Nu Kae Nye Nya Nyui Si Ku Ðe Subɔsubɔhawo Ŋu?

1. Ðe subɔsubɔhawo katã nyoa?

Ame siwo si dzi anukwaretɔ le la le subɔsubɔhawo katã me. Enye dzidzɔ be míanyae be Mawu kpɔa ame siawo eye wòtsɔa ɖe le eme na wo. Gake nublanuitɔe la, subɔsubɔhawo ƒe ŋkɔ mee wowɔ ŋutasẽnu vɔ̃ɖi geɖewo le. (2 Korintotɔwo 4:3, 4; 11:13-15) Nyadzɔdzɔwo ɖee fia be, subɔsubɔha aɖewo ƒo wo ɖokuiwo ɖe ŋɔdzidonamenuwo wɔwɔ, ameƒomevi aɖewo tsɔtsrɔ̃ ɖa, aʋawɔwɔ, kple ŋutasẽnuwɔwɔ ɖe ɖeviwo ŋu gɔ̃ hã me. Aleke gbegbee esia doa nuxaxa na ame siwo xɔ Mawu dzi se vevie lae nye esi!​—Xlẽ Mateo 24:3-5, 11, 12.

Subɔsubɔha vavãtɔ ƒe nuwɔnawo hea ŋutikɔkɔe vanae na Mawu, ke alakpasubɔsubɔ ya medzea eŋu o. Alakpasubɔsubɔ fiaa nu siwo mele Biblia me o, eye wòfiaa alakpanuwo tso Mawu kple ame kukuwo hã ŋu. Gake Yehowa di be amewo nanya nyateƒe siwo ku ɖe ye ŋu.​—Xlẽ Xezekiel 18:4; 1 Timoteo 2:3-5.

2. Nu kae nye nya nyui si ku ɖe subɔsubɔhawo ŋu?

Dzidzɔnya lae nye be subɔsubɔha siwo gblɔna be yewolɔ̃ Mawu evɔ wònye Satana ƒe xexea boŋue wòlɔ̃ la mate ŋu aflu Mawu o. (Yakobo 4:4) Mawu ƒe Nya la yɔ alakpasubɔsubɔhawo katã be “Babilon Gã.” Babilon nye blemadu si me alakpasubɔsubɔ dzɔ tso le Noa ƒe ŋkekea me Tsiɖɔɖɔa megbe. Eteƒe madidi o Mawu atsrɔ̃ subɔsubɔha siwo blea ameƒomea hetea amewo ɖe to la kpata.​—Xlẽ Nyaɖeɖefia 17:1, 2, 5, 16, 17; 18:8.

Nya nyui geɖewo gali. Yehowa meŋlɔ dzianukwaretɔ siwo le alakpasubɔsubɔha vovovowo me le xexea me godoo la be o. Ele nyateƒea fiam ame siawo tsɔ le wo nu ƒom ƒu.​—Xlẽ Mixa 4:2, 5.

3. Nu kae wòle be dzianukwaretɔwo nawɔ?

Yehowa tsɔa ɖe le eme na ame siwo lɔ̃a nu nyui kple nu si le eteƒe wɔwɔ. Exlɔ̃a nu ame siawo vevie be woado le alakpasubɔsubɔ me. Ame siwo lɔ̃ Mawu la lɔ̃na faa wɔa tɔtrɔwo bena woƒe nu nadze eŋu.​—Xlẽ Nyaɖeɖefia 18:4.

Dzi dzɔ dzianukwaretɔ siwo nɔ anyi le ƒe alafa gbãtɔ me esi apostoloawo ɖe gbeƒã nya nyuia wose. Wosrɔ̃ agbenɔnɔmɔ yeye aɖe tso Yehowa gbɔ, enye agbenɔnɔmɔ si me dzidzɔ le wu, enana tameɖoɖo nɔa ame ƒe agbe ŋu, eye wònana mɔkpɔkpɔ sua ame si. Ame siawo ɖo kpɔɖeŋu nyui na mí egbea, elabena woxɔ nya nyui la hetsɔ Yehowa ɖo nɔƒe gbãtɔ le woƒe agbe me.​—Xlẽ 1 Tesalonikatɔwo 1:8, 9; 2:13.

Yehowa xɔa ame siwo do le alakpasubɔsubɔ me la ɖe eƒe tadeagulawo ƒe ƒomea me kple dzidzɔ. Ne èlɔ̃ ɖe Yehowa ƒe amekpekpea dzi la, àzu exɔlɔ̃, àzu hatitadeagula siwo le Yehowa subɔm ƒe ƒome lɔ̃ame yeye aɖe me tɔ, eye àkpɔ agbe mavɔ.​—Xlẽ Marko 10:29, 30; 2 Korintotɔwo 6:17, 18.

4. Aleke Mawu ana dukɔ sia dukɔ me tɔwo nakpɔ dzidzɔ?

Ʋɔnu si woadrɔ̃ alakpasubɔsubɔ kpuie la nye nya nyui aɖe. Ana gbɔdzɔe amewo le xexea me godoo tso ametete ɖe anyi me. Alakpasubɔsubɔ magakplɔ ameƒomea atrae ahade mama eme akpɔ gbeɖe o. Ame siwo katã le agbe ɣemaɣi la awɔ ɖeka le Mawu vavã ɖeka la subɔsubɔ me.​—Xlẽ Nyaɖeɖefia 18:20, 21; 21:3, 4.