3 | Tulu Ne La Itre Hlue i Iehova Ekö

TUSI HMITRÖTR A QAJA LA . . . Itre trahmany me föe ka mele nyipici “ka tu së hi, nge casi hi la itre aliene hni së me” angatr.—IAKOBO 5:17.

Alien

Hna qatreng e hnine la Tusi Hmitrötr la itre hna melën hnene la itre trahmany me föe ka hane amamane la aliene hni angatr. Ame la easa e la itre hnei angatr hna melën, tro hë sa öhne laka, ceitu hi la hne së hna melën me itre xan e angatr.

Aqane Troa Xatua Së

Aja i easë asë hi tro itre xan a trotrohni easë. Ngo ka nyipiewekë catre lai kowe la itre hna tith hnene la ketre mec ka ajolëne la mekuna i angatr. Ame la easa e la Tusi Hmitrötr, ke easa öhne laka, ceitune hi la itre mekune me itre aliene hni së memine la itre xaa atr hna qaja e hnine ej. Easa trotrohnin e cili ka hape, hetre itre xane fe ka hane akötre tu së.

Hna amë e hnine la Tusi Hmitrötr la itre trengewekë ne la itre atr ka akötr. Hane fe kö epuni qaja ka hape, ‘Thatreine hë ni’? Celë fe hi hna qaja hnei Mose, me Elia Me Dravita.—Numera 11:14; 1 Ite Joxu 19:4; Salamo 55:4.
Tusi Hmitrötr a qaja la ketre föe, Hana la ëje i eahlo. ‘Atraqatre la akötre’ i eahlo, ke tha ka hnaho kö eahlo, nge kola hnyimasai eahlo hnene la ithupëjia me eahlo.—1 Samuela 1:6, 10.
Tusi Hmitrötre fe a qeje Iobu, ketre trahmany ka tu së hi. Ngacama ka lapaune nyidrë koi Iehova, ngo tru catr la akötre i nyidrë matre öni nyidrë: “Sisi ni la meleng ; xele hë ni ma mel.”—Iobu 7:16, MN.

Ame la easa öhne e hnine la Tusi Hmitrötr la aqane cile catr la itre atre cili qëmekene la itre mekuna i angatr ka ngazo, ke kola thue trengecatr së troa cile kowe la itre jole së.

Ixatua Ne La Tusi Hmitrötr Kevin

Aqane Melëne Ni La Ketre Mec Hna Hape, Trouble Bipolaire

“Hna öhne la ketre mec theng hna hape, trouble bipolaire lo eni a 50 lao macatre. Ame itre xaa ijin, kösë atreine hi ni nyinyine la itre jole ka traqa koi ni. Ngo hetre ijine kö laka, ame koi ni tha nyipiewekë hë koi ni troa mel.”

Aqane Xatua Ni Hnei Tusi Hmitrötr

“Kösë ceitune hi la hnenge hna melën me Peteru aposetolo. Hnene la itre tria i angeic matre ame koi angeic tha nyipiewekë hë angeic koi itre xan. Ngo, tha hnene kö la mekune cili hna sewe angeic troa ce tro memine la itre sinee ka hnimi angeic. Ame la kola traqa koi ni la mecing, ke kola akötrë ni hnene la itre triang nge kösë tha nyipiewekë hë ni koi itre xan. Tui Peteru, eni a isine troa ce tro memine la itre sineeng ka xatua ni troa cile catr.

“Kola akeukawanyi ni hnene la hna melën hnei Dravita Joxu. Hnei nyidrëti fe hna hane kucakuca me hace fë la itre tria i nyidrëti ekö. Ceitunge hi me nyidrë. Eni fe a hace fë la itre hnenge hna kuca maine qaja e itre xaa ijin. Kola akeukawanyi ni hnene la hna qaja hnei Dravita ngöne Salamo 51. Ame ngöne la xötr 3, öni nyidrë: ‘Ate hë ni la ite hnenge hna shashaith, nge eje pala hi qëmekenge la ngazong.’ Eje hnyawa hi la hnenge hna melën ngöne la kola traqa koi ni la mec. Ame ngöne la itre ijine cili, eni a mekun ka hape, pëkö ca eloing. Ngo Dravita fe a qaja ngöne la xötr 10 ka hape: ‘Akötesieti fe, xupejë koi ni la hni ka wië ; nge kuca hmaca jë la u ka cile huti e kuhu hning.’ Eni a hane hë tune koi Akötresie matre xatua ni troa saze la aqane waiewekëng. Ketre, kola aupunyi ni hnene la xötr 17. Kola hape: ‘Akötesieti fe, tha tro kö [nyipëti] a sixane la hni hna thë fë me hna hutra hnyija.’ Celë hi xötr ka amamane koi ni ka hape, tru la ihnimi Akötresieti koi ni.

“Ame la eni a lapa mekun la tulu ne la itre hlue i Akötresieti ekö me itre ewekë hnei Nyidrëti hna kuca koi ni enehila, ke kola acatrene la lapauneng kowe la mele elany. Celë hi ka acatrene la lapauneng kowe la itre hna thingehnaean, nge ka xatua ni troa cile catr.”