‘ A’ ye to ka nin kɛ’
Hakilijigi lajɛn bena kɛ awirilikalo tile 5nan na
1. Mun na Hakilijigi lajɛn kɔrɔtanin lo?
1 ‘ A’ ye to ka nin kɛ walisa ka aw hakili to ne la.’ (Luka 22:19). O kumaw fɛ, Yesu ye cii di a ka kalandenw ma ko u k’u hakili jigi ale ka saya koo la. O saya kɛra saraka ye. Kunmabɔsara be koo caaman dafa. O kama, loon wɛrɛ si tɛ yen saan kɔnɔ min kɔrɔtanin lo kosɔbɛ kerecɛnw fɛ ka tɛmɛ Hakilijigi lajɛn loon kan. Ɲinan, o loon bena kɛ awirili tile 5nan na. Komi o loon be surunyana, an be se k’a yira Jehova la cogo di ko an b’a waleɲuman lɔn?—Kol. 3:15.
2. Kalan ni miirili be se k’an dɛmɛ cogo di an k’a yira ko an be ni waleɲumanlɔn ye Hakilijigi koo la?
2 I yɛrɛ labɛn: Koo minw kɔrɔtanin lo an fɛ, an ka teli k’an yɛrɛ labɛn u kama. Koo minw kɛra Yesu ka loon labanw na dugukolo kan, n’an be miiri o koow kan denbaya kɔnɔ, o bena an dɛmɛ k’an dusukun cogoya labɛn Hakilijigi lajɛn kama (Esd. 7:10). Examinons les Écritures chaque jour ani kalandiriye kɔnɔ, vɛrise damanin dira ka ɲɛsin Hakilijigi koo ma. Nka, vɛrise caaman wɛrɛw ani gafe Le plus grand homme ka kalansen minw ɲɛsinna o vɛrisew ma, olu be sɔrɔ saan 2011, feburu tile fɔlɔ ka La Tour de Garde kɔnɔ, ɲɛɛ 23-24.
3. An be se ka wagati caaman kɛ waajuli la cogo di k’a yira ko an be ni waleɲumanlɔn ye Hakilijigi koo la?
3 Waajuli kɛ: An be se fana k’an ka waleɲumanlɔn yira an kɛtɔ ka wagati caaman kɛ waajuli la (Luka 6:45). Duniɲa kuru bɛɛ kɔnɔ, an bena kanpaɲi dɔ daminɛ marisi tile 17nan na ka mɔgɔw weele ka na Hakilijigi lajɛn na. Yala i be se ka labɛn kɛ ka wagati caaman kɛ waajuli la, n’a sɔrɔ i ko piyɔniye kɔrɔsigi wa? Mun na aw tɛ baro kɛ o kan denbaya kɔnɔ aw ka gwa kɔnɔ batoli wagati la sufɛ?
4. N’an be na Hakilijigi lajɛn na, an be se ka nafa juman lo sɔrɔ o la?
4 N’an be na Hakilijigi lajɛn na saan o saan, o b’an nafa dɛ! Jehova ye ɲuman kɛ k’a Dencɛ kelenpe bangeli di k’a kɛ kunmabɔsara ye. N’an be miiri o koo la, dɔ be fara an ka ninsɔndiya n’an ka kanuya kan Ala koo la (Yuh. 3:16; 1 Yuh. 4:9, 10). O b’an lasun an kana ɲɛnamaya kɛ an yɛrɛw ye tugun (2 Kɔr. 5:14, 15). O b’an lasun fana an k’a ɲini ka Jehova tando bɛɛ ɲɛɛ na (Zab. 102:20-23). Tiɲɛn na, Jehova sagokɛla minw b’a waleɲuman lɔn, olu kɔrɔtɔnin lo awirilikalo tile 5nan ka se. O loon na, u bena sababu sɔrɔ ka ‘Matigi saya koo fɔ.’—1 Kɔr. 11:26.