Ame Kae Ðo Yehowa Ðasefowo Ƒe Haa?

Yehowa Ðasefowo ƒe habɔbɔ si li egbea dze dɔ gɔme tso ƒe 1800 ƒe ƒeawo me. Ɣemaɣi la, Biblia nusrɔ̃vi ʋɛ siwo nɔ Pittsburgh, Pennsylvania, le United States, te Biblia me dzodzro moveviɖoɖotɔe. Wotsɔa sɔlemehawo ƒe nufiafiawo sɔna kple nu si tututu nye Biblia ƒe nufiafia. Wote nu siwo ŋu wokena ɖo la tata ɖe agbalẽwo, nyadzɔdzɔgbalẽwo kple magazine si woyɔna egbea be Gbetakpɔxɔ​—Le Gbeƒã Ðem Yehowa Ƒe Fiaɖuƒe la me.

Bible nusrɔ̃vi dovevienu mawo dometɔ ɖeka ŋkɔe nye Charles Taze Russell. Togbɔ be Russell xɔ ŋgɔ le Biblia fiafia dɔa me ɣemaɣi eye wònye Gbetakpɔxɔ magazinea ŋlɔla gbãtɔ hã la, meɖo subɔsubɔha yeye anyi o. Tsã la, woyɔa woƒe ƒuƒoƒoa be Biblia Nusrɔ̃viwo. Russell kple Biblia Nusrɔ̃vi mamlɛawo ƒe taɖodzinue nye be yewoana amewo nanya nu tso Yesu Kristo ƒe nufiafiawo ŋu ahadze Kristo-hame si nɔ anyi le ƒe alafa gbãtɔ me la ƒe afɔɖoƒewo yome. Esi wònye Yesue ɖo Kristotɔnyenye anyi ta la, eyae míebuna be enye míaƒe habɔbɔa ɖola.​—Kolosetɔwo 1:​18-20.