Ale Si Nàwɔ Abi Ðe Ðaseɖiɖidɔa Me—Do Nya Aɖe Ða Be Nàɖi Vomeɖase

Nu Si Tae Wòle Vevie: Ne míele gbeƒã ɖem tso aƒe me yi aƒe me la, zi geɖe la, míekena ɖe ame geɖe ŋu le aƒe me o. Ke hã míedoa go wo le ʋu me, ne míele ɖɔkta dzɔm, alo le ɖiɖiɖemeɣiwo le suku kple dɔwɔƒe kpakple le teƒe bubuwo. Yehowa ƒe lɔlɔ̃nu wònye be mɔnukpɔkpɔ nasu ame sia ame si wòase Fiaɖuƒegbedeasia. (1 Tim. 2:3, 4) Zi geɖe la, hafi míate ŋu aɖi ɖase na wo la, ele be míawo ŋutɔwo míado nya aɖe ɖa gbã atsɔ adze dzeɖoɖoa gɔme.

Ale Si Nàwɔe:

Lé ŋku ɖe amewo ŋu. Ðe wòdze le amea ŋu be adi be yeaɖo dze faa? Ðe nɔnɔmea aɖe mɔ miaɖe dzi ɖi aɖo dzea? Gbeƒãɖela aɖewo kpɔa amea ƒe mo hekoa alɔgbɔnu. Ne amea hã ko alɔgbɔnu ko la, wodzea agbagba dzea dzeɖoɖo gɔme.
Do gbe kpui aɖe ɖa le tame ne dzi mele ƒowò nàƒo nu o.—Neh. 2:4; Dɔw. 4:29.
Gblɔ nya aɖe nàtsɔ adze dzeɖoɖoa gɔme, ɖewohĩ gbedoname ko. Menye Fiaɖuƒea ŋuti nyae Yesu tsɔ dze dzeɖoɖo gɔme kple Samaria nyɔnua o. (Yoh. 4:7) Ɣeaɖewoɣi la, àte ŋu akafu amea atsɔ adze egɔmee. Àte ŋu agblɔ be: “Viwòwo bua ame ŋutɔ!” Àte ŋu abia nyabiase hã atsɔ adze dzeɖoɖoa gɔme ale: “Èse etsɔ si va yi ƒe nyadzɔdzɔwoa?”
Ne miedze dzeɖoɖo gɔme ko la, di mɔnukpɔkpɔ nàtsɔ nya nyuia ade eme, gake mègatsi dzi akpa na esia wɔwɔ o. Miyi dzeɖoɖoa dzi va se ɖe esime nɔnɔmea sɔ na ɖaseɖiɖi. Ðewohĩ àte ŋu agblɔ nya aɖe si anyɔ amea ƒe ɖetsɔleme eye wòabia nya. Le kpɔɖeŋu me, ne dzeɖoɖoa ku ɖe ƒomenyawo ŋu la, àte ŋu agblɔ be: “Meke ɖe aɖaŋuɖoɖo aɖewo ku ɖe vihehe ŋu siwo dzi míate ŋu aka ɖo ŋu.” Ne nyadzɔdzɔ aɖe ŋue miele dze ɖom tsoe la, àte ŋu agblɔ be: “Mexlẽ nya nyui aɖe nyitsɔ si ado dzidzɔ na ame sia ame.” Ne mète ŋu ɖi ɖase hafi dzeɖoɖoa wu enu o la, megate ɖe dziwò o.
Traktwo kple agbalẽ bubu siwo nàte ŋu ana ame siwo tsɔ ɖe le eme la nenɔ ŋuwò ɣesiaɣi.

Te Esia Kpɔ Le Ɣletia Me:

Kwasiɖa sia kwasiɖa la, dze dzeɖoɖo ɖeka ya teti gɔme kple taɖodzinu be yeaɖi vomeɖase.