Bibulukalan sɔrɔcogo duuru
1. N’a ka gwɛlɛ ka bibulukalan sɔrɔ an ka kiinw kɔnɔ, an man kan ka mun lo kɛ, ani mun na do?
1 Yala a ka gwɛlɛ i ma ka bibulukalan sɔrɔ wa? Kana i fari faga. Minw t’u fari faga Jehova sago kɛli la, a b’olu duga (Gal. 6:9). Fɛɛrɛ duuru dɔw filɛ jukɔrɔ minw be se k’i dɛmɛ.
2. An be se ka sin ka bibulukalan daminɛ cogo di?
2 Sin ka bibulukalan kofɔ: Mɔgɔ caaman b’a lɔn ko an be La Tour de Garde ni Réveillez-vous ! yira mɔgɔw la. N’a sɔrɔ u t’a kala ma ko an be bibulukalanw kɛ ni mɔgɔw ye fana. Waajuli kɛtɔ soo ni soo, mun na i tɛ sin ka bibulukalan kofɔ mɔgɔw ye ka filɛ? I be to ka taga bɔ makodon mɔgɔ minw ye, i be se fana k’u ɲininga n’u b’a fɛ ka bibulukalan kɛ. N’u ma sɔn, to ka taga gafew di u ma ani k’u dɛmɛ. Kabi saan caaman, balimacɛ dɔ tun be to ka taga zurunaliw di cɛɛ dɔ n’a muso ma. Loon dɔ, zurunali kuraw dinin kɔ u ma, a kɔsegira ko a be taga. Nka, a nana a hakili la k’u ɲininga ko: “A bena diya aw ye ka bibulukalan kɛ wa?” U ko ɔnhɔn! O ye balimacɛ kabakoya. Sisan, u batisera.
3. Mun na an man kan k’a miiri ko minw be na lajɛnw na, u bɛɛ lo be kalan kɛra ni balima dɔ ye? A ɲɛfɔ.
3 Minw be na lajɛnw na: Kana a miiri ko makodon mɔgɔ minw bɛɛ be na lajɛnw na, u bɛɛ be kalan kɛra ni balima dɔ ye ka ban. Balimacɛ dɔ y’a fɔ ko: “Mɔgɔ minw be na lajɛnw na, ne ye n’ ka bibulukalanw fanba sɔrɔ n’ kɛtɔ ka kuma n’olu ye.” Balimamuso dɔ gwɛrɛla muso dɔ la min be maloya ka kuma. O muso ka denmusow batisenin tun lo kafo kɔnɔ, a tun be na lajɛnw na kabi saan 15 ɲɔgɔn. A tun be na Masaya Boon na lajɛnw daminɛ yɛrɛ la ani u bannin kɔ dɔrɔn, a tun be bɔ ka taga. O muso sɔnna ka Bibulu kalan, ani a laban, a batisera. Balimamuso y’a sɛbɛ ko: “Ne be nimisa min na, o ye ko n’ ye kɔnɔni kɛ fɔɔ saan 15 ka sɔrɔ k’o muso ɲininga n’a be bibulukalan fɛ!”
4. Bibulu kalandenw ani balimaw be se k’i dɛmɛ cogo di ka bibulukalan sɔrɔ?
4 Kalanden lɔnbagaw: Balimamuso dɔ b’a jija ka dɔw bila sira u ka bibulukalanw na. Kalan bannin kɔ, a be sira deli kalan ɲɛminɛbaga fɛ ka kalanden ɲininga n’a lɔnbaga dɔw b’a fɛ ka bibulukalan kɛ fana. N’i be gafe Bibulu ka kalan dira i ka viziti dɔ ma, i be se k’a tigi ɲininga ko: “I be mɔgɔ wɛrɛ lɔn, a bena diya min ye ka gafe nin ɲɔgɔn sɔrɔ wa?” Balimaw be se ka makodon mɔgɔ dɔ sɔrɔ kiin kɔnɔ, nka u ka koow cogoya kosɔn, u tɛ se ka kalan kɛ n’a tigi ye. O kama, a sara balimaw na ko i be bibulukalan ɲinina.
5. Mun na a ka ɲi an ka an balimaw ka furuɲɔgɔnma dannabaliw ɲininga n’u b’a fɛ ka Bibulu kalan?
5 Furuɲɔgɔnma dannabaliw: Aw ka kafo kɔnɔ, yala weleweledala dɔw ka furuɲɔgɔnma ye dannabaliw ye wa? U dɔw tɛ sɔn ka baro kɛ Bibulu koo la n’u furuɲɔgɔnma dannabaga ye. Nka, n’a sɔrɔ u bena sɔn ka kalan kɛ ni mɔgɔ wɛrɛ lo y’a ɲini u fɛ. Tuma caaman na, a ka fisa an ka kuma fɔlɔ an balima fɛ walisa k’a lɔn cogo fisaman min na an be se k’o kɛ.
6. Nafa juman b’a la ka delili kɛ n’an be bibulukalan ɲinina?
6 Delili: An kana a miiri ko delili tɛ se ka dɔ ɲɛ an ye (Yak. 5:16). Jehova y’a daa di ko n’an ye fɛɛn dɔ deli a fɛ ka kɛɲɛ n’a sago ye, a bena an jaabi (1 Yuh. 5:14). Balimacɛ dɔ bolo tun degunnin lo kosɔbɛ, nka a tora ka delili kɛ walisa ka bibulukalan sɔrɔ. A muso tun be jɔrɔla ko a cɛɛ tɛna wagati sɔrɔ ka kalanden dɛmɛ sanko n’o kalanden ka kunkow ka ca. O kama, a tora ka Jehova deli o koo la ani a y’a ɲini a fɛ a k’ale cɛɛ dɛmɛ ka bibulukalan dɔ sɔrɔ. Lɔgɔkun fila ɲɔgɔn o kɔ, Jehova y’u ka deliliw jaabi. Piyɔniye dɔ ye cɛɛ dɔ sɔrɔ min b’a fɛ ka Bibulu kalan. A y’o cɛɛ kalifa balimacɛ ma. Balimacɛ muso y’a sɛbɛ ko: “Mɔgɔ o mɔgɔ b’a miiri ko a bolo degunnin lo kojugu ka bibulukalan kɛ, ne b’a fɔ o tigi ye ko: I k’i haminanko tigitigi fɔ Jehova ye ani kana delili dabila. An ye ninsɔndiyaba sɔrɔ an tun tɛ miiri min na.” N’i be i jija, n’a sɔrɔ e fana bena bibulukalan dɔ sɔrɔ ani i ninsɔn bena diya ka mɔgɔ dɔ dɛmɛ a ka sira ta “min bɛ taa ɲɛnamaya la.”—Mat. 7:13, 14.