Sinuratan Id Tohuri
1 PONONTUDUKAN
Toturan do Kinorohingan pinoimpou id ponontudukan Dau. Ponontudukan diti nopo nga tadon do katapatan id Baibol it kouhup dati mamarati karalano pomusarahan do Kinorohingan. Ponontudukan do Baibol kouhup dati’d kikabaalon do momonsoi kootuson, lolobi po’d tontok do a toko nonuan di Yohuwah toturan dit kopiontok do hal diri.
2 KOBINTUMBOYOON
Komoyon nopo’d mumboyo di Yohuwah nga momonsoi toko di korohian Dau miampai’d agaan o ginawo. Manu i Yohuwah do mumboyo toko Dau sabap do tupus. (1 Yohanis 5:3) Nung mupus om kikotumbayaan toko kumaa Dau, tonudon om mumboyo toko kasai ponontudukan Dau mulong piya’d osusa do momonsoi id koposion. Kaanu toko’d ogumu o kasanangan, soira’d mumboyo toko Dau, tu tudukan toko Dau karalano’d koposion dit osonong om minamatos dot manahak do barakat id maso’d abantalan.—Yosaya 48:17.
3 KOSIMBAYANAN DO MOMILI
Minanahak i Yohuwah kosimbayanan do momili kumaa’d koinsanai tulun. A toko Dau winonsoi’d miagal do robot. (Ponugutan 30:19; Yosua 24:15) Milo toko’d gunoon o kosimbayanan diti dot momonsoi kootuson dit abaal. Nga nung a toko antaan-taan, kowonsoi toko kanto’d kootuson dit araat. Gunoon toko kosimbayanan diti do popokito’d kotorodoko om tupus kumaa di Yohuwah.
4 TOTURAN DO MORAL
Pinatantu di Yohuwah ot toturan do moral, toi ponontudukan kumaa dati. Id Baibol, kopinsingilo toko’d toturan diri om kaanu’d kasanangan mantad dilo. (Boros dot Aralom 6:16-19; 1 Korintus 6:9-11) Toturan dilo monuduk dati’d nunu it osonong om araat id mato do Kinorohingan. Om monuduk dati karalano’d popokito’d tupus, momonsoi kootuson dit abaal, om monokiambalut do tulun. Mulong piya’d rumaat kopio o toturan moral do pomogunan nga a i nokosimban o toturan di Yohuwah. (Ponugutan 32:4-6; Maliaki 3:6) Soira tumanud toko’d toturan do Kinorohingan, ointirungan toko mantad ogumu kobolingkangan di don tinan om pomusarahan.
5 KOGIIGINOWOO
Kogiiginowoo nopo nga toilaan dit haro id dati kokomoi’d nunu it otopot om it kasala. Koinsanai dati nga nonuan di Yohuwah do kogiiginowoo. (Rum 2:14, 15) Kogiiginowoo dit nopinsingubas kouhup dati’d momonsoi kootuson dit osonong om papasanang do Kinorohingan. I pogi, oporlu’d popintingubason o kogiiginowoo toko tumanud do toturan moral di Yohuwah. (1 Pitrus 3:16) Kogiiginowoo toko nogi mononsunud dati soira’d oruhai toko no’d kopomonsoi dit kasala toi it kapanahak dati’d topurimanan do kasala tontok do kowonsoi toko dit araat. Kogiiginowoo toko osiliu kanto’d oluhoi, nga miampai ponguhupan di Yohuwah, kaanu toko potonduli kaagu. Kogiiginowoo dit olidang kapanahak dati’d kosimbayanan om ngaran dit osonong.
6 OORIS DO KINOROHINGAN
Ooris do Kinorohingan komoyon dot a toko momonsoi’d dit koporuol do ginawo Dau tu mupus om mamantang toko kopio Dau. Topurimanan diti kouhup dati’d momonsoi dit osonong om mongilag dit araat. (Sinding 111:10) Om nogi koudsuur dati’d mumboyo do koinsanai toturan do Kinorohingan om popootus do batos toko kumaa Dau. Topurimanan do moddosi diti kaampayat do karalano toko’d momusorou, monokiambalut do tulun suai, om momili id koposion monikid tadau.
7 RUMOLOGO
Kopuriman do olunggui o songulun it rumologo tu nokopomonsoi yau dit nakasala. Tulun dit mupus do Kinorohingan kopuriman do tumongob om osusa o ginawo nung a tumanud do toturan Dau. Nung kowonsoi toko dit araat, oporlu toko mokiampun di Yohuwah moi’d ompunon Dau o dusa toko maya’d rundun tobusan di Yesus. (Matius 26:28; 1 Yohanis 2:1, 2) Nung rumologo toko miampai’d poimponu o ginawo om tumingkod dot momonsoi dit kasala, otumbayaan toko dot ompunon toko di Yohuwah. A toko indo adalaan do kosorou dot kasala dit dusa laid. (Sinding 103:10-14; 1 Yohanis 1:9; 3:19-22) Apatut do minsingilo toko mantad kasalaan toko, monimban do pomusarahan dit kasala, om tumanud do toturan moral di Yohuwah.
8 PONGUYUNGAN
Soira haro sosongulun momonsoi dusa dit adalaan om a rumologo, a iyau milo’d sumiliu’d surupu id sidang Kristian. Oporlu’d uyungon yau mantad do sidang. A toko manu’d kipiromutan miampai dau toi monongkiboros dau. (1 Korintus 5:11; 2 Yohanis 9-11) Ponguyungan nopo nga momogompi’d kolidango do sidang om popoingkawas do kolidango ngaran di Yohuwah. (1 Korintus 5:6) Ponguyungan diti kouhup nogi’d sosongulun do kopuriman dot apatut iyau’d rumologo om gumuli id di Yohuwah.—Lukas 15:17.
9 MONUDUK, TISUHU, OM PONONSUNUDAN
Mupus kopio i Yohuwah dati om manu’d monguhup dati. I pogi, monuduk, monuhu om mononsunud Yau dati maya’d Baibol om maya’d tulun dit mupus Dau. Sobaagi’d tulun dit kibohiton, manu toko kopio’d ponudukan do Kinorohingan. (Yoromia 17:9) Soira’d mumboyo toko’d tisuhu do tulun dit linantik Dau, kopokito do mamantang om mumboyo toko Dau.—Ibrani 13:7.
10 KOSIRIBAON DO GINAWO
Tu kibohiton toko, osinang toko’d minggayo-gayo. Nga manu i Yohuwah do osiriba o ginawo toko. Poingkuro toko’d poposuni kosiribaon do ginawo? Iso nopo karalano nga popiirad do tinan toko miampai di Yohuwah. Om kopuriman toko indo dot okooro toko om apatut no’d poposuni kowoyo-woyoon dit osiriba o ginawo. (Ayub 38:1-4) Tulun dit osiriba o ginawo, momusorou kasai’d tulun suai om popogulu’d kopontingan diyolo. Nga tulun dit minggayo-gayo momusorou dot iyau no i lobi osonong mantad ko tulun suai. Songulun it osiriba o ginawo monorisid do dau’d tinan miampai otulid dot mongintong do koluhoion om kokorisan dau. A moddosi’d mangakun do kasalaan dau, mokiampun, om mamaramit do pononsunudan. Sumondiu kopio iyau di Yohuwah om tumanud do tisuhu Dau.—1 Pitrus 5:5.
11 KOKUASAAN
Tulun dit kikuasa kihak do manahak dot porinta om momonsoi’d kootuson. Tu i Yohuwah no o minomonsoi do nunu nopo, Iyau no i kikuasa kopio id pointongkop do tawan om tana. Momoguno kasai Iyau do kokuasaan Dau montok kasanangan koinsanai dit winonsoi Dau. Nonuan nogi di Yohuwah do kokuasaan o piipiro tulun, miagal tongomolohing, ponotua id sidang, om pomorinta. Kihak iyolo’d manahak do tisuhu, om manu i Yohuwah do monokodung toko diyolo. (Rum 13:1-5; 1 Timotius 5:17) Nga nung a kopisudong o toturan do tongoulun miampai’d toturan di Yohuwah, mositi no’d mumboyo toko’d Kinorohingan om okon ko tulun. (Winonsoi 5:29) Soira’d sumokodung toko’d tulun dit nonuan di Yohuwah kokuasaan, kopokito do mamantang toko’d kootuson di Yohuwah.
12 PONOTUA
Minomoguno i Yohuwah do ponotua toi tobpinai dit ogumu no nawayaan dot momogompi’d susumamba Dau. (Ponugutan 1:13; Winonsoi 20:28) Kouhup o ponotua dati’d momogompi piromutan miampai di Yohuwah, om kikosimbayanan om kipiuludan do sumamba Dau. (1 Korintus 14:33, 40) Oporlu’d oboyo o tongoponotua miagal dit pinosurat id Baibol pogului’d lontikon. I pogi, roitan toko iyolo’d linantik miampai’d ponguhupan rusod tolidang do Kinorohingan. (1 Timotius 3:1-7; Titus 1:5-9; 1 Pitrus 5:2, 3) Otumbayaan om monokodung toko kopio’d organisasi do Kinorohingan, i pogi ounsikou toko’d kumaraja miampai’d tongoponotua.—Sinding 138:6; Ibrani 13:17.
13 TULU DO SAMPAGANAKAN
Nonuan di Yohuwah o tongomolohing do tonggungan dot momogompi tangaanak om sampaganakan diyolo. Pinointalang do Baibol do tapa nopo nga tulu do sampaganakan. Nung aiso tapa, tina no o tulu do sampaganakan. Oporlu’d poposodia takanon, tongorasuk, om tiyonon o tulu sampaganakan montok do sampaganakan dau. Kitonggungan nogi iyau’d monontuduk om monguhup sampaganakan dau’d sumamba di Yohuwah. Sobaagi’d suntu, oporlu’d antangan dau do rumikot kasai iyolo id pitimungan, popinhabar, om papaharo‘d sambaan do sampaganakan. Suai ko iri, iyau no momonsoi kootuson id sampaganakan. A iyau orongit toi araat, nga momit kasai iyau’d poomitanan di Yesus dit osonong om otimbang. Nung momonsoi iyau miagal diti, kikosimbayanan om kipiuludan o sampaganakan dau om kipiromutan iyolo dit ogirot miampai di Yohuwah.
14 KOTINANAN DO MOMOYO
Kotinanan do Momoyo nopo nga tinimungan do kusai it kikalansanan do masi id surga. Ginuno iyolo di Yohuwah do momogompi di don rusod do susumamba Dau id pomogunan. Di tabad koiso, minomoguno i Yohuwah do iso kotinanan do momoyo dot momogompi di don rusod do sidang Kristian dit timpuuni. (Winonsoi 15:2) Baino, miagal nogi di winonsoi di Yohuwah. Minomoguno Yau Kotinanan do Momoyo do monontuduk, mongintirung, om manahak do tisuhu kumaa susumamba Dau. Soira’d momonsoi kootuson, sumondiu kopio iyolo do Baibol om rusod tolidang do Kinorohingan. Roitan di Yesus iyolo’d sobaagi’d “susuhuon dit otorodok om it oilo.”—Matius 24:45-47.
15 MONONGKULU
Somoonu songulun tobpinai tondu suhuon do momonsoi karaja id sidang, karaja dit koubasan do wonsoion do tobpinai kusai. Soira’d momonsoi yau diti, apatut do monongkulu iyau. Milo yau’d monongkulu toi monontupi do popokito’d pamantangan toturan do boyoon. Oporlu iyau monongkulu id kaantakan dit pointantu no. Sobaagi’d suntu, apatut yau’d monongkulu soira papapanau iyau’d pinsingilaan Baibol nung hiri i sawo toi tobpinai kusai.—1 Korintus 11:11-15.
16 NEUTRAL
Apatut do neutral toko om a monokihompit id hal do pulitik. (Yohanis 17:16) Miagal di Yesus, monokodung toko Pomorintaan do Kinorohingan om a humompit id hal don pomogunan.
Manu i Yohuwah dati ‘do minsiriba dot id boyoon om id pomorinta do pomogunan’. (Titus 3:1, 2; Rum 13:1-7) Nga minoboros nogi o Kinorohingan dot a mamatai. I pogi, kogiiginowoo’d tulun Kristian tantu nod a papasaga do moi sangod. Ondung papasaga o pomorinta do sosongulun dit magada do khidmat dot soudor do momonsoi karaja kogumuan, tulun Kristian mositi no’d momonsoi kootuson tumanud do kogiiginowoo dau.
I Yohuwah no sambaon toko tu Iyau no o Gompomonsoi dati. Mulong piya’d mamantang toko’d ponokolambang do pogun, a toko manabik do bondira toi suminding sinding do pogun. (Yosaya 43:11; Daniol 3:1-30; 1 Korintus 10:14) Suai ko iri, susumamba di Yohuwah momonsoi kootuson dandau dot a mongundi do parti pulitik toi calon tontok do pilihan raya, tu monokodung toko’d Pomorintaan do Kinorohingan.—Matius 22:21; Yohanis 15:19; 18:36.
17 KOUBASANAN DO DON POMOGUNAN
Koubasanan do don pomogunan nopo nga karalano pomusarahan do Rogon it kointalang id kowoyo-woyoon do tulun id pomogunan diti. Tulun dit noimbayatan do koubasanan do don pomogunan a mupus di Yohuwah om a tumanud do Toturan Dau. (1 Yohanis 5:19) Popokito iyolo‘d “koubasanan do don pomogunan” maya’d wonsoion om pomusarahan diyolo. (Iposus 2:2) Susumamba di Yohuwah mositi no’d a oimbayatan do koubasanan diti. (Iposus 6:10-18) Mositi no’d mupus om tumanud iyolo do toturan di Yohuwah om tumotos do minggisom dot popokito karalano pomusarahan Dau.
18 KOMURTADAN
Tulun do murtad, magada do katapatan id Baibol. Sumaap iyolo di Yohuwah om i Yesus, om mangampayat do suai tulun do tumanud diyolo. (Rum 1:25) Orohian iyolo do popiduo do ginawo om pomusarahan susumamba di Yohuwah. Piipiro tulun Kristian di timpuuni nokosiliu murtad om miagal nogi dii do baino. (2 Tosolunika 2:3) Tulun dit otorodok kumaa di Yohuwah a manu kipiromutan miampai tulun do murtad. A toko mambasa toi mokinongou ponudukan diyolo tu sabap do siilo toi unsubon do tulun suai. Tumorodok toko di Yohuwah om Iyau no ot sambaon toko.
19 PONGOMPUNAN DO DUSA
Id Toturan di Musa, mokianu o tulun Israil do pongompunan do dusa mantad di Yohuwah. Mogowit iyolo’d gandum, tumau, om tayam do porsombahan sobaagi’d sinumbali dot mokianu pongompunan do dusa. Iti koposorou diyolo do mangampun i i Yohuwah do dusa diyolo. Soira’d nokorundun di Yesus o koposion dau, a nodi tagal do manahak iyolo do porsombahan. Pinorundun di Yesus o koposion dau dit aiso bohiton dot “insan noo do maan do gisom dot alaid.”—Ibrani 10:1, 4, 10.
20 MAMANTANG KOPOSION DO TAYAM
Toturan di Musa papasaga’d tulun Israil do mangakan dot tonsi do tayam. Monuhu nogi i Toturan di Musa diyolo dot manahak do porsombahan do tayam do sumbolion. (Oturan 1:5, 6) Nga a i Yohuwah papasaga do pokoruol iyolo do tayam-tayam. (Boros dot Aralom 12:10) Toturan di Musa nopo nga kisuang do porinta dot momogompi’d tayam. Sinuhu o tulun Israil do momogompi’d tayam diyolo do tososonong.—Ponugutan 22:6, 7.
21 BOOGIAN TOKORO’D RAHA OM KARALANO’D PONGUBATAN
Boogian tokoro’d raha. Raha nopo nga haro apat ot tinimungan tagayo’d raha, iti nopo nga sel raha taragang, raha topurak, platelet, om plasma. Apat tinimungan tagayo’d raha diti milo’d babakon id boogian dit okoro om roitan do boogian tokoro’d raha.a
Tulun Kristian magada do pongundalihan do tagayo’d raha om kohompit nogi i apat boogian do raha. Nga poingkuro nung it boogian tokoro’d raha? A minanahak o Baibol do ponontudukan dit osorisid. I pogi monikid dati momonsoi kootuson sondiri tumanud do kogiiginowoo dit nopinsingubas do ponontudukan do Baibol.
Piipiro tulun Kristian magada boogian tokoro do raha tu kosorou iyolo’d toturan do Kinorohingan di minonuhu tulun Kristian do ‘papaawas do raha dot tayam id tana.’—Ponugutan 12:22-24.
Tulun suai mamaramit di boogian tokoro’d raha tu momusorou iyolo’d iri okon ko ponokolambang do koposion.
Tontok do momonsoi ko’d kootuson kokomoi’d boogian tokoro do raha, soroho no poguhatan dilo:
Kopuriman oku nangku dot nung magada oku koinsanai boogian tokoro do raha, komoyon nogi do magada oku piipiro tubat dit gunoon dot momolingos do toruol toi it kotingkod do momuraha?
Kaanu oku nangku do popointalang kumaa’d dokutur nokuro tu magada oku toi mamaramit boogian raha dit tokoro?
Karalano’d pongubatan. Sobaagi’d tulun Kristian, a toko manahak do raha toi popoopi’d raha toko pogului pamayayakan. Nga haro piipiro karalano’d pongubatan suai dit momoguno raha di susumakit. Id hal diti, sosongulun oporlu’d momonsoi kootuson tumanud do kogiiginowoo sondiri. Monikid tulun oporlu’d momonsoi kootuson sondiri kokomoi poingkuro gunoon o raha dau id timpu do pamayayakan, ujian makmal, toi pongubatan. Id karalano diti, raha di susumakit posoliwanon kanto mantad do tinan dau id piipiro timpu.—Montok kopoilaan, intangai Kerja Teokratik Kita, Tulan Kohopod om Iso 2009, koukaban 5-8.
Sobaagi’d suntu, proses pencairan darah (hemodilution). Pogului’d pamayayakan, posoliwanon o raha mantad do tinan di susumakit, om cecair pangambang isi padu posuangon id tinan dau moi’d mongolon do raha dit pinosoliwan. Tontok do katalib o pamayayakan, pogulion kaagu o raha diri id tinan dau.
Iso po kaagu karalano dit roitan do kotomposian do sel (cell salvage). Raha dit nokoluyung id timpu do pamayayakan potimungon kaagu, pulangon nondo, om pogulion id tinan di susumakit tontok toi katalib o pamayayakan.
Monikid dokutur momoguno mogisuaian o karalano, i pogi apatut o tulun Kristian do koilo nunu wonsoion do dokutur dau. Om oporlu indo iyau do momonsoi kootuson sondiri kokomoi poingkuro’d gunoon di dokutur o raha dau id pamayayakan, ujian makmal, toi id pongubatan.
Tontok do momonsoi ko’d kootuson kokomoi’d karalano do pongubatan it kohompit pomogunaan do raha, soroho no poguhatan dilo:
Nung posoliwanon o raha mantad tinan ku, om akasou koluyungon do raha ku solinaid do timpu, pasaga nangku o kogiiginowoo ku’d momusorou dot raha diti kakal i do boogian do tinan ku, om a oporlu’d ‘paawason id tana’?—Ponugutan 12:23, 24.
Tontok do papanahon o karalano’d pongubatan, otingkau toi o kogiiginowoo ku dit nopinsingubas do Baibol nung songulun surupu’d pongubatan poposoliwan do raha ku, monimban do suang dau, om pogulion nondo kaagu id tinan ku toi id ganit pamayayakan ku?
Koilo oku nangku dot nung magada oku koinsanai’d karalano do pongubatan it kohompit pomogunaan do raha, komoyon do magada oku’d karalano miagal ko poniisan do raha, hemodialisis, toi pomogunaan do mesin tunundu-topos?
Pogului’d momonsoi toko kootuson kokomoi’d boogian tokoro do raha toi karalano’d pongubatan it kohompit pomogunaan do raha, apatut do sumambayang toko’d mokianu kabaalon mantad di Yohuwah om momonsoi’d ponorisidan. (Yakub 1:5, 6) Katalib diri, momonsoi toko nogindo kootuson tumanud do kogiiginawoo dit nopinsingubas. A toko apatut do muhot tulun suai nunu it wonsoion diyolo, om iyolo nga a nogi apatut do mononsog dati do tumanud do kootuson diyolo.—Rum 14:12; Galatia 6:5.
22 OPULANG ID MORAL
Songulun it opulang id moral mositi’d koilo momusorou, momonsoi, moboros, om kikowoyoo dit opulang id mato do Kinorohingan. Monuhu i Yohuwah do minsodu toko mantad koinsanai’d kowoyoon do seks dit aiso moral. (Boros dot Aralom 1:10; 3:1) I pogi, pogului’d kotoguang toko kaantakan dit kopogumbal dati’d momiduso, mositi no’d tumotos toko do mumboyo di Yohuwah. Milo toko’d mokianu Kinorohingan do monguhup dati moi’d kipomusarahan dit opulang, om mositi nogi do tumotos toko’d mongilag dit koimbayat.—1 Korintus 6:9, 10, 18; Iposus 5:5.
23 A OTINGAYAMAN DO KIKOWOYO-WOYOON DIT ARAAT OM SOSOMU
Kikowoyo-woyoon dit araat om a otingayaman kohompit nogi wowonsoyon di sumaap dot toturan do Kinorohingan om popointalang do kowoyoo dit a koilo’d otingayaman. Tulun dit kikowoyo-woyoon miagal diti popointingayam dot toturan do Kinorohingan. Nung oilaan dot kasala o sosongulun, jawatankuasa pengadilan ot manalasai do kes dau. Sosomu nopo nga kohompit nogi mogisuaian ot kowoyoo dit kasala. Piipiro kes dit sosomu oporlu kanto’d salasaion do jawatankuasa pengadilan id sidang.—Galatia 5:19-21; Iposus 4:19; kopoilaan sumusuhut, intangai “Poguhatan do Pambasa” id majala Menara Pengawal, 15 Tulan Koturu 2006, boros Indonesia.
▸ Kotob 9, poringgan 7; Kotob 12, poringgan 10
24 MELANCAP
Seks nopo nga iso karalano’d popokito tupus it pinatahak di Yohuwah kumaa dit misasawo noo. Nga soira melancap ot sosongulun dot mamagampot do kosionuan dot seks dau maya’d mangama di alat kelamin dau, kasala yau’d momoguno do titahak do Kinorohingan. Kowoyoo diti mamaraag do piombolutan dau miampai di Yohuwah. Kowoyoo diti nogi koudsuur dau do kikosionuan dit a normal om kipomusarahan dit kasala kokomoi seks. (Kolosi 3:5) Nung osusa ko’d moningkod dot kowoyoo dit araat diti, kada kapaasai. (Sinding 86:5; 1 Yohanis 3:20) Sambayang no kumaa di Yohuwah om pokianu no’d ponguhupan Dau. Insodu no mantad pornografi, kakamot di sosomu, it kaampayat diya momosorou’d hal dit sosomu. Sunudai no molohing nu dit Kristian toi tambalut dit otuo noo id don rusod. (Boros dot Aralom 1:8, 9; 1 Tosolunika 5:14; Titus 2:3-5) Kotumbayaai no’d okito om unsikohon i di Yohuwah ot pinggisaman nu dot tumimporon dot opulang id moral.—Sinding 51:19; Yosaya 1:18.
25 MAGAPID
Komoyon do kisawo o sosongulun kolobi’d iso ot sawo toi sinawo. A i Yohuwah pinopotimpuun dot magapid id pisasawaan. Id maso’d Israil, pinapasaga i Yohuwah do magapid nga iti okon ko oturan Dau di timpuuni. Baino, a i Yohuwah papasaga do magapid ot susumamba Dau. Songulun sawo, mositi’d iso noo sinawo om songulun sinawo nga mositi’d iso noo o sawo.—Matius 19:9; 1 Timotius 3:2.
26 PIADAAN OM PITONGKIADAN
Manu i Yohuwah di misasawo do miampai kasai dot solinaid diyolo’d poimpasi. (Kinawansayan 2:24; Maliaki 2:15, 16; Matius 19:3-6; 1 Korintus 7:39) Pasagaon di Yohuwah i misasawo do miada nung nakapagampahu ot songulun diyolo. Songulun it a nakasala kihak do momili ondung monokiada iyau toi amu.—Matius 19:9.
Somoonu, songulun Kristian momili dot tumongkiad mantad koruhang dau mulong piya’d a minagampahu i koruhang dau. (1 Korintus 7:11) Id sumusuhut diti piipiro sabap nokuro tu mitongkiad iyolo:
A momogompi’d sampaganakan. A i sawo manahak kosusukupan dot sampaganakan gisom do aiso kousinan toi a kaakan.—1 Timotius 5:8.
Adalaan do moninduol dot tinan. Osindualan o sosongulun gisom dot kopoligogon do kolidasan om koposion dau.—Galatia 5:19-21.
A kaanu sumamba di Yohuwah. Sosongulun kotoguang do pongindaraatan mantad koruhang dau gisom dot a iyau kaanu do sumamba di Yohuwah.—Winonsoi 5:29.
27 PAMARAYAHAN OM PONGUDSUURAN
Koinsanai dati nga manu’d royohon om udsuuron. (Boros dot Aralom 12:25; 16:24) Kopogirot toko’d tiso om tiso maya’d koboro-boroso dit osonong om it kopokito’d tupus. Koboro-boroso miagal diti kopogirot do tobpinai toko om kouhup diyolo’d tumilombus do otoboi om sumamba di Yohuwah mulong piya’d kotoguang do kosusaan. (Boros dot Aralom 12:18; Pilipi 2:1-4) Nung kopuriman do oluhoi o sosongulun, apatut do mokinongou toko dit polombuson dau om mumbal do mamarati topurimanan dau moi’d koilo toko poingkuro’d monguhup dau (Yakub 1:19) I pogi, intutunai no tobpinai do tososonong moi’d koilo ko nunu kosusukupan diyolo. Om uhupai no iyolo do manganu’d pongudsuuran om koinsasamadan do ginawo mantad di Yohuwah.—2 Korintus 1:3, 4; 1 Tosolunika 5:11.
28 KARAMAIAN DO PISASAWAAN
A minanahak o Baibol do toturan dit koontok kokomoi karamaian do pisasawaan. Monikid kinoiyonon haro mogisuaian o tadat om tundang-undang. (Kinawansayan 24:67; Matius 1:24; 25:10; Lukas 14:8) Id pisasawaan do tulun Kristian, batos dit pinolombus di misasawo id toguang di Yohuwah oponting kopio. Batos diri polombuson tontok do boro-boroson id pisasawaan diyolo it polombuson do songulun ponotua. Koubasan do rumikot id boro-boroson diri nopo nga sampaganakan om tambalut tosomok diyolo. Milo i misasawo’d momili do papaharo’d poginakanan toi amu. (Lukas 14:28; Yohanis 2:1-11) Nunu nopo kootuson dit pilion diyolo, karamaian do pisasawaan diri apatut do kapamarayou di Yohuwah. (Kinawansayan 2:18-24; Matius 19:5, 6) Ponontudukan do Baibol kouhup diyolo dot momili dit osonong. (1 Yohanis 2:16, 17) Nung posurung iyolo tinumon dit kaawuk id karamaian diri mositi do kaanu iyolo’d papapanau karamaian diri do tososonong. (Boros dot Aralom 20:1; Iposus 5:18) Tuni sinding toi nunu nopo ababayan pohoroon do hiri mositi no’d kapamarayou di Yohuwah. Oporlu it misasawo’d popogulu do piromutan diyolo om di don rusod diyolo, om okon ko popogulu’d karamaian id pisasawaan diyolo.—Boros dot Aralom 18:22; moi’d ogumu o pomilian, intangai Menara Pengawal it pinalabus 15 Tulan Kohopod 2006, koukaban 18-31 id boros Indonesia.
29 MOMONSOI KOOTUSON DIT ABAAL
Manu toko momonsoi kootuson dit pinoimpou’d ponontudukan do Baibol. Sobaagi’d suntu, songulun Kristian alapon kanto koruhang dau it okon ko Sasi do moi akan miampai tobpinai dau id tadau do karamaian. Nung kotoguang ko’d kowoyoon diti, nunu wonsoion nu? Nung pasaga diya o kogiiginawoo nu dot mongoi, mositi no’d pointalangon nu kumaa di koruhang nu dot mongoi ko hilo do makan nopo om okon ko tumanud nunu nopo ababayan i pohoroon dot tugama kapir id karamaian diri. Mositi nogi do momusorou ko, ondung kootuson di wonsoion nu kotingkau do kogiiginowoo tulun suai toi amu.—1 Korintus 8:9; 10:23, 24.
Nung onuan ko’d bos nu do bonus tontok iso o karamaian, mada ko nangku do bonus diri? Amu nogi. Soroho o poguhatan dilo: Mongunsikou no nangku o bos nu kumaa pakaraja dau, toi id pomusarahan dau bonus diri sobaagi’d tadat mantad karamaian diri? Oporlu’d momusorou ko kokomoi hal diti om hal do suai pogului’d momonsoi kootuson mamaramit toi mada do bonus diri.
Poingkuro nung manahak o sosongulun diya’d titahak tontok do karamaian om moboros dot: “Oilaan ku a ko mamaramai’d karamayan diti nga manahak oku kasai diya titahak diti”? Manu no kanto yau’d popokito do kopuhango. Nga nung mogumbal no yau’d kotumbayaan nu toi mogihum do kosiwatan do popohompit diya id karamaian diri, a ko kanto mamaramit do titahak diri. Sorohon no nunu nopo kootuson toko, nga manu toko kikogiiginowoo dit olidang om otorodok kasai kumaa di Yohuwah.—Winonsoi 23:1.
30 PADAGANGAN OM TUNDANG-UNDANG
Oporlu’d osikap toko do manalasai kobolingkangan om id karalano dit osonong moi’d a lobi karaat o kobolingkangan diri. (Matius 5:23-26) Apatut toko’d popogulu kapamarayahan kumaa di Yohuwah om piuludan do sidang.—Yohanis 13:34, 35; 1 Korintus 13:4, 5.
Nung koimbulai o kobolingkangan id padagangan miampai tobpinai suai, apatut toko do tumotos dot manalasai’d sopi ko iyati no, om a mogowit do hal diri id kut. Id 1 Korintus 6:1-8, minoboros i Paulus dot nung mogowit toko kobolingkangan miagal diti id kut, mogindaraat toko ngaran di Yohuwah om sidang. Id Matius 18:15-17 minamarait tolu karalano dit apatut dot tonudon tulun do Kristian do manalasai totondos dit araat miagal ko pongindaraat om tudut: (1) Tulun dit poinghompit mositi no’d manalasai do kobolingkangan diri sopi ko iyolo no; (2) Nung a kalantoi ot hal diti milo iyolo’d mokianu ponguhupan songulun toi ko duo tulun surupu sidang dit otuo; om (3) Nung kakal do a milo’d salasaion milo iyolo’d mokianu ponguhupan kotinanan do ponotua. Momoguno i tongoponotua ponontudukan do Baibol do monguhup koinsanai tulun it nokohompit moi’d kodimpot iso o kootuson. Nung haro songulun it a manu tumanud ponontudukan do Baibol, oporlu i tongoponotua do manganu tindakan disiplin.
Oporlu toko kanto’d momonsoi tuntutan do kut nung kohompit o piadaan, hak pomogompian do tanak, alimoni (balansa do nafkah), pampasan insurans, kemuflisan, toi wasiat. A toko sumaap do pononsunudan di Paulus nung momonsoi toko tuntutan id kut id kowoyoon diti.
Nung songulun Kristian momonsoi dit araat, miagal ko mangasou, mongindaraat do tangaanak, manakau, toi mamatai, a toko i sumunsung do pononsunudan di Paulus nung posunudon toko kumaa’d pihak berkuasa.
31 TUDUT DI ROGON
Mantad po id Kabun do Idon, minggisom o rogon do mongudut do tulun. (Kinawansayan 3:1-6; Pinointalang 12:9) Koilo yau nung kaanu yau’d momorulong dati, koimbayat iyau dati do momonsoi di tangaraat. (2 Korintus 4:4; Yakub 1:14, 15) I pogi, momoguno iyau’d pulitik, tugama, padagangan, karamaian, sinikulan, om suai po do mongimbayat do pomusarahan toko.—Yohanis 14:30; 1 Yohanis 5:19.
Oilaan di rogon dot oruhai no timpu dau, i pogi minggisom kopio yau dot mangampayat soginumu do tulun lolobi po susumamba di Yohuwah. (Pinointalang 12:12) Nung a toko antaan-taan maid-laid kaanu yau’d mamaraag do pomusarahan toko. (1 Korintus 10:12) Sobaagi’d suntu, manu i Yohuwah poingompus o pisasawaan. (Matius 19:5, 6, 9) Nga kogumuan tulun do baino momusorou dot osinang iyolo’d monongkiada. Kogumuan do wayang om ababayan id TV nogi nga monokodung pomusarahan miagal dilo. Apatut do antaan-taan toko moi’d a katanud do kowoyo-woyoon miagal diti.
Kosionuan do minsimbayan nga iso o lawa do rogon. (2 Timotius 3:4) Nung a toko antaan-taan, a toko kanto mamantang do tulun dit pinoingkakat di Yohuwah. Sobaagi’d suntu, songulun tobpinai tumimpun kanto’d magada ponontudukan do tongoponotua. (Ibrani 12:5) Songulun tobpinai tondu a doti kaakun do toturan kokomoi’d tulu do sampaganakan dit pinatantu di Yohuwah.—1 Korintus 11:3.
I pogi, kada koimbayatai do pomusarahan do rogon. Nga oporlu toko’d momit do pomusarahan di Yohuwah om ‘popotumpu pomusarahan toko di haro do hilo’d surga.’—Kolosi 3:2; 2 Korintus 2:11.
32 PONGUBATAN KOLIDASAN
Koinsanai dati nga manu kikolidasan dit osonong om nung kitoruol toko manu toko’d pongubatan dit lobi osonong. (Yosaya 38:21; Markus 5:25, 26; Lukas 10:34) Baino, haro mogisuaian pongubatan nga apatut do momili toko’d pongubatan dit kopisudong do ponontudukan do Baibol. Apatut nogi’d sorohon toko dot Pomorintaan do Kinorohingan no i kapanahak dati’d kolidasan dit otopot. A toko manu’d popogulu kopio kokomoi kolidasan toko gisom dot a momoduli do sambaan toko kumaa di Yohuwah.—Yosaya 33:24; 1 Timotius 4:16.
Mositi’d minsodu toko mantad pongubatan dit momoguno’d kuasa don rogon. (Ponugutan 18:10-12; Yosaya 1:13) I pogi, pogului’d mamaramit toko nunu nopo pongubatan toi tubat, apatut do sorisidon po kopio dati. (Boros dot Aralom 14:15) Sorohon no dot mogihum kasai o Rogon do kosiwatan do mamalawa dati maya’d spiritisme. Nung kopuriman toko’d pongubatan diri poinghompit doti spiritisme, apatut do minsodu toko dilo.—1 Pitrus 5:8.
a Piipiro dokutur momusorou kanto’d apat boogian do tagayo’d raha sobaagi’d boogian tokoro’d raha. I pogi apatut ko kanto’d popointalang do kootuson di winonsoi nu dot a mamaramit do pongundalihan do raha dit apat boogian tagayo’d raha, it sel raha taragang, sel raha topurak, platelet, om plasma.