Ibuot 2
Nsinsi Edidem
1. Ntak emi akpanade nnyịn inyene mbuọtidem ke Abasi nte ata Ete?
JESUS ọkọtọn̄ọ “Akam Ọbọn̄” oro ke ndikot Abasi “Ete nnyịn.” Baba, idịghe kpasụk Ete Jesus Christ ikpọn̄îkpọn̄, edi ke ofụri ofụri, Ete ofụri ubonowo emi ke n̄kopuyo ẹtuakde ibuot ẹnọ edima ‘Andikop akam’ emi. (Psalm 65:2) Nte “Edidem emi akarade ke kpukpru eyo,” enye omowụt eti ye nsinsi edikere mban̄a ọnọ mme edibot n̄kpọ esie, kpa nte eti ete eke owo anamde aban̄a nditọ esie. (1 Timothy 1:17) Nnyịn ikpenyene ndikọn̄ mbuọtidem ke “Ete nnyịn” nte ata Owo emi ekerede aban̄a nnyịn. Se ededi usem oro nnyịn isemde, uduot ikpaidem oro inyenede m̀mê idaha nnyịn ke uwem, nnyịn ikpenyene ndinyene ifụre ndika mbịne enye, koro “Abasi inamke asari, edi ke kpukpru idụt enye adadara owo eke abakde enye onyụn̄ anamde edinen ido.”—Utom Mme Apostle 10:34, 35, NW.
2, 3. Didie ke Ete nnyịn owụt idemesie ke usụn̄ mbiba nte Ọnọ-Uwem ye Akwa Andinọ? (Genesis 1:1, 2, 31)
2 “Ete nnyịn emi odude ke heaven” edi Andibot, kpa Enyeemi ọnọde ubonowo uwem. (Matthew 6:9; Psalm 36:9) Edi enye otịm edi n̄kpọ okponde akan ndidi Ọnọ-Uwem nnyịn, enye n̄ko edi Akwa Andinọ. Nnyịn ikpodori enyịn eti ete eke owo ndinọ nditọ esie ufọkidụn̄ ye se ẹdade ẹdu uwem, idem ke atakde ekese ini ye ukeme. Ete nnyịn eke heaven ama anam emi, ye idem se ibede oro, ke n̄kpon n̄kan usụn̄ ntatubọk.
3 Kere nte edima “nsinsi Edidem” emi okotịmde isọn̄ ndidi ebietidụn̄ nnyịn. Enye owụk enye ke ata nnennen itie ke idak ikpaenyọn̄, ndien ebede ke akakan odudu esie enye anam kpukpru se ẹyomde kaban̄a edinem itieidụn̄ eke owo odu ke isọn̄. Ekem enye anam eren ye n̄wan, esịnde mmọ ke ediye ebietidụn̄ emi—akamba enọ, ke akpanikọ, emi enye ‘ọnọde nditọ owo’!—Psalm 115:16; 19:1, 2.
4. (a) Nso ima ima mbemiso ekikere ke Ete nnyịn okowụt ke nditịm ebietidụn̄ nnyịn? (b) Nso isọn̄ọ inọ nnyịn nte ke enye ôyom nnyịn ikop idatesịt?
4 Nso ediye itieidụn̄ ke Ete nnyịn eke heaven ọkọnọ nditọ esie ntem ke isọn̄! Enye ama anam ndutịm man otodo mbịtmbịt, mme ọnọ nduọkodudu okoneyo ẹkpetiene mme uwemeyo ini utom. Enye onịm mme iduọkini kaban̄a ufọn ye inemesịt nnyịn. (Genesis 8:22) Enye anam mmọn̄, emi edide se ẹtịmde ẹyom ke uwem, odu barasuene, onyụn̄ anam enye odu ke kpukpru ebiet ke ofụri isọn̄ man ikeme ndikoi enye ini ekededi oro iyomde. Enye ebri ọnọ nduọkodudu awawa mbiet—akanade ke ediwak million ibio idomo okụk—ke ofụri unaodot nnyịn. Enye ama abana enye ye ndiye uduot flawa. Enye ọdiọn̄ enye otịm eye ke ufọt mme edem akai ikọt, mme n̄kpọdiọhọ mmọn̄ ye ikpọ obot. Enye ọyọhọ “idak” isọn̄ ye ekese ukan̄, aran ye mme orụk aduan̄ eken. Enye akaiso ndidọn̄ “ufọk ubon udia” eke isọn̄ ndiyọhọ nduọḥo ye ibokpot, mme mfri, mme ikọn̄ udia ye mme ndinụm eken. Nso enyene ọniọn̄, ima ima Andinọ ke Ete nnyịn eke heaven edi ntem! Bible okot enye “Abasi inemesịt.” Ke akpanikọ, enye omoyom nnyịn ikop inemesịt, nde.—1 Timothy 1:11, NW; Isaiah 25:6-8.
“ENYỊN̄” ETE NNYỊN
5. Nso ekpenyene ndidi udọn̄ esịt nnyịn ke ndida mme akpa ikọ eke akam uwụtn̄kpọ Jesus oro mbọn̄ akam?
5 Edima Ete nnyịn emi odude ke heaven emenyene “eti enyịn̄,” kpa eti etop nte Akakan Andinọ. Enye n̄ko emenyene san̄asan̄a enyịn̄ idemesie, kpasụk nte ete eke owo enyenede. Edieke nnyịn inyenede ete eke obụk oro odotde, nnyịn ikpenyene ndisua ndikụt nte ẹsuenede enyịn̄ ye eti etop esie. Nnyịn ikpenyene ndiyom ndikụt nte ẹkponode enyịn̄ esie. Idem ke akande oro, ekpenyene ndidi udọn̄ esịt nnyịn ndikụt nte ẹkponode enyịn̄ Ete nnyịn eke heaven. Mmọdo, ke ofụri uyọhọ esịt nnyịn, nnyịn ikpenyene ndikeme ndida mme ikọ oro Jesus ekebemde iso asiak ke Akam Uwụtn̄kpọ esie mbọn̄ akam nte: “Ete nnyịn emi odude ke heaven: Yak ikpono enyịn̄ Fo.”—Matthew 6:9; Mme N̄ke 22:1.
6. Ke se iban̄ade enyịn̄ Abasi, nso ke afo akpama ndikụt otịbede?
6 Ke akpanikọ, ekpenyene kpukpru ini ndidi akam ofụri esịt nnyịn nte ẹkpono, ẹmenede enyịn̄ akwa Andibot heaven ye isọn̄ ke enyọn̄ okon̄ akan enyịn̄ efen ekededi, ẹnyụn̄ ẹwụt enye nte n̄kpon n̄kan, edifọn enyịn̄ oro enyenede se ọwọrọde ke ofụri ekondo. Edinam edisana enyịn̄ Abasi emi asana omotịm edi akpan n̄kpọ akan edinyan̄a nnyịn. Enyịn̄ ye etop esie ẹnyene ndidi se ẹkponode—ẹnọde ubọn̄ ẹbiọn̄ọ esuene oro mme oburobụt edibot n̄kpọ ẹdoride enye.
7. Nso ke Bible owụt nte edide san̄asan̄a enyịn̄ Abasi?
7 Nso edi san̄asan̄a enyịn̄ Ete nnyịn eke heaven? Ẹyarade enye ke udọn̄ikọ emi owụtde nte ke Andinyene akwa enyịn̄ oro ênyene mme asua. Ke nditịn̄ mban̄a emi, Psalm 83, ufan̄ 17 ye 18, ke Bible King James Version, okot ete: “Yak mmọ ẹkụt bụt ye afanikọn̄ ke nsinsi; ih, yak mmọ ẹdia esuene, ẹnyụn̄ ẹtak: Man mme owo ẹfiọk nte ke afo, emi enyịn̄ fo ikpọn̄îkpọn̄ edide JEHOVAH, edi andikon̄ n̄kan ke ofụri isọn̄.”—Se n̄ko Psalm 100:3.
8. Nso ke mme asua Abasi ẹn̄wana ndinam ye enyịn̄ esie, ndien ye nso utịp?
8 Ke ntre, enyịn̄ Abasi edi JEHOVAH. Edi ediwak mbon oro ẹdọhọde nte ituakde ibuot inọ Abasi ẹnana ukpono ẹnọ enyịn̄ oro ẹkaha. Ndusụk owo ẹma ẹsio enyịn̄ esie ẹfep ke mme edikabade Bible mmọ, ẹdade mme udorienyịn̄ nte “ỌBỌN̄” ye “ABASI” ke itie esie ẹnyụn̄ ẹwet mmọ ke ikpọ abc. Usụn̄ edinam emi idịpke ọwọrọetop enyịn̄ Abasi ikpọn̄îkpọn̄ edi anam n̄ko mme owo ẹdu ke ndutịme kaban̄a Ọbọn̄ Jehovah ye Ọbọn̄ Jesus Christ ọkọrọ ye “mbọn̄” ye “mme abasi” eken oro ẹtịn̄de ẹban̄a ke Bible. (Psalm 110:1; Deuteronomy 10:17; N̄wed Mbon Rome 1:4; 1 Corinth 8:5, 6) Didie ke mme owo ẹkpekeme ndibọn̄ akam ke ofụri esịt nte ẹkpono, m̀mê ẹnam enyịn̄ Ete oro asana, ke ini mmọ ẹn̄wanade-n̄wana ndidịp enye?
9. (a) Ẹwet didie enyịn̄ Abasi ke usem Hebrew, ye ke mme usem eken? (b) Bible owụt ete Abasi edi owo ifan̄?
9 Ẹwet anana mbiet enyịn̄ Abasi oro ke usem Hebrew, kpa akpa usem emi ẹkedade ndiwet Bible, ye mme idiọn̄ọ inan̄ ẹmi יהוה, emi ndusụk owo ẹn̄wanade ndikot nte Yahʹweh. Orụk edikot oro kpukpru owo ẹnyịmede ke Ikọmbakara edi “Jehovah,” ẹnyụn̄ ẹsiwet enye ke mbiet usụn̄ emi ke mme usem efen. Ke ndida enyịn̄ oro “Jehovah,” nnyịn imekeme ndiwụt enyeemi ẹtịn̄de ẹban̄a in̄wan̄în̄wan̄. Enye edi “Jehovah kiet.” Idịghe enye edi Jesus Christ, koro Jesus edi anam-akpanikọ Eyen Abasi, kpa “mbiet Abasi emi enyịn owo mîkwe; Abasi okobon Enye ete edi Akpan, ndien edibot ofụri ererimbot.”—Colossae 1:15; Mark 12:29; Deuteronomy 6:4.
10. Nso ke enyịn̄ Abasi ọwọrọ, ndien didie ke enye anam emi owụt?
10 Enyịn̄ oro “Jehovah” ênyene okop odudu n̄kpọ oro enye ọwọrọde. Enye ọwọrọ: “Enye Anam Akabade Edi (m̀mê, Ndudu).” Emi edi kaban̄a Idemesie, idịghe kaban̄a Enye ndibot mme n̄kpọ. Ntem, enye akada “Jehovah” ndidi enyịn̄ “editi” esie ke ini okoyomde ndikabade ndi utịbe Andifak ikọt esie Isrel nsio ke ubọk Pharaoh isọn̄ Egypt. (Exodus 3:13-15) Ke ukperedem, ke ini prọfet Jeremiah okowụtde Ọbọn̄ Ekondo Jehovah nte Andinam enyọn̄ ye isọn̄ ‘ebe ke akwa odudu ye edimenede ubọk esie,’ ye nte ‘enyeemi okponde ke item, onyụn̄ ọsọn̄de ke utom,’ Jehovah ama ọsọn̄ọ ọnọ prọfet esie oro nte, ke edikem ini Esie, Enye eyenam n̄kpọ oro etiede nte se mîkemeke nditịbe oto ke ndikabade ndi Andision̄o ikọt Esie ke mbuotekọn̄ Ukara Babylon. Ndien enye ama anam ntre!—Jeremiah 32:17-19, 27, 44; 2 Chronicles 36:15-23.
11. Didie ke ẹkeme ndibuan enyịn̄ Abasi mfịn ye obio ubọn̄ esie?
11 Mfịn, n̄ko, Jehovah edi akwa Abasi emi “anamde akabade edi.” Enye ekeme ke idemesie ndikabade ndi sededi oro oyomde enye akabade edi, ndiyọhọ utom ekededi oro oyomde, man anam mme utịben̄kpọ ebe ke obio ubọn̄ esie, kaban̄a edinam enyịn̄ esie asana ye ke ufọn ikọt esie. Se ededi oro enye aduakde ndinam edi se ẹnamde, uforo uforo.—Isaiah 48:17; 55:11.
NTE ẸNAM ENYỊN̄ ABASI ASANA?
12. Didie ke ubonowo ẹse Abasi?
12 Nte ubonowo ẹmewụt esịtekọm, ukpono ye ima ẹnọ ọwọrọetop enyịn̄ Abasi emi, emi enende onyụn̄ otịmde n̄kpọ ke utịbe usụn̄ ntre ọnọ mme edibot n̄kpọ esie ke isọn̄? Se kanade ofụri isọn̄ emi, ndien afo eyekụt ibọrọ. Mme ido ukpono eke mme idụt oro ẹkotde idem mme anditiene Christ ẹwụt Abasi ke usụn̄ ọdiọkde didie ntem! Ediwak ke otu mme idụt ẹmi ẹkụt enye nte Abasi ibetedem ekọn̄, ẹnyụn̄ ẹbọn̄ akam ẹnọ enye ẹte an̄wam mmọ ke ndin̄wana ye ekemmọ owo. Mbon eken ẹbat enye nte Abasi ibak, emi ọnọde “ukpọn̄ mme akpan̄kpa” ẹka ubiak ubiak nsinsi ikan̄ ndutụhọ. Mbon efen n̄ko ẹsụhọde enye itie ke ndiwụt enye nte anana uwem ndisọi mbiet oro ẹdade eto m̀mê itiat ẹnam. Ediwak owo ẹkokoi ẹbiat ndinen mbet esie, ẹdọhọde ẹte ke Abasi ikwe m̀mê ndikere mban̄a aba.—Men N̄wed Utom Mme Apostle 10:34, 35; Jeremiah 7:31; Isaiah 42:8 ye 1 Peter 5:7 kpụhọde.
13. Nso ekpedi akpatre utịp edieke ẹyakde mbon oro ẹnamde ẹtụn usụn̄ ẹbịne mme usụn̄uwem unana ima mmọ?
13 Nte ededi, edieke mbon oro ẹdade ẹtụn usụn̄ mîmaha Abasi inyụn̄ inam enyịn̄ esie asana, didie ke mmọ edima ekemmọ owo? (1 John 4:20, 21; 5:3) Ndien ibọhọke ẹnam ima afiak odu ke ufọt ekpụk ubonowo, ererimbot ke akpatre iditreke ndikabade obio ubahade, obom ye ndutịme. Enye amakam etetịbe ntre ke ndusụk ebiet. Ye edisuana eke n̄kpọekọn̄ nuclear ke otu mme idụt, usen kiet mme ama-utopikan̄ ẹmekeme ndisọhi ofụri orụk eke owo mfep. Edi oro edi se edima Ete nnyịn mîdiyakke otịbe tutu amama!—Psalm 104:5; 119:90; Isaiah 45:18.
NTE ABASI ANAMDE ENYỊN̄ ESIE ASANA
14, 15. Anie ada iso ke ndinam enyịn̄ Abasi asana, ndien didie?
14 Anie edi enyeemi adade iso ke ndinam enyịn̄ Abasi asana? Sese, Jehovah ke idemesie! Enye anam emi ebe ke ndinam n̄kpọ ndinọ ndisana idaha esie ubọn̄. Enye eyebiere ikpe nsobo ọnọ kpukpru mbon oro ẹbiatde edisana uduak esie, ọkọrọ ye mbon oro ẹfịkde ekemmọ owo ye mbon oro ẹkpepde nsu ẹban̄a Abasi. (Psalm 140:12, 13; Jeremiah 25:29-31) Jehovah ikemeke ndikan̄ idemesie. Enye edi Abasi akpanikọ, emi odotde san̄asan̄a utuakibuot kpukpru edibot n̄kpọ esie. Enye edi Ọbọn̄ Ekondo, emi kpukpru edibot n̄kpọ ẹnyenede ndikop uyo nnọ.—N̄wed Mbon Rome 3:4; Exodus 34:14; Psalm 86:9.
15 Ke ndinam enyịn̄ esie asana, Ọbọn̄ Ekondo, Jehovah, eyesọhi kpukpru mbon oro ẹbiatde isọn̄ emi efep ke esịt, oro ẹnamde n̄kpọ ke ntuaha ye uduak esie. Emi edi koro enye asasua ukwan̄ido onyụn̄ ama edinen ido. (Psalm 11:5-7) Nte enye ke idemesie ọdọhọde: “Ami nyenyụn̄ nnịm idem mi ke akwa ye ke edisana, nnyụn̄ nnam mmọ ẹfiọk mi ke enyịn ediwak mme idụt. Ndien mmọ ẹyefiọk ẹte ke ami ndi Jehovah.” (Ezekiel 38:23) In̄wan̄în̄wan̄, ndien, edieke iyomde ndidara edidiọn̄ Jehovah, nnyịn nde inyene ndinam enyịn̄ esie asana, ikamade enye nte n̄kpọ asanade onyụn̄ odotde ọyọhọ ukpono, inyụn̄ idu uwem nte ekemde ye uduak esie.
16. Nso udeme ke edu uwem nnyịn enyene ke ndinam enyịn̄ Abasi asana?
16 Edu uwem mbon oro ẹtuakde ibuot ẹnọ Jehovah ekeme ndida ukpono m̀mê esuene nsọk enyịn̄ Abasi. Kpukpru nnyịn ikpakam idu uwem ke usụn̄ oro anamde mbon efen ẹtịn̄ eti ikọ ẹban̄a akwa Abasi oro nnyịn inamde n̄kpọ inọ oro onyụn̄ adade idatesịt ọsọk esịt Jehovah. (1 Peter 2:12; Mme N̄ke 27:11) Nte nditọ n̄kopuyo, nnyịn ikpenyene ndiyom ndiwụt esịtekọm nnọ Ete nnyịn kaban̄a kpukpru enọ esie, ọkọrọ ye ediye ebietidụn̄ nnyịn—kpa isọn̄—emi edinamde enyene ubọn̄ emi akam okponde akan ke idak ukara Obio Ubọn̄ Eyen esie.—Isaiah 6:3; 29:22, 23.
17. Ye nso edu ke nnyịn ikpeka ibịne “nsinsi Edidem” ke akam?
17 Enem didie ntem nnyịn ndidi ndidu ke eti itie ebuana ye “nsinsi Edidem” emi! Nte ededi, nnyịn ikemeke ndinam emi ke odudu idem nnyịn, koro ẹkeyomo kpukpru nnyịn ẹto mme anamidiọk mme ete ye eka ẹnyụn̄ ẹman nnyịn ke unana mfọnmma. Edi nnyịn imekeme ndibọn̄ akam nnọ Abasi kpa nte Edidem David akanamde: “Fụk iso fo, kûse mme idiọk ido mi; nyụn̄ sọhi kpukpru mme ukwan̄kpọ mi fep. Bot edisana esịt nọ mi O Abasi; nyụn̄ nam obufa spirit eke ọsọn̄ọde ada, sịn mi ke idem.” (Psalm 51:5-10) Nte nnyịn ikpepde iban̄a se “Ete nnyịn emi odude ke heaven” oyomde oto nnyịn, nnyịn imekeme ndibọn̄ akam mben̄e editiene mbuana ke nsinsi edidiọn̄ oro obio ubọn̄ esie edidade edi. Ih, yak nnyịn ke ọyọhọ mbuọtidem ibọn̄ akam ite obio ubọn̄ Abasi edi. Ndien nso ke obio ubọn̄ oro ediwọrọ ọnọ ubonowo mi ke isọn̄? Yak nnyịn ise.