Katalib Tadau’d Pisasawaan

1, 2. Nung kikobolingkangan o pisasawaan, komoyon nangku’d a no milo’d posonongon? Pointalango.

PISASAWAAN nopo nga nipuhawang mantad di Yohuwah it kopotood koposion do sosongulun. Nga, koinsanai pisasawaan miagal ko a opupusan o kobolingkangan, om a ogirot o piromutan miagal di gulu po.

² A toko apatut dot osuaian nung kotoguang toko’d kobolingkangan id pisasawaan. Nga iti okon ko komoyon dot a no milo’d posonongon o pisasawaan toko tu misasawo dit kikobolingkangan dit awagat kopio koihum i kasai dot ralan do popotonduli piromutan om popogirot pisasawaan diyolo. Poingkuro?

MINSOMOK DO KINOROHINGAN OM KORUHANG NU

3, 4. Nunu ot aantakan id pisasawaan?

³ Pisasawaan popiiso’d duo tulun dit misuai ot korohian, pomusarahan, tadon om koubasanan. I pogi, tumotos iyolo do mongintutun om mamarati’d tiso om tiso.

⁴ Solinaid do timpu, sumogit doti piromutan di misasawo, tu adalaan iyolo’d popogulu do dau’d tinan. I pogi, poingkuro iyolo’d kaanu potonduli kaagu do piromutan diyolo?

5. (a) Nunu o kouhup do tulun Kristian dot minsomok do koruhang dau? (b) Tumanud Ibrani 13:4, poingkuro toko momusorou kokomoi pisasawaan?

⁵ Minonuduk i Yohuwah di misasawo do karalano’d minsomok Dau om tiso om tiso. (Sinding 25:4; Yosaya 48:17, 18) Ka dau: ‘Mositi no do pokolidangon do koinsanai’d tulun o pisasawaan.’ (Ibrani 13:4) Manu i Yohuwah momusorou toko do pisasawaan apatut do pantangon, intirungan, om unsikohon.

TUPUS KUMAA DI YOHUWAH KOUHUP ID PISASAWAAN NU

6. Tumanud Matius 19:4-6, nunu pomusarahan di Yohuwah kokomoi’d pisasawaan?

⁶ I Yohuwah no pinopotimpuun do pisasawaan. Ka’d Yesus, “Iri no o kotongkiadan do kusai di tina om tapa dau om kopiiso i iyau di sawo dau, om iyolo nopondo goduwo om osiliu dot iso-iso, ka. Om okon noddi ko duwo po iyolo, suwai ko iso poo. Om iri no o kokuwaan do nunu nopo i nopiiso do Kinorohingan om a no koino-ino do pitongkiadon do tulun.” (Matius 19:4-6) Mantad di timpuni, manu i Yohuwah do poingompus om olumaag o pisasawaan do tongoulun.

7. Poingkuro i misasawo kopogirot dot pisasawaan diyolo?

⁷ Baino kotoguang i misasawo dot ogumu o koudipon mantad ko di gulu po. Somoonu kotoguang iyolo kobolingkangan dit awagat kopio gisom dot momusorou iyolo do a no milo’d posonongon. Nga ondung karati iyolo’d pomusarahan di Yohuwah kokomoi pisasawaan, kaanu iyolo’d popogirot do pisasawaan diyolo.​—1 Yohanis 5:3.

8, 9. (a) Soira’d apatut toko do tumanud pononsunudan di Yohuwah kokomoi pisasawaan? (b) Poingkuro toko’d popokito dot mongunsikou toko’d pisasawaan toko?

⁸ Manahak kasai i Yohuwah dati pononsunudan dit osonong. Miagal dit noroitan di tiinu, minomisunud Yau dati dot, ‘Mositi no do pokolidangon do koinsanai’d tulun o pisasawaan.’ (Ibrani 13:4; Gomponuduk 5:4) I pogi mulong piya’d asanang toi osusa, apatut toko do minggisom do tumanud tisuhu di Yohuwah.​—1 Tosolunika 1:2-3; Ibrani 6:10.

⁹ Tu mongunsikou toko’d pisasawaan toko, ilagon toko dot momonsoi toi moboros nunu nopo it karaag do pisasawaan diri. Om manu toko’d popogirot do piromutan id pisasawaan toko. Poingkuro?

PANTANGO NO PISASAWAAN NU MAYA’D KOBORO-BOROSO OM WONSOION NU

10, 11. (a) Nunu kobolingkangan dit koimbulai id piipiro pisasawaan? (b) Nokuro tu antaan-taan toko o koboro-boroso toko kumaa koruhang toko?

¹⁰ Haro mogisuaian karalano’d tulun do moninduol do koruhang dau. Koilo toko dot tulun Kristian a moninduol tiso om tiso miampai koboro-boroso diyolo. Ka’d songulun tondu: “Asaru i sawo ku moboros dit araat om opodos. Mimang a okito iti id tinan nga osindualan kopio ginawo ku soira moboros yau dot ‘Aiso kopio guna!’ toi ‘Monusa ko nopo doho.’” Songulun sawo moboros dot, sinawo dau asaru’d mongintigayam dau. Ka dau, “A oku mokinongou koboro-boroso di sinawo ku, i pogi a oku monongkiboros miampai dau om asaru oku alaid do muli mantad id karaja.” Oo, koboro-boroso dit araat om opodos kaanu’d moninduol do ginawo’d koruhang toko.

¹¹ Soira mongintingayam i misasawo’d tiso om tiso, iti moninduol dot ginawo om alaid kopio do lumingos. I pogi, a i Yohuwah orohian dit misasawo do moninduol tiso om tiso miampai koboro-boroso diyolo. Nga a nu kanto tinomod do poporuol do ginawo koruhang nu. Opurimanan nu doti dot osonong ko kumaa dau, nga nunu topurimanan dau? Nung kopokoruol o koboro-boroso nu do topurimanan dau, sumimban ko nangku?​—Galatia 5:15; basao Iposus 4:31.

12. Nunu kaampayat do piromutan nu miampai di Yohuwah?

¹² Koboro-boroso toko kumaa’d koruhang toko id walai toi id kogumuan kaampayat do piromutan toko miampai di Yohuwah. (Basao 1 Pitrus 3:7.) Yakub 1:26 poposorou dati dot: “Ondung haro o tulun do momusorou dot otorodok iyau dot id tugama, nga a indo dau oporinta o dila dau, om monipu no iyau’d tinan dau; om aiso i o guna di kotorodoko dau dot id tugama dau.”

13. Nunu suai karalano’d sosongulun koporuol do ginawo’d koruhang dau?

¹³ Tulun dit nakasawo oporlu’d koilo topurimanan do koruhang diyolo id nunu nopo. Sobaagi’d suntu, manahak ko nangku’d ogumu o timpu miampai’d tulun suai? Mulong piya momonsoi ko dit osonong, miagal ko popinhabar toi monguhup, kopuriman nangku i koruhang nu dot a podulion? Ka’d songulun tobpinai tondu: “Soira i sawo ku manahak ogumu o timpu om ponguhupan kumaa tobpinai tondu suai id sidang, kopuriman oku oruol o ginawo om a podulion.”

14. (a) Nunu katapatan it nopinsingilaan toko id Kinawansayan 2:24? (b) Nunu apatut do uhoton toko?

¹⁴ Sobaagi’d tulun Kristian, kitongunggan toko kumaa’d molohing toko om tobpinai-tobpinai id sidang. Nga soira’d kasawo toko, tonggungan toko dit oponting nopo nga kumaa’d koruhang toko. Ka’d Yohuwah, “kopiiso i iyau di sawo dau.” (Kinawansayan 2:24) Apatut do popogulu toko’d topurimanan do koruhang toko. Uhot pogi: “Ogonop toi timpu, ponguhupan, om tupus ku kumaa’d koruhang ku?”

15. Nokuro tu tulun Kristian dit nakasawo no, mongilag do kipiombolutan dit ogirot miampai tulun suai it okon ko koruhang dau?

¹⁵ Nung manahak ko’d ogumu timpu om ponguhupan kumaa tulun suai mantad ko koruhang nu, iti kaanu mamaraag do pisasawaan nu. Ogirot doti o piromutan nu’d miampai sosongulun gisom dot muhang ko dau. (Matius 5:28) Topurimanan miagal diti kounsub diya do momonsoi seks dit aiso moral.

“MOSITI NO DO MITORODOK KOPIO I MISASAWO”

16. Nunu ponuhuan do Baibol kokomoi’d pisasawaan?

¹⁶ Ka’d Baibol: “Mositi’ no do mitorodok kopio i misasawo. Tu tulun nopo di momonsoi do sosomu om i magampahu om hukuman i do Kinorohingan.” (Ibrani 13:4; Boros dot Aralom 5:18) Poingkuro toko’d mamantang om a monosomu do pisasawaan?

17. (a) Nunu pomusarahan do kogumuan tulun kokomoi’d magampahu? (b) Poingkuro pomusarahan tulun Kristian kokomoi’d magampahu?

¹⁷ Haro tulun momusorou dot a kasala do a tumorodok kumaa koruhang diyolo. Nga a toko apatut do momit do kowoyo-woyoon diti. Araatan kopio i Yohuwah dot seks dit aiso moral om i magampahu tu hal diti monosomu’d pisasawaan toko, mongintingayam di Yohuwah, sumaap do toturan Dau, om karaag do piombolutan toko miampai Dau. (Basao Rum 12:9; Ibrani 10:31; 12:29) Oo, oporlu toko’d minsodu nunu nopo it koimbayat dati do magampahu, kohompit nogi kipomusarahan do rumohian do tulun suai.​—Ayub 31:1.

18. (a) Nunu piagalan do magampahu om sumamba tingolig? (b) Nunu pomusarahan di Yohuwah kokomoi magampahu?

¹⁸ Nokoboros o Toturan di Musa dot magampahu nopo nga dusa dit adalaan, miagal nogi sumamba do tingolig. Tulun dit magampahu toi sumamba do tingolig hukumon do kapataion. (Oturan 20:2, 10) Nunu piagalan do magampahu om sumamba do tingolig? Sosongulun it sumamba do tingolig a otorodok kumaa di Yohuwah. Miagal nogi dii, sosongulun dit magampahu a otorodok kumaa koruhang dau. (Kinosoliwanan 19:5, 6; Ponugutan 5:9; basao Maliaki 2:14.) Atalang kopio dot magampahu nopo nga dusa dit adaalan id mato di Yohuwah.

19. Nunu it kopogirot do pinggisaman toko moi dot a magampahu?

¹⁹ Baino, pomusarahan di Yohuwah kokomoi magampahu a i nokosimban. A toko manu’d sumamba do tingolig om miagal nogi di a toko manu’d moninduol do koruhang toko. (Sinding 51:3, 6; Kolosi 3:5) Nung magampahu, komoyon dot a toko mamantang do pisasawaan toko, om nogi popokito’d a toko mamantang di Yohuwah.​—Intangai Sinuratan id Tohuri 26.

KARALANO’D POPOGIROT DO PISASAWAAN

20. Tumanud Boros dot Aralom 24:3, poingkuro toko popoingkakat pisasawaan dit ogirot?

²⁰ Poingkuro ko’d kopogirot do pisasawaan? Ka’d Baibol: “Kogiro-girot nopo do pisompiiyanan om toilaan om i kopisuhut.” (Boros dot Aralom 24:3) Pisasawaan miagal ko iso o walai. Haro walai dit aiso o suang toi aiso nunu nopo, om haro nogi walai dit osonong o kokitanan om pinolumis. Tulun dit kitoilaan momogompi’d pisasawaan dau dot ogirot om olumaag, miagal iso walai dit osonong o kokitanan om pinolumis.

21. Poingkuro toilaan kopogirot do pisasawaan?

²¹ Minoboros o Baibol dot: “Hinonggo nopo o haro o toilaan, om haro no o bilik di noponu do konunu-nunuan dit angagayo o gatang om olumis.” (Boros dot Aralom 24:4) Nunu it nopinsingilaan toko id Baibol, kouhup do popogirot do pisasawaan toko. (Rum 12:2; Pilipi 1:9) Basao no Baibol om kakamot babasaon miampai’d koruhang nu om powonsoion iri id pisasawaan nu. Pokitono no tupus, om pamantangan, om kowoyo-woyoon dit osonong. Pokianu no’d ponguhupan di Yohuwah do poposuni kowoyo-woyoon dit osonong om it kopogirot do pisasawaan nu om kapasanang diya dot upuson.​—Boros dot Aralom 15:16, 17; 1 Pitrus 1:7.

22. Nokuro tu apatut do popokito toko’d tupus om pamantangan kumaa’d koruhang toko?

²² Apatut tumotos toko’d momonsoi dit osonong miampai tupus om pamantangan kumaa’d koruhang toko. I pogi, kogirot indo pisasawaan toko om it lobi oponting kopotood toko’d ginawo di Yohuwah.​—Sinding 147:11; Rum 12:10.