Ka Ðe “Anyigba Blibo La Ƒe Ʋɔnudrɔ̃la” Si Nye Nublanuikpɔla La Dzi!

1. Nu vevi kae Yehowa fia Abraham si faa akɔ na ame?

MAWU ƒo nu to eƒe dɔla aɖe dzi gblɔ na Abraham be yeatsrɔ̃ Sodom kple Gomora. Nya mawo ɖe fu na nuteƒewɔla Abraham vevie. Ebia be: “Ðe nàtsrɔ̃ ame dzɔdzɔewo kpe ɖe ame vɔ̃ɖiwo ŋua? . . . Ðe anyigba blibo la ƒe Ʋɔnudrɔ̃la la mawɔ nu dzɔdzɔe oa?” Yehowa gbɔ dzi ɖi fia nu vevi aɖe exɔlɔ̃ Abraham; eyae nye be: Mawu matsrɔ̃ ame dzɔdzɔe akpɔ gbeɖe o. Abraham maŋlɔ dzeɖoɖo ma be akpɔ o. Nufiame si le eme la ɖea vi na mí eye wòfaa akɔ na mí egbea.—1 Mose 18:​23-33.

2. Aleke míawɔ aka ɖe edzi be Yehowa drɔ̃a ʋɔnu dzɔdzɔe ɣesiaɣi eye wòkpɔa nublanui?

² Aleke míawɔ aka ɖe edzi be Yehowa drɔ̃a ʋɔnu dzɔdzɔe ɣesiaɣi eye wòkpɔa nublanui? Míate ŋu aka ɖe edzi elabe míenya be “Yehowa . . . kpɔa keke dzi me ke.” (1 Sam. 16:7) Le nyateƒe mea, enya “amegbetɔviwo katã ƒe dzi.” (1 Fia. 8:39; 1 Kron. 28:9) Esia wɔ nuku ŋutɔ! Esi Yehowa ƒe susuwo kɔ wu amegbetɔwo ƒe susuwo taa, míate ŋu ase eƒe ʋɔnudɔdrɔ̃wo gɔme bliboe akpɔ o. Ema ta esɔ be gbɔgbɔ ʋã apostolo Paulo wògblɔ be, Yehowa Mawu ƒe “ʋɔnudɔdrɔ̃wo me dzodzro tsitotsito meli o!”—Rom. 11:33.

3-4. Biabia kawoe ate ŋu anɔ ame aɖewo si, eye nu ka mee míadzro le nyati sia me? (Yohanes 5:​28, 29)

³ Togbɔ be míese egɔme alea hã, biabia aɖewo anya nɔ ame aɖewo si abe esiwo tɔgbi Abraham bia ene. Le kpɔɖeŋu me: ‘Ðe mɔnukpɔkpɔ ate ŋu asu amewo abe Sodom kple Gomora tɔ siwo Yehowa tsrɔ̃ si be woagava nɔ agbe akea? Ðe wo dometɔ aɖewo anɔ “ame madzɔmadzɔ,” siwo woafɔ ɖe tsitre la domea?’—Dɔw. 24:15.

⁴ Mianya ɖo ŋku edzi be nyitsɔ laa la, gɔmesese yeye va su mía si ku ɖe “agbe ƒe tsitretsitsi” kple “ʋɔnudɔdrɔ̃ ƒe tsitretsitsi” ŋu.a (Xlẽ Yohanes 5:​28, 29.) Numekɔkɔ yeye ma na míegase nu bubu aɖewo gɔme, si me míadzro le nyati sia kple esi akplɔe ɖo me. Gbã la, míadzro nu siwo mímenya ku ɖe Yehowa ƒe ʋɔnu dzɔdzɔe dɔdrɔ̃ ŋu o me, eyome míadzro nu siwo míenya hã me.

NU SI MÍENYA O

5. Nya kae míaƒe agbalẽwo gblɔ va yi tso ame siwo Mawu tsrɔ̃ le Sodom kple Gomora ŋu?

⁵ Le ƒe siwo va yi mea, míaƒe agbalẽwo gblɔ nu si adzɔ ɖe ame siwo Yehowa drɔ̃ ʋɔnu be wonye ame madzɔmadzɔwo dzi. Míegblɔ le míaƒe agbalẽwo me be ame siwo Yehowa ŋutɔ tsrɔ̃, abe Sodom kple Gomora tɔwo ene la, womagafɔ wo ɖe tsitre o. Gake esi míedo gbe ɖa eye míeku nu me tso nyaa ŋu yi ŋgɔe la, míekpɔe be kakaɖedzi mele nya ma ŋu o. Nu ka tae?

6. Ame madzɔmadzɔ siwo Yehowa tsrɔ̃ dometɔ aɖewo ɖe, eye nu kae míenya o?

⁶ Biblia ƒo nu tso nudzɔdzɔ bubu aɖewo ŋu siwo me Yehowa drɔ̃ ʋɔnu ame madzɔmadzɔwo le eye wòtsrɔ̃ wo. Le kpɔɖeŋu me, bu ame gbogbo siwo tsrɔ̃ le Tsiɖɔɖɔa me, dukɔ adre siwo wòna eƒe amewo tsrɔ̃ le Ŋugbedodonyigbaa dzi, alo Asiriatɔwo ƒe asrafo 185,000 siwo eƒe dɔla aɖe tsrɔ̃ le zã ɖeka mea ŋu kpɔ. (1 Mose 7:23; 5 Mose 7:​1-3; Yes. 37:​36, 37) Le nudzɔdzɔ siawo katã mea, ɖe Biblia ɖe eme tsitotsito be esi wònye Yehowa ŋutɔe tsrɔ̃ ame siawo ta la, wo dometɔ ɖe sia ɖe tsrɔ̃ ɖikaa eye womagafɔ wo ɖe tsitre oa? Biblia megblɔe o.

7. Nu kae mímenya tso ame siwo wotsrɔ̃ le Tsiɖɔɖɔa me alo ame siwo wotsrɔ̃ le Kanaan-nyigba dzi ŋu o? (Kpɔ nɔnɔmetata .)

⁷ Mímenya ale si Yehowa drɔ̃ ʋɔnu ame ɖekaɖeka siwo wòtsrɔ̃ le nudzɔdzɔ mawo me o; eye mímenya ne mɔnukpɔkpɔ su ame mawo si wosrɔ̃ nu tso Yehowa ŋu be woatrɔ dzi me o. Esi Biblia ƒo nu tso Tsiɖɔɖɔa ŋua, egblɔ be Noa nye “dzɔdzɔenyenye ƒe gbeƒãɖela.” (2 Pet. 2:5) Gake Biblia megblɔ be esime Noa nɔ aɖakaʋu gã ma kpam la, edze agbagba be yeaɖe gbeƒã na ame sia ame si nɔ anyigba dzi ɣemaɣi o. Nenema kee mímenya ne mɔnukpɔkpɔa su dukɔ siwo nɔ Kanaan-nyigba dzi siwo nɔ nu gbegblẽ wɔm si be woasrɔ̃ nu tso Yehowa ŋu eye woatrɔ woƒe agbenɔnɔ o.

8. Nu kae mímenya tso Sodom kple Gomora tɔwo ŋu o?

⁸ Ke Sodom kple Gomora tɔwo hã ɖe? Ame dzɔdzɔe si ŋkɔe nye Lot nɔ du ma me. Gake ɖe míenya ne Lot ɖe gbeƒã na wo katã? Ao, míenya o. Wo vɔ̃ɖi ya, gake ɖe wo dometɔ ɖe sia ɖe nya nyui kple vɔ̃a? Ðo ŋku edzi be ameha aɖewo va be yewoadɔ Lot ƒe amedzrowo gbɔ sesẽe. Biblia gblɔ be ame siwo va la “tso ŋutsuviwo dzi va se ɖe amegãɖeɖiwo dzi.” (1 Mose 19:4; 2 Pet. 2:7) Ðe míate ŋu agblɔe kple kakaɖedzi be Yehowa, Mawu nublanuikpɔla, atso nya me be yemafɔ ame mawo dometɔ aɖeke ɖe tsitre oa? Nya lae nye be ame dzɔdzɔe siwo le dua me la mede ewo gɔ̃ hã o. (1 Mose 18:32) Eya ta ame madzɔmadzɔwoe wonye, eye Yehowa tɔ dzɔ be wòtsrɔ̃ wo. Gake ɖe míate ŋu anɔ te ɖe ema dzi agblɔ be, womafɔ wo dometɔ aɖeke ɖe tsitre, ne wole “ame madzɔmadzɔwo” fɔm ɖe tsitre oa? Míate ŋu agblɔe kple kakaɖedzi o!

9. Nu kae mímenya tso Salomo ŋu o?

⁹ Gake le Biblia mea, ame dzɔdzɔe aɖewo hã va zu ame madzɔmadzɔwo. Wo dometɔ ɖekae nye Fia Salomo. Enya Yehowa kple ale si wòle be wòasubɔe eye Yehowa yrae geɖe; gake emegbea, Salomo va subɔ alakpamawuwo. Eƒe nu vɔ̃wo na Yehowa do dziku ɖe eŋu eye dukɔa kpe fu ƒe alafa geɖe. Nyateƒee, Ŋɔŋlɔawo gblɔ be “wotsɔ Salomo mlɔ tɔgbuiawo gbɔ,” afi si woɖi Fia David kple ame dzɔdzɔe bubuwo hã ɖo. (1 Fia. 11:​5-9, 43; 2 Fia. 23:13) Gake ɖe afi si woɖii ɖo nye kpeɖodzi be woafɔe ɖe tsitrea? Biblia megblɔe o. Ðewohĩ ame aɖewo ƒe susu ayi Biblia ƒe nya siawo dzi be, “ame si ku la, wotso afia nɛ ɖee tso eƒe nu vɔ̃ me.” (Rom. 6:7) Biblia gblɔ nya ma ya, gake mefia be ame sia ame si kue woafɔ ɖe tsitre, abe ke ɖe wodze na agbe yeye ma godoo ene o. Nunanae tsitretsitsia nye tso mía Mawu lɔ̃amea gbɔ. Ame siwo wòdi be yeana mɔnukpɔkpɔa ale be woate ŋu anɔ agbe asubɔ ye tegbee lae wòafɔ ɖe tsitre. (Hiob 14:​13, 14; Yoh. 6:44) Ðe tsitretsitsi ƒe nunana sia asu Salomo sia? Míenya o; Yehowa koe nya. Nu si míenyae nye be, Yehowa awɔ nu si le eteƒe.

NU SI MÍENYA

10. Ðe Yehowa dina be yeatsrɔ̃ amegbetɔwoa? Ðe eme. (Ezekiel 33:11) (Kpɔ nɔnɔmetataa hã.)

¹⁰ Xlẽ Ezekiel 33:11. Yehowa na míenya ale si wòsena le eɖokui me ne ele ʋɔnu drɔ̃m amewo. Gbɔgbɔ ʋã apostolo Petro wògblɔ nya siwo tɔgbi nyagblɔɖila Ezekiel gblɔ. Egblɔ be: “Yehowa . . . medi be ame aɖeke natsrɔ̃ o.” (2 Pet. 3:9) Nyateƒenya ma faa akɔ na mí, ena míenya be Yehowa metsɔa dzitsitsi tsrɔ̃a amewo ɖikaa o, negbe ɖe susu nyui aɖe li si tae wòawɔe nenema. Eƒe nublanuikpɔkpɔ sɔ gbɔ, eye ekpɔa nublanui ɣesiaɣi si wòhiã.

11. Ame kawoe womafɔ ɖe tsitre o, eye aleke míewɔ nya?

¹¹ Nu kae míenya tso ame siwo womafɔ ɖe tsitre o ŋu? Wo dometɔ ʋɛ aɖewo ko ŋue Biblia ƒo nu tsoe.b Yesu na eme kɔ be womafɔ Yuda Iskariot ɖe tsitre o.c (Marko 14:21; kpɔ Yohanes 17:12 hã.) Yuda Iskariot nyae be nu si wɔm yenɔ la nye tsitretsitsi ɖe Yehowa Mawu kple Via ŋu, gake eɖoe koŋ wɔe.d (Kpɔ Marko 3:29.) Yesu gblɔ tso subɔsubɔhakplɔla siwo tsi tre ɖe eŋu la dometɔ aɖewo hã ŋu be, womafɔ wo ɖe tsitre o. (Mat. 23:33) Eye apostolo Paulo xlɔ̃ nu Kristotɔwo be womafɔ xɔsegbela siwo metrɔ dzi me o la ɖe tsitre o.—Heb. 6:​4-8; 10:29.

12. Nu kae míenya tso Yehowa ƒe nublanuikpɔkpɔ ŋu? Gblɔ eƒe kpɔɖeŋu.

¹² Ke nu kae míenya tso Yehowa ƒe nublanuikpɔkpɔ ŋu? Aleke wòɖee fia be yemedi be “ame aɖeke natsrɔ̃ o”? Bu ale si wòkpɔ nublanui na ame aɖewo siwo wɔ nu vɔ̃ gãwo la ŋu kpɔ. Fia David wɔ nu vɔ̃ gãwo; ewɔ ahasi eye wòwu ame hã. Gake David trɔ dzi me, eya ta Yehowa kpɔ nublanui nɛ eye wòtsɔe kee. (2 Sam. 12:​1-13) Fia Manase wɔ nu vɔ̃ dziŋɔ̃wo le eƒe agbenɔnɔ ƒe akpa gãtɔ. Gake esi wòtrɔ dzi mea, Yehowa kpɔ nu siwo dzi wòanɔ te ɖo akpɔ nublanui nɛ eye wòatsɔ akee. (2 Kron. 33:​9-16) Kpɔɖeŋu siawo ɖoa ŋku edzi na mí be Yehowa kpɔa nublanui ne ekpɔ nane si dzi wòate ŋu anɔ te ɖo atsɔ ake. Yehowa afɔ wo ɖe tsitre elabe wolɔ̃ ɖe edzi be yewowɔ nu vɔ̃ eye wotrɔ dzi me.

13. (a) Nu ka tae Yehowa kpɔ nublanui na Niniwetɔwo? (b) Nya kae Yesu va gblɔ emegbe tso Niniwetɔwo ŋu?

¹³ Míenya hã be Yehowa kpɔ nublanui na Niniwetɔwo. Mawu gblɔ na Yona be: Woƒe “nu vɔ̃ɖi wɔwɔ va ɖo ŋkunyeme.” Gake esi wotrɔ dzi mea, Yehowa lɔ̃ faa tsɔ woƒe nu vɔ̃wo ke wo. Yona ya do dziku be Yehowa kpɔ nublanui na wo. Eva hiã be Mawu naɖo ŋku edzi na eƒe nyagblɔɖilaa be Niniwetɔwo menya “nyui kple vɔ̃ o.” (Yona 1:​1, 2; 3:10; 4:​9-11) Emegbe Yesu zã Niniwetɔwo tsɔ fia nu mí tso ale si Yehowa drɔ̃a ʋɔnu dzɔdzɔe eye wòkpɔa nublanui ŋu. Yesu gblɔ be Niniwetɔ siwo trɔ dzi me “afɔ ɖe tsitre le ʋɔnudrɔ̃ɣi la.”—Mat. 12:41.

14. Nu kae “ʋɔnudɔdrɔ̃ ƒe tsitretsitsi” la afia na Niniwetɔwo?

¹⁴ Nu kae nya si Yesu gblɔ be ‘woafɔ’ Niniwetɔwo “ɖe tsitre le ʋɔnudrɔ̃ɣi la” fia? Yesu gblɔ be “ʋɔnudɔdrɔ̃ ƒe tsitretsitsi” aɖe le ŋgɔ. (Yoh. 5:29) Enɔ nu ƒom tso eƒe Ƒe Akpe Ðeka Dziɖuɣia ŋu, esime woafɔ “ame dzɔdzɔewo kple ame madzɔmadzɔwo” siaa ɖe tsitre. (Dɔw. 24:15) Le ame madzɔmadzɔwo gomea, woafɔ wo ɖe tsitre na “ʋɔnudɔdrɔ̃ ƒe tsitretsitsi.” Esia fia be Yehowa kple Yesu anɔ ŋku lém ɖe wo ŋu akpɔe ɖa be, woaɖo to eye woawɔ ɖe nu si wosrɔ̃ dzi hã. Ne wofɔ Niniwetɔ aɖe ɖe tsitre eye wògbe be yemasubɔ Yehowa o la, Yehowa maɖe mɔ nɛ be wòayi edzi anɔ agbe o. (Yes. 65:20) Gake ame siwo katã tiae be yewoasubɔ Yehowa eye yewoawɔ nuteƒe nɛ la, mɔnukpɔkpɔ asu wo si be woanɔ agbe tegbee!—Dan. 12:2.

15. (a) Nu ka tae mele be míagblɔ be womafɔ ame siwo wotsrɔ̃ le Sodom kple Gomora la dometɔ aɖeke ɖe tsitre o? (b) Aleke wòle be míase nya siwo le Yuda 7 la gɔmee? (Kpɔ aɖaka si nye “Nu Kae Yuda Ƒe Nyawo Fia?”)

¹⁵ Esi Yesu nɔ nu ƒom tso Sodom kple Gomora tɔwo ŋua, egblɔ be anɔ bɔbɔe na wo “le Ʋɔnudrɔ̃gbe la” wu ame siwo gbe ye kple yeƒe nufiafiawo. (Mat. 10:​14, 15; 11:​23, 24; Luka 10:12) Eƒe nya siawo gɔme ɖe? Ðewohĩ míasusui be kpɔɖeŋunyagbɔgblɔ aɖe koe nya sia nye. Gake nu ŋutɔŋutɔe, abe ale si ko nya si wògblɔ tso Niniwetɔwo ŋu be woafɔ “le Ʋɔnudrɔ̃gbe la” hã nye nu ŋutɔŋutɔ ene. Eya ta kakaɖedzi li be “Ʋɔnudrɔ̃gbe” kple “Ʋɔnudrɔ̃ɣi” siwo ŋu wòƒo nu tsoe le nudzɔdzɔ evea siaa me la nye nu ɖeka. Azɔ ɖo ŋku nya si Yesu gblɔ tso “ʋɔnudɔdrɔ̃ ƒe tsitretsitsi” la ŋu dzi. Egblɔ be woafɔ “ame siwo wɔ nu vlowo la” hã ɖe tsitre. (Yoh. 5:29) Sodom kple Gomora tɔwo hã wɔ nu gbegblẽwo abe Niniwetɔwo ke ene, gake mɔnukpɔkpɔ su Niniwetɔwo ya si wotrɔ dzi me. Eya ta edze abe mɔkpɔkpɔ aɖe li na Sodom kple Gomora tɔwo ene. Ate ŋu adzɔ be woafɔ Sodom kple Gomora tɔ aɖewo ɖe tsitre eye mɔnukpɔkpɔ asu mía si be míafia nu wo tso Yehowa kple Yesu Kristo ŋu.

16. Nu ka dzie Yehowa anɔ te ɖo atso nya me be yeafɔ ame aɖe ɖe tsitre alo yemafɔe ɖe tsitre o? (Yeremiya 17:10)

¹⁶ Xlẽ Yeremiya 17:10. Nu si míenya tso ale si Yehowa drɔ̃a ʋɔnui ŋu dze le mawunyakpukpui sia me. Eyae nye be ‘Yehowae dzroa dziwo me, eye wòdoa dzimesusuwo kpɔna.’ Eya ta le tsitretsitsi si gbɔna mea, aɖo “eteƒe na ame sia ame ɖe eƒe zɔzɔme nu,” abe ale si ko wòwɔnɛ ɣesiaɣi ene. Ne Yehowa kpɔ be ele be yeatsrɔ̃ ame aɖea, atsrɔ̃e. Gake ne ekpɔ nane si dzi wòanɔ te ɖo akpɔ nublanui hã la, awɔe. Eya ta mele be míasusui be womafɔ ame aɖewo ɖe tsitre o, negbe ɖee Biblia tɔ asi wo dzi tẽe!

“ANYIGBA BLIBO LA ƑE ƲƆNUDRƆ̃LA” AWƆ “NU DZƆDZƆE”

17. Nu kae ava dzɔ ɖe ame siwo ku la dzi?

¹⁷ Ame miliɔn gbogbo aɖewo ku tso esime Adam kple Xawa wɔ ɖeka kple Satana wodze aglã ɖe Yehowa Mawu ŋu. “Futɔ” vɔ̃ɖi aɖee “ku” nye! (1 Kor. 15:26) Nu kae ava dzɔ ɖe ame siwo katã ku la dzi? Woafɔ Kristo yomedzela wɔnuteƒe ʋɛ aɖewo siwo ƒe xexlẽmee nye 144,000 ɖe tsitre be woava nɔ agbe le dziƒo eye womagaku akpɔ o. (Nyaɖ. 14:1) Woafɔ Yehowa subɔla wɔnuteƒewo ɖe tsitre le “ame dzɔdzɔewo ƒe tsitretsitsi” la me. Ne wowɔ nu dzɔdzɔe le Kristo ƒe Ƒe Akpe Ðeka Dziɖuɖua kple dodokpɔ mamlɛa me la, woayi edzi anɔ agbe tegbee. (Dan. 12:13; Heb. 12:1) Azɔ hã, le Ƒe Akpe Ðeka Dziɖuɖua mea, woafɔ “ame madzɔmadzɔwo,” siwo nye ame siwo mesubɔ Yehowa o alo “ame siwo wɔ nu vlowo” la hã ɖe tsitre eye mɔnukpɔkpɔ asu wo si be woatrɔ woƒe agbenɔnɔ eye woava subɔ Yehowa. (Luka 23:​42, 43) Gake ame aɖewo dze aglã ɖe Yehowa kple eƒe tameɖoɖo ŋu, eye wo vɔ̃ɖi ale gbegbe be etso nya me be yemafɔ wo ɖe tsitre kura koŋ o.—Luka 12:​4, 5.

18-19. (a) Nu ka tae míate ŋu aka ɖe ale si Yehowa adrɔ̃ ʋɔnu ame siwo ku la dzi? (Yesaya 55:​8, 9) (b) Nu ka mee míadzro le nyati si kplɔe ɖo me?

¹⁸ Ðe susu nyuiwo li siwo tae míaka ɖe Yehowa ƒe ʋɔnudɔdrɔ̃wo katã, esiwo gɔme míese kple esiwo gɔme mímese o dzia? Ɛ̃! Abe ale si Abraham va se egɔme enea, Yehowa si nye “anyigba bliboa ƒe ʋɔnudrɔ̃la” la nye nublanuikpɔla, ede blibo eye eƒe nunya ƒo ɖe sia ɖe ta. Ena hehe Via, eye wòtsɔ ʋɔnudɔdrɔ̃a katã de esi. (Yoh. 5:22) Yehowa kple Via nya nu si le amegbetɔ ɖe sia ɖe ƒe dzi me. (Mat. 9:4) Eya ta ne wole ʋɔnu drɔ̃m amewoa, woawɔ “nu si le dzɔdzɔe” le ame ɖe sia ɖe gome!

¹⁹ Mina míaɖoe kplikpaa be míaka ɖe Yehowa kple eƒe nyametsotsowo katã dzi. Míenya be eyae dze adrɔ̃ ʋɔnu, ke menye míawo o! (Xlẽ Yesaya 55:​8, 9.) Ema tae míegblẽ ʋɔnudɔdrɔ̃wo katã ɖe Yehowa kple Via Yesu si me. Míenya be míaƒe Fia Yesu asrɔ̃ Fofoa adrɔ̃ ʋɔnu dzɔdzɔe eye wòakpɔ nublanui ne ehiã. (Yes. 11:​3, 4) Gake nya kae míate ŋu agblɔ tso ale si woadrɔ̃ ʋɔnu amewo le xaxa gã si gbɔna me la ŋu? Nu kae míenya o? Eye nu kae míenya? Míaɖo biabia siawo ŋu le nyati si kplɔe ɖo me.