Lɔlɔ̃ si Ƒo Ðesiaɖe Ta

WOÐE Helagbe me nya a·gaʹpe gɔme le Kristotɔwo ƒe Hela Ŋɔŋlɔawo, alo Nubabla Yeyea, ƒe akpa gãtɔ me be “lɔlɔ̃.”

Numekugbalẽ si nye Insight on the Scripturesa gblɔ le eƒe nya ma gɔmeɖeɖe me be: “[A·gaʹpe] menye seselelãme si gbɔ eme, si wotu ɖe ƒomedodo si le ame nɔewo dome dzro ko dzi la ɖeɖe fia, abe alesi wosusunɛ zi geɖe ene o, ke boŋ enye agbenyuinɔnɔ alo hadome ƒe lɔlɔ̃ si wotu ɖe tameɖoɖo kplikpaa dzi be woawɔ ɖe gɔmeɖose, dɔdasi, kple nɔnɔme nyui si dze ame la dzi, ahatsɔ anukwareɖiɖi anɔ ame kemɛa ƒe nyui dim le nusiwo nyo la me. A·gaʹpe (lɔlɔ̃) nana woɖua ame nɔewo dome fulélewo dzi eye meɖea mɔ gbeɖe be fuléle siawo nana akpa ɖeka naɖe asi le gɔmeɖose dzɔdzɔewo ŋu ahawɔ wɔɖenui o.”

A·gaʹpe ate ŋu alɔ seselelãme deto hã ɖe eme. Apostolo Petro xlɔ̃ nu be: ‘Mitsɔ lɔlɔ̃ [a·gaʹpe] lɔ̃ mia nɔewo vevie.’ (Petro I, 4:8) Eyata woate ŋu agblɔ be a·gaʹpe lɔ dzi kple susu siaa ɖe eme. Màdi be yeadzro mawunyakpukpui aɖewo siwo ɖe lɔlɔ̃ si ƒo ɖesiaɖe ta sia ƒe ŋusẽ kple eƒe goglome fia la me oa? Mawunyakpukpui siawo akpe ɖe ŋuwò: Mateo 5:43-47; Yohanes 15:12, 13; Romatɔwo 13:8-10; Efesotɔwo 5:2, 25, 28; Yohanes I, 3:15-18; 4:16-21.

[Etenuŋɔŋlɔwo]