Kekevi Siwo Wotsɔ Le Ðase Ðim “Na Dukɔwo Katã”

Ƒe ewo kple edzivɔe nye esia míele ɖaseɖikekevia zãm, eye dɔwɔnu sia le amewo ƒe susu hem va míaƒe gbeƒãɖeɖedɔa dzi. Le xexea me godooa, amewo dea dzesi míaƒe kekevia bɔbɔe. Kekevi siawo nya kpɔ, eye wo zazã le bɔbɔe hã. Ðewohĩ àlɔ̃ ɖe nya si Nɔvinyɔnu Asenata, si tso Poland gblɔ dzi. Egblɔ be: “Kekevia le kpokploe eye wò nya kpɔ. Ele bɔbɔe be míazãe eye míatee ayi teƒe vovovowo hã.”

Èbu ale si wowɔa kekevi siawoe ŋu kpɔa?

Wowɔe Nyuie

Le ƒe 2001 mea, Dɔdzikpɔhaa da asi ɖe edzi be mía nɔvi siwo le France nate dutoƒoɖaseɖiɖi ƒe mɔnu vovovowo kpɔ, eye kekevia zazã hã nɔ eme. Wote kekevi ƒomevi vovovowo zazã kpɔ. Le kpɔɖeŋu me, wotrɔ asi le kekevi si tɔgbi wozãna tsɔ ɖia asi le fiase gãwo mea ŋu tsɔ doa boblo míaƒe agbalẽwo. Mlɔeba, France alɔdzedɔwɔƒea va da asi ɖe edzi be woazã kekevi ƒomevi aɖe koŋ, eye gbeƒãɖelawo zãe ƒe geɖe.

Nu nyui siwo do tso dutoƒoɖaseɖiɖidɔa mea dzɔ dzi na nɔvi siwo le France ŋutɔ. Eya ta le ƒe 2011 mea, Dɔdzikpɔhaa da asi ɖe edzi be woate dutoƒoɖaseɖiɖidɔa kpɔ le New York City, U.S.A., eye woazã kekeviwo kple kplɔ̃wo le esia wɔwɔ me. Mɔɖela siwo kpɔ gome le ɖaseɖiɖidɔ sia mea de dzesii be kekevia zazã ɖea vi ŋutɔ, eye ele bɔbɔe be woatee ayi teƒeteƒewo. Azɔ hã, mɔɖelaawo do susuwo ɖa ku ɖe ale si woate ŋu atrɔ asi le kekevia ŋu be wòaganyo ɖe edzi wua ŋu. Atie wotsɔ wɔ kekevi gbãtɔawo, si wɔe be wonɔ kpekpem eye esesẽna be woatsɔ wo aflɔ atrakpuiwo. Eya ta wogbugbɔ trɔ asi le wo ŋu be woanɔ wodzoe wu, gake menye ale gbegbe be ya naƒoe wòamu bɔbɔe o. Wotrɔ asi le kekefɔtiawo hã ŋu be wololo wu hesẽ nyuie ale be woate ŋu ate wo le mɔ glidzaglidzawo gɔ̃ hã dzi. Azɔ hã, wowɔ teƒe sue aɖe ɖe kekevia megbe ale be woate ŋu adzra agbalẽ bubuwo ɖo ɖe afi ma.

Dutoƒoɖaseɖiɖidɔ sia kpɔ dzidzedze ŋutɔ! Eya ta tso ƒe 2012 mea, Dɔdzikpɔhaa da asi ɖe edzi be woazã ɖaseɖikekeviwo le xexea me godoo. Wowɔ ɖoɖo be dɔwɔƒe aɖe nazã ŋudɔwɔnu siwo le wodzoe gake ŋusẽ le wo ŋua atsɔ awɔ wo le agbɔsɔsɔ gã me.

Esi ƒeawo va nɔ yiyima, wowɔ asitɔtrɔ viviviwo le kekevia ŋu. Le kpɔɖeŋu me, le ƒe 2015 mea, wowɔ aŋekotoku aɖe kpe ɖe eŋu ale be agbalẽawo nagaƒo tsi ne tsi le dzadzam o. Esia dzɔ dzi na Nɔvinyɔnu Dina, si le Georgia ŋutɔ. Egblɔ be: “Ðeko wòle abe wowɔ tsimewu na kekevia ene.” Le ƒe 2017 mea, wowɔ boblodonu ƒe ʋuƒo siwo nye magnɛt tɔwo ɖe gbegbɔgblɔ aɖewo me. Nɔviŋutsu Tomasz, si le Poland, gblɔ be: “Esime míenɔ tsãtɔ si wotsɔ agbalẽ wɔ zãma, esesẽna ŋutɔ be míaɖɔlii. Magnɛt tɔawo va de mía dzi ale gbegbe.” Le ƒe 2019 mea, wogawɔ asitɔtrɔ bubuwo le kekevia ŋu ale be ŋusẽ nanɔ wo ŋu wu eye woazã wo eteƒe nadidi.

Ga Si Míezãna Ðe Kekeviawo Wɔwɔ Ŋu

Dɔwɔƒe ɖeka aɖee wɔa kekeviawo heɖona ɖe xexea me godoo. Fifia, kekevi ɖeka ƒe home nye Amerika dɔlar 43, ʋudzɔ kple eŋu fe bubuwo ya mele eme o. Va de asi na egbea, woɖo kekevi 420,000 kple edzivɔ ɖe hamewo le xexea me godoo, eye ga si míezã ɖe wo ŋue nye dɔlar miliɔn 16.

Be míazã miaƒe nudzɔdzɔwo nyuiea, míedɔa kekeviawo le agbɔsɔsɔ me. Tsɔ kpe ɖe eŋua, hameawo ate ŋu adɔ kekevia ƒe ŋutinuwo atsɔ adzra akpa siwo gblẽa ɖo tsɔ wu be woadɔ keke yeye.

Ale Si Wole Kekevia Zãm Le Ðaseɖiɖidɔa Me

Le xexea me godooa, gbeƒãɖelawo le dzidzɔ kpɔm ɖe kekeviawo zazã ŋu. Martina, si le Ghana, gblɔ be: “Le míaƒe gbeƒãɖeɖe ƒe mɔnu vovovoawo mea, míawoe tena ɖe amewo ŋu. Gake nu si dzɔa dzi nam le kekevia zazã ŋue nye be ameawo boŋue tena ɖe mía ŋu. Enyea ɖaseɖiɖi na ame siwo tso eme va yina la gɔ̃ hã.”

Le Afrika dukɔ bubu aɖe mea, ŋutsu aɖe te ɖe kekevia ŋu hexɔ míaƒe agbalẽ siwo le wo degbe me. Le kwasiɖa ɖeka megbea, etrɔ va gblɔ be: “Mexlẽ agbalẽawo katã. Agbalẽawo me nyawo le vevie ŋutɔ. Meyina emenyawo gblɔ ge na nye ƒometɔwo le kɔƒea me.” Kɔƒe si me wòtsoa gbɔ didi kilometa 500. Le ɣleti eve megbea, etrɔ gbɔ va gblɔ be: “Nye kɔƒea me tɔwo xlẽ agbalẽawo katã, eye wokpɔ dzidzɔ ɖe nya siwo le wo mea ŋu ŋutɔ. Wodi be yewoava zu Yehowa Ðasefowo. Gake nyabiasewo le wo si. Le kpɔɖeŋu me, wova nya be, be ame naxɔ nyɔnyrɔa, ele be woanyrɔe ŋutɔŋutɔ ɖe tsia me. Evɔ tɔsisi aɖeke mete ɖe míaƒe kɔƒea ŋu o. Ðe wòle be míava afi sia hafi woanyrɔ mía?” Gbeƒãɖelaawo wɔ ɖoɖo be mɔɖela aɖe si doa ŋutsua degbea nayi nusɔsrɔ̃a dzi kplii. Woyi edzi le Biblia srɔ̃m edziedzi.

Edzɔa dzi na mí ne míekpɔ ale si wole kekeviawo zãm tsɔ le gbeƒã ɖem “le anyigba blibo la katã dzi be wòanye ɖaseɖiɖi na dukɔwo katã.” (Mateo 24:14) Aleke míewɔna kpɔa ga tsɔ wɔa kekeviawo? Ga siwo mieɖona ɖa hena xexea me godoo ƒe dɔa ye míezãna, eye ame geɖe dzɔa gaa to donate.jw.org dzi. Akpe na mi ɖe ale si miedzɔa nu faa ta.