**Ale Si Nàwɔ Abi Ðe Ðaseɖiɖidɔa Me—Na Biblia ƒe Nufiafia Gbalẽa**

Nu Si Ta Wòle Vevie: Biblia ƒe Nufiafia gbalẽae nye dɔwɔnu si koŋ míezãna tsɔ fiaa nu amewo. Ke hã, hafi míate ŋu azãe atsɔ afia nu ame aɖe la, ele be míatsɔ ɖeka ana amea wòanye etɔ. Eya ta ele be mí katã míadze agbagba abi ɖe Biblia ƒe Nufiafia gbalẽa nana amewo le gbeadzi me. (Lod. 22:29) Enana ƒe mɔnu vovovowoe li, eye ele be gbeƒãɖelawo natia esi ŋu dɔ woate ŋu awɔ nyuie.

Ale Si Nàwɔe:

Bia nya aɖe si anyɔ aƒemenɔlaa ƒe ɖetsɔleme si ƒe ŋuɖoɖo miate ŋu akpɔ le agbalẽa ƒe ta aɖe me. Àte ŋu abia nyabiase siwo le ta ɖe sia ɖe ƒe gɔmedzedze la ƒe ɖeka faa. Ne èse ale si aƒemenɔlaa ɖo eŋui vɔ la, xlẽ mawunyakpukpui aɖe si sɔ eye nàtsɔ memama aɖe si ɖe nyabiase ma me la fiae ne míadzro eme kpuie.
Mɔ bubue nye be nàzã foto alo nyabiase siwo le axa 3 va se ɖe 4 dometɔ aɖe atsɔ anyɔ aƒemenɔlaa ƒe ɖetsɔleme, emegbe nàfia aƒemenɔlaa agbalẽa ƒe akpa si Biblia ɖo biabia ma ŋu le. Le kpɔɖeŋu me, àte ŋu ahe eƒe susu ayi ɖe afɔku si ŋu woƒo nu tso le nyadzɔdzɔwo me dzi, eye nàgblɔ nɛ be ame geɖe dina be yewoakpɔ ŋuɖoɖo na nyabiase siwo le axa 3 lia. Alo àte ŋu agblɔ be yele yeƒe aƒelikawo srãm kpɔ be yeagblɔ etsɔme nyui aɖe ŋu nya na wo. Emegbe tsɔ foto siwo le axa 4 va se ɖe 5 la fiae, eye nàbia be, “Ŋugbedodo siawo dometɔ kae nàdi be wòava eme?” Mɔnu bubu hãe nye be, nàgblɔ be yele amewo srãm kpɔ kpuie be yeakpe ɖe wo ŋu woakpɔ agbemebiabia veviwo ƒe ŋuɖoɖowo. Emegbe nàtsɔ nyabiase siwo le axa 6 lia afiae, eye nàbiae be wo dometɔ kae wòadi be yeakpɔ ŋuɖoɖo na.
Do Biblia nusɔsrɔ̃ ɖe amea gbɔ tẽe. Àte ŋu agblɔ be: “Míetsɔ Biblia srɔ̃gbalẽ sia le míaƒe aƒelikawo fiam. Èkpɔ agbalẽ sia kpɔa? [Ðe mɔ wòaɖo eŋu.] Ne miniti ʋɛ aɖewo le asiwò la, madi be mawɔ ale si míate ŋu azã agbalẽ sia atsɔ asrɔ̃ wò ŋutɔ wò Biblia la afia wò.”

Te Esia Kpɔ Le Ɣletia Me:

Miwɔ mɔnu siwo me míedzro la ƒe wɔwɔfia aɖewo le miaƒe ƒometadedeagu me.
Ne èle gbeadzi kple gbeƒãɖela aɖe la, gblɔ mɔnu si nèdi be yeazã la nɛ. (Lod. 27:17) Zã mɔnu bubu ne esi nèzã mewɔ dɔ o.