Catre Jë Madrin La Epuni a Utipië Trootro

1-2. Tune kaa la aqane goeëne Iehova la itre trejin ka qatre hë? (Salamo 92:12-14; wange ju icetrön.)

AME ngöne la itre xaa nöj, itre atr a madrin la angatr a nyiqane qia, ke kola amamane ka hape, macaje hë angatr, nge atreine hë angatr waiewekë. Nge ame pena ngöne la itre xaa nöj, itre atr a thel troa juetrëne la itre pene qia, matre tha tro kö a mama ka hape, qatre hë angatr. Eje hi laka, kuca ju hë së la nöjei pengöne ewekë, ngo tro pala hi së lai a qatr.

² Tune kaa la aqane goeëne Iehova la itre trejin ka qatre hë? (It. Ed. 16:31) Nyidrëti a aceitunë angatr me itre sinöe ka tru. (E jë la Salamo 92:12-14.) Pine nemen? Pine laka, ame la itre sinöe ka cia hlöeë me pupui lolo, ke itre ka hekö catr. Ame la ketre, ke kolo cerisier du Japon. Ame la itre xan, ka 1 000 lao macatre. Tune la itre sinöe cili, ka mingöming la itre hlue i Iehova ka qatre hë. Tha Iehova kö a goeëne la iqia i angatr, ngo aliene hni angatr. Celë hi matre, ka mingöming angatr koi Nyidrë. Nge Nyidrëti a wangatrune la itre thiina i angatr, ke hnei angatr hna catr me mele nyipici qane ekö.

3. Qaja jë la ketre ceitune ka amamane ka hape, Iehova a huliwane la itre hlue i Nyidrë ka qatre hë, matre kuca la aja i Nyidrë.

³ Iehova pala hi a wangatrune la hlue i Nyidrë, ngacama angeic a utipië trootro.a Hnei Nyidrëti hna huliwane la itre hlue i Nyidrë ka qatre hë, matre kuca la aja i Nyidrë. Ame lo Iehova a qaja koi Sara ka hape, tro eahlo a thinene la nöj ka catr, me xötrapane la Mesia, ke qatre föe menu hë eahlo. (Gen. 17:15-19) Ketre qatre hë Mose, lo Iehova a upi nyidrë troa troxome la nöje i Isaraela qa Aigupito. (Eso. 7:6, 7) Nge qatre catre hë Ioane, lo Iehova a upi nyidrë troa cinyanyine la faif lao tus ne la Tusi Hmitrötr.

4. Thenge la Itre Edromë 15:15, nemene la ka troa xatuane la itre qatr troa cile kowe la itre jol? (Wange ju fe la foto.)

⁴ Ame la itre jol, ke sinetrongene kö la iqia. Kola ihnyima hnene la ketre trejin föe ka hape, “Ame la iqia, ke tha göne kö lo itre ka meij.” Matre nemene la ka troa xatuane la itre qatre troa cile kowe la itre jole i angatr? Loi e tro angatr a hetre madrin.b (E jë la Itre Edromë 15:15.) Ame ngöne la tane mekune celë, tro sa ce wang la nyine tro angatr a kuca, matre madrin. Nge tro fe sa ce wang la aqane tro la itre atrene la ekalesia a xatua angatr. Ngo tro sa pane ce wang la kepin, matre jole troa madrine la kola qatr.

ITRE EJOLEN LA KOLA QATR

5. Nemene la ka ajolëne la itre trejin ka qatr?

⁵ Maine eö a utipië trootro, nemene la ka ajolë eö? Maine jë eö a hace, ke thatreine hë eö kuca lo itre ewekë hnei eö hna kuca ekö. Maine eö pena a mekun lo itre drai ekö, lo eö a egöcatr. (A. Cai. 7:10) Öni Ruby ketre trejine föe: “Jole hë koi ni troa heetr, ke tha eni hmaca kö a enij tune ekö, nge eni a thë fë la akötreng. Göi jole fe koi ni troa lii soset. Nge kolo fe a akötr la lue iwanakoimeng troa enijën.” Nge öni Harold, ka huliwa ekö ngöne la Bethela: “Eni a hleuhleu ke, tha tunge hmaca kö ekö. Ame ekö, eni a kuci spor, nge ka pi elo baseball catre ni. Itre xan pala hi a qaja ka hape, ‘Hna pi lai balo koi Harold, ke ka maca hnyawa la iwanakoime i xabo!’ Ngo ame enehila, goi thatreine fe hë ni hna la balo.”

6. (a) Nemene fe la itre xaa kepin, matre kola dekurag la itre qatr? (b) Nemene la ka troa xatuane la itre qatr troa wange ka hape, tha ijiji angatr hë troa xomi loto? (Wange ju la ketre tane mekun hna hape “Ijijing Pala Kö Troa Xomi Loto?”)

⁶ Ma epun fe a dekurag ke, tha ijiji epuni hmaca kö troa kuca casine la hnei epuni hna ajan. Maine jë, hetre ka ce lapa pala hi me epun, maine epuni pena a lapa thene la ketre nekö i epun. Maine pena, tha öhne hnyawa ha epun koilo, maine kucakuca catr epun, matre tha ijiji epuni hë troa tro cas kowe la ketre götran, maine xomi loto. Celë hi matre, ame itre xaa ijin, epuni a dekurag. Ngo the thëthëhmine kö laka, Iehova pala hi me itre xan a hnimi epun. Trotrohnine hi Iehova la hnei epun hna melën. Öhne hi Nyidrë la ihnimi epun koi Nyidrë, me kowe la itre trejin. Eje hi lai hnei Nyidrëti hna goeën.—1 Sam. 16:7.

7. Nemene la ka troa xatua la ketre qatr ka dekurag?

⁷ Maine jë, epuni a hleuhleu, ke ame koi epun, tha tro kö epuni a öhne la drai i Iehova. Nemene la ka troa xatua epun? The thëthëhmine kö laka, aja i Iehova troa apatrene la fene celë, ngo hetre kepin matre Nyidrëti a itreqe. (Isa. 30:18) Eje hi, Nyidrëti a ajan tro la itre milio lao atr a hane atre Nyidrë me nyihlue i Nyidrë. (2 Pet. 3:9) Matre, ame la epuni a kucakuca, mekune jë la etrune la itre atr ka thatre Nyidrëti pala kö. Maine jë, ame la itre xan, ke fami epun.

8. Nemene la hna kuca hnene la itre qatr, la angatr a wezipo me akötr?

⁸ Qatre ju hë së maine jeune, ngo ame la easa akötr maine wezipo, easë a qaja maine kuca la itre ewekë ka akötrë itre xan. (A. Cai. 7:7; Iako. 3:2) Ka tui Iobu, ketre hlue i Iehova ka mele nyipici. Hnei angeic hna “ewekë menu,” ke tru la akötre i angeic. (Iobu 6:1-3) Nge pine laka, itre qatr a wezipo maine xomi wenekas, matre angatr a qaja me kuca la itre ewekë ka asesëkötrë së. Eje hi laka, qatre ju hë së maine ka wezipo, ngo tha tro kö sa ngazo thiina maine imusinë. Maine hne së hna qaja la ketre ewekë ka akötrë ketre, the cile kö troa qeje menu.—Mat. 5:23, 24.

AQANE TRO LA ITRE QATR A MADRIN

9. Pine nemen matre loi e tro la itre qatr a kapa la ixatua i itre xan? (Goeëne ju fe la itre foto.)

⁹ Kapa ju la ixatua i itre xan. (Gal. 6:2) Tha ka hmaloi kö lo xötrei. Öni Gretl ketre trejin föe: “Jole catr koi ni troa kapa la ixatua qaathei itre xan, ke xele ni troa ahacenyi angatr. E thupen, hnenge hna saze la aqane waiewekëng me ipië, nge hnenge hna öhne laka, ka nyipiewekë la ixatua i itre xan.” Ame la epuni a kapa la ixatua i itre xan, epuni a aijijë angatr troa öhne la madrine troa ham. (It. Hu. 20:35) Nge tro fe epuni a öhne la aqane hnimi epun me sikusiku epun hnei angatr.

10. Pine nemene matre nyipiewekë troa hetre hni ne ole? (Wange ju fe la foto.)

¹⁰ Troa hetre hni ne ole. (Kol. 3:15; 1 Thes. 5:18) Ame la ketre atr a xatua së, ke hetre hni ne ole së. Ngo ame itre xaa ijin, thëthëhmine pë hë së troa qaja. Ame la epuni a hnyimahnyima me olen, epuni hi lai a amamane kowe la itre sinee i epun ka hape, epuni a madrin kowe la ixatua i angatr. Öni Leah, ketre trejin ka thupën la itre qatr ngöne la Bethela ka hape: “Hnene la ketre trejin ka qatre föe hna lapa cinyanyi kart koi ni, matre olene la huliwang. Tha ka qea kö, ngo ka mingöminge catr! Madrine catre ni, ke eahlo a wangatrun la hnenge hna kuca koi eahlo.”

11. Tune kaa la aqane tro la itre qatr a xatua itre xan? (Goeëne ju fe la itre foto.)

¹¹ Catre jë xatua itre xan. Maine tro epuni a nue traem me trengecatr troa xatua itre xan, ke tha tro kö epuni a wangatrune pala ha la itre jole i epun. Hnene la ketre edromë qa Afrique, hna aceitunëne la itre qatr me itre itus ka qatrenge la itre ini ka tru thatraqai së. Ngo pëkö ini hna troa kapa, e tha fe kö së la itus. Itre qatre fe, the cile kö troa ce thawa la hnei epun hna atre me itre hnei epun hna melën, memine la itre xötr ka co. Hnyinge jë koi nyudren, nge drei nyudren hnyawa ju. Qejepengöne jë koi nyudren laka, jëne madrine la troa trongëne la itre trepene meköti Iehova. Tro epuni lai a kepe madrine la epuni a xatuan me ithuecatr kowe la itre sinee i epun.—Sal. 71:18.

12. Thenge la Isaia 46:4, nemene la hnei Iehova hna thingehnaean kowe la itre hlue i Nyidrë ka qatre hë? (Goeëne ju fe la itre foto.)

¹² Sipo trengecatre jë koi Iehova. Maine jë kolo ha kucakuca la ngönetrei me mekuna i epun. Ngo ame Iehova, “tha ka hane fe kö nyidrë kucakuca me hmanono.” (Isa. 40:28) Tune kaa la aqane huliwane Nyidrë la trengecatre i Nyidrë? Nyidrëti a thue trengecatr kowe la itre hlue i Nyidrë ka qatre hë. (Isa. 40:29-31) Ketre, hnei Nyidrëti hna thingehnaean ngöne la Tusi Hmitrötr laka, tro kö Nyidrëti a xatua angatr. (E jë la Isaia 46:4.) Nge Nyidrëti pala hi a eatrën la hnei Nyidrëti hna qaja. (Ios. 23:14; Isa. 55:10, 11) Hapeu, tha madrine kö epun la epuni a drenge la ihnim me ixatua i Iehova, la epuni a ase thith?

13. Thenge la 2 Korinito 4:16-18, nemene la nyine tro sa lapa mekun? (Wange ju fe la foto.)

¹³ The thëthëhmine kö laka, tro hmaca epuni a jeune me egöcatr. Maine atre hi së laka, tha ka cile huti kö la ewekë hne së hna melën, ke hmaloi hi tro sa cile kow. Nge Tusi Hmitrötr a qaja ka hape, tha ka cile huti kö la iqia me itre sine mec. (Iobu 33:25; Isa. 33:24) Matre madrine jë pe, ke elany la nyipi madrin, ngo tha kolo kö lo itre drai hnapan. (E jë la 2 Korinito 4:16-18.) Tro pena sa ce wang la aqane tro la itre xan a xatua epun.

IXATUA I ITRE XAN KOWE LA ITRE TREJIN KA QATR

14. Pine nemene matre nyipiewekë tro sa wang la itre trejin ka qatr me telefon lapa koi angatr?

¹⁴ Troa wang la itre trejin ka qatr me telefon lapa koi angatr. (Heb. 13:16) Tro la itre qatr a hleuhleu, ke angatr casi pala hi. Öni Carl,c ketre trejin ka qatr ka hape: “Eni a umë qane hmakanyi utihë hej, nge pëkö hnenge hna kuca. Ceitu eni hi memine la ketre öni hna umën. Ame ngöne la itre ijine cili, eni a wesitr me kucakuca.” Ame la easa wang la itre trejin ka qatr, easë hi lai a amamane ka hape, ka nyipiewekë angatr koi së, nge easa hnimi angatr. Celë hi ka akeukawanyi angatr. Ame itre xaa ijin, easa mekun troa telefon maine wang la ketre qatr ne la ekalesia, ngo tha kuca ju kö së. Eje hi, tru catr hnei jole i easë. Ngo nemene la ka troa xatua së troa “tuluthe la ka nyipiewekë,” ene la troa wang la itre qatr? (Fil. 1:10) Makëne jë ngöne la agenda i easë laka, troa hë maine iupifë message koi angatr. Ketre, loi e troa sa la ketre drai, matre troa wai angatr. Nge e ase hë së mekun, ke loi e troa eatrën.

15. Nemene la nyine tro la itre jeune a ce kuca memine la itre qatr?

¹⁵ Maine easë la ketre jeune, easa thel la nyine tro sa porotrikën me itre qatr, maine nyine tro sa kuca me angatr. Ngo the hnehengazo menu kö, loi e tro pe sa nyisinee i angatr. (It. Ed. 17:17) Qëmeken me thupene la itre icasikeu, tro jë troa porotrik me angatr. Hnyingëne jë koi angatr ka hape, nemene la xötr ka xatua angatr e nöjei drai. Maine sipo angatre jë troa qaja la ketre ewekë hnei angatr hna melën ekö, lo angatr a co, nge ka amadrinë angatr. Nge hë angatre jë troa ce goeën me epun la JW Télédiffusion. Maine pena, xatua angatre jë troa kuca la itre mises à jour ngöne la telefone i angatr, maine télécharger la itre itus ka hnyipixe. Öni Carol ketre trejin föe: “Hëne jë la itre trejin ka qatr troa kuca me eö la itre ewekë hnei eö hna pi kuca. Ngacama qatre hë ni, ngo ka pi tro pala hi ni koi magazë, me xen ngöne restaurant, me ngenu e kuhu trön.” Nge öni Maira: “Ame la ketre sineeng ke, ka 90 lao macatre. Nge ame ni, ke 33 lao macatreng. Ngo ame itre xaa ijin, thëthëhmine hë ni ka hape, qatre föe catr eahlo la nyio a ihnyima me ce goeë film. Nge ame la kola traqa la jol koi ketre, nyio a itö ithuecatr.”

16. Pine nemene matre loi e tro sa ce tro me itre trejin ka qatre troa wai droketre?

¹⁶ Ce tro jë me itre trejin qatr troa wai droketre. Tro jë troa itrothei, nge ce tro jë me angatr matre wang ka hape, kolo kö a okupe angatr hnyawa hnei itre droketre. (Isa. 1:17) Ketre, loi e tro sa makën la hna qaja hnei droketre. Öni Ruth, ketre trejin ka qatre hë: “Ame la eni a tro cas troa wai droketre, ke tha nyipiewekë ni kö hnei nyidrë. Itre droketre a qaja ka hape, ‘Eapo la ka mekun. Ngo pëkö meci eapo.’ Ngo ame la kola ce tro me ni, ke saze hnyawa la aqane ujë i droketre koi ni. Eni a olen kowe la itre trejin ka xomi ijin troa ce tro me eni.”

17. Nemene la aqane tro la itre jeunes a ce cainöj memine la itre qatr?

¹⁷ Ce cainöje jë memine la itre trejin ka qatr. Ame la itre xan, ke tha ijiji angatre hmaca kö troa cainöj ngöne la itre hnalapa trootro. Ngo e ijij, sipone jë kowe la ketre trejin ka qatre föe troa cilefë présentoir me epun. Nge xome trongëne jë kö la ketre icea, matre tro eahlo a lapa ezine la présentoir. Maine pena, hëne jë la ketre qatr troa sine la ini Tusi epun. Maine ijij, ce tro jë memine la ka ini Tusi kowe la hnalapa i nyidrë. Ketre, ijije hi tro la itre qatre thup a acil la itre icasikeu göi cainöj ngöne la hnalapa ne la itre trejin ka qatr, matre aijijë angatr troa hane sin. Eje hi, tha ka gufa kö la itre trengecatr hne së hna nu, matre nyipine la itre qatr ngöne la ekalesia.—It. Ed. 3:27; Roma 12:10.

18. Nemene la hne së hna troa ce wang ngöne la tane mekun e thupen?

¹⁸ Kola amamane hnene la tane mekune celë laka, Iehova a hnim la itre trejin ka qatr, me nyipiewekë angatr. Ketre, tru la ihnimi ne la ekalesia koi angatr! Tha ka hmaloi kö troa utipië trootro, ngo jëne la ixatua i Iehova, ijiji epun troa madrin. (Sal. 37:25) Eje hi, tru kö la madrin hnei epun hna troa kapa elany, hun ekö lo epuni a jeune! Ngo ame la itre xan e easë, angatr a thupëne la ketre qatr, maine ketre nekönatr maine sinee ka wezipo. Tune kaa la aqane tro angatr a madrin? Troa sa la hnyinge celë ngöne la tane mekun e thupen.