Mekene 2

Fene Gaa Pë Akötr

1, 2. Nemene la itre mekune ka isa pengöne kö, hna hamëne hnene la itre atr ka ala nyim?

NGO eje hi, ame ngöne la fene hnengödrai asë, isa pengöne kö la aqane wai ewekë ne la itre atr, itre milio la etrun. Angatre a nyiqaane goeëne la ketre manathithi hna troa kapa hnene la itre atr, ngöne la itre drai ka troa xulu. Angatre a qaja ka hape, easenyi pala ha matre paatre palua pi hë la iangazo, me iakötrë qa ngöne la fen. Xecie hnyawa e kuhu hni angatre ka hape, calemi hë la ijine troa xome trije la itre ewekë ka ngazo, matre cile jë pe la fene hnengödrai ka hnyipixe. Angatre mina fe a qaja ka hape, kolo ha nyiqaane ami trepene enehila la fene ka hnyipixe cili!

² Kola lapaune hnene la itre atr cili laka, ngöne la fene ka hnyipixe, tro ha pë isi, me iaxösisi, me ihumuth, tro ha hetrenyi la meköt, nge pë hmaca kö troa hetre puafala. Tro fe a ketre fene ga pë kucakuca, me hleuhleu, pë hmaca kö troa treije hnei akötr, nge pë hmaca kö mec. Ame ngöne la ijine cili, tro hë la itre atr a traqa trootro kowe la pexej, me mele epine palua me madrine ngöne la paradraiso e celë fen. Nge drei la ketre ewekë ka sisitria, laka, troa mele hmaca lo itre ka meci hë, nge ijiji angatre fe troa hane mele epine palua!

3, 4. Pine nemene matre, xecie e kuhu hni ne la itre xane la aqane wai ewekë i angatr?

³ Hapeue lo mekune göi itre drai ka troa xulu, tune kaa, troa aceitunëne eje me pu ne jidr, pine laka, pëkö trepene ka catr? Ohea. Hna hneëtrepene eje hune la lapaune ka catr, ene laka troa eatre la paradraiso hna thingehnaean. (Heberu 11:1) Pine nemene matre, xecie hnyawa la mejiune cili e kuhu itre hni angatr? Pine laka, ewekë lai hna thingehnaeane hnene la Atre Xupe la hnengödrai memine la fen, Nyidrë la ka pucatine asë.

⁴ Hnei Tusi Hmitrötre hna qaja ngöne lo itre hnei Akötresie hna thingehnaeane ka hape: “Tha tia kö la kete ewekë ne la nöjei ewekë ka loi asë hnei Iehova Akötresi nyipunie hna ulatine koi nyipunie; eate asë hë koi nyipunie, ngo tha tia kö la ketre ewekë ka cas.” “Tha ate Akötesie, mate thoi Nyidë . . . Hape u, asehë nyidëti ulatin, ngo tha tro kö a kuca? Nge ase hë nyidëti könietin, ngo tha tro kö nyidëti a aeaten?” “Hnei Iehova ne sabaothi hna sisinyi, me hape, Nyipici troa tune lo hnenge hna mekun, nge tune la hnenge hna hne i hnin, tro ej’a cile hut.”​—Iosua 23:14; Numera 23:19; Isaia 14:24.

5. Nemene la itre hnyinge nyine troa sa?

⁵ Ngo maine eje kö la trepene mekune i Akötresie, ene laka, troa acile la ketre paradraiso e celë fene ga pëkö akötr, haawe, ue kö la Nyidrëti a nue la itre ewekë ka ngazo troa cia hlöeë? Pine nemene la Nyidrëti a treqene la sikisi thauzane lao macatre uti hë enehila, troa apaatrene trootro la ngazo? Tune kaa la itre macatre ne akötr, laka traqa koi itre hadredr, hapeu, nyine amamane hi lai ka hape, pëkö Akötresie, maine pena thaa Nyidrëti kö a nyipi ewekë së?