MAWUNYAKPUKPUI SIWO ME WOÐE
1 Mose 1:26—“Mina Ne Míawɔ Ame Ðe Míaƒe Nɔnɔ Me”
“Eye Mawu gblɔ be: ‘Na míawɔ ame ɖe míaƒe nɔnɔme nu wòaɖi mí, eye wòakpɔ ŋusẽ ɖe ƒumelãwo, nuwɔwɔ siwo dzona le yame, aƒemelãwo kple anyigba blibo la katã kpakple lã siwo katã tana le anyigba dzi la dzi.’”—1 Mose 1:26, Xexe Yeye Gɔmeɖeɖe.
“Emegbe Mawu gblɔ be: ‘Mina ne míawɔ ame ɖe míaƒe nɔnɔ me, eye wòaɖi mí, ne wòaɖu ƒumelãwo, xe dzodzoewo, aƒemelãwo kple gbemelãwo kpakple lã siwo katã tana le anyigba la dzi.’”—1 Mose 1:26, Eʋegbe Biblia.
Nu Si 1 Mose 1:26 Fia
Mawu wɔ amegbetɔwo ɖe eƒe nɔnɔme nu, si fia be woate ŋu aɖe nɔnɔme siwo le Mawu si la afia. Nɔnɔme siawo dometɔ aɖewoe nye lɔlɔ̃, veveseseɖeamenu kple nu dzɔdzɔe wɔwɔ. Ema tae amegbetɔwo tea ŋu srɔ̃a Mawu ƒe nɔnɔmewo.
“Mawu gblɔ be: ‘Na míawɔ ame ɖe míaƒe nɔnɔme nu.’” Hafi Yehowa Mawua nawɔ nu bubuwo katã la, ewɔ mawudɔla sẽŋu aɖe si wova yɔ emegbe be Yesu. Yesu dzie wòto “wɔ nu bubu siwo katã le dziƒowo kple anyigba dzi.” (Kolosetɔwo 1:16) Yesu ɖea Yehowa ƒe nɔnɔmewo fiana bliboe—“eyae nye Mawu makpɔmakpɔ la ƒe nɔnɔme.” (Kolosetɔwo 1:15) Eya ta esɔ be Mawu gblɔ na Yesu be: “Na míawɔ ame ɖe míaƒe nɔnɔme nu.”
‘Wòakpɔ ŋusẽ ɖe aƒemelãwo kple anyigba blibo la katã dzi.’ Womewɔ lãwo ɖe Mawu ƒe nɔnɔme nu o. Womate ŋu aɖe lɔlɔ̃ afia abe ale si amegbetɔwo wɔnɛ ene o, eye dzitsinya hã mele wo si o. Gake Mawu tsɔa ɖe le eme na lãwo. Esia tae wògblɔ be amegbetɔwo ‘nakpɔ ŋusẽ’ ɖe wo dzi. Nya sia agate ŋu afia be ‘woaɖu wo dzi’ (Agbenya La) alo “akpɔ wo dzi” (Common English Bible). Eya ta ɖe Yehowa nɔ dɔ dem asi na amegbetɔwo be woalé be na lãwo. (Psalmo 8:6-8; Lododowo 12:10) Yehowa di be amegbetɔwo nalé be na anyigbaa kple nu gbagbe siwo katã le edzi la nyuie.
Nya Siwo Ƒo Xlã 1 Mose 1:26
Mose ƒe agbalẽ gbãtɔ ta 1 kple 2 ƒo nu tso ale si wowɔ xexe bliboa, anyigbaa kple nu gbagbe siwo le edzi ŋu. Nu sia nu si Yehowa wɔ la wɔ nuku ŋutɔ, gake amegbetɔwoe ɖe dzesi le nu siwo wòwɔ ɖe anyigba dzi la dome. Esi Mawu wɔ nuwo vɔ la, ‘ekpɔ nu siwo katã wòwɔ la, eye kpɔ ɖa, wonyo ŋutɔ.’—1 Mose 1:31.
Kpɔ video kpui sia be nànya nu geɖe ku ɖe nuwɔwɔwo ƒe ŋutinya si le Mose ƒe agbalẽ gbãtɔa me ŋu.
Alakpanya siwo amewo gblɔna ku ɖe nya si le 1 Mose 1:26 ŋu
Alakpanya: Ŋutsuwo koe ate ŋu asrɔ̃ Mawu alo aɖe eƒe nɔnɔmewo afia—nyɔnuwo mele eme o.
Nyateƒea: Nya “ŋutsu” si dze le yevugbe Biblia geɖe me la ate ŋu ana ame aɖe nasusui be ŋutsuwo ko gblɔm wole. Gake le Hebrigbea ŋutɔ me la, nya sia fia amegbetɔwo katã, ŋutsuwo kple nyɔnuwo. Eya ta ŋutsuwo kple nyɔnuwo siaa ate ŋu aɖe Mawu ƒe nɔnɔmewo afia. Mawu vea wo katã nu eye ena mɔnukpɔkpɔ wo katã be woava kpɔ agbe mavɔ.—Yohanes 3:16.
Alakpanya: Ŋutinuwo le Mawu si abe amegbetɔwo ene.
Nyateƒea: “Mawu nye Gbɔgbɔ”—si fia be mímate ŋu akpɔe o. (Yohanes 4:24) Gake ɣeaɖewoɣi ne Biblia le nu ƒom tso Mawu ŋu la, eyɔa eƒe mo, eƒe asiwo, eƒe dzi kple bubuawo ale be mí amegbetɔwo míate ŋu ase nu si gblɔm wole la gɔme nyuie.—2 Mose 15:6; 1 Petro 3:12.
Alakpanya: Nya si le 1 Mose 1:26 la ɖee fia be Yesue nye Mawu.
Nyateƒea: Mawu kple Yesu dome le kplikplikpli abe vi kple tɔ ene, gake menye ame ɖekae wonye o. Yesu fia nu amewo be Mawu lolo wu ye. (Yohanes 14:28) Ne èdi be yeanya nu geɖe tso nya sia ŋu la, kpɔ video si nye Yesu Kristoe Nye Mawua? alo nàxlẽ nyati si nye “Nu Ka Tae Woyɔa Yesu Be Mawu Ƒe Vi?”
Kpɔ video kpui sia be nàkpɔ nu si ŋu Mose ƒe agbalẽ gbãtɔa ku ɖo.
a Mawu ƒe ŋkɔe nye Yehowa. (Psalmo 83:18) Kpɔ nyati si nye “Ame Kae Nye Yehowa?”