Mekene 5
Ketre Ahnahna Ka Mingöminge La Troa Ketre Ië Hna Ajan
1, 2. Nemene la ketre ahnahna ka mingöming ka eje thene la atr ngöne la kola xupi angeic?
MAINE easë a ajane troa trotrohnine la kepine matre Akötresieti a nue la akötr, memine lo aqane tro nyidrëti a apaatrene la ewekë cili, nyipi ewekë catre tro së a atrepengöne la aqane xupi së hnei Nyidrë. Thaa hnei Nyidrëti hmekuje kö hna xupi së a ngönetrei hi me atuat. Ngo hnei Nyidrëti mina fe hna hamëne koi së la atreine waimekune me itre thiina ka eje e kuhu hni së.
2 Ame la troa atreine isa ië hna ajan, ke, celë hi trepene la itre aliene mekune me aliene hni së. Nyipici hnei Akötresie hna traane e kuhu hni së la mekune troa isa ië hna ajan. Drei la ketre ahnahna ka mingöminge qaathei Nyidrë.
Tune Kaa La Aqane Xupi Së
3-5. Pine nemene matre, easë a madrine la inuegufa qaathei Akötresie?
3 Tro së a pane ce wange la enyipi ewekëne la troa isa ië hna ajan, ngöne la mekune i Akötresie göi troa nue la iakötrë. Ngo qëmekene tro së a ce ithahnatane lai, loi e troa pane mekune la itre hnyinge celë, hna hape: Hapeu, ajane kö epuni troa ketre sipu iëne la nyine tro epuni a kuca me qaja, me nyine tro epuni a xeni me xetrën, me pengöne huliwa nyine tro epuni a kuca, me götrane hna troa mele ngön, me aqane tro epuni a mel? Maine epuni a ajane tro pena ha la ketre atr, a hamëne la itre trenge ithahnata nyine tro epuni a qaja me itre ewekë nyine tro epuni a kuca ngöne la nöjei drai ne mele epun?
4 Pëkö atr a thele troa musinëne la mele i angeice ka pexeje hnei ketre. Pine nemene lai? Pine la aqane xupi së hnei Akötresie. Öni Tusi Hmitrötre ka hape, hnei Akötresie hna xupe la trahmanyi ‘hnaiji Nyidrë me tui Nyidrë,’ nge atre hnyawa hi së laka, ketre ewekë lai ka eje thei Akötresie, ene la troa isa ië hna ajan. (Genese 1:26; Deuteronomi 7:6) Celë hi matre, ngöne la Nyidrëti a xupe la itre atr, hnei Nyidrëti fe hna hane hamëne koi angatre la ahnahna ka sisitria cili—ene la troa isa ië hna ajan. Drei hi la ketre kepine matre, easë a hace ngöne la kola xomaconyi së hnene la itretre musi menu.
5 Celë hi matre thaa ka pëkö trepene la troa isa ië hna ajan, pine laka ketre Akötresie ka inuamacanyi Nyidrë. Öni Tusi Hmitrötre ka hape: “Nge ame la hnei Ua i Joxu hna hne ngön, te, troa shenge la ate cili.” (2 Korinito 3:17) Haawe, hna xupi së hnei Akötresie, nge hna amë the së la mekune troa isa ië hna ajane ngöne la mele së. Atre hi Nyidrë la aqane trongene elanyi la mekune së me itre aliene hni së; nge atre hnyawa fe kö Nyidrëti laka, troa atraqatre la madrine së e hna nue së troa isa ië hna ajan.
6. Hnei Akötresieti hna xupe tune kaa la atuate së matre atreine tro eje a ce huliwa memine la inuegufa?
6 Hnei Akötresieti fe hna hamëne la atreine troa mekun, me troa waipengöne hnyawa la itre ewekë, me troa axeciëne la itre mekun, me atreine troa wangatrehmekune la loi qa ngöne la ngazo; itre ewekë lai nyine sine trongene la inuegufa. (Heberu 5:14) Ngo loi e hna nyitrepene la atreine ië ewekë hnene la inamacan. Thaa hna xupi së kö tune la itre robo, laka, pëkö inamacan, nge pëkö hni ne ajane thene la itre fao troa kuca la itre ewekë. Ketre, thaa hna xupi së kö tune la itre öni laka, angatre pë hë a mele thenge la ewekë hna amekötine hë koi angatr. Ketre pengöne kö së, pine laka, hna kuca la inenatre së, matre tro eje a huliwa thenge la ewekë ka eje the së, ene la troa isa ië hna ajan.
Sisitria Ngöne La Qaan
7, 8. Nemene la ewekë ka sisitria hna hamëne hnei Akötresie ngöne la qaan, kowe la lue pane keme me thine së?
7 Ketre, hnei Nyidrëti fe hna hamëne la nöjei hna ajane asë ka ijije thatraqane la atr; celë fe lai hatrene laka, Nyidrëti a thele loi kowe la pane keme me thine së, ene Adamu me Eva. Ketre tune mina fe, hna ami nyidroti ngöne la paradraiso, ketre götrane ka ceitune memine la ketre park ka tru. Ka tiqa nyidro hnei ewekë ngöne la götrane la ngönetrei. Ka pexeje la ngönetrei me mekune i nyidro, celë hi matre, thaa ka tro kö nyidro a qatr me wezipo, maine meci pena—ijije hi ekö tro nyidro a hetrenyi la mele ka thaa ase palua kö. Maine ju, tro fe nyidroti a hnahone la itre nekönatre ka pexej, ka troa hetre mejiune kowe la itre drai elany, laka, troa mele epine palua ngöne la madrin. Maine ju fe, tro ha kökötre trootro la elapane la itre atr, nge lolo la huliwa nyine tro angatre a kuca, ene la troa nyihnyawane la fene hnengödrai matre paradraiso pi.—Genese 1:26-30; 2:15.
8 Kola qaja hnei Tusi Hmitrötre la itre ewekë hna hamëne me hape: “Nge xajawatinë hë Akötesie la nöjei ewekë asëjëihë lo hnei Nyidëti hna kuca, nge hana wange nyipi loi.” (Genese 1:31) Nge kola qeje Akötresieti fe ka hape: “pexeje la huliwa.” (Deuteronomi 32:4) Nyipici, hnene la Atre ixupi hna hamëne la mele ka pexeje ngöne la qaan. Ka tro eje ekö a sisitria catre kowe la atr. Drei la ihnimi Akötresieti koi nyidro!
Hna Nyi ifegone La Isa Aqane Tro Së a Ië Hna Ajan
9, 10. Pine nemene matre, nyipi ewekë troa nyi ifegone hnyawa la inuegufa?
9 Ngo hapeu, ka pë ifegone la aqane nue Akötresie la itre atr, troa isa trongë hna ajan? Pane mekune ju së la mele ka eje ngöne la ketre traone ga tru atr, kola nyinyape catre la itre loto, kola isa kuci hna ajane hnei itre ka xom, ke, pëkö trenge wathebo thatraqai itre gojeny. Hapeu, ajane kö epuni troa hane xomi loto ngöne la traone cili? Ohea, thatreine kö troa nyinyape hnyawa, pine laka pëkö trenge wathebo ka köja gojenyi së, ketre kola nyinyape menu la itre loto matre tru catre la ka eatr.
10 Troa aceitunëne lai memine la ahnahna hna hamëne koi së hnei Akötresie, ene la inuegufa. E thaa hna nyi ifegone kö la inuegufa, eje hi laka, thaa tro kö a mele ka loi la atr. Nyipi ewekë troa hetrenyi la itre trenge wathebo, matre troa amekötine la itre huliwa ne la atr. Önine la Wesi Ula i Akötresie ka hape: “Tune la nöjei ate gufa kö [“hna nuegufan,” MN], ngo kolo kö a celohmëne la gufa [“inuegufa,” MN] i nyipunie nyine he la iangazo.” (1 Peteru 2:16) Akötresieti a ajane tro së a nyi ifegone la inuegufa, matre nyine loi kowe la nojei atr asë. Thaa ka pexeje kö la aqane nuegufa së hnei Nyidrë, ngo hna nyi ifegone pe hnene la musi ne la wathebo.
Nemene La Itre Wathebo?
11. Hna xupi së troa nyihlue i drei?
11 Hna xupi së matre troa drengethenge la musi drei? Kola mama fe la ketre hnaewekë ngöne la ketre götrane la 1 Peteru 2:16, hna hape: “Ite hlue i Akötesie.” Thaa kolo kö lai a qaja la ketre hlue hna akötrën, ngo, kolo pe a amamane hnyawa laka, hna xupi së matre tro së a madrine e hne së hna trongëne la trenge wathebo i Akötresie. (Mataio 22:35-40) Sisitria catre kö la aqane eatrongë së hnene la itre trenge wathebo i Akötresie, hune lo itre wathebo hna acile hnene la itre atr. “Ini Iehova Akötesi’ö, ate ini’ö troa hete thangan, ate e eö ngöne la gojenyi tro eö a trongën.”—Isaia 48:17.
12. Nemene la aqane nue së troa isa ië hna ajan, thenge la itre hna amekötine hnei Akötresie?
12 Ngöne la ketre götran, trenge wathebo i Akötresieti a nue së troa isa ië hna ajan, thenge la itre hna amekötine hnei Nyidrë. Celë hi matre, mingöminge troa goeëne la atr, pine laka, nyimu isa aqane axecië mekun. Pane ange mekune hnyawa ju la aqane emanane la nöjei pengöne xen, me nöjei aqane heetre, me nöjei pengön miuzik, me nöjei pengöne ewekë ka mingöminge hna kuca hnene la atr, me nöjei pengöne uma ngöne la fene hnengödrai asë. Eje hi laka, ajane kö së troa isa ië hna ajane ngöne la itre götrane celë, hune la troa nue itre xane troa musinë së.
13. Nemene la itre wathebo thatraqane la emelene la ngönetrei nyine troa nyipi ewekëne catrën, matre nyine loi koi së?
13 Qa ngöne lai, hna xupi së matre troa manathith, ngo tro së a hetrenyi la madrine celë, e hne së hna drengethenge la itre trenge wathebo hna hamëne hnei Akötresie nyine eatrongëne la mele ne la atr. Ceitune hi lai memine la troa drengethenge la itre wathebo hna acile hnei Akötresie, thatraqane la mele ne ngönetrei ne la atr. Hanawange la ketre ceitun, maine tro së a xele ma drenge la itre wathebo hnei Akötresieti hna acile thatraqane la ihnadro, nge easë a jöeë pi qa hune la ketre götrane ga draië catr, eje hi laka, tro sa eatr, maine meci pena. Ketre, maine tro fe së a thipetrije me thaa drenge la itre hna amekötine hnei Akötresie thatraqane la ngönetrei së, ene la troa xele ma xen, me ij, me mano qa ngöne lue hnafij, eje hi laka, tro hë së lai a mec.
14. Hne së hna atre tune kaa ka hape, thaa hna xupe kö la itre atr troa thipetrije la musi Akötresie?
14 Haawe, maine nyipici ka hape hna xupi së cememine la ajane troa drengethenge la itre wathebo hna acile hnei Akötresie thatraqane la ngönetrei, nge ka musinëne la mele ne la atr, ke, hna hane xupi së mina fe troa mele thenge la itre wathebo i Akötresie, göi thiina ka loi, me aqane troa ce mel. (Mataio 4:4) Troa mele ka loi la itre atr, e hnei angatre hna drengethenge la musi ne la Atre xupi angatr. Öni Ieremia perofeta ka hape: “Tha qa i ate troa amekötine la ite hna feke ca hnei angeic. Iehova fe, haji ni jë.” (Ieremia 10:23, 24) Qa ngöne lai, hna xupe la atr troa mele e fene la musi Akötresie, tro angeice a drengethenge Nyidrë ngöne la nöjei pengöne götrane la mele i angeic, ngo thaa tro kö a ketre sipu mus.
15. Tune kaa la itre wathebo i Akötresie, ketre ehnefe itre eje koi Adamu me Eva?
15 Pëkö ehacene ekö kowe la lue pane trefëne troa drengethenge Akötresie. Ngo tro pe nyidroti a hetrenyi la manathithi qa ngön, ketre tune mina fe la itre fami ngöne la fene hnengödrai asë. Maine hnene ju pe la lue pane trefëne hna hane mele thenge la itre hna amekötin e hnine la itre wathebo i Akötresie, haawe tro fe hë së a hane hetrenyi la manathithi ka tru. Maine ju ke, ma drei la easë a mele enehila ngöne la ketre paradraiso ka mingöminge me lolo, nge tro së a tune la ketre fami hna acaasine hnene la ihnim. Nge maine ju fe, thaa tro kö a traqa koi së la itre iakötrë, me itre hace, memine la mec.
[Iatr ne la götran 11]
Hnei Akötresie hna hamë qaane ka loi kowe la itre atr
[Iatr ne la götran 12]
Hapeu, hetre ajane i epuni kö troa xomi loto ngöne la itre gojenyi hna nyinyapëne lapaan, a ka pë kö caa pano nyine köja gojenyine la nöjei atr?