Ale Si Nàwɔ Abi Ðe Ðaseɖiɖidɔa Me—Tɔtrɔyia Gɔmeɖoɖo Anyi

Nu Si Ta Wòle Vevie: Ne míedo go ame aɖe si ɖe ɖetsɔleme fia la, ele be míatrɔ ayi le ɣeyiɣi si wòanɔ aƒe me be míade tsi nyateƒea ƒe ku si míeƒã la. (1 Kor. 3:6) Zi geɖe la, ehiãna be míabia ɣeyiɣi si aƒemenɔlaa anɔ anyi ahawɔ ɖoɖo ɖe tɔtrɔyi ŋu hafi adzo. Gakpe ɖe eŋu la, anyo be míagblẽ nyabiase aɖe ɖe egbɔ eye míadzro eme kplii ne míegatrɔ yi. Esia awɔe be aƒemenɔlaa anɔ mɔ kpɔm na míaƒe vava, eye ne nyabiasea ƒe ŋuɖoɖo le agbalẽ si míegblẽ ɖe egbɔ me la, ana wòadi be yeaxlẽ agbalẽa. Ne èdzra eƒe susu ɖo ɖe tɔtrɔyia ŋu alea la, anɔ bɔbɔe be nàtrɔ ayi, elabena mietia nyati si ŋu miaɖo dze tsoe la xoxo, eye aƒemenɔlaa nya nu si wòanɔ mɔ kpɔm na. Ne míegatrɔ yi la, míate ŋu agblɔ be míeva be míaɖo biabia si míegble ɖe egbɔ la ŋu.

Ale Si Nàwɔe:

Ne èle asi trɔm le aƒe me yi aƒe me dzeɖonyaa ŋu la, dzra nyabiase aɖe hã ɖo eye nàɖo eŋu le tɔtrɔyi si akplɔ ema ɖo me. Ate ŋu aku ɖe nyati aɖe si tso agbalẽ si nam míele gbe ma gbe me ŋu loo, alo biabia aɖe si ŋu woɖo le míaƒe Biblia srɔ̃gbalẽwo dometɔ ɖeka me si nàte ŋu atsɔ afiae ne ègatrɔ yi.
Hafi nàwu dzeɖoɖoa nu la, na ɖetsɔlemetɔa nanya be enye yeƒe didi be yewoagaɖo dze ake, eye nàgblẽ nyabiase si nèdzra ɖo la ɖe egbɔ. Le anyigbamama aɖewo me la, vovo si menɔa amewo ŋu o la wɔnɛ be womelɔ̃na be woaɖo ɣeyiɣi ne míatrɔ ava srã yewo kpɔ o. Le nɔnɔme mawo me la, àte ŋu agblɔ be: “Ðe wòasɔ na wò be matrɔ ava kwasiɖa si gbɔna wɔale siawoa? [Ðe mɔ wòaɖo eŋu.] Madi be matrɔ va egbe aleawo gbe ava ɖo nya sia ŋu na wò . . . Ne meva eye vovo mele ŋuwò o la, àte ŋu ana manya faa.”
Ne èɖo game aɖe koŋ na aƒemenɔlaa be yeatrɔ ava la, wɔ ɖe edzi. (Mat. 5:37) Le tɔtrɔyia ƒe nuwuwu la, wɔ dzadzraɖo ɖe tɔtrɔyi si akplɔ ema ɖo la ŋu.

Te Esia Kpɔ Le Ɣletia Me:

Ne èle asi trɔm le aƒe me yi aƒe me dzeɖonyaa ŋu la, dzra ɖo ɖe nyabiase si ŋu nàɖo le tɔtrɔyi si akplɔ ema ɖo me hã ŋu. Ðo dze tso eŋu na gbeƒãɖela bubu siwo nàzɔ kplii le gbeadzi.