Nneme etie nte ebọp emi anamde ekeme ndisan̄a n̄kpere eyen fo
ETE YE EKA
5 Ẹsineme Nneme
NSO KE EMI ỌWỌRỌ?
Oyom ete ye eka ẹsitịn̄ se mmọ ẹkerede ye nte etiede mmọ ke idem ẹnọ nditọ mmọ, nditọ ẹnyụn̄ ẹtịn̄ eke mmọ ẹnọ ete ye eka mmọ.
NTAK EMI EDIDE AKPAN N̄KPỌ
Ekeme ndisọn̄ ndineme nneme ye nditọ fo ke ini mmọ ẹtọn̄ọde ndikpon. Ke ini nditọ fo ẹkedide n̄kpri, mmọ ẹma ẹsitịn̄ kpukpru n̄kpọ ẹnọ fi, edi idahaemi mmọ ẹma ẹketọn̄ọ ndikpon mi, mmọ imaha aba nditịn̄ se ifịnade mmọ nnọ fi. Editie nte ata akamba inyan̄ abahade mbufo mbiba. Idem ọkpọkọm etie nte ke nditọ fo iyomke ndineme nneme ye afo, ini oro ke enen̄ede oyom eneme nneme ye mmọ!
SE AKPANAMDE
Ben̄e idem ndineme nneme ye eyen fo ini ekededi oro enye oyomde. Nyịme ndineme nneme ye enye ọkpọkọm edi ke okoneyo.
“Ekeme ndidọn̄ fi ndidọhọ enye ete, ‘Idahaemi ndien ke oyom nditịn̄ ikọ? Ntak mûkutịn̄ke tọn̄ọ oko?’ Edi, ndi ọfọn iyat esịt ye nditọ nnyịn edieke mmọ ẹyomde ndineme nneme ye nnyịn? Ndi idịghe se ediwak ete ye eka ẹkam ẹbọn̄de-bọn̄ akam ẹyom edi oro?”—Lisa.
“N̄kpama ndisibak ndụk idap, edi ami ye nditọ mi isinen̄ede ineme nneme ke ufọt okoneyo.”—Herbert.
SE BIBLE ETỊN̄DE: “Yak owo kiet kiet okûyom ufọn idemesie, edi oyom ufọn owo en̄wen.”—1 Corinth 10:24.
Kûyak n̄kpọ en̄wen adia ini fo. Ete kiet ọdọhọ ete: “Ndusụk ini, esidi nditọ mi ke ẹtịn̄ ikọ ye ami, ami ke n̄kere ediwak n̄kpọ en̄wen. Mmọ ẹsidiọn̄ọ ke n̄kpan̄ke utọn̄!”
Edieke afo esinamde se ete emi etịn̄de, mbọk nịme TV, fon, ye n̄kpọ ntre ke ini eyen fo enemede nneme ye afo. Nen̄ede kpan̄ utọn̄ kop se enye etịn̄de. Kûda se enye etịn̄de unam mbubru ọkpọkọm etie fi nte idịghe akpan n̄kpọ.
“Akpana inam nditọ nnyịn ẹkụt ke imenen̄ede iyom ndifiọk nte etiede mmọ ke idem. Edieke inamde etie nte ke emi ibeheke nnyịn, mmọ iditịn̄ke se ifịnade mmọ inọ nnyịn, edi ẹkeme ndimen n̄ketịn̄ nnọ owo en̄wen.”—Maranda.
“Kûyat esịt, idem ọkpọkọm se eyen fo etịn̄de inenke.”—Anthony.
SE BIBLE ETỊN̄DE: “Ẹkpeme nte mbufo ẹkpan̄de utọn̄.”—Luke 8:18.
Da ini emi mbufo ẹnamde n̄kpọ ẹneme nneme. Ndusụk nditọwọn̄ ẹsima nditịn̄ se isịnede mmọ ke esịt ke ini mmọ mîtiehe iso ye iso ye ete m̀mê eka mmọ.
“Imesineme nneme ye nditọ nnyịn ke ini isịnede ke moto. Mmọ ẹsitịn̄ se isịnede mmọ ke esịt sia nnyịn mîtiehe iso ye iso.”—Nicole.
Ini en̄wen emi ekemede ndineme nneme ye nditọ fo edi ke ini ẹtiede kiet ẹdia udia.
“Ke ini itiede kiet idia udia mbubreyo, kpukpru nnyịn imesitịn̄ se ikamade usen oro ye se nnyịn mîkamaha. Emi esinam idiana kiet onyụn̄ anam ifiọk ke imekere iban̄a kiet eken.”—Robin.
SE BIBLE ETỊN̄DE: “Ẹsọp ndikop ikọ, ẹkûsọp nditịn̄ ikọ.”—James 1:19.