Poingompus O Tupus Do Kinorohingan

1, 2. Nokuro tu mupus ko di Yohuwah?

MUPUS ko do Kinorohingan? Oupus ko kanto kopio Dau tu minambakti ko kumaa Dau. Kopuriman ko doti dot Iyau no tambalut nu dit osonong. Nga it a ko po mupus di Yohuwah, mupus no Yau diya. Boros ka’d Baibol: ‘Iyati nga mupus toko no, tu id gulu i o Kinorohingan do mupus dati.’​—1 Yohanis 4:19.

² Soroho o karalano di Yohuwah do popokito tupus Dau montok dati. Pinatahak Dau dati iti pomogunan sobaagi’d tiyonon dit olumis om koinsanai koonu-onuan toko. (Matius 5:43-48; Pinointalang 4:11) Manu Yau dot haro piromutan toko dit osonong miampai Dau, om manahak Yau dati kosiwatan do minsingilo kokomoi Dau. Soira mambasa toko’d Baibol, iti komoyon mokinongou toko di Yohuwah. Om soira sumambayang toko, mokinongou i Yau dati. (Sinding 65:3) Uhupan om pogiroton toko Dau miampai’d rusod tolidang. (Lukas 11:13) Pinaatod nogi Dau i tanak Dau moi dot koidu toko mantad dusa om kapataion.​—Basao Yohanis 3:16; Rum 5:8.

3. Poingkuro toko popotilombus piromutan tosonong miampai di Yohuwah?

³ Soroho pogi kokomoi songulun tambalut nu dit osonong, it miampai kasai diya tontok id kataadan toi kolungguian. Haro pinggisaman do popogirot piombolutan miagal dilo. Miagal nogi’ddi piombolutan toko dit otopot miampai di Yohuwah, tu Yau no Tambalut toko dit pointopot. Poingompus o piombolutan toko miampai Dau. Boros ka’d Baibol: ‘Intirung no id tupus do Kinorohingan.’ (Yudas 21) Poingkuro toko momonsoi diti? Sisimbar do Baibol: ‘Tu komoyon do mupus toko do Kinorohingan om, mumboyo toko do koinsanai di ponuhuan Dau. Om koinsanai di ponuhuan Dau nga a i awagat dot id dati.’​—1 Yohanis 5:3.

‘KOMOYON DOT MUPUS DO KINOROHINGAN’

4, 5. Poingkuro’d suminuni o tupus id ginawo nu montok di Yohuwah?

⁴ Nunu komoyon do Baibol soira moboros dot ‘mupus do Kinorohingan’? Boros diti popointalang dot tupus toko dit aralom montok Dau. Kosorou ko po nangku soira’d tuminimpuun ko mupus di Yohuwah?

⁵ Soroho kaagu nunu nopurimanan nu di insan ko nogi koilo do manu i Yohuwah do apasi ko sogigisom id pomogunan do wagu. Nokopinsingilo ko dot kaanu i Yohuwah do popootus dot koinsanai dilo, om ounsikou ko’d kogoyoo do rundun di Yesus dit pinatahak di Yohuwah do minatai montok dati. (Matius 20:28; Yohanis 8:29; Rum 5:12, 18) Nakagayat do ginawo nu soira nokoilo ko dot songkuro rinalom tupus di Yohuwah montok diya, om iya nga mimpuun nogi do mupus Dau.​—Basao 1 Yohanis 4:9, 10.

6. Nunu kohompit mupus do sosongulun? Tupus nu kumaa’d Yohuwah kounsub diya do momonsoi nunu?

⁶ Nga topurimanan diti kinotimpuunon nogi do tupus montok di Yohuwah. Sobaagi’d suntu, soira’d mupus toko do sosongulun okon ko moboros noo dot “Mupus oku diya.” Tupus toko kounsub toko’d momonsoi nunu it popotood do ginawo dau. Miagal nogi di tupus nu montok di Yohuwah, kounsub diya do masi id ralan dit popotood do ginawo Dau. Soira suminuni o tupus diri, mongunsub diya do mambakti kumaa Dau om mokibatis. Soira momonsoi dilo, minamatos ko do sumamba di Yohuwah sogigisom. (Basao Rum 14:7, 8.) Poingkuro ko’d potilombus dot powonsoi do batos dilo?

“MUMBOYO TOKO DO KOINSANAI DI PONUHUAN DAU”

7. Nung mupus toko di Yohuwah, nunu wonsoion toko? Nunu o piipiro’d ponuhuan Dau?

⁷ Tu mupus toko di Yohuwah, “mumboyo toko do koinsanai di ponuhuan Dau.” Poingkuro toko momonsoi diti? Mumboyo toko Dau. Id Baibol, minsingilo toko poingkuro koposion dit korohian di Yohuwah. Sobaagi’d suntu, mogodu Yau dati do magawuk, manakau, magampahu, tumuku do sosongulun toi nunu nopo suai ko i Yau.​—1 Korintus 5:11; 6:18; 10:14; Iposus 4:28; Kolosi 3:9.

8, 9. Poingkuro toko’d koilo nunu korohian di Yohuwah do wonsoion toko, nung aiso kooturan do Baibol dit poingontok? Panahak do suntu.

⁸ Montok papasanang do ginawo di Yohuwah, ogumu po i wonsoion toko mantad ko mumboyo noo do ponuhuan Dau. A i Yohuwah minanahak dati kooturan dit madtamong do koinsanai ralan do koposion. I pogi, haro nogi timpu’d aiso o kooturan do Baibol dot monguhup dati momonsoi kootuson. Poingkuro toko kaanu momonsoi kootuson di tosonong? (Iposus 5:17) Id Baibol kaanu toko’d ponontudukan poingkuro pomusarahan di Yohuwah kokomoi nunu nopo. Om soira mambasa toko’d Baibol, ointutunan toko kopio i Yohuwah. Kopinsingilo toko karalano do pomusarahan Dau, kohompit nunu it korohian om karaatan Dau.​—Basao Sinding 97:10; Boros dot Aralom 6:16-19; intangai Sinuratan id Tohuri 1.

⁹ Sobaagi’d suntu, poingkuro toko momili ababayan id TV toi nunu intangan toko id intonet? A i Yohuwah minomisunud dati dot nunu ot apatut do wonsoion toko. Nga ponontudukan di tinahak Dau kouhup dati do momonsoi kootuson di tosonong. Kogumuan pomomoinan do baino poimponu’d kororongit om sosomu. Id Baibol, minomisunud i Yohuwah dati dot “aayi-ayi no kopio o ginawo Dau dot araatan do tulun dit orohian do kororongit” om “tulun nopo di momonsoi do sosomu om i magampahu om hukuman i do Kinorohingan.” (Sinding 11:5; Ibrani 13:4) Poingkuro ponontudukan diti kouhup dati do momonsoi kootuson di tosonong? Soira nokoilo toko dot araatan i Yohuwah nunu nopo it sosomu, mositi’d ilagon toko.

10, 11. Nokuro tu mumboyo toko di Yohuwah?

¹⁰ Nokuro tu mumboyo toko di Yohuwah? Iti okon ko mongilag nopo do ohukuman toi kobolingkangan mantad kootuson di nowonsoi dit poinsala. (Galatia 6:7) Nga, mumboyo toko’d Yohuwah tu mupus toko Dau. Miagal tangaanak i manu do popotood di tapa diyolo, iyati nga manu nogi popotood di Tapa toko id surga. Aiso it lobi osonong ko mantad do nokoilo toko do otood i Yohuwah miampai dati.​—Sinding 5:13; Boros dot Aralom 12:2; intangai Sinuratan id Tohuri 2.

¹¹ I pogi, a toko’d mumboyo di Yohuwah miampai awagat o ginawo. Om a toko momili do mumboyo soira asanang noo. Om a toko momili honggo tiso toturan Dau om standard Dau do tonudon toko toi amu. (Ponugutan 12:32) Nga mumboyo toko kopio Dau miagal it pinoboros id Sinding: “Asanangan oku i do mumboyo di ponuhuan Nu, tu orohian oku i kopio’ddi.” (Sinding 119:47; Rum 6:17) Manu toko miagal di Nuu, it popokito tupus kumaa di Yohuwah miampai momonsoi koinsanai di ponuhuan Dau. Ka’d Baibol, “tonudo ngai” di Nuu. (Kinawansayan 6:22) Manu ko’d moboros i Yohuwah miagal dilo kumaa diya?

12. Poingkuro toko’d popotood di Yohuwah?

¹² Poingkuro topurimanan di Yohuwah soira’d mumboyo toko Dau? ‘Koposonong toko’d ginawo’ Dau. (Boros dot Aralom 11:20; 27:11) Soroho kokomoi dilo! Popotood toko do Gompomonsoi tawan om tana soira’d mumboyo toko Dau. Nga a i Yau mononsog dati. Suai ko nonuan toko Dau kosimbayanan do momili. Komoyon haro kosimbayanan toko’d momili do momonsoi dit otopot toi ko kasala. Manu i Yohuwah do tupus toko montok Dau koudsuur dati do momonsoi kootuson dit osonong moi dot kaanu toko koposion dit osonong kopio.​—Ponugutan 30:15, 16, 19, 20; intangai Sinuratan id Tohuri 3.

“PONUHUAN DAU NGA A I AWAGAT”

13, 14. Poingkuro toko’d koilo dot a i osusa kopio’d tumanud do ponuhuan di Yohuwah? Panahak do suntu.

¹³ Poingkuro nung kosorou toko dot osusa kopio’d tumanud do ponuhuan di Yohuwah toi mangantob dot kosimbayanan toko? Boros ka’d Baibol: “Koinsanai di ponuhuan Dau nga a i awagat.” (1 Yohanis 5:3) “Awagat” id boros suai, gunaon nogi do popokito’d kooturan dit a mitimbang toi tulun dit mangantob om poporuol do suai tulun. (Matius 23:4; Winonsoi 20:29, 30) Ka’d Alkitab Berita Baik: “Ponuhuan Dau nga a kopio osusa bagi’d dati.” Otopot kopio, ponuhuan di Yohuwah mitimbang kasai om a i “awagat” montok dati.

¹⁴ Ponokosuntu, soroho pogi monguhup ko’d tambalut nu’d mundaliu id walai wagu. Pinosuang dau koinsanai kakamot dau id kutak. Piipiro agaan om asanang do mangakat, nga i suai awagat kopio om manu do duo tulun do mangakat. Monuhu toi i tambalut nu do mangakat do kutak dit awagat kopio do sosongulun ko no? Tantu amu! Nokuro? Tu a yau manu’d osindualan ko. Miagal do tambalut dilo, a i insan i Yohuwah do monuhu dati do momonsoi nunu nopo it osusa kopio. (Ponugutan 30:11-14) Oilaan i di Yohuwah dot isai toko. “Oilaan i Dau o tadon toko, ahandaman i Dau do tana toko i toomod.”​—Sinding 103:14.

15. Nokuro tu otumbayaan toko dot toturan di Yohuwah montok kasanangan dati?

¹⁵ Sinunudan di Musa o bansa do Israil dot toturan di Yohuwah nopo nga montok ‘kosimbayanan’ diyolo om nung otorodok iyolo kumaa di Yohuwah “gompion indo kasai” iyolo Dau. (Ponugutan 5:28-33; 6:24) Miagal nogi dii do baino, nunu nopo posunudon di Yohuwah nga montok kasanangan dati. (Basao Yosaya 48:17.) Tapa toko Yohuwah, koilo’d nunu it osonong montok dati. (Rum 11:33) Ka’d Baibol: ‘Kinorohingan nopo om tupus.’ (1 Yohanis 4:8) Iti komoyon dot nunu nopo it poboroson om wonsoion di Yohuwah nga noudsuur do tupus.

16. Poingkuro toko’d koilo dot kaanu toko mumboyo mulong piya kibohiton toko om poimpasi id pomogunan do Rogon?

¹⁶ Okon ko osinang montok dati do mumboyo di Yohuwah tu poimpasi toko id pomogunan dit porintaon do Rogon. Mumbal iyau’d mongimbayat do tulun momonsoi nunu it araat. (1 Yohanis 5:19) Suai ko iri, sumaap toko nogi’d pomusarahan om topurimanan toko dit kibohiton. (Rum 7:21-25) Nga tupus toko montok di Yohuwah manahak dati kokorisan do momonsoi di tosonong. Okito Dau pinggisaman toko do mumboyo Dau om uhupan toko Dau miampai rusod tolidang Dau. (1 Somuil 15:22, 23; Winonsoi 5:32) Rusod tolidang monguhup dati do poposuni kowoyoon di tosonong om kouhup dati do mumboyo Dau.​—Galatia 5:22, 23.

17, 18. (a) Nunu it nopinsingilaan toko id buuk diti? (b) Nunu it pogibabarasan toko id kotob sumusuhut?

¹⁷ Id buuk diti, minsingilo toko poingkuro do masi tumanud ralan dit korohian di Yohuwah. Minsingilo toko nogi poingkuro’d powonsoi ponontudukan om standard moral Dau id koposion toko. Sorohon no dot a i Yohuwah mononsog dati do mumboyo Dau. Soira mumboyo toko, koposion toko’d baino om maso abantalan nga lobi osonong. It lobi oponting, soira mumboyo toko’d Kinorohingan, iti kopokito dot mupus toko Dau.​—Intangai Sinuratan id Tohuri 4.

¹⁸ Minanahak i Yohuwah kogiiginowoo do monguhup dati do koilo nunu it otopot om kasala. Nung ubason toko kogiiginowoo diti, iti kouhup dati ‘mumboyo do koinsanai di ponuhuan Dau.’ Nunu o kogiiginowoo toko, om poingkuro do minsingubas dilo? Kaino intangai toko.