Hana Do Gbe Ða Bia Ŋutsuvi

Srɔ̃ eve nɔ Israel ŋutsu aɖe si ŋkɔe nye Elkana si, woƒe ŋkɔwoe nye Hana kple Penina, gake ŋutsua lɔ̃ Hana wu. Penina ɖua fewu le Hana ŋu ɣesiaɣi elabena Hana medzi vi o evɔ vi geɖe nɔ Penina ya si. Elkana kplɔa eƒe ƒomea yia Silo ƒe sia ƒe woɖadea ta agu le avɔgbadɔa me. Gbe ɖeka esi wònɔ afi ma la, ede dzesii be dzi menɔ ye srɔ̃ lɔlɔ̃a Hana dzɔm kura o. Egblɔ be: ‘Hana, meɖe kuku mègafa avi o. Meli na wò. Melɔ̃ wò.’

Emegbe Hana ɖeɖe yi ɖado gbe ɖa. Esi wònɔ kuku ɖem na Yehowa be wòakpe ɖe ye ŋu la, enɔ avi fam. Edo ŋugbe be: ‘Yehowa, ne èna medzi ŋutsuvi la, matsɔe ana wò, eye wòasubɔ wò le eƒe agbe me katã.’

Nunɔlagã Eli kpɔ Hana wònɔ avi fam eye wòsusu be emu aha. Hana gblɔ nɛ be: ‘Ao, nye aƒetɔ nyememu aha o. Mele kuxi sesẽ aɖe me tom eye mele egblɔm na Yehowa.’ Eli kpɔe be yewɔ vodada eya ta egblɔ nɛ be: ‘Mawu newɔ nu si dim nèle la na wò.’ Hana ƒe dzi dze eme eye wòdzo. Kaka ƒe ɖeka naɖo la, edzi ŋutsuvi eye wòtsɔ ŋkɔ nɛ be Samuel. Kpɔ ale si gbegbe dzi adzɔ Hanae ɖa!

Hana meŋlɔ ŋugbe si wòdo na Yehowa la be o. Esi wòtso no na Samuel ko la, ekplɔe va avɔgbadɔa me be wòasubɔ le afi ma. Egblɔ na Eli be: ‘Ðevi siae medo gbe ɖa bia. Mele edom na Yehowa le eƒe agbe me katã.’ Elkana kple Hana yia Samuel gbɔ ƒe sia ƒe hetsɔa awu ʋlaya yeye si ŋu abɔ mele o yina nɛ. Yehowa na Hana gadzi ŋutsuvi etɔ̃ kple nyɔnuvi eve bubuwo.