‘Troa Acatrene La Casi Së Lo Hne Së Hna Kapa Jëne La Ua’
AME ngöne la tusi Paulo kowe la itre keresiano ne Efeso, hnei angeic hna qaja la enyipiewekëne troa catre ‘ixomihnikeu thenge la ihnim, me mele tingetinge me itre xan, me isine troa acatrene la casi së, lo hne së hna kapa jëne la ua.’—Efe. 4:2, 3.
Ame la “cas,” ka eje e hnine la ekalesia, ke “hna kapa jëne la ua.” Kolo lai a hape, ka xulu qa ngöne la men i Akötresie. Ngo tune la hna qaja hnei Paulo, loi e tro sa “acatrene” la casi së. Hnëqa i drei? Isa hnëqa së, itre keresiano troa ‘acatrene la casi së, lo hne së hna kapa jëne la ua.’
Goeëne la ketre ceitun: Kola hamë eö la ketre loto ka hnyipixe. Drei la ka troa nyidrawan ej? Hnëqa i eö. Maine kola ngazo la loto, ke tha hnei eö kö hna kuca hnyawan, tha tro kö eö lai a upezöne la atr ka hamë eö la loto.
Ngacama ahnahna i Akötresie la casi së ngöne la ekalesia, ngo hnëqa së isa ala cas troa acatren ej. Maine tha iloi kö së memine la ketre trejin, loi e tro sa isa hnying ka hape, ‘Eni kö a isine troa nyinyine la jol, matre acatrene la casi ne la ekalesia?’
‘ISINE JË’ TROA ACATRENE LA CAS
Öni Paulo, nyipiewekë troa nue trengecatr, matre acatrene la cas ngöne la ekalesia. Ka nyipici catre lai, e hna akötrë së hnene la ketre trejin. Ngo hapeu, tro pala hi sa wange lai trejin ka akötrë së? Ame itre xaa ijin, ke tha nyipiewekë kö. Hnyinge jë pe ka hape, ‘Maine tro ni a ithanata koi angeic, tro kö ni lai a acatrene la cas, maine atrune lai jol?’ Ame la nyin, ke tro hi a nue la ngazo hna kuca koi së.—It. Ed. 19:11; Mar. 11:25.
Hnyinge jë ka hape, ‘Maine tro ni a ithanata koi angeic, eni kö lai a acatrene la cas, maine atrune lai jol?’
Tune la hna qaja hnei Paulo, catre jë së “ixomihnikeu thenge la ihnim.” (Efe. 4:2) Kolo hi lai a hape, ka tria fe la itre trejin me easë tui së. Eje hi, easa isine troa heetrëne “la thiina ka hnyipixe.” (Efe. 4:23, 24) Ngo, thatreine kö së troa traqa hnyawa kowe la thiina cili. (Roma 3:23) Maine tro sa kapa la nyipici cili, ke tro ha hmaloi koi së troa ixomihnikeu, me nue la ngazo itre xan, matre ‘acatrene la casi së, lo hne së hna kapa jëne la ua.’
Easa cas ngöne la “otene la iloi,” la easa nue me thëthëhmine la ngazo hna kuca koi së. Ame la hnëewekë qene Geres ngöne Efeso 4:3, Bible Lifu hna hape, “otene,” hna ujëne ngöne Kolose 2:19 ka hape, “hnaitöjun.” Ame la itre hnaitöjun, ke hetre itre ifezin, ka acatrenekeune la itre jun. Ketre tun, tro la tingeting me ihnimi së kowe la itre trejin, a acatrene la imelekeu së me angatr, ngacama hetre iwesitrë e itre xaa ijin.
Maine hna akötrë eö hnene la ketre trejin, isine jë troa trotrohni angeic, hune la troa qaja angazo angeic. (Kol. 3:12) Ka ngazo asë hi së, matre tro fe hi lai a hane traqa koi eö, troa akötrë ketre. E tro pala hi eö a mekune lai, ke tro lai a xatua eö troa ‘acatrene la casi së, lo hne së hna kapa jëne la ua.’