Momonsoi Dit Otulid Id Nunu Nopo

1, 2. Nunu topurimanan di Yohuwah soira kokito’d pinggisaman toko’d momonsoi dit otulid?

SONGULUN tanak mamanau mantad sikul muli id walai. Nokokito yau dumpit it poimponu’d tusin id tana. Nunu wonsoion dau? Naanu dau o dumpit diri om pinoguli dau kumaa di sanganu. Soira’d nokorongou i tina do tanak diri kokomoi hal dilo, otood kopio i tina dau.

² Kogumuan do molohing otood soira’d otulid o tanak diyolo. I Yohuwah Tapa toko id surga ‘Kinorohingan dit otorodok,’ om Yau nga otood soira’d otulid toko. (Sinding 31:6) Manu toko’d “momonsoi dit otopot dot id suang do nunu nopo” moi’d kapasanang Dau. (Ibrani 13:18) Kaino intangai toko apat o karalano’d popokito’d kotulido id koposion, om kasanangan nung momonsoi toko miagal diri.

OTULID ID TINAN SONDIRI

3-5. (a) Poingkuro toko kanto kopongudut do tinan sondiri? (b) Nunu it kouhup dati do monorisid tinan sondiri miampai otulid?

³ Pogului’d otulid kumaa tulun suai, mositi’d otulid toko id tinan sondiri. Nga okon ko osinang kasai o hal diti. Di tabad koiso, tobpinai id sidang Laodikia a otulid montok tinan diyolo sondiri. Andasan diyolo kapasanang iyolo do Kinorohingan, nga otopot nopo om amu i. (Pinointalang 3:17) Iyati kanto nga a otulid id tinan sondiri miagal diyolo.

⁴ Ka’d Yakub: “Ondung haro o tulun do momusorou dot otorodok iyau dot id tugama, nga a indo dau oporinta o dila dau, om monipu no iyau’d tinan dau; om aiso i o guna di kotorodoko dau dot id tugama dau.” (Yakub 1:26) Mongudut toko tinan sondiri nung momusorou dot “kopomonsoi oku nopo dit osonong, a i Yohuwah tumogod nung sumoonu mongudut oku toi kikowoyo-woyoon dit araat.” Nunu o kouhup dati’d minsodu pomusarahan dit kasala miagal diti?

⁵ Soira mintong toko’d soromin, kokito toko’d poingkuro karaba-rabaso toko. Nga soira’d mambasa toko Baibol, okito toko nunu id suang do ginawo toko. Kouhup o Baibol dati do mongintutun kopio kokorisan om koluhayan toko moi’d kopomonsoi ponimbanan. (Basao Yakub 1:23-25.) Nga nung momusorou toko’d a kikoluhayan, a toko indo sumimban. I pogi, oporlu’d momoguno toko’d Baibol do monorisid tinan sondiri miampai otulid. (Koihadan 3:40; Hagai 1:5) Suai ko iri, oporlu nogi’d sumambayang toko do mokianu di Yohuwah dot monorisid dati om popokito’d koluhayan toko. (Sinding 139:23, 24) Sorohon no dot “araatan i Yohuwah tulun di momonsoi dot araat, nga ogirot o piromutan Dau id tulun di momonsoi dit otopot.”​—Boros dot Aralom 3:32, NW.

OTULID ID SAMPAGANAKAN

6. Nokuro tu apatut i misasawo do otulid kumaa’d tiso om tiso?

⁶ Monikid tulun mositi’d otulid id sampaganakan dau. Nung otulid i misasawo, kikotumbayaan iyolo kumaa’d tiso om tiso. Apatut minsodu iyolo mantad nunu nopo it a otulid, miagal ko kitopurimanan do muhang do tulun suai, mintong di sosomu, om kipiromutan dit a apatut miampai tulun suai. Intangai pogi nunu ka’d susuminding: “A oku i orohian do sumugku do tulun di gomponipu, om minsodu oku’d tulun di posiwot.” (Sinding 26:4) Ondung momusorou ko’d hal-hal dit aiso moral, iti nga miagal ko a otulid om mamaraag nogi’d pisasawaan nu.

7, 8. Poingkuro ko’d momoguno’d Baibol do monuduk do tangaanak do kopontingo kowoyoo di otulid?

⁷ Tangaanak nga apatut do minsingilo’d kopontingo do kowoyoo di otulid. Tongomolohing milo momoguno’d susuian do Baibol dot monuduk diyolo. Miagal ko suntu dit a otulid, i Akan it minanakau, i Gohasi it minongudut moi’d kaanu tusin, om i Yudas i minanakau tusin om i minongindaraat di Yesus montok 30 tusin do pirok.​—Yosua 6:17-19; 7:11-25; 2 Raja 5:14-16, 20-27; Matius 26:14, 15; Yohanis 12:6.

⁸ Id Baibol kisuntu nogi’d tulun di otulid, miagal ko i Yakub, minonuhu di tangaanak dau do popoguli tusin dit nokito diyolo, i Yipta om i tanak tondu dau, pinopootus do batos diyolo, om i Yesus it moboros kasai otopot mulong piya’d oligogon o koposion dau. (Kinawansayan 43:12; Gompomutus 11:30-40; Yohanis 18:3-11) Suntu-suntu diti kouhup do tangaanak dot mamarati’d oponting kopio kikowoyoo di otulid.

9. Poingkuro tongomolohing dit otulid kaampayat do tangaanak diyolo?

⁹ Tongomolohing, soroho no ponontudukan do Baibol dit oponting diti: “Monuduk ko nod tulun do suwai; nga nokuro tu a nu tudukan o diya’d ginawo? Mogodu ko’d wokon do manakau, om manakau ko indo iya!” (Rum 2:21) Ondung monuhu o molohing do tangaanak diyolo’d otulid, nga iyolo sondiri a otulid, iti koborulong do tangaanak diyolo. Nung oilaan di tangaanak do oudut i molohing diyolo mulong piya’d hal dit okooro, katanud kanto iyolo’d oudut. (Basao Lukas 16:10.) Nga nung otulid o molohing diyolo, iyolo nga otulid nogi.—Boros dot Aralom 22:6; Iposus 6:4.

OTULID ID SIDANG

10. Poingkuro’d otulid o koboro-boroso toko tontok do mogiboro-boros miampai’d tobpinai sopikotumbayaan?

¹⁰ Apatut nogi’d otulid toko kumaa’d tobpinai sopikotumbayaan. Nung a toko antaan-taan o boros toko osiliu doti’d boros dit mongindaraat. Nung asaru toko’d moboros hal dit amu toko oilaan o katapatan dau, koboros toko doti’d tudut. I pogi apatut dot “a nopo moro-boros.” (Boros dot Aralom 10:19) Kikowoyoo dit otulid okon ko komoyon dot milo toko moboros nunu nopo it osorou, oilaan, toi orongou toko. Mulong piya’d otopot o poboroson toko nga a i apatut do popimboros, tu hal dilo okon ko hal dati, om nogi a toko apatut do mimboros dit a kopongudsuur. (1 Tosolunika 4:11) Tulun di kikowoyoo dit araat moboros dot, “moboros oku nopo dit otopot.” Sobaagi’d susumamba di Yohuwah, koboroso toko mositi’d poposonong kasai’d ginawo.​—Basao Kolosi 4:6.

11, 12. (a) Poingkuro songulun it nokowonsoi’d dusa dit adalaan lobi’d karaat o kowoyoon? (b) Nunu poguhatan dit apatut do uhoton? (c) Poingkuro toko’d otulid kumaa’d organisasi di Yohuwah?

¹¹ Nonuan di Yohuwah o ponotua tonggungan dot momogompi sidang. I pogi apatut do otulid toko kumaa diyolo. Nokuro? Ondung kitoruol ko om rumuba do dukutur, polisokon nu nangku piipiro kopoilaan kokomoi toruol nu? Nung miagal dii, kaanu toi dokutur do monguhup diya? Ingkaa nogi, nung kopomonsoi toko’d dusa dit adalaan, a apatut do polisokon toko. Mositi’d posunudon toko di ponotua. (Sinding 12:3; Winonsoi 5:1-11) Nga poingkuro nung kopomonsoi dusa dit adalaan o tambalut nu? (Oturan 5:1) Polisokon nu nangku toi momusorou ko’d kouhup o ponotua di tambalut nu dot potonduli piromutan dau miampai di Yohuwah?​—Ibrani 13:17; Yakub 5:14, 15.

¹² Apatut nogi’d otulid toko kumaa’d organisasi di Yohuwah miagal ko, monuang toko’d kopoilaan kokomoi’d ruputan karaja popinhabaran, burang sumiliu’d porintis, om nogi burang do nunu nopo.​—Basao Boros dot Aralom 6:16-19.

13. Poingkuro toko’d otulid nung dumadagang toko miampai tobpinai sopikotumbayaan?

¹³ A apatut o tulun Kristian do popirolot karaja don pomogunan om sambaan kumaa di Yohuwah. Sobaagi’d suntu, a toko mogiboro-boros kokomoi karaja don pomogunan id walai pitimungan toi ko id popinhabaran. A toko nogi posiwat do papadagang kumaa’d tongotobpinai. Nung touki ko, apatut do tontuon nu timpu om pamagadsi nu. Posodia ko nogi kasanangan toi faedah dit pinatantu’d tundang-undang, miagal ko insurans kolidasan toi koundarangan miampai gadsi. (1 Timotius 5:18; Yakub 5:1-4) Nung pakaraja ko montok tobpinai sopikotumbayaan, kada kalansan dot poinlolobi o kosonongo diyolo montok diya. (Iposus 6:5-8) Apatut do kumaraja ko id timpu’d pointantu om papanau karaja dit pinatahak.​—2 Tosolunika 3:10.

14. Tulun Kristian dit orohian dumadagang miampai tobpinai sopikotumbayaan apatut do momonsoi’d nunu?

¹⁴ Poingkuro nung orohian toko’d dumadagang miampai tobpinai sopikotumbayaan, it kohompit nogi poloburan toi molos do kousinan? Apatut do momonsoi toko’d surat do pibatasan. Minoboros o Baibol do tontok di minomoli tana i Nabi Yoromia, minomonsoi iyau’d duo dolinan surat pomolian, minonuhu nogi yau sasi dot sumain iso do surat diti, om pinopi dau o koduo-duo dolinan do surat dilo. (Yoromia 32:9-12; intangai nogi Kinawansayan 23:16-20.) Soira’d momonsoi toko’d surat dot pibatasan, okon ko komoyon do a toko otumbayaan do tobpinai sopikotumbayaan toko. Hal diti kaanu’d mongilag do topurimanan dit negatif, kosindualan do ginawo, toi pisongkiwalan. Apatut do momusorou toko’d kosimbayanan do sidang lobi oponting ko mantad pidagangan toko.​—1 Korintus 6:1-8; Intangai Sinuratan id Tohuri 30.

OTULID ID POMOGUNAN DITI

15. Nunu topurimanan di Yohuwah montok tulun dit a otulid id padagangan?

¹⁵ Manu i Yohuwah do otulid toko kumaa’d koinsanai tulun kohompit nogi iyolo it okon ko Sasi-Sasi’d Yohuwah. Ka’d Baibol: ‘Araatan i Yohuwah do tulun di mamakai do timbangan dit a koontok. Nga asanangan Iyau do tulun di mamakai di timbangan di koontok.’ (Boros dot Aralom 11:1; 20:10, 23) Id maso Baibol, momoguno o tulun do timbangan soira’d papadagang, nga haro dumadagang dit monipu tulun miampai momoguno timbangan dit a koontok. Baino kogumuan nogi’d tulun a otulid id padagangan. Araatan kopio i Yohuwah tulun miagal diti.

16, 17. Nunu piipiro karalano toko’d popokito kotulidan id pomogunan do baino?

¹⁶ Koinsanai dati minggisom do momonsoi dit otulid, id poporiksaan id sikulan, mogihum karaja, monuang burang don pomogunan, om nunu nopo. Nga kogumuan do tulun kopuriman dot a kasala do monipu toi manahak kopoilaan dit a otopot. A toko apatut do osuaian do kowoyo-woyoon diyolo tu ka’d Baibol id tadau do kolimpupuson, kogumuan do tulun “tinan dau nopo o sorohon, adalaan do rumohian do tusin, . . . om a orohian dit osonong.’​—2 Timotius 3:1-5.

¹⁷ Somoonu osinang kopio o kokitanan tulun dit a otulid. (Sinding 73:1-8) Tulun Kristian atagakan doti do karaja, oudutan, toi indaraaton, tu popokito iyolo kowoyoon dit otulid. Nga kikasanangan o kowoyo-woyoon dit otulid. Nokuro?

KOTULIDAN KOPOGOWIT DO BARAKAT

18. Nokuro tu kigatang kopio ngaran dit osonong?

¹⁸ Nung songulun toko dit otulid om milo’d tumboyoon, kopogowit toko ngaran dit osonong om kigatang kopio. Koinsanai dati milo’d momonsoi ngaran dit osonong. (Mika 7:2) Otopot, piipiro tulun mongunsasangi kanto diya tu kikowoyo-woyoon ko dit otulid. Nga haro i kasai o tulun dit mongunsikou’d kowoyo-woyoon nu dit otulid om otumbayaan indo diya. Id pointongkop do pomogunan ointutunan kopio o Sasi-Sasi’d Yohuwah sobaagi’d tulun dit otulid. Ogumu nogi tulun dot orohian do manganu’d Sasi-Sasi’d Yohuwah kumaraja tu kikowoyo-woyoon iyolo’d otulid. Suai ko iri, a toko indo potingkodon dot kumaraja soira’d haro pakaraja dit uyungon tu a otulid.

19. Poingkuro kowoyo-woyoon dit otulid kaampayat do piromutan toko miampai di Yohuwah?

¹⁹ Soira’d momonsoi toko dit otulid, kaanu toko indo kogiiginowoo dit olidang om kosimbayanan do pomusarahan. Om osiliu toko’d miagal di Paulus do minoboros dot: “Oilaan i kopio dahai dot osonong o kopurimanan do ginawo dahai”. (Ibrani 13:18) It lobi oponting, mongunsikou kopio i Yohuwah do pinggisaman toko’d momonsoi dit otulid.​—Basao Sinding 15:1, 2; Boros dot Aralom 22:1.