MEKENE 34
Tro Sa Amamane Tune Kaa La Ihnimi Së Koi Iehova?
Hapeu, öhne kö epuni la ixatua i Iehova la epuni a inine la Tusi Hmitrötr? Aja i epuni kö troa acatrene la imelekeu i epun me Nyidrë? Tro kö epuni a öhne laka, e troa kökötre trootro la ihnimi epuni koi Iehova, tro hë Nyidrëti lai a hnimi epun, me thupë epun. Tro epuni a amamane tune kaa la ihnimi epun koi Nyidrë?
1. Tro sa amamane tune kaa la ihnimi së koi Iehova?
Easa amamane la ihnimi së koi Iehova, la easa drengethenge Nyidrë. (E jë la 1 Ioane 5:3.) Tha Nyidrëti kö a musinë së troa drengethenge Nyidrë. Hnei Nyidrëti hna nue së troa isa iën. Ame la aqane troa amadrinë Iehova, ke tro sa “drengethenge qa kuhu hni.” (Roma 6:17) Tha Iehova kö a musinë epun, ke ame la aja i Nyidrë, tro epuni a drengethenge Nyidrë, ke epuni a hnimi Nyidrë. Ame ngöne la götrane 3 me 4 ne la itusi celë ke, kola troa xatua epun troa amamane la ihnimi epun koi Iehova, jëne la itre huliwa ka amadrinë Nyidrë.
2. Hnauëne laka, tha ka hmaloi kö troa hnimi Iehova?
“Nyimu aköte ne la ate ka meköt.” (Salamo 34:19) Easë asë hi a isi memine la ngazo e kuhu hni së. Easë fe a ixelë memine la itre jol göi mani, me itre iakötrë, me itre xaa jole ju kö. Matre tha ka hmaloi kö tro sa drengethenge Iehova la kola traqa la itre jol. Ngo e tro epuni a drengethenge Iehova, epuni hi lai a amamane ka hape, ka tru Nyidrë koi epun. Ketre, epuni fe hi lai a amamane ka hape, epuni a nyipici koi Nyidrë. Ame e cili, tro fe Iehova a nyipici koi epun, nge tha tro jë kö Nyidrëti a nuetriji epun.—E jë la Salamo 4:3.
TROA CE ITHANATAN
Tro sa ce wang la enyipiewekën troa drengethenge Iehova, memine la aqane tro sa mele nyipici koi Nyidrë.
3. Ketre mekun ka ketri epuni fe
Ame ngöne la tusi Iobu, easa öhne la aqane nyizö Iobu hnei Satana, memine la itre atr ka ajane troa nyihlue i Iehova. E jë la Iobu 1:1, 6–2:10, nge ce ithanatane jë cahu itre hnying:
Ame koi Satana, hnauëne laka, Iobu a drengethenge Iehova?—Goeëne ju la Iobu 1:9-11.
Tune kaa la aqane nyizö epun memine la itre xaa atr hnei Satana?—Goeëne ju la Iobu 2:4.
E jë la Iobu 27:5b, nge ce ithanatane jë cahu hnying:
Tune kaa la aqane amamane Iobu ka hape, ka tru la ihnimi angeic koi Iehova?
Hnei Iobu hna amamane la ihnimi angeic koi Iehova ngöne la angeic a mele nyipici koi Nyidrë
Easa hnimi Iehova la easa mele nyipici koi Nyidrë
4. Amadrinëne jë la hni Iehova
E jë la Ite Edomë 27:11, nge ce ithanatane jë cahu itre hnying:
Tune kaa la pengöi Iehova, e tro epuni a drengethenge me trongëne la itre wathebo i Nyidrë? Pine nemen?
5. Ijije hi tro epuni a mele nyipici koi Iehova
Ihnimi së koi Iehova la ka upi së troa qeje Nyidrë koi itre xan. Maine ka mele nyipici së koi Iehova, tha jole kö tro sa qeje Nyidrë koi itre xan. Goeëne jë la VIDEO, nge ce ithanatane jë cahu itre hnying:
Ka jole kö koi epun troa qeje Iehova koi itre xan?
Nemene la ka xatua Grayson troa triji xou?
Maine ka mele nyipici së koi Iehova, tro sa hnim la itre ewekë hnei Nyidrëti hna hnim, me sisine la itre ewekë hnei Nyidrëti hna sisin. E jë la Salamo 97:10, nge ce ithanatane jë cahu itre hnying:
Nemene la itre ewekë hnei Iehova hna hnim? Nge nemene la itre ewekë hnei Nyidrëti hna sisin?
Tune kaa la aqane tro epuni a ajane la loi me sisine la ngazo?
6. Emele së la troa drengethenge Iehova
Ame la troa drengethenge Iehova ke, ewekë lai ka lolo catre nyine tro sa kuca. E jë la Isaia 48:17, 18, nge ce ithanatane jë cahu itre hnying:
Ame koi epun, atre kö Iehova la ka loi koi së? Pine nemen?
Qane lo epuni a inine la Tusi Hmitrötr me inine troa atre Iehova, hetre eloine kö hnei epuni hna kapa??
HNE SË HNA MAJEMINE DRENG: “Tha Akötresieti fe kö a wangatrune la itre huliwang.”
Nemene la xötr nyine tro epuni a amamane ka hape, ame la itre ewekë hne së hna kuca ke, ka amadrinë Iehova maine ka akötrë Nyidrëti pena?
HANE HI LA HNE SË HNA CE WANG
Ijije hi tro epuni a amamane la ihnimi epun koi Iehova, la epuni a drengethenge Nyidrë, me mele nyipici, ngacama tru ju hë la itre jol.
Nyine Amekunën
Nemene la ini hnei epuni hna xome qa ngöne la tulu i Iobu?
Tune kaa la aqane tro epuni amamane la ihnimi epun koi Iehova?
Nemene la ka troa xatua epun troa mele nyipici koi Iehova?
ITRE XAA NYINE WANG
Tro epuni a mele nyipici tune kaa koi Iehova me kowe la ekalesia?
“Tro Nyipëti a Nyipici Kowe La Itre Ka Mele Nyipici” (16:49)
Tune kaa la aqane nyizöne Satana la itre atr?
“L’intégrité de Job” (La Bible : quel est son message ?, partie 6)
Tro la itre nekönatr a amamane tune kaa la ihnimi angatr koi Iehova?
Tro la itre jeunes a mele nyipici tune kaa koi Iehova ngacama tru ju hë la iajojezi?