Yesaya 41:10—“Mègavɔ̃ O, Elabena Meli Kpli Wò”

“Mègavɔ̃ o, elabena meli kpli wò. Mègatsi dzi o, elabena nyee nye wò Mawu. Mado ŋusẽ wò; makpe ɖe ŋuwò. Matsɔ nye dzɔdzɔenyenye ƒe nuɖusi alé wò ɖe te.”—Yesaya 41:10, Xexe Yeye Gɔmeɖeɖe Biblia.

“Megavɔ̃ o, elabena meli kpli wò; ŋɔ megadzi wò o, elabena nyee nye wò Mawu, mali ke wò, makpe ɖe ŋuwò, eye matsɔ nye xɔname ƒe nuɖusi alé wò.”—Yesaya 41:10, Eʋegbe Biblia.

Nu si Yesaya 41:10 fia

Yehowaa Mawu ka ɖe edzi na esubɔla wɔnuteƒewo be yeakpe ɖe wo ŋu, kuxi ka ke me tom wole o.

“Meli kpli wò.” Yehowa na esubɔlawo nya susu siwo tae mele be woavɔ̃ o—Yehowa megblẽ wo ɖi o. Nu ka tae? Elabena Yehowa kpɔa nu siwo me tom wole eye wòsea woƒe gbedodoɖawo, eya ta ɖeko wòle abe ɖe Yehowa tɔ ɖe wo gbɔ ŋutɔŋutɔ ene.—Psalmo 34:15; 1 Petro 3:12.

“Nyee nye wò Mawu.” Yehowa ɖo ŋku edzi na esubɔlawo be yekpɔtɔ nye woƒe Mawu eye woƒe subɔsubɔ dzea ye ŋu. Esia faa akɔ na esubɔlawo ŋutɔ. Eye woate ŋu aka ɖe edzi bliboe be naneke mate ŋu axe mɔ na Mawu be wòakpe ɖe yewo ŋu o.—Psalmo 118:6; Romatɔwo 8:32; Hebritɔwo 13:6.

“Mado ŋusẽ wò; makpe ɖe ŋuwò. Matsɔ nye dzɔdzɔenyenye ƒe nuɖusi alé wò ɖe te.” Nya sia siwo Yehowa gblɔa ɖee fia be ele kpe ɖom susu vevi aɖe dzi. Susu vevi mae nye be yeayi edzi akpe ɖe ye subɔlawo ŋu. Nya sia si Yehowa gblɔ be yeatsɔ yeƒe nuɖusi alé wò ɖe te la ɖea ale si Yehowa wɔa nui ne esubɔlawo hiã eƒe kpekpeɖeŋu fiana. Ne ame aɖe le kuxi me tom la, Mawu doa eƒe nuɖusi ɖa le kpɔɖeŋu nyagbɔgblɔ nu tsɔ ɖea amea tso kuxia me.—Yesaya 41:13.

Mɔ vevitɔ si dzi Mawu doa ŋusẽ esubɔlawo eye wòkpena ɖe wo ŋu ye nye to eƒe Nya, Biblia dzi. (Yosua 1:8; Hebritɔwo 4:12) Le kpɔɖeŋu me, aɖaŋuɖoɖo nyuiwo le Mawu ƒe Nyaa me siwo ate ŋu akpe ɖe ame siwo le kuxiwo abe ahedada, ame vevi aɖe ƒe ku alo dɔlényawo ene me tom. (Lododowo 2:6, 7) Mawu ate ŋu ato eƒe gbɔgbɔ kɔkɔea si nye eƒe dɔwɔŋusẽ dzi akpe ɖe esubɔlawo ŋu be woanɔ ŋute le susu me ale be woate ŋu ado dzi le kuxiwo me.—Yesaya 40:29; Luka 11:13.

Nya siwo ƒo xlã Yesaya 41:10

Nya siawo faa akɔ na Yudatɔ wɔnuteƒe siwo wova lé dzoe emegbe yi Babilon. Yehowa gblɔe ɖi be ne esusɔ vie woadzo le Babilon la, woase nyatakakawo be dukɔ aɖe ava tsrɔ̃ dukɔ siwo ƒo xlã Babilon eye woado ŋɔdzi na Babilon ŋutɔ hã. (Yesaya 41:2-4; 44:1-4) Ne Babilon kple dukɔ siwo ƒo xlãe le vɔ̃vɔm le nya siawo ta hãa, Yudatɔwo ya mavɔ̃ kura o, elabe Yehowa akpɔ wo ta. Zi etɔ̃ sɔŋ Yehowa gblɔ be “mègavɔ̃ o” tsɔ ɖo kpe esia dzi na wo.—Yesaya 41:5, 6, 10, 13, 14.

Togbɔ be Yudatɔ siwo wolé dzoe yi Babilon ye nya siwo le Yesaya 41:10 yina tẽe hã, Yehowa Mawu na nya siawo kpɔtɔ li eye wofaa akɔ na esubɔlawo katã egbea hã. (Yesaya 41:10; 40:8; Romatɔwo 15:4) Yehowa kpena ɖe esubɔla siwo li egbea ŋu abe ale si wòkpe ɖe esiwo nɔ anyi va yi la ŋu ene.