Itre Hnyinge Ne La Itre Ka e
Nemene “la mekuna i” Iehova, hnei Nyidrëti hna troa amë hnine la itre hni ne la itre nöj?
Ame la kola nyiqane la akötr atraqatr, Hna Amaman 17:16, 17 a hape: “Nge ame lo treene lao jian memine la öni ka ses hnei eö hna goeën, tro angatr a methinëne la föe ne gojeny, me thapa la nöjei ewekë i angeic, matre cile xöe pi angeic. Thupene lai, tro angatr a öni la itre ijöne i angeic me dreuthetriji angeic. Ke tro Akötresie a amë hnine la itre hni angatr la aja troa sajuëne la mekuna i nyidrë, nyipici, troa eatrëne la mekune ka cas i angatr, ene la troa nue la mus i angatr kowe la öni ka ses.” Ame ekö, itre itusi së a qaja ka hape, ame la “mekun” hnei Iehova hna troa amë hnine la hni ne la itre nöj, ke ene la troa lep apatrene la hmi ka thoi.
Ngo, loi e troa saze la aqane trotrohnine cili. Ame la “mekuna i” Iehova hna troa amë hnine la hni ne la itre nöj, ke “ene la troa nue la mus i angatr kowe la öni ka ses.” Tro sa sa la itre hnyinge e cahu, matre trotrohnine la aqane troa eatre la hna perofetane celë.
Drei la itre hna qaja ngöne la hna perofetan celë? Ame “la föe ne gojeny” hna hëne fe ka hape, “Babulona Atraqatr,” ke kolo itre hmi ka thoi. Ame la “öni ka ses ka madra palulu” ke ej a nyihatrene la ketre organizasio kowe la tingeting, hna eköth lo 1919, hna hëne ka hape, Société des nations, nge hna hëne pë hë enehila ka hape, Organisation des Nations unies (ONU). (Hna Am. 17:3-5) Nge ame lo “treene lao jian,” ke kolo itre musi asë ka sajuëne la öni ka ses.
Nemene la pengöne la föe ne gojeny memine la öni ka ses ka madra palulu? Kola “të” hune la öni ka ses hnene la föe ne gojeny, kolo lai a hape, angeic a xatuane la öni ka ses cili, me thele troa iaön me musinën ej.
Nemene la ka troa traqa kowe la föe ne gojeny? Tro la öni ka ses memine la treene lao jian a “methinëne la föe ne gojeny.” Tro angatre lai a nue la elëhni angatr koi angeic, me atrekënö la itre mo i angeic me qaja amamane la ngazo i angeic. Ketre, thenge la hna amekötine hnei Akötresie, tro angatr a apatrene paluane la föe ne gojeny. (Hna. Am. 17:1; 18:8) Celë hi pune la hmi ka thoi. Ngo qëmekene troa apatren ej, tro Iehova a upe la itre nöj troa kuca la ketre ewekë laka, tha hna hane kö kuca qane ekö.
Nemene la hnei Iehova hna troa kuca kowe la itre nöj? Tro Nyidrëti a amë hnine la itre hni ne la treene lao jian la “mekuna i nyidrë” matre tro angatr a “nue la mus me mene i angatr kowe la öni ka ses [ka madra palulu],” ene la ONU. (Hna Am. 17:13) Pane mekune jë la aliene lai. Hapeu, tro kö la itre musi atr a sipu mekun troa nue la mus me mene i angatr kowe la öni ka ses? Waea! Kola qaja hnene la hna perofetan ka hape, Akötresie la ka troa uku angatr troa ujë tun. (It. Ed. 21:1; wange ju fe la Isaia 44:28.) Hapeu, tro kö lai a aca tro traqa? Öö! Tro lai a aca tro traqa me asesëkötrë së. Ame la öni ka ses a kapa la mene i angeic, ke tro angeic a eatrëne la mekuna i Iehova kowe la itre organizasio ne la hmi ka thoi, ene la troa apatrenyi palua angatr.
Nemene la hne së hna treqen göi elany? Tha nyipiewekë kö tro sa goeëne la itre nuvel, me thele la itre hatren ka amaman laka, itre mus a nyiqane xatuane la ONU. Ngo hane pe la hne së hna lapa treqen: Troa aca tro traqa la ijin laka, tro Iehova a amë hnine la itre hni ne la itre nöj, troa nue la mus me mene i angatr kowe la öni ka ses. Atre ju hi së e cili laka, easenyi catre hë la akötr atraqatr. Ngo ame enehila, “loi e tro pe sa hmek me atreine waiewekë,” ke easenyi catre hë la itre ewekë ka troa saze!—1 Thes. 5:6.