Atre Fe Hi Nyipunie?

Pine nemene matre angetre Isaraela a nyithupene la hotr?

AME ekö, ketre trahmanyi a tro fë la hotr matre troa kuië june hmala kowe la fami ne la föe. Ame la hotr, tre, kola qaja la itre ewekë, itre öni maine manie. Ijije fe troa nyithupene la hotr ngöne la kola huliwa, tune la hna kuca hnei Iakobo. Hnei angeic hna huliwa koi sevene lao macatre matre troa faipoipo me Rakela. (Gen. 29:17, 18, 20) Pine nemene matre kola nyithupene la hotr?

Öni Carol Meyers, ketre ka inamacan: “Ame la hotr hna nyithupen ke, kola nyihnane la huliwa hna kuca hnene la jajiny e kuhu hnalapa.” Ketre, kola acatrene la aqane imelekeu ne la lue lapa. Ijije hi tro la lue lapa cili a itö ixatua ngöne la itre ijine jol. Ame la kola kuië june hmala ke, kola amamane laka, tha qa i keme hmaca kö troa thupëne la jajiny, ngo trahmanyi pë hë.

Ame la hotr ke, tha kolo kö a aceitunëne la jajiny memine la ketre ewekë nyine troa itön maine salemën. Kola qaja ngöne la ketre itus (Les institutions de l’Ancien Testament) ka hape: “Ame ekö e Isaraela, ijije hi tro sa mekun laka, ame la easa nyithupene la hotr ke, easa itöne la föe. Ngo kolo pe a olene la huliwa hna kuca hnene la jajiny ngöne la hnalapa.”

Ame enehila, kolo palahi a nyithupene la hotr ngöne la itre xaa nöj. Eje hi, “loi e mama cile kowe la nöjei atr ka hape, itre ka atreine tulu ewekë” la kem me thin Keresiano. Tha tro kö nyidro a sasaithi tulu palaha göne la etrune la hotr. Loi e tro pe nyidroti a atreine waiewekë hnyawa. (Fil. 4:5; 1 Kor. 10:32, 33) E cili, tro hë nyidroti a amamane laka, tha nyidroti kö a “hni koi mani.” (2 Tim. 3:2) Ketre, tha tro kö la trahmany a uthe la ijine faipoipo me aluzi traem matre troa huliwa me nyithupene la hotr. Nge tha tro kö angeic a nue la huliwa ne pionie matre troa huliwa i maseta ngöne la drai ka pexej.

Ame ngöne la itre xaa nöj, hna athipe hnei mus la etrune la hotr. Loi e tro la itre kem me thin Keresiano a trongëne lai. Pine nemen? Pine laka, Tusi Hmitrötr a amekötin kowe la itre Keresiano troa “drengethenge la itre mus” me trongëne la itre wathebo ka ihmeku memine la aja i Iehova.—Rom. 13:1; Itre hu. 5:29.