Ibuot 1

“Yak Obio Ubọn̄ Fo Edi”!

1. Mme Mbụme Ndida Nnyene Nneme: Nso ke obio ubọn̄ Abasi ediwọrọ ọnọ fi, edieke enye adade mme idaha ẹmi ẹdude ke ndise mi edi, ibịghike?

IWAKKE ikọ akam oro ẹsiwakde ndida ke akam nte eke enyọn̄ n̄wed emi. Ekeme ndidi afo andikot n̄wed emi ama ọbọn̄ akam oro. Ndien ke akpanikọ nnyịn imoyom obio ubọn̄ Abasi! Ediye didie ntem ndidụn̄ ke idak mme idaha oro ẹwụtde ke ndise ke mme page emi! Ndien oro edi idotenyịn emi obio ubọn̄ Abasi akamade ọnọ nnyịn: Emem ye edidianakiet ke ofụri isọn̄. Kpukpru uduot ubonowo ẹdianade kiet ke mbọbọ ata ima. Owo kiet kiet okopde inem ndinam enyene mbun̄wụm utom onyụn̄ adarade utịp utom esie. Ofụm ọyọhọde ye ikwọ otode mme n̄kpọ obot ọkọrọ ye ikwọ ye inua imam eke mme okop inemesịt owo. Okop nsọn̄idem ererimbot n̄ka ubonowo emi owo baba kiet mîkọrike isọn̄ m̀mê ndidọn̄ọ. Edidara emem ye mme unam, ufuọn̄ eke mme flawa, uyai eke mme enyene uduot unaisọn̄ ye anana utịt edikpụhọde eke mme iduọkini. Ih, kpukpru ẹmi, ye ekese eken, ẹdi se ẹn̄wọn̄ọde ẹnọ isọn̄ nnyịn ke obio ubọn̄ Abasi àmá edi, nte nnyịn idikụtde.

2, 3. Nso mme ukpụhọde ke mme isua ndondo emi ẹsọn̄ọ ẹwụt udọn̄ kaban̄a obio ubọn̄ Abasi?

² Nte ededi, mme n̄kpọ ẹtịm ẹdi isio isio idahaemi. Koro nnyịn isan̄a ibe ke ini emi Bible etịn̄de aban̄a nte “ndiọk eyo.” (2 Timothy 3:1) Afo ọmọfiọk nte ndiọk eyo emi otụkde uwem fo. Ediwak mbon oro ẹkotde n̄wed emi ẹma ẹduọk mbon ima mmọ ke mme ekọn̄ ye ke mme afai eken eke isua ikie emi. Kpa ye oro mme idụt ke ẹsịn idem ke mfiopn̄kan mbuba ubon n̄kpọekọn̄ nte akanam mîdịghe. Ndien mmọ ẹmekam ẹnyenyene n̄kpọekọn̄ otịmde awak ebe se ẹkpeyomde ke ndida nsọhi ofụri ubonowo mfep.

³ Mme mfịna eken, oro ẹtịmde ẹkpere nnyịn idem, ẹmebehe nnyịn n̄ko. Ye akpakịp uwo n̄wo, uwotowo ye idan̄ n̄kanubọk, ediwak nnyịn imokụt nte idem edisan̄a ke mme efak edide n̄kpọ ndịk. Ndien nte nnyịn ikopke iban̄a nte ibat usion̄o ndọ awakde akan, n̄wụre eke mme ubon ye nsọn̄ibuot nditọn̄wọn̄ awakde ebe nte ekedide ke akpa? Ke emana idan̄ unana ukpan ye mbumehe uda n̄kpọsọn̄ ibọk emi, ediwak owo ke ẹkop umiọn̄ ndinọ nditọ mmọ ẹka ufọkn̄wed. Dara etieti edieke odụn̄de ke n̄kann̄kụk m̀mê ke obio emi utọ mme mfịna ẹmi mîdụhe kan̄a!

4, 5. (a) Nso mme mfịna efen ẹtụk uwem nnyịn? (b) Nso mme idaha ererimbot ẹwụt nte ke omoyom ‘obio ubọn̄ Abasi edi’ iwiwa?

⁴ Akpa fi okụk ifan̄ ndidori udia ke okpokoro ke mme usen emi? Ndien atak fi okụk ifan̄ ndikama moto fo nte eyede? Nte ekọmurua udia ye eke aranuwat ẹdọkde, anana nsọn̄ọnda idaha ererimbot owụt mbukpọn̄ idiọk n̄kpọntịbe aban̄a ini iso. M̀mọ̀n̄ ke ererimbot nnyịn aka? Ikọ kiet otode U.S.News & World Report eke August 4, 1980, ama osio owụt nte afanikọn̄ emi ọdiọkde okosịm. Enye ọkọdọhọ ete: “Ibọhọke enyene akpan edinam oro ẹtienede, ke isua 20 ke iso ererimbot edidi ndedehe, anana iwụk ekondo ye ediwak billion mbon unana ẹnyan̄ade ẹyom mme ọsọn̄urua n̄kpọ udu uwem, emi ẹnanade. Ntọt oro ọkọwọrọ ke July 24 oto mme isụn̄utom ukara oro ẹkekụrede ndụn̄ọde isua ita.” Ke otu mme n̄kpọ eken, ndụn̄ọde emi ama ayarade nte ke ibat owo ke ererimbot eyesịm 6.3 billion ke isua 2000, nte—ke ẹsiode edisịn urua ke mme n̄kpọ ẹfep—ata ekọmurua ke udia eyedọk utịm ikaba, nte ke mme desert ẹyetara ndien mme akai ikọt ẹyesop, ye nte ke ẹbaharede aranisọn̄ ofụri ererimbot ke itie iba, ẹyedọk ubak kiet ẹkụre ke nsụhọde n̄kaha. Oro edi, edieke edide editịm n̄kpọ emi odude ke emi eyekam ọbọbọhọ odu ebịghi ntre!

⁵ Nso ke mme idụt kiet kiet, m̀mê idem Esop Edidiana M’idụt ẹkeme ndinam mban̄a afanikọn̄ ẹmi? Ata esisịt, kan̄a. Enye owụt adan̄a nte nnyịn iyomde obio ubọn̄ Abasi usọp usọp!

OBIO UBỌN̄ ORO EDI NSO?

6. Ntak emi idotenyịn nnyịn akpakpade mfụhọ edieke obio ubọn̄ Abasi okpodude ke esịt mme owo kpọt?

⁶ Nte enye edi ikpîkpu idaha emi odude ke esịt mmọemi ẹnịmde ke akpanikọ? Ke mme ikọ efen, ke ini ẹkabarede mme owo ẹwakde ekem esịt ẹnọ ido ukpono Christ, nte obio ubọn̄ Abasi eyedu mi? Ndusụk owo ẹkere ntre, ẹmende N̄wed Luke 17:21 ke King James Version, m̀mê Authorized Version ẹwụt, ke Bible (emi edikabade nto Ikọmbakara) ọdọhọde ete: “Obio ubọn̄ Abasi omodu ke esịt mbufo.” Edi edieke edide ubiere mmọ emenen, obio ubọn̄ Abasi ke odu usụn̄ oyom akan. Ntak-a? Koro mbahade ibat mbon oro ẹdọhọde nte idide mme anditiene Christ omosụhọde akan mbahade 25 eke ikie, ke onyụn̄ ososụhọde akan. N̄ko, ediwak million mbon ederi ẹdu ke mme itie ikie oro mîsiwakke ndika ederi.

7, 8. Didie ke edidụn̄ọde N̄wed Abasi an̄wam nnyịn ndidiọn̄ọ se N̄wed Luke 17:21 ọwọrọde ke akpanikọ?

⁷ Kere, n̄ko, ban̄a emi: Mmanie ke Jesus eketịn̄ ikọ ọnọ ke ini ọkọdọhọde ete, “Obio ubọn̄ Abasi omodu ke esịt mbufo?” Ekedi mbon mbubịk mme Pharisee oro Jesus akadade mme ikọ Abasi ebede ke prọfet Isaiah etịn̄ aban̄a ete: “Esịt mmọ ada nsan nsan ye ami.” (Matthew 15:1, 8, AV; Isaiah 29:13) Didie ke Obio Ubọn̄ ekpekebe odụk n̄kpọsọn̄ esịt oro? Nso, ndien, ke mme ikọ Jesus oro ẹwọrọ? N̄kpọ ndida mfiọk odu ke nsiondi King James Version oro enyenede mme edikot ke mben. Do, usụn̄ efen oro ẹdọhọde nte ke ẹkeme ndikot edi: “Obio ubọn̄ Abasi omodu ke otu mbufo.” Ndien emi edi usụn̄ emi ediwak edikabade Bible eken, utọ nte Jerusalem Bible eke mbon Catholic ye The New English Bible, ẹkotde n̄ko.

⁸ Do, ndien, Jesus mi eketịn̄ aban̄a idemesie nte Edidem emi ẹmekde ẹnịm, nte idude ke otu mmọ. Enye ama enen̄ede odu do ke otu mmọ, nte ata owo. Ndien emi akpanam nnyịn ifiọk, nde, nte ke Obio Ubọn̄ oro edi ata obio ubọn̄, ata ata ukara, kpa nte Edidem esie edide ata ata owo.

ATA IDEM N̄KPỌ MFỊN

9, 10. Nso ke ata obio ubọn̄ edi, ndien didie ke enye ekeme ndinọ mme andidu ke idak esie ufọn?

⁹ Mfịn, ibat ibat obio ubọn̄ ẹsụhọ ke isọn̄ emi. Mmọ ẹdi ata mme ukara, ẹsịnede Norway, United Kingdom, Jordan ye Nepal, ke ndisiak ifan̄ kpọt. Ke mmọemi edidem (m̀mê ọbọn̄an̄wan) odu, ọkọrọ ye nsan̄a mme andikara oro ẹnamde n̄kpọ nte n̄ka ukara, mme ọbọp mbet m̀mê otu mme andikara eken. Ke idak nda-ndomo ekpri otu mme andikara emi, ke ofụri otuowo ẹnam mbubehe uwem ofụri usen mmọ. Mmọ ẹdi mme andidu ke idak obio ubọn̄ oro.

¹⁰ Ke ebiet emi edidem ye nsan̄a mme andikara esie ẹkerede ntotụn̄ọ ntotụn̄ọ ẹban̄a mfọnọ n̄kpọ mme owo oro, obio ubọn̄ ekeme ndinọ ediwak ufọn. Ekedi ntre ke obio ubọn̄ Solomon eset, ke ini oro mme owo “ẹkewak, nte ntan emi odude ke mbeninyan̄ ke uwak, ke ẹdia n̄kpọ, ẹnyụn̄ ẹn̄wọn̄, ẹnyụn̄ ẹdat esịt.”—1 Ndidem 4:20; 10:1-9.a

11. Ke nso mme usụn̄ ke obio ubọn̄ Abasi ebiet mme obio ubọn̄ eke isọn̄?

¹¹ Nte akpanikọ oro nte ke obio ubọn̄ Abasi akara oto heaven anam enye okûdi ata idem n̄kpọ? Sese, inamke! Akpa kan̄a, enye enyene edidem emi odude ke uwem mfọn mfọn onyụn̄ ananam n̄kpọ. Enye edi enyeemi Abasi emekde, kpa Ọbọn̄ Jesus Christ, emi Bible ọdọhọde aban̄a ete: “Mme [idụt] ẹyenyụn̄ ẹdori Enye enyịn ke idem.” (N̄wed Mbon Rome 15:12) Kpa nte mme ukara eke isọn̄, obio ubọn̄ heaven emenyene ntan̄-ndian otu mme andikara. Bible owụt nte ke emi esịne nsan̄a ndidem ẹmi ibat mmọ enyenedenyene adan̄a, emi ẹma ẹkewụt nsọn̄ọnda mmọ ẹnọ Abasi nte iren ye iban ke isọn̄ emi. Kaban̄a mmọemi, Jesus ọkọdọhọ ete: “Ẹkûfehe ndịk, ekpri otu erọn̄; koro edide eti uduak Ete mbufo ndida Obio Ubọn̄ oro nnọ mbufo.” (Luke 12:32; Eriyarare 5:9, 10; 20:4) Obio ubọn̄ oro enyene odudu otode ke heaven. Otode ke iwụk ebiet esie ke heaven, ukara Obio Ubọn̄ oro ekeme nditie nnọ ewụhọ esie—ebe ke usụn̄ oro otịmde okop odudu akan eke radio m̀mê eke odudu un̄wana—osịm ebiet ekededi ke isọn̄.

12, 13. Obio ubọn̄ Abasi enyene nso orụk (a) mme ibet, (b) ndutịm unọ ukpep, (c) ndutịm nsọn̄idem?

¹² Nso kaban̄a mme ibet? Ih, obio ubọn̄ Abasi ada mme ibet akara—ata mfọn n̄kan mbet, emi Abasi anamde ndinọ mme owo ufọn. Afo emekeme ndikot mban̄a mmọ ke Bible. (Deuteronomy 6:4-9; Mark 12:28-31) Nte obio ubọn̄ oro enyene ndutịm unọ ukpep? Enye ke akpanikọ emenyene! Idem idahaemi ndutịm ukpep esie omodu ndin̄wam mbon esịt akpanikọ ẹtode kpukpru idụt ye obio ye usem, nditịm idem nnọ uwem nsinsi ke idak edinen edikara eke Obio Ubọn̄ oro. Ke idụt ekededi oro afo odụn̄de ke isọn̄, afo ke idemfo emekeme ndibuana ke ndutịm item emi.—Matthew 24:14; Eriyarare 7:9, 10; Isaiah 54:13.

¹³ Nte Obio Ubọn̄ oro enyene ndutịm kaban̄a nsọn̄idem? Enye enyene mfọn n̄kan ke otu kpukpru ndutịm nsọn̄idem oro ẹdude—ọkọn̄ọde ke uwa ufak Ọbọn̄ Jesus Christ. Ndutịm emi eyenam mme owo ẹbọhọ udọn̄ọ ye mme mmemme ikpọkidem oro mmọ ẹnyenede, man ẹkeme ndisịm nsinsi uwem ke ọyọhọ eti nsọn̄idem. (Isaiah 25:8; John 10:10) Ke ini okodude ke isọn̄, Jesus ama anam ediwak utịben̄kpọ, owụtde nte ke enye eyenyene unen ye odudu ndinam mbon udọn̄ọ ẹkop nsọn̄idem, mme nnan ẹkụt usụn̄, mme mbụn̄ọ ẹsan̄a, ye idem ndinam mme akpan̄kpa ẹfiak ẹdidu uwem. (Luke 7:20-23) Ke adan̄aemi ndutịm Obio Ubọn̄ emi odude kan̄a ọnọ ini iso, mbon oro ẹkpepde ẹban̄a enye mfịn ke ẹkpep n̄ko ndidu edisana, eti ido uwem ke ẹnyụn̄ ẹnam ẹfiak ẹkop nyayama nsọn̄idem eke spirit idahaemi. Idotenyịn mmọ edi ata idotenyịn.—Isaiah 65:14; N̄wed Mbon Rome 10:11.

14. Ke adan̄aemi odude ke isọn̄, nso ke Jesus ekepep ke ukpepn̄kpọ esie?

¹⁴ Ke ini Jesus ekedide owo ke isọn̄, enye ama ekpep owo ediwak n̄kpọ aban̄a obio ubọn̄ Abasi, ndien, ke akpanikọ, ama ọnọ ntabi-nse kaban̄a uwem ke idak ukara esie. (Luke 4:43; Matthew 12:22-28) Enye ama ekpep mme mbet esie aban̄a Abasi, man mmọ ẹkeme ndisan̄a n̄kpere Abasi ke itie ebuana eke nditọ ye ima ima ete. Enye ama ọnọ mmọ eti ndausụn̄ kaban̄a uforo uforo ediyọ mme idaha oro nnyịn isobode ke uwem.—John 1:18; 14:6.

NTỌN̄Ọ INEMESỊT AKPANIKỌ

15. Didie ke mbon eyo Jesus ẹkebiet nnyịn mfịn ke se iban̄ade ediyom ndọn̄esịt?

¹⁵ Akam oro nte ‘obio ubọn̄ Abasi edi’ edi ubak Ukwọrọikọ oro ke Obot, oro Jesus ọkọnọde ke mben obot emi asakde iso ese Inyan̄ Galilee. Mme andikpan̄ utọn̄ nnọ enye ẹkedi mme mbet esie oro ẹkemekde, ọkọrọ ye otu mbon efen. Mmọemi ẹkedi se mbon ibụk ẹnamde ‘ẹdu ke nnanenyịn ẹnyụn̄ ẹsuana.’ (Matthew 9:36) Se Jesus eketịn̄de ama ada ndọn̄esịt ọsọk mme andikpan̄ utọn̄ nnọ enye, ndien mme ikọ esie ẹkeme ndinọ nnyịn ndọn̄esịt kpasụk ntre mfịn.

16. Mmanie ẹdi mbon oro ẹkụtde ata inemesịt, ndien didie?

¹⁶ Jesus ọkọtọn̄ọ ukwọrọikọ esie ke ndisio ebiet emi inemesịt akpanikọ ọtọn̄ọde oto n̄wụt. Nte ẹkenyene ndikụt emi ke inyene obụkidem, ke edinọ idem inemesịt, ediyom nduai idem ye inemesịt? Baba, koro Jesus okodori nsọn̄uyo ọnọ mme n̄kpọ eke spirit. Enye okowụt nte ke mme owo oro “ẹnyenede udọn̄ ke n̄kpọ spirit” oro ẹnyụn̄ “ẹkopde biọn̄ ye nsatitọn̄ edinen ido” ẹdikụt inemesịt emi ebịghide ke obio ubọn̄ Abasi. (Matthew 5:3, 6, NW; Luke 8:1, 4-15) Nte afo ke ọkọri utọ udọn̄ eke spirit oro?

17, 18. (a) Nso ke ana nnyịn inam man inyene unyịme Abasi? (b) Didie ke un̄wọn̄ọ Jesus ke N̄wed Matthew 6:26-33 edemede fi udọn̄?

¹⁷ Ke ukwọrọikọ esie oro, Jesus ama anam an̄wan̄a nte ke man idi se Abasi onyịmede, nnyịn inyene ndikpep ndidi mme andikpebe Ete nnyịn emi odude ke heaven. Nnyịn ikpenyene ndiwụt mme edu esie inyụn̄ idu uwem nte ekemde ye mme idaha esie. (Matthew 5:43-48; Ephesus 5:1, 2) Man inem enye esịt, inaha utuakibuot nnyịn edi ikpîkpu ido edinam oro inamde ini kiet m̀mê ikaba ke urua. Enye enyene ndidi odu uwem, okopidem utuakibuot, oro owụtde idem ke uwem ofụri usen nnyịn ye ke ima ima edikere mban̄a nnyịn nnọ ekemmọ owo.

¹⁸ Nte ededi, edieke nnyịn inịmde mme n̄kpọ eke spirit nte akpa n̄kpọ ke uwem nnyịn, nte emi ididaha isịm nnyịn ndisobo unana ke ọdiọkitọn̄, n̄ka mme amaidem eke eyomfịn? Baba kiet! Edieke nnyịn ‘ibemde iso iyom obio ubọn̄ Abasi ye edinen ido esie,’ do ẹyedian kpukpru n̄kpọ eken oro ẹyomde ke uwem ẹnọ nnyịn. Jesus ama anam emi an̄wan̄a ke usụn̄ eyede ke N̄wed Matthew 6:26-33, emi afo ekpenyenede ndikot.

19, 20. (a) Ntak emi edidiọn̄ọ nte Abasi esede utuakibuot nnyịn edide akpan n̄kpọ? (b) Didie ke ẹkeme ndin̄wam nnyịn ndinọ obio ubọn̄ Abasi akpa itie ke uwem nnyịn? (c) Ntak emi edifiak ndụn̄ọde “Akam Ọbọn̄” oro edinyenede ufọn?

¹⁹ Didie, ndien, ke nnyịn inyene ‘ndibemiso nyom obio ubọn̄’ oro? Ndi ọwọrọ nte ke edieke nnyịn ‘ikade ufọkabasi oro nnyịn imekde’ nnyịn ke akpanikọ iyebọ edidiọn̄ Abasi? Mîdịghe, nte ana nnyịn idụn̄ọde iyom orụk utuakibuot oro Abasi emekde ọnọ nnyịn? Tịmfiọk se Jesus ọkọdọhọde aban̄a emi: “Idịghe kpukpru owo ẹmi ẹkotde Mi ẹte, Ọbọn̄, Ọbọn̄, edidụk ke Obio Ubọn̄ Heaven; edi owo eke anamde uyo Ete Mi emi odude ke heaven.” Enye ama anam an̄wan̄a nte ke ndusụk mbon oro ẹkedade nte ‘itịn̄de ntịn̄nịmikọ ke enyịn̄ esie inyụn̄ idade enyịn̄ esie inam ediwak utom odudu’ ẹdinen̄ede ẹdi “mme anam ukwan̄kpọ” ke idaha ekikere Abasi. (Matthew 7:21-23; se n̄ko 7:13, 14.) Nnyịn idisan̄a didie itịm ifiọk nte Abasi esede utuakibuot nnyịn? Ebe n̄kukụre ke nditịm mmehe ye se idude ke Ikọ esie, kpa Bible.

²⁰ Edidụn̄ọde Bible eyen̄wam nnyịn ndinọ obio ubọn̄ Abasi uwọrọiso oro enye odotde ke uwem nnyịn, ye ke usụn̄ oro ekemde ye mme idaha nnyịn owo kiet kiet. Enye eyen̄wam nnyịn ndinyene obufa ekikere kaban̄a uwem, ndinyụn̄ mfiọk se mme n̄kpon n̄kan akpan n̄kpọ ẹdide. Mmọdo yak nnyịn ikere iban̄a udiana ikpehe emi odude ke Ukwọrọikọ Jesus ke Obot oro ẹdiọn̄ọde nte “Akam Ọbọn̄.” (Matthew 6:9-13) Edifiak ndụn̄ọde Akam Uwụtn̄kpọ emi eyen̄wam nnyịn ndinyene ata in̄wan̄în̄wan̄ ndise kaban̄a se Abasi oyomde oto nnyịn edieke anade nnyịn inyene ata inemesịt. Ndien enye eyewụt nnyịn nte ke aduai owo idem ibuotikọ Bible edi edinọ enyịn̄ Abasi ubọn̄ ebe ke obio ubọn̄ esie ke ubọk Jesus Christ.

[Ikọ idakisọn̄]

[Ekebe ke page 7]

NTE UBONOWO OYOM OBIO UBỌN̄ ABASI?

“Edieke ẹkpetopde ekpri ubak n̄kpọekọn̄ nuclear ke obio New York, enye ndusụk ekeme ndikpowot million owo 2 ye mbahade 25 ke ini kiet, ọnọ mme owo million 3 ye mbahade 6 efen unan ata idiọk idiọk, . . . ntre ke mme ọkọk udọn̄ọ ye mme ekpep n̄kpọ mban̄a bọm nuclear ẹkenyịme n̄kpọn̄. . . . Se mmọ ẹnịmde ke akpanikọ edi nte ke ererimbot eyesobo utọ ekọn̄ oro mbemiso isua ikie emi ebede ye nte ke enye eyenam owo ikemeke ndikaiso ndu uwem.”—New York “Times,” September 27, 1980

[Ekebe ke page 11]

ATA IDEM N̄KPỌ EKE OBIO UBỌN̄ ABASI

EDIDEM: Jesus, ye unen ndikara ke 1,000-isua.

NSAN̄A MME ANDIKARA EKE HEAVEN: Abasi emek oto mme anam-akpanikọ owo.

OBIO UKARA ESIE: Isọn̄ nnyịn ye paradise ofụri ererimbot ẹfiakde ẹwụk.

MME ANAM-AKPANIKỌ MME ANDIDU KE IDAK: Ediwak billion owo, abuanade mme akpan̄kpa oro ẹdinamde ẹset.

MME IBET: Ẹkọn̄ọ ke edinen ido Abasi, ibet edidem eke ima.

NDUTỊM UNỌ UKPEP: Ndin̄wam mme owo eke kpukpru orụk ndidara uwem inemesịt idahaemi, nnyụn̄ ntịm mmọ idem nnọ nsinsi uwem ke paradise isọn̄.

[Ndise ke page 4]