Potimporono Tupus id Kinorohingan

1, 2. Poingkuro toko’d otimporon id tupus do Kinorohingan?

KOINSANAI DATI manu kikolidasan dit osonong. Mulong piya’d osusa, nga minggisom toko’d mangakan takanon dit osonong om sasais do tinan. Miagal nogi dii, oporlu toko‘d minggsiom do mongintirung kolidasan di don rusod toko.

² Soira’d nokotutun toko di Yohuwah, oporlu toko dot popogirot piromutan toko miampai Dau. Sinuhu o tulun Kristian dot “gumirot dot id kotumbayaan” moi’d ‘ointirungan kasai koposi-posion diyolo id tupus do Kinorohingan.’ (Yudas 20, 21) I pogi, poingkuro toko’d kaanu gumirot id kotumbayaan?

POGIROTO KASAI O KOTUMBAYAAN NU

3-5. (a) Manu i Rogon do kipomusarahan ko do nunu kokomoi ponuhuan di Yohuwah? (b) Nunu pomusarahan nu kokomoi toturan om ponontudukan di Yohuwah?

³ Oponting do kikotumbayaan ko dot ralan di Yohuwah nopo nga ralan dit osonong kopio. Manu i Rogon do momusorou ko dot osusa do mumboyo’d ponuhuan di Yohuwah, om a ko’i tagal dot ponudukan Dau. Mantad id Kabun do Idon po, monotos kopio i Rogon do mongimbayat do tulun moi’d kipomusarahan miagal dilo.​—Kinawansayan 3:1-6.

⁴ Osusa toi mumboyo’d ponuhuan di Yohuwah? Amu. Sobaagi’d suntu, soroho pogi nung manau-panau ko id iso o kabun, om kokito ko’d tansar dit akawas kopio. Muhot ko kanto, “Nokuro tu kitansar o hiti?” Nga sigog ka’d korongou ko’d singa do marom-garom id sampaping do tansar diri. Nunu topurimanan nu? Okon toi ko mongunsikou ko dot kointirung diya o tansar diri mantad ko akanon di singa? Ponontudukan di Yohuwah miagal do tansar dilo, om i Rogon miagal di singa. Minanahak o Baibol pononsunudan montok dati, “Mumbangan-bangan kou no om sumodia kasai! Tu Rogon no o pisangod dokoyu. Om iyo po iyau di singa do mimpanau do hilo om hiti do marom-garom do mogihum do kanon dau.”​—1 Pitrus 5:8.

⁵ Manu i Yohuwah dot momurimon toko’d koposion dit osonong kopio, i pogi nonuan toko Dau toturan om ponontudukan dit kointirung dati mantad do Rogon. (Iposus 6:11) Minonurat i Yakub dot: “Oturan nopod Kinorohingan om osonong i kopio om haro o kuasa do popoidu do tulun om barakatan nod Kinorohingan o nunu nopo o wonsoyon dau.”​—Yakub 1:25.

6. Poingkuro toko’d kikotumbayaan dot ralan di Yohuwah nopo nga it osonong kopio?

⁶ Soira mumboyo toko’d ponuhuan di Yohuwah, lobi’d ogirot o kotumbayaan toko. Sobaagi’d suntu, minonuhu i Yohuwah dati do sumambayang kumaa Dau, rumikot id pitimungan, mongudsuur tiso om tiso, om moi popinhabar. (Matius 6:5-8; 28:19, 20; Galatia 6:2; 1 Tosolunika 5:17; Ibrani 10:24, 25) Nung mumboyo toko ponuhuan diti, kaanu toko’d lobi ogumu o koinsanangan. Om soira’d imurianan toko o koinsanangan dit naanu toko, lobi otumbayaan toko dot ralan di Yohuwah no it osonong kopio.

7, 8. Nunu kouhup dati moi’d a adalaan do tumongob kokomoi pogumbalan id maso abantalan?

⁷ Poingkuro nung tumongob ko dot a ko kanto kaanu’d mumboyo ponuhuan di Yohuwah? Sorohon no boros di Yohuwah diti: ‘Iyoho no i Yohuwah, i Kinorohingan nu. Orohian Oku do monuduk diya di popoinsonong diya, om potunud Oku diya dot id ralan dit apatut nu’d susuyon. Ondung otorodok ko’d mumboyo dit oturan Ku om lumuyung nondo o barakat dot id dokoyu do miagal di bawang dot a rumasak. Om a ko apagon do kaanu’d kamanangan do miagal no di tumbak do rahat di rumuab dot id tisan do rahat.’​—Yosaya 48:17, 18.

⁸ Soira mumboyo toko di Yohuwah, kosimbayanan toko osiliu miagal do bawang dit a rumasak, om kosonongo toko miagal do tumbak do rahat it a insan do otingkod. Nunu nopo pogumbalan dit otoguangan nga, kaanu toko kasai do tumorodok kumaa di Yohuwah. Ka’d Baibol: ‘Patahako nod Yohuwah ino katangkabaan nu, om pokorison ko indo Dau, a i Iyau insan do popologos dot aala i tulun dit osonong.’​—Sinding 55:23.

TUMOTOS DO TUMUO

9, 10. Nunu komoyon do tumuo?

⁹ Soira’d ogirot o piromutan nu miampai di Yohuwah, ‘tumuo ko nondo dot id suang do koposi-posion.’ (Ibrani 6:1) Nunu komoyon dot “tumuo”?

¹⁰ Moi’d tumuo toko, oporlu dot sumiliu toko tambalut dit osonong di Yohuwah om poposuni pomusarahan Dau. (Yohanis 4:23) Minonurat i Paulus dot, “Tulun nopo di tumanud do kowoyo-woyoo do don tulun dot id suang do koposi-posion dau, om iri kasai nopo i korohian do don tulun o sorohon. Nga iri nopo tulun di tumanud do ponuhuan do Rusod do Kinorohingan dot id suang do koposi-posion dau, om momusorou kasai i di korohian do Rusod do Kinorohingan.” (Rum 8:5) Tulun dit nokotuo a momusorou’d koinsanangan do koposion toi kakayaan. Nga monotos yau do sumamba di Yohuwah om momonsoi kootuson dit abaal id koposion. (Boros dot Aralom 27:11; basao Yakub 1:2, 3.) A nogi yau oimbayatan do momonsoi dit araat, tu koilo yau nunu it otopot om minggisom do powonsoi dilo.

11, 12. (a) Nunu komoyon di Paulus kokomoi’d “oubas do mongilo honggo it osonong om honggo it araat”? (b) Nunu piagalan do tulun Kristian dit otuo om atlit do sukan dit abaal?

¹¹ Oporlu’d minggisom toko do tumuo. Ka’d Paulus, “Iri nopo taakanon dit okodou om iri no tulun di nongosukod o kaakan, tu iyolo nopo om oubas nod mongilo ondung honggo it osonong om honggo it araat.” (Ibrani 5:14) Boros do “oubas” poposorou dati kokomoi’d songulun atlit do sukan dit minsingubas kasai.

¹² Songulun atlit do sukan oporlu ogumu o maso’d minsingubas. Tontok di baragang po iyau, a iyau koilo karalano do momusus poingkuro popogura do longon om gakod dau. Nga soira gumayo iyau, maid-laid lobi’d koilo yau. Maya pinsingubasan dit minguli-guli, kaanu yau sumiliu atlit sukan dit abaal. Miagal nogi dii, oporlu toko’d ogumu o timpu do minsingubas do sumiliu tulun Kristian dit otuo.

13. Nunu o kouhup toko’d kipomusarahan miagal di Yohuwah?

¹³ Nokopinsingilo toko no’d poingkuro toko kipomusarahan miagal di Yohuwah. Nokopinsingilo toko nogi do mongunsikou om mupus do toturan Dau. Soira momonsoi toko kootuson, apatut do muhot toko, “Nunu toturan toi ponontudukan do Baibol id kaantakan diti? Poingkuro oku kaanu powonsoi diti? Nunu korohian di Yohuwah do wonsoion ku?”​—Basao Boros dot Aralom 3:5, 6; Yakub 1:5.

14. Nunu o wonsoion toko moi’d kopogirot do kotumbayaan toko?

¹⁴ Miagal do takanon dit osonong tu kouhup do tinan toko lobi olidas, toilaan kokomoi di Yohuwah kouhup dati do kikotumbayaan dit lobi’d ogirot. Di tuminimpuun toko nogi’d minsingilo’d Baibol, nokoilo toko’d katapatan asas kokomoi di Yohuwah. Nga maid-laid, oporlu toko’d karati hal dit lobi aralom. I pogi minoboros i Paulus dot, “Ponotos no kopio do sumiliu’d tulun di kitoilaan, tu’ iti no it agayo kopio o komoyon.”​—Boros dot Aralom 4:5-7; 1 Pitrus 2:2.

15. Songkuro kopontingo’d tupus toko kumaa di Yohuwah om kumaa tobpinai sopikotumbayaan?

¹⁵ Nung manu toko’d olidas om okoris kasai, mositi’d tumilombus toko’d momogompi do kolidasan toko. Miagal nogi dii, nung sumiliu toko’d tulun Kristian dit otuo, oporlu toko’d momogompi kasai piromutan miampai di Yohuwah. Ka’d Paulus: ‘Ilaai pogi dokoyu o koposi-posion dokoyu ondung otopot kopio do poingimpou do kotumbayaan dot id Kristus.’ (2 Korintus 13:5) Suai ko popogirot do kotumbayaan, oporlu toko’d popogirot kasai tupus kumaa di Yohuwah om tobpinai sopikotumbayaan. Minoboros i Paulus dot, ‘Mulong piya kosuhut ngai oku dit angaralom, om otumbayaan kopio oku’d gisom do milo oku do popoundaliu do nuluhon, nga ondung a oku kitupus, om aiso i o guna-guna ku!’​—1 Korintus 13:1-3.

POGULUONO IT LANSANON TOKO

16. Manu i Rogon do kitopurimanan toko’d nunu?

¹⁶ Manu i Rogon do momusorou toko dot a i kapasanang do Kinorohingan o tongoulun. Manu yau’d tumongob, olunggui, om apaasan toko. A yau manu dot otumbayaan toko do tobpinai sopikotumbayaan toko. (Iposus 2:2) Oilaan do Rogon dot nung kipomusarahan toko dit negatif, atagakan toko indo sunduan om tumongkiad mantad di Yohuwah. Nga minanahak i Yohuwah dati do kalansanan dot mongintirung dati.

17. Songkuro kopontingo do kalansanan?

¹⁷ Id Iposus 6:17, piniagal do Baibol o kalansanan do ‘katampasian do koposion’ toko miagal do tupi kolidar do mongintirung tulu’d soudor. Nung poguluonon toko kopio o kalansanan dit pinabatos di Yohuwah, iti kointirung do pomusarahan toko om kopoinsodu pomusarahan dit negatif.

18, 19. Poingkuro i Yesus do kotoboi dot monoguang do pogumbalan?

¹⁸ Di totuong do kolimpupuson di Yesus hiti’d pomogunan, nindaraat om tinongkiadan iyau di tongotambalut dau. Tulun dit iso bansa di Yesus nogi nga sumaap dau om manu do pataion yau. Nunu kouhup di Yesus do monoguang koinsanai diti? Ka’d Ibrani 12:2: “Tu sinorou nopo dau om i kataadan dau do katalib iri. Om dinondo noddi om poirikau no iyau dot id dawananan di tirikohonon do Kinorohingan.”​—Ibrani 12:2.

¹⁹ Koilo i Yesus dot nung otorodok kasai yau, kapamarayou iyau di Yohuwah om kopointalang dot goudut kopio o Rogon. Kalansanan diti manahak dau do kataadan. Oilaan nogi dau dot kosugku kaagu iyau di Tapa dau hilo’d surga. Kalansanan diti kouhup dau do tumoboi. Miagal di Yesus, iyati nga mositi popogulu do kalansanan toko. Kalansanan diti kouhup dati’d kotoboi do monoguang do nunu nopo pogumbalan.

20. Nunu it kouhup diya do kipomusarahan dit positif?

²⁰ Koilo i Yohuwah soira’d popokito ko’d kotumbayaan om kotoboion. (Yosaya 30:18; basao Maliaki 3:10.) Minamatos Iyau dot, “patahakon indo Dau diya i korohian kopio do ginawo nu.” (Sinding 37:4) I pogi, potilombuso no’d popogulu do kalansanan dit pinabatos Dau. Manu o Rogon do kitopurimanan ko’d tumongob om momusorou’d a i Yohuwah popootus di batos Dau. Nga a apatut do momusorou miagal diri. Nung tumimpuun ko’d momusorou dit negatif, pokianu no’d ponguhupan di Yohuwah. Sorohon no it poinsurat id Pilipi 4:6, 7: ‘Kada kou katangkabo do pasal do nunu nopo. Suwai ko sumambayang, om poboroson i pokionuon dokoyu dot id Kinorohingan. Nunu nopo o pokionuon dokoyu, om poboroson kasai dot id Kinorohingan. Om iri indo i kosimbayanan do ginawo di mantad id Kinorohingan, it a osuhutan do tulun, o poposimbayan do ginawo om pomusarahan dokoyu, i nokoiso dot id Kristus Yesus.’

21, 22. (a) Nunu hontolon di Yohuwah bagi’d pomogunan? (b) Nunu ot pinggisaman nu?

²¹ Imurianai no kalansanan dit piandad-andad toko! Id pomogunan wagu, koinsanai tulun nga sumamba di Yohuwah. (Pinointalang 7:9, 14) Aiso nondo o Rogon, rusod dit araat, om koinsanai karaaton. A toko no kotoguang do toruol om kapataion. Mogisosokodung nondo o tongoulun dot monginlumis do pomogunan diti sumiliu’d iso o Paradais dit olumis. Osima nondo takanon om kikosimbayanan o koinsanai tulun. Aiso nondo tulun dit orongit om araat. Maid-laid, aiso nondo bohiton do koinsanai tulun hiti’d pomogunan om “koidu nondo iyolo om koinggayo do kotonggoi di tangaanak do Kinorohingan.”​—Rum 8:21.

²² Manu i Yohuwah do osiliu toko’d tambalut tosonong Dau. I pogi, pinggisom no’d mumboyo Dau om minsomok Dau monikid tadau. Maha daa koinsanai toko kointirung kasai id tupus do Kinorohingan!​—Yudas 21.