Purimono No Ot Karaja Nu

1-3. (a) Nunu topurimanan do kogumuan tulun kokomoi karaja diyolo? (b) Id kotob diti, nunu poguhatan dit pogibara-barasan toko?

KOINSANAI dati oporlu’d tumotos do kumaraja dot momogompi tinan om sampaganakan toko. Nga ogumu tulun sumonsog do momonsoi’d karaja dit a dau korohian. Nung miagal ko dilo, poingkuro ko’d kaanu monimban do pomusarahan om tumimpuun do momurimon dot karaja nu?

² Minoboros i Yohuwah dot: “Apatut ngai toko i do makan om minum om momurimon di hasil do karaja toko. Tu iri nopo om nipuhawang id Kinorohingan.” (Gomponuduk 3:13) Winonsoi toko di Yohuwah miampai kosusukupan om kosioonuan do kumaraja. Manu Yau dot momurimon toko do karaja toko.​—Basao Gomponuduk 2:24; 5:18.

³ I pogi, poingkuro toko’d kaanu momurimon do karaja toko? Nunu karaja dit a kosudong montok tulun Kristian? Poingkuro toko’d kopitimbang id karaja om id sambaan toko? Nunu karaja dit oponting kopio montok dati?

APARU KOPIO I YOHUWAH OM I YESUS DO KUMARAJA

4, 5. Nunu pomusarahan di Yohuwah kokomoi’d karaja?

⁴ Orohian kopio i Yohuwah do kumaraja. Ka’d Kinawansayan 1:1: “Tontok di timpuun i om wonsoyo nod Kinorohingan o tawan om pomogunan.” Kopongo nopo Dau’d momonsoi o tana om koinsanai di haro id tana, kopuriman Yau dot “osonong ngai nopo.” (Kinawansayan 1:31) Otood kopio i Gompomonsoi toko dit hasil do karaja Dau.​—1 Timotius 1:11.

⁵ A i Yohuwah nokoumbal dot tumingkod do kumaraja. Ka’d Yesus: ‘Kumaraja kasai i Tapa ku do gisom do dinondo.’ (Yohanis 5:17) Mulong piya a toko koilo kokomoi piipiro karaja dit kikoimayaan dot wonsoion di Yohuwah, nga koilo toko i piipiro dilo. Kakal i Dau do momili’d tinimungan do tulun do momorinta miampai di Yesus id Pomorintaan Dau. (2 Korintus 5:17) Tudukan om gompion Dau o tongoulun maya karaja popinhabaran do sompomogunan. Kootuson, riniangan o tulun do kotutun Dau om kikosiwatan do masi sogigisom id paradais hiti’d tana.​—Yohanis 6:44; Rum 6:23.

6, 7. Poingkuro kowoyo-woyoon di Yesus kokomoi’d karaja?

⁶ Miagal di Tapa dau, i Yesus nga orohian do kumaraja. Pogului luminintuhun yau hiti’d pomogunan, Yesus nopo nga songulun di “mongilo-ilo do wonsoyon” do Kinorohingan. Monguhup yau di Yohuwah do momonsoi koinsanai i haro id surga om id tana. (Boros dot Aralom 8:22-31; Kolosi 1:15-17) Di hiti po yau’d pomogunan, tumotos i Yesus kumaraja sobaagi’d “tukang kayu.”​—Markus 6:3.

⁷ Nga karaja dit oponting kopio do wonsoion di Yesus nopo nga popinhabar habar dot osonong om monuduk tulun kokomoi di Yohuwah. Solinaid tolu toun om satanga, kumaraja yau’d mantad kosuabon gisom do totuong. (Lukas 21:37, 38; Yohanis 3:2) Om osodu kopio pamanahan dau dot popinhabar moi’d kodimpot yau’d soginumu o tulun.​—Lukas 8:1.

8, 9. Nokuro tu kopomurimon kopio i Yesus do karaja dau?

⁸ Montok di Yesus, momonsoi karaja di Yohuwah miagal ko takanon dit manahak dau kokorisan om kogiroto. Haro timpu dot atangkangau kopio i Yesus gisom dot aiso o timpu dau do makan. (Yohanis 4:31-38) Momoguno yau koinsanai kosiwatan do monuduk tulun kokomoi Tapa dau. I pogi, kaanu yau’d moboros kumaa di Yohuwah dot ‘Nokoinggayo ku no i Tapa do hiti’d pomogunan tu nowonsoi ngai ku i karaja di pinonuhuan di Tapa doho.’​—Yohanis 17:4.

⁹ Atalang kopio dot tumotos i Yohuwah om i Yesus do kumaraja om otood iyolo’d momurimon do hasil do karaja diyolo. Manu toko’d momit do poomitanan diyolo. (Iposus 5:1; 1 Pitrus 2:21) I pogi, tumotos toko kopio momonsoi karaja dati miampai’d poimponu o ginawo.

POMUSARAHAN TOKO KOKOMOI’D KARAJA

10, 11. Nunu kouhup dati do poposuni pomusarahan dit positif kokomoi’d karaja dati?

¹⁰ Sobaagi’d tulun di Yohuwah, tumotos toko’d kumaraja do momogompi tinan om sampaganakan toko. Manu toko’d kitopurimanan dit osonong kokomoi karaja toko, nga hal diti amu osinang ondung a toko orohian do karaja toko. I pogi, nunu it apatut do wonsoion toko?

¹¹ Posunio kowoyoon dit positif. A toko kaanu monimban do karaja toko, nga kaanu toko poposuni pomusarahan dit positif kokomoi karaja miampai’d mamarati pomusarahan do Kinorohingan. Sobaagi’d suntu, manu i Yohuwah tulu do sampaganakan momogompi’d kosusukupan do sampaganakan dau. Ka’d Baibol, sosongulun it a posodia kosusukupan do sampaganakan dau, lobi “araat po iyau ko i tulun dit a notumbayaan.” (1 Timotius 5:8) Nung tulu ko do sampaganakan, apatut do tumotos ko’d mogihum do kosusukupan. Orohian ko toi amu do karaja nu, nga koilo ko i dot maya’d pinggisaman nu posodia kosusukupan do sampaganakan, kapasanang ko’i di Yohuwah.

12. Nunu kasanangan dot aanu nung aparu om otulid toko?

¹² Aparu do kumaraja om otulid. Lobi’d asanang montok diya do momurimon do karaja nu nung kikowoyo-woyoon ko dit aparu om otulid. (Boros dot Aralom 12:24; 22:29) Otumbayaan i touki diya tu a ko manakau tusin, timpu, toi dapu do kumponi. (Iposus 4:28) Nunu it oponting, kokito i Yohuwah koporuon om kotulido nu. I pogi, kaanu ko indo’d ‘kogiiginowoo dit olidang’ tu koilo ko’d papasanang dot ginawo do Kinorohingan.​—Ibrani 13:18; Kolosi 3:22-24.

13. Nunu kootuson nung kikowoyoon toko dit osonong?

¹³ Kikowoyoon dit osonong. Nung opurimanan toko dot kowoyo-woyoon toko kapamarayou di Yohuwah, iti koudsuur dati’d lobi orohian do karaja toko. (Titus 2:9, 10) Kowoyoon toko dit osonong kagayat kanto’d tambalut karaja toko do minsingilo’d Baibol.​—Basao Boros dot Aralom 27:11; 1 Pitrus 2:12.

MOMILI’D KARAJA DIT KOSUDONG

14-16. Nunu poguhatan dit apatut do sorohon toko tontok dot momili’d karaja?

¹⁴ A o Baibol minanahak do nuludan dot karaja dit apatut dot romiton toi ilagon do tulun Kristian. Nga ponontudukan do Baibol kouhup dati do momili karaja dit kosudong. (Boros dot Aralom 2:6) I pogi, tontok do momili karaja, apatut do momusorou toko tongopoguhatan diti:

¹⁵ Kohompit nangku di karaatan di Yohuwah o karaja diti? Araatan i Yohuwah do tulun dit araat, miagal ko manakau om oudut. (Kinosoliwanan 20:4; Winonsoi 15:29; Iposus 4:28; Pinointalang 21:8) I pogi, ilagon toko nunu nopo karaja dit a kopisudong dot toturan di Yohuwah.​—Basao 1 Yohanis 5:3.

¹⁶ Monokodung toi koudsuur o karaja diti dot momonsoi nunu it karaatan di Yohuwah? Sobaagi’d suntu, nonuan ko’d karaja sobaagi’d mamaramit do rurumikot. A kasala o karaja diti, nga poingkuro ondung pakaraja ko id klinik do pongundalihan do raha? Mulong piya’d a ko kohompit do momonsoi pongundalihan do raha, nga okon toi ko monokodung ko’d momonsoi dit karaatan di Yohuwah?​—Winonsoi 15:29.

17. Nunu it kouhup dati’d momonsoi kootuson dit kapasanang do Kinorohingan?

¹⁷ Nung momonsoi toko kootuson tumanud ponontudukan do Kinorohingan, oubas toko indo dot ‘mongilo honggo it osonong om honggo it araat.’ (Ibrani 5:14) Uhot pogi, ‘Nung romiton ku karaja diti, kopogkorulau nangku kogiiginowoo tulun suai? Apatut nangku tongkiadan ku koruhang om tangaanak ku do kumaraja id soliwan do pogun? Poingkuro hal diti’d kaampayat diyolo?

MONGINTUTUN HAL DIT LOBI OPONTING

18. Nokuro tu okon ko osinang do popogulu’d hal di don rusod?

¹⁸ Poimpasi toko id ‘motingkopupuson do pomogunan,’ i pogi a osinang dot popogulu’d hal di don rusod. (2 Timotius 3:1) Oporlu’d toko momogompi kosusukupan do sampaganakan, nga okon ko asanang dot mogihum do karaja. A toko nogi manu’d papasaga do dapu lobi oponting id koposion toko. (1 Timotius 6:9, 10) I pogi poingkuro toko’d ‘momili hal dit lobi oponting’ om tontok diri nogi’d momogompi’d kosusukupan do sampaganakan toko?​—Pilipi 1:10.

19. Poingkuro toko kipomusarahan dit kopitimbang kokomoi’d karaja?

¹⁹ Pogondos no’d Kinorohingan miampai poimponu o ginawo. (Basao Boros dot Aralom 3:5, 6.) Koilo o Kinorohingan dot nunu ot kosusukupan toko om momusou Iyau dati. (Sinding 37:25; 1 Pitrus 5:7) Ka’d Baibol: ‘Kada pologoso dot oporinta di rumohian do tusin o koposi-posion dokoyu, suwai ko poumbagalon nopo i haro dot id dokoyu. Tu nokoboros o Kinorohingan dot, “A Ku iya pologoson, om a Ku iya tongkiadan.”’ (Ibrani 13:5) A i Yohuwah manu’d adalaan toko’d atangkabo kokomoi’d kosusukupan do sampaganakan toko. Ogumu kointalangan dit tinahak Dau dati dot momogonop do kosusukupan toko. (Matius 6:25-32) I pogi, a toko apatut do tumingkod do minsingilo’d Baibol, popinhabar, om rumikot id pitimungan sabap no’d kumaraja.​—Matius 24:14; Ibrani 10:24, 25.

20. Poingkuro toko’d osuhatan no’d masi?

²⁰ Poguluono no hal di don rusod. (Basao Matius 6:22, 23.) Mimang dot a abaal do papasaga’d tusin, koposion dit osonong, toi kakamot elektronik do kawawagu dot osiliu lobi oponting mantad ko piromutan toko miampai di Yohuwah. I pogi, nunu kouhup dati do popogulu hal di don rusod? Kada pongutang. Nga nung kitutang toi nokopongolos do tusin, pinggisom no’d osisikap do mambarai. Ondung a toko antaan-taan, dapu toko kapaganu’d ogumu o timpu om kinoris toko gisom dot aiso di timpu toko dot sumambayang, minsingilo Baibol, om popinhabar. I pogi, kada no ponimung dot ogumu o dapu. Nga apatut do minsingilo toko dot abagalan no’d kosusukupan miagal ko “haro po o taakanon om pakayan.” (1 Timotius 6:8) Apatut do sorisidon toko kopio o karalano’d koposion toko monikid timpu ondung kaanu’d toko popoingkawas karaja toko kumaa di Yohuwah toi amu.

21. Nokuro tu apatut toko’d papatantu nunu it poguluonon toko id koposion?

²¹ Potontuo poguluonon dit otopot. Apatut do abaal toko’d momoguno do timpu, kinoris, om dapu toko. Nung a toko antaan-taan, hal dit a kopio oponting miagal ko sinikulan toi tusin kapangahau do timpu toko. Ka’d Yesus: “Poguluonon no kopio dokoyu’d momusou o Pomorintaan do Kinorohingan.” (Matius 6:33) Nunu it pilion, koubasan, wonsoion monikid tadau, om it gompoton toko, popokito’d nunu kopio o poguluonon toko.

KARAJA DIT OPONTING KOPIO MONTOK DATI

22, 23. (a) Nunu karaja dit oponting kopio montok tulun do Kristian? (b) Nunu kouhup dati’d otood id karaja toko?

²² Kumaraja montok di Yohuwah om popinhabar nopo nga karaja dit oponting kopio montok dati. (Matius 24:14; 28:19, 20) Miagal di Yesus, minggisom toko’d papapanau karaja diti. Haro it mundaliu id koiyonon do suai it manu’d lobi ogumu o popinhabar. Haro nogi i minsingilo’d boros do suai moi’d kaanu iyolo popinhabar kumaa tulun di moboros do boros diti. Ponokiboros no kumaa diyolo it momonsoi hal diti, om pokisusui no diyolo nunu i nawayaan diyolo. Tantu no’d monusui iyolo diya dot koposion diyolo dit lobi’d olumaag om kirati.​—Basao Boros dot Aralom 10:22.

²³ Baino, kogumuan dati apatut do tumotos dot kumaraja do momogompi kosusukupan do sampaganakan. Kokito i Yohuwah do pinggisaman toko om mongunsikou do koinsanai dit wonsoion toko montok do sampaganakan toko. I pogi, nunu nopo karaja toko apatut do momit toko di Yohuwah om Yesus do minggisom do kumaraja. Soroho no dot karaja toko dit lobi oponting nopo nga kumaraja montok di Yohuwah om popinhabar. Hal diti kapanahak dati kataadan dit otopot.