Saapo No Rogon

1, 2. Nunu it apatut do pinsingilaan toko kokomoi’d Rogon om rusod dit araat?

MANDAD-ANDAD toko’d koposion id pomogunan do wagu. Nga babaino, kakal toko po’d poimpasi id pomogunan dit porintaon do Rogon om rusod dit araat. (2 Korintus 4:4) Mulong piya’d a toko kokito diyolo nga mimang do haro iyolo om kikuasa kopio.

² Id kotob diti, pogibabarasan toko poingkuro’d kaanu sumondiu di Yohuwah om ointirungan mantad di Rogon. Minamatos i Yohuwah dot monguhup Iyau dati, nga apatut do karati toko poingkuro i Rogon om rusod dit araat do mongudut om manangod dati.

“MIAGAL DO SINGA DO MAROM-GAROM”

3. Manu o Rogon momonsoi do nunu kumaa dati?

³ Monondos i Rogon do a toko sumamba di Yohuwah miampai’d poimponu o ginawo, om tumongkiad toko Dau soira oontok do kosusaan. (Basao Ayub 2:4, 5.) Otogod kopio i Rogon om i rusod dit araat soira’d minsingilo o sosongulun kokomoi di Yohuwah. Mumbal iyolo’d mangantob tulun dit manu’d mambakti kumaa di Yohuwah om botison. Minoboros o Baibol dot Rogon miagal po’d “singa do mimpanau do hilo om hiti do marom-garom do mogihum do kanon dau.” (1 Pitrus 5:8) Oo, manu kopio i Rogon do tumongkiad toko di Yohuwah.​—Sinding 7:2, 3; 2 Timotius 3:12.

4, 5. (a) Nunu it a owonsoi do Rogon? (b) Nunu komoyon dot ‘Saapo no Rogon’?

⁴ A toko apatut do moddosi do Rogon om rusod dit araat tu minamatos i Yohuwah do mongintirung dati. Ka Dau, ‘ogumu kopio o tulun do songintimung’ iyolo nopo nga tulun Kristian dit otopot “i tulun di nakamanang do tontok di maso di koinggoritan dit awagat kopio.” (Pinointalang 7:9, 14) A i kaanu mangantob i Rogon do osiliu o hal diti tu mongintirung i Yohuwah do tulun Dau.

⁵ Nung sumondiu toko di Yohuwah, a i Rogon kaanu’d mamaraag piromutan toko miampai Dau. Ka’d Baibol: ‘Osomok i Yohuwah dot id dokoyu ondung osomok kou no dot id Dau.’ (2 Susui 15:2; basao 1 Korintus 10:13.) Ogumu o tulun kikotumbayaan miagal di Habil, Hinok, Nuu, Sara, om i Musa, it sumaap di Rogon miampai sumondiu kopio di Yohuwah. (Ibrani 11:4-40) Iyati nga ingkaa nogi. Ka’d Baibol: “Saapon no dokoyu o Rogon, om mogidu i i Rogon do mantad id dokoyu.”​—Yakub 4:7.

“HARO O PONOKISAAP TOKO”

6. Poingkuro i Rogon do manangod dati?

⁶ Mulong piya’d koilo i Rogon dot intirungan toko di Yohuwah nga kakal i dau do tumotos do mamaraag piromutan toko miampai di Yohuwah. Momoguno iyau mogisuaian o karalano do manangod dati. Kaino intangai toko piipiro karalano dilo?

7. Nokuro tu manangod i Rogon do tulun di Yohuwah?

⁷ Minonurat i Yohanis dot, “Id suang ngai do pomorintaan di Yaraat o pointongkop diti pomogunan.” (1 Yohanis 5:19) I Rogon no ot momorinta do pomogunan diti om manu iyau’d momorinta tulun di Yohuwah. (Mika 4:1; Yohanis 15:19; Pinointalang 12:12, 17) Koilo yau dot oruhai no timpu dau, i pogi monotos kopio yau’d manangod dati id karalano dit opurimanan toi ko it a toko opurimanan.

8. Koinsanai tulun Kristian apatut koilo do nunu?

⁸ Ka’d Iposus 6:12, “Monokisaap toko di kuasa di rusod dit angaraat di momorinta do hilo’d tawan.” Koinsanai tulun Kristian apatut do koilo dot soira nakabakti iyolo kumaa di Yohuwah, oporlu monokisaap iyolo di Rogon om rusod taraat. Iri no sabap minoboros i Paulus dot tulun Kristian mositi “okoris kasai.”​—Iposus 6:11, 13, 14.

9. Nunu wonsoion di Rogon om rusod dit araat kumaa dati?

⁹ Momoguno o Rogon om rusod dit araat dot mogisuaian o karalano do mongudut dati. Mulong piya’d kodimpot toko do monoibau’d lawa di ginuno dau nga momoguno kaagu iyau lawa do suai do mamagakom dati. Iri no sabap dot monotos kopio iyau do mogihum koluhaian toko. Nga kaanu toko i mongilag do lawa dau tu minonuduk o Baibol dati kokomoi tudut dau. (2 Korintus 2:11; intangai Sinuratan id Tohuri 31.) Tudut dau do koiso nopo nga spiritisme.

MINSODU MANTAD RUSOD DIT ARAAT

10. (a) Nunu ot spiritisme? (b) Nunu pomusarahan di Yohuwah kokomoi spiritisme?

¹⁰ Komoyon nopo’d spiritisme nga kipiromutan miampai rusod dit araat. Iti kohompit nogi mogogontong, bobolian, mamakai’d gimat, om monongkiboros tulun di napatai. Minoboros o Baibol dot araatan kopio i Yohuwah do spiritisme. I pogi, nung manu toko’d sumamba di Yohuwah, a toko milo do kipiromutan miampai spiritisme. (Ponugutan 18:10-12; Pinointalang 21:8) Apatut o tulun Kristian dot minsodu mantad nunu nopo it poinghompit do spiritisme.​—Rum 12:9.

11. Nokuro tu a toko manu’d agayat do hal dit kikoimayaan om it poinlolobi?

¹¹ Oilaan di Rogon dot spiritisme nopo nga kapamaraag do piromutan toko miampai di Yohuwah. I pogi, manu iyau’d agayat toko do hal dit kikoimayaan om it poinlolobi moi dot osinang iyau do mamalawa toko.

MOGUMBAL I ROGON DOT MONGUDUT DATI

12. Poingkuro i Rogon do mogumbal dot mogimbayat do pomusarahan toko?

¹² Manu i Rogon do oborulong o tongoulun om opiduwo o ginawo diyolo do momusorou dot “osonong it araat, om anawau it otuong.” (Yosaya 5:20) Manu nogi i Rogon dot otumbayaan o tongoulun do ponontudukan nopo’d Baibol nga aiso guno om kaanu toko masi’d lobi olumaag mulong piya’d aiso ponudukan do Kinorohingan.

13. Poingkuro i Rogon dot mumbal do momiduwo do ginawo’d tongoulun?

¹³ Mantad di gulu po, orohian o Rogon do opiduwo o ginawo’d tongoulun. Id kabun do Idon, minuhot iyau di Hawa dot: “Noduhan kou no kopio do Kinorohingan do mangakan do tua do koinsanai diti kayu do hiti’d kabun?” (Kinawansayan 3:1) Om id maso di Ayub, minuhot i Rogon di Yohuwah id toguang di tongomoloikat dot: “Orohian i tuu i Ayub do sumambayang dot id Diya dot aiso daa ot aanu-anu dau?” (Ayub 1:9) Katalib do binatis i Yesus, minogumbal i Rogon di Yesus miampai’d minoboros dot: “Okon toi ko Tanak ko’d Kinorohingan? Suhuo pogi ilo watu do sumiliu’d roti.”​—Matius 4:3.

14. Poingkuro i Rogon dot kopoimbulai poguhatan do tongoulun ondung otopot do koligogon toi amu o spiritisme?

¹⁴ Baino nga manu i Rogon dot kipoguhatan o tongoulun ondung otopot do koligogon toi amu o spiritisme. Wonsoion dau o spiritisme miagal ko osonong o kokitanan om a kasala gisom do noudutan o piipiro tulun Kristian. (2 Korintus 11:3) I pogi, poingkuro toko’d mongintirung do tinan toko? Poingkuro toko’d a oimbayatan do tudut di Rogon? Kaino intangai toko duo hal, pomomoinan om pongubatan do kolidasan.

MANGANU I ROGON DO KOSIWATAN ID KOSIONUAN TOKO

15. Poingkuro toko’d kohompit do spiritisme maya’d pomomoinan?

¹⁵ Baino, kogumuan do pomomoinan miagal ko wayang, video, ababayan id TV, game kompiuto om laman web kisuang do spiritisme. Haro nogi it mongintong do nasip, mambasa horoskop, om momoguno daun turup toi buul kristal. Momonsoi o Rogon do koinsanai diti miampai’d kokitanan dit osonong kopio, kopotood om a koligogon gisom dot a iyolo kopuriman do momoguno iyolo’d spiritisme. Haro nogi i momusorou dot a kasala mintong nunu nopo it kisuang do spiritisme nung a iyolo momoguno dilo. Nga koligogon kopio pomusarahan miagal diti. Poingkuro?​—1 Korintus 10:12.

16. Nokuro tu apatut do ilagon toko pomomoinan dit poinghompit do spiritisme?

¹⁶ A i kaanu mambasa o Rogon om rusod dit araat do pomusarahan toko. Nga kaanu iyolo’d mongilo’d pomusarahan om kosionuan toko miampai’d mongimuri nunu i wonsoion toko. Nung momili toko’d wayang, tuni sinding, toi buuk it poinghompit do bobolian, toilaan don ghaib, tombiruo, mogogontong, puntianak, om suai po, oilaan diyolo dot orohian toko kopio kokomoi diyolo. I pogi, maganu di iyolo’d kosiwatan do mamalawa dati moi dot kohompit toko id pomogunaan do spiritisme.​—Basao Galatia 6:7.

17. Poingkuro o Rogon do mamalawa dati tontok do kotoguang toko’d kobolingkangan do kolidasan?

¹⁷ Manganu nogi i Rogon do kosiwatan do mamalawa dati tontok do monoguang toko’d kobolingkangan do kolidasan. Baino, kogumuan do tulun kitoruol om a i nolingasan mulong piya’d noumbalan no diyolo ot mogisuaian o pongubatan. (Markus 5:25, 26) I pogi, mogihum om mumbal iyolo’d nunu nopo karalano moi’d olingasan. Nga sobaagi’d tulun Kristian apatut do antaan-taan toko om a momili’d pongubatan dit momoguno do spiritisme.​—Oturan 19:31.

18. Nunu karalano’d pongubatan dit mositi’d ilagon do tulun Kristian?

¹⁸ Tulun Israil di gulu po, haro nogi i momoguno spiritisme. Ka’d Yohuwah kumaa diyolo: “Tontok di poinsawaton dokoyu o longon dokoyu do sumambayang, om a Oku no montong dokoyu. Om asaru kou piya do sumambayang nga a Ku no pokinongohon.” (Yosaya 1:15) Soroho pogi, a i Yohuwah mokinongou’d sambayang diyolo! I pogi, iyati nga a manu’d momonsoi nunu nopo it kaantob do sambayang toko toi it kapatagak do kohubayaan di Yohuwah kumaa dati, lolobi po tontok do kitoruol toko. (Sinding 41:3) I pogi, pogului’d momili toko’d karalano pongubatan, apatut do oilaan toko do aiso ot nunu nopo it kohompit do spiritisme id pongubatan diri.​—Matius 6:13; Intangai Sinuratan id Siriba 32.

SUSUIAN KOKOMOI’D RUSOD DIT ARAAT

19. Poingkuro Rogon dot poporosi tulun kumaa dau?

¹⁹ Ogumu o tulun nokoumbal dot kinasou do Rogon om rusod dit araat, i pogi moddosi iyolo om migit do kotumbayaan dit a otopot. Haro nogi tulun do popinsusui susuian dit kororosi kokomoi’d poingkuro i rusod dit araat mangasou’d tulun. Susuian miagal diti osonong kopio torongou om orohian iyolo’d popinsusui kumaa tulun suai. Susuian miagal diti kounsub do tulun moddosi do Rogon.

20. Poingkuro toko’d popotongkop do tudut di Rogon?

²⁰ Manu o Rogon dot moddosi o tulun kumaa dau. (2 Tosolunika 2:9, 10) Rogon gompongudut dit kitoilaan kopio’d mongimbayat pomusarahan do tulun om popotumboyo diyolo hal dit a otopot. Osorou kanto diyolo’d otopot it okito toi orongou diyolo, om popinsusuion nondo kumaa tulun suai. Om piguli-gulian nondo diyolo’d poposusui om popoinggayo-gayo do susuian dilo. A toko manu’d muhup do Rogon dot popotongkop do tudut dau miampai’d minguli do monusui susuian miagal dilo.​—Yohanis 8:44; 2 Timotius 2:16.

21. Apatut do monusui toko dot nunu?

²¹ Nung nokokito toko’d rusod dit araat, a toko popinsusui nawayaan diri do popotood dot tulun suai. A toko nogi apatut do moddosi di Rogon om rusod dit araat tu rusod tolidang do Kinorohingan lobi kikuasa ko mantad diyolo. Sobaagi’d tulun di Yohuwah manu toko popotumpu’d pomusarahan toko kumaa di Yesus. (Ibrani 12:2) A i Yesus popoilang susuian do Rusod dit araat kumaa tumatanud dau. Nga monusui iyau kumaa’d tulun habar tosonong kokomoi’d Pomorintaan do Kinorohingan om i “nongowonsoi do Kinorohingan di kongoimayaan kopio.”​—Winonsoi 2:11; Lukas 8:1; Rum 1:11, 12.

22. Minggisom ko’d momonsoi do nunu?

²² Sorohon no’d manu i Rogon dot mamaraag piromutan toko miampai di Yohuwah. Monotos iyau do minggisom do momonsoi diri. Nga koilo toko kokomoi tudut dau om apatut do minggisom toko’d minsodu mantad spiritisme. I pogi a toko ‘onuan o Rogon do momonsoi di dau’d korohian’ om popoluhoi’d pinggisaman toko. (Basao Iposus 4:27.) Oo, ondung saapon toko o Rogon kaanu toko’d minsodu’d lawa dau om kaanu pongintirungan mantad di Yohuwah.​—Iposus 6:11.