Yɔrɔ 4nan: An ka bibulukalanw kɛ minw be ɲɛtaga sɔrɔ
An ka kalanden dege kalan labɛncogo la
1 Kalanden min be kɔn ka kalan labɛn, n’a be jaabiliw jukɔrɔla ci, ani a b’a ɲini ka jaabiliw di a yɛrɛ ka kumacogo la, o kalanden ka teli ka ɲɛtaga kɛ joona Alakow ta fan fɛ. O kama, kalan juu mana sigi ka ban, an ka kalansen kelen labɛn ɲɔgɔn fɛ ni kalanden ye walisa a ka kalan labɛncogo kɔrɔsi. Kalanden caamanba mako bena kɛ a la an ka sapitiri wala kalansen kuturu kelen bɛɛ labɛn n’u ye.
2 Ka jaabiliw jukɔrɔlaw ci ani ka sɛbɛriw kɛ dakunw dafɛlaw la: A ɲɛfɔ kalanden ye cogo min na a be se ka jaabiliw sɔrɔ minw tilenna ka sin ɲiningali sɛbɛnenw ma. Ile yɛrɛ be baara kɛ ni gafe min ye k’a kalan, o yira a la walisa a k’a ye cogo min na i ye daɲɛw ni kumasen jɔnjɔnw jukɔrɔlaw ci. Kalan lajɛtɔ n’a ye, n’a sɔrɔ a bena a ɲini k’i ladegi ka hakilinata jɔnjɔnw dɔrɔn jukɔrɔla ci minw bena a dɛmɛ k’a hakili jigi jaabiliw la (Luka 6:40). O kɔ, a ɲini a fɛ a ka jaabiliw di a yɛrɛ ka kuma fɔcogo la. O bena i dɛmɛ i k’a filɛ n’a be kalan faamu koɲuman.
3 Vɛrise dɔw dira dakunw kɔnɔ nka u kɔnɔnakow ma sɛbɛ. A kɔrɔtalen be kosɔbɛ kalanden k’u lajɛ koɲuman a ka kalan labɛntɔ (Kew. 17:11). A dɛmɛ a k’a faamu k’o vɛrise kelen kelen be dakun ka hakilinata dɔ kɔrɔta. A yira a la cogo min na a be se ka miiriya surunw sɛbɛ dakunw dafɛlaw la. A fɔ a ye ka sinsin a kan ko a be koo minw kalanna, u basiginen be Bibulu lo kan. Kalan kɛtɔ n’a ye, a jagwɛlɛya a ka baara kɛ caaman ni vɛrisew ye, minw dira dakun kɔnɔ.
4 Hakilinata kunbabaw lajɛli, ani segikanni: Sanni kalanden k’a daminɛ ka kalansen labɛn ka dunya, a ka ɲi a ka kalan ka hakilinata kunbabaw lajɛ fɔlɔ. A yira a la ko a be se k’o kɛ n’a b’a daminɛ ka sapitiri tɔgɔ, dantigɛliw, jaaw ni tagamasiɲɛw lajɛ ka surunya. A ɲɛfɔ a ye ko sanni a ka kalan labɛnni kuncɛ, a ka ɲi a ka wagati dɔ ta ka kalan ka hakilinata kunbabaw lajɛ. A be se ka tɛmɛ segikanni koorilen fɛ k’o kɛ n’o y’a sɔrɔ o koorilen be sɔrɔ gafe kɔnɔ. O segikanni bena a dɛmɛ ka kunnafoniw mara a hakili la.
5 N’an be kalanden dege a k’a yɛrɛ labɛn koɲuman a ka kalan kama, o bena a dɛmɛ k’a daa don kosɔbɛ kafo ka lajɛnw na. O fana bena a dɛmɛ a ka deli kalan kɛcogo la. Wagati jan o kɔfɛ, o delinanko bena a mako ɲɛ hali n’a nana tila a ka kalan na n’an ye.