Ẹtan̄a Iduọ Babylon ke Japan

BABYLON, akwa obio oro, ọmọduọ, ọmọduọ, emi akanamde kpukpru mme idụt ẹn̄wọn̄ wine ifụtesịt use esie.” Edi apostle John ke edem ko ke akpa isua ikie eke Eyo Nnyịn ekebemiso okop ọkpọsọn̄ etop angel oro. Nte ededi, ke eyo nnyịn, ke “usen Ọbọn̄,” mme Christian Ntiense Jehovah ẹtiene ẹbuana ke ndinam ofụri ubonowo ẹkop.​—Ediyarade 1:10; 14:8.

Akwa Babylon edi ndutịm nsunsu ido ukpono ofụri ererimbot, emi Christendom edide ubak kiet emi enyenede, nduduọhọ akan. Ke ofụri “utịt ini” emi, Mme Ntiense Jehovah ke ofụri ererimbot ẹmetan̄a ubiomikpe Jehovah uko uko ẹdori enye. (Daniel 12:4) Ke uwụtn̄kpọ, mme nsiondi Enyọn̄-Ukpeme eke April ye May isua oko ẹma ẹkama mme okopodudu ibuotikọ ẹyararede ubiomikpe nsunsu ido ukpono ye nsobo esie oro edide ke iso. Ke ofụri ererimbot ẹma ẹsuan nsiondi ẹmi awakde ebe million 50​—kpa okopodudu editan̄a ubiomikpe Akwa Babylon!

Japan Esịn Odudu

Ẹma ẹkụt uwụtn̄kpọ nduaidem oro Mme Ntiense Jehovah ẹkenyenede ke mme akpan nsiondi ẹmi ke Japan, kpa ebiet emi mbon Shinto ye mbon Buddha eke Akwa Babylon ẹkarade. Ke Japan nsiondi Utom Obio Ubọn̄ Nnyịn eke December ke 1988 ama anam ẹdiọn̄ọ ẹban̄a akpan ubịnikọt an̄wautom oro ẹkediomide ẹnọ ọfiọn̄ April ye May 1989. Ikot edin̄wam akpan utom magazine emi ama ọwọrọ ke mme nsiondi Utom Obio Ubọn̄ Nnyịn oro ẹketienede, kpa ye mme leta oro ẹkenọde ẹsọk mme esop ye otu mbiowo.

Nte ẹkenamde n̄kpọ ẹban̄a ekedi n̄wọrọnda. Ye un̄wam Jehovah, ke ọfiọn̄ iba oro ke isua oko, Japan ama ọbọ ikọ ntiense oro akanam mîbọhọ.

Utom Usiakusụn̄ Unọ Un̄wam

Ntọt eke December 1988 ama esịne ikọ ẹmi: “Nnyịn imesịn udọn̄ inọ mbufo ndinyene utịt-mbuba edidụk utom usiakusụn̄ unọ un̄wam ke April ye May, akpan akpan ke April.” Ẹma ẹfiak ẹnọ ekikere emi ke nsiondi Utom Obio Ubọn̄ Nnyịn eke February 1989, emi akakpakde nditọete ‘ndinam ukpụhọde ke mbubehe ofụri usen mmọ man ẹnyene adan̄a ediwak asan̄autom oro ẹyakde idem ẹnọ nte ekekeme ndisịn enyịn̄ nte mme asiakusụn̄ unọ un̄wam ke April.’

Mme Ntiense ẹmi ẹma ẹda ikọ editi emi ẹsịn ke esịt. Utịp? N̄wakn̄kan ibat mme asiakusụn̄ unọ un̄wam. Ke March 1989 ibat mme asiakusụn̄ unọ un̄wam ama ososịm obufa n̄wakn̄kan ibat owo 24,115. Edi ke April owo 41,055 akayak esisịt ndiwak n̄kan ibat oro utịm ikaba. N̄wọrọnda ukeme ke akpanikọ!

Ke ediwak ẹsop, kpukpru m̀mê ata ediwak asuanetop ẹma ẹbuana ke ndusụk ikpehe utom uyụhọ-ini ke ini akpan utom ọfiọn̄ iba oro. Emi ke ediwak idaha ama oyom ekese ndutịm. N̄wanndọ kiet ama eyịk m̀mê imọ iyekeme ndibuana sia enye odụn̄de ke obot obot obio oro ekperede ndidi itiat 3,000 emi n̄kpọisan̄ mîwakke. Nte ededi, enye ama enen̄ede oyom ndisiak usụn̄ unọ un̄wam. Ntre mbiowo ẹma ẹnam ndutịm ndin̄wam enye ke n̄kpọisan̄, ndien n̄wan emi, ye kpukpru asuanetop eken ke esop, ẹma ẹkop inem utom usiakusụn̄ ọfiọn̄ kiet.

Eti ndausụn̄ mbiowo ama onịm uwụtn̄kpọ ke mbahade Obio Osaka, Obio Takatsuki, Esop Otsuka edide asuanetop 77, ke ebiet emi kpukpru mbiowo ye mme asan̄autom unamutom ẹkedude ke otu owo 73 oro ẹkebuanade ke ndusụk orụk utom usiakusụn̄. Kpukpru n̄kparawa asuanetop oro ẹma ẹkena baptism, ẹmi ẹsụk ẹkade n̄wed ẹma ẹsịne n̄ko ke otu mme asiakusụn̄ oro. Edu usiakusụn̄ oro n̄kparawa Ntiense ẹmi ẹkewụtde ekedi orụk oro ẹkekụtde ke ediwak esop. Ke uwụtn̄kpọ, ke otu n̄kpri owo 23 oro ẹma ẹkena baptism ke Esop Heiwadai ke mbahade Obio Tokyo, owo 11 ẹkedi mme asiakusụn̄ ofụri-ini ndien owo 11 ẹkedi mme asiakusụn̄ unọ un̄wam ke April. Ke esop oro, ofụri ibat asuanetop 93 ẹma ẹsiak usụn̄ kpasụk ke ọfiọn̄ oro.

Akpan Usen Utom

Nsiondi Utom Obio Ubọn̄ Nnyịn eke March ke Japan ama esịn udọn̄ ọnọ nditọete ye ikọ ẹmi: “Idịghe Saturday ọyọhọ iba ye ọyọhọ inan̄ kpọt ke ẹsin̄wam utom magazine edi kpukpru Saturday ke ọfiọn̄. Ifịk oro nditọete ẹnyenede odot se ẹtorode. Ke April ẹmenam ndutịm ẹnọ utom magazine n̄ko ke kpukpru Saturday, ndien mbọk ẹsịn akpan ukeme ndisio April 8 san̄asan̄a nnịm nnọ usen magazine man kpukpru owo ẹkpebuana ke utom magazine ke usen oro. Man ẹnọ kpukpru owo oro ẹdinyịmede ndikop ntọt, oyom ẹsuan ekemini nsiondi ẹmi ntatara ntatara.”​—Isaiah 61:2; Ediyarade 18:4, 5.

Ke February nsiondi Utom Obio Ubọn̄ Nnyịn eke mbon Japan ama ọsọn̄ọ etịn̄ aban̄a akpan utom emi. Enye ọkọdọhọ: “Ke ọyọbọ Saturday iba, April 8, yak owo kiet kiet ke otu Mme Ntiense Jehovah ke Japan​—oro idahaemi ẹwakde ẹbe owo 130,000​—abuana ke utom magazine.” Ẹma ẹsịn udọn̄ ẹnọ mbiowo ndidiomi nsio nsio orụk utom magazine oro edidade ofụri usen oro man adan̄a ediwak owo nte ekekeme ẹkpebuana. Ekọm enyene in̄wan̄în̄wan̄ unam n̄kpọ eke mbiowo ye un̄wam ofụri esịt okotode mbon eken ke otu asuanetop, usen oro ekedi kiet oro ẹkekụtde ata unen. Nnyịn imekeme ndidọhọ nte ke usen oro, ẹma ẹmenede uyo ọsọn̄ akan ke Japan ke editan̄a ubiomikpe Jehovah ndori Akwa Babylon.

Ke uwụtn̄kpọ, ke Esop Ushioda ke Obio Yokohama, mbiowo ẹma ẹnam ndutịm utom oro ekebịghide ke hour 13, ọtọn̄ọde ke n̄kanika 7 usenubọk tutu osịm 8 okoneyo. Ẹma ẹsịn unọ ikọ ntiense efak utịm ikaba, ye mme ini ndifiak n̄kosobo ye mbon oro ke akpa mîkodụhe ke ufọk ye unọ ikọ ntiense ofụri ini eke ufọk-ke-ufọk. Ata ediwak asuanetop ẹma ẹkeme ndibuana ke nsụhọde n̄kaha, kiet ke otu ikpehe utom ẹmi, ndien ediwak owo ẹma ẹbuana ke kpukpru ikpehe utom oro ẹkediomide.

Ẹma ẹdiomi utom oro akakade-kaiso ke Esop Jonan, Obio Fukuoka. Do, ẹma ẹnam mme ndutịm ẹbịghide ediwak hour ọtọn̄ọde ke n̄kanika 8 usenubọk tutu osịm 9 okoneyo, ye ata ekpri mi nduọkodudu ke ufọt uwemeyo. Ẹma ẹsịn unọ ikọ ntiense eke ufọk-ke-ufọk, ẹkade mme efak unam mbubehe ye eke unyamurua, ẹnyụn̄ ẹkade mme ebiet oro mmọ mîkekwe owo ndomokiet ke akpa ediwaha. Ndusụk Mme Ntiense ke esop oro ẹma ẹtọt hour itiaita ke utom ukwọrọikọ ke usen oro!

Ẹma ẹkụt nte nditọete ẹkenamde n̄kpọ ke ofụri esịt ke mbahade Obio Wakayama, emi ofụri asuanetop 55 ke Esop Kainan ẹkebuanade ke akpan usen utom emi. Eyenete an̄wan kiet do, kpa asiakusụn̄ ofụri ini akaman eyen ke April 7. Nte oro ama akpan enye okûnọ ikọ ntiense ke April 8? Baba. Enye ama ọnọ mme magazine kpa do ke ufọkibọk oro! Ke ndiwụt mbiet edu emi, ẹma ẹyịk eyenete eren kiet ke mbahade Obio Osaka ndise mban̄a n̄kpọ ke itieutom idịbi udia esie ke April 8. Enye edisan̄a didie abuana ke akpan utom emi? Enye ama anam itieutom esie edi efakutom esie onyụn̄ ọbọ etịbe ition.

Eyenete an̄wan kiet ke mbahade Obio Saitama ama enyene udọn̄ ndibuana ke akpan utom emi ke usen oro, edi enye ekenyene ndisan̄a ye ebe esie oro mînịmke ke akpanikọ n̄ka Obio Asahikawa oro oyomde usụn̄ ekpere ndisịm itiat 800. Kpa ye oro, enye ikakpaha mba. Ke Asahikawa, enye ama ada n̄kpri nditọ esie iba aka itie-mbehe tren, ndien do, ke an̄wa itie-mbehe oro, enye ama okụt se enye okodoride enyịn aban̄a: otu asuanetop ẹtode esop obio oro nte ẹdude ke utom an̄wautom. Enye ama ekeme ndibuana ye mmọ ke utom usen oro.

Unọ Ikọ Ntiense Efak

Utom Obio Ubọn̄ Nnyịn eke mbon Japan akpan akpan ama esịn udọn ọnọ mbiowo ndidiomi unọ ikọ ntiense efak ke April 8, ndien emi ama akabade edi akamba ikpehe kiet ke akpan usen oro. Nte okotịbede, ọkpọsọn̄ edịm ama edep ke ofụri idụt oro, edi oro ikebịtke ufiop ufiop udọn̄ nditọete. Ata ediwak owo ẹma ẹwụt ukem edu ẹkekụtde ye nditọete iban ita ẹdide mbon n̄kpọnnam ke Esop Minamata, mbahade Obio Kumamoto. Kpa ye isua emana mmọ​—65, 80 ye 85​—mmọ ẹma ẹkan ọkpọsọn̄ edịm oro ubọk, ẹkenyụn̄ ẹdi eti nsịnudọn̄ ẹnọ mbon eken ke esop; mmọ n̄ko ẹma ẹnam ediwak mbon oro ẹkesan̄ade ẹbe ẹwụk enyịn ẹse mmọ.

Ke adan̄aemi ọnọde ikọ ntiense efak, eyenete an̄wan kiet ke Esop Edem Usoputịn Obio Kashiwa ama obụp eren kiet ete: “Nte akanam afo omokop aban̄a Akwa Babylon?” Ke ini eyenete emi ọkọnọde mme nsiondi magazine eke April oro, eren oro ọkọdọhọ ete, “Ami nyomke” onyụn̄ ebe esiemọ. Nte ededi, ke ini eren emi okosịmde itie-ube usụn̄ tren onyụn̄ atuakde ada, enye ke okomụm mmụm ete, “Nso idi Akwa Babylon?” Eyenete eren kiet oro ọkọnọde ikọ ntiense efak ekpere ama ada okop se enye etịn̄de onyụn̄ asan̄a ke mben usụn̄ oro ye enye, anamde se Akwa Babylon edide an̄wan̄a. Eren oro ama ọbọ mme magazine oro.

Ndusụk esop ke mbemiso akananam inọhọ ikọ ntiense efak. Edi toto ke April 8, mmọ ẹmenam enye edi ubak utom ofụri ini mmọ. Ndien idịghe n̄kpọ n̄kpaidem! Unọ ikọ ntiense efak edi usụn̄ oro okụtde unen etieti ke ndisobo ye mbon oro owo mîkemeke ndisịm ke usụn̄ en̄wen. Eyenete an̄wan kiet ke Obio Naha, Okinawa, okodu ke utom unọ ikọ ntiense efak ke an̄wa ọfis oro owo mîsiyakke Mme Ntiense Jehovah ẹdụk kaban̄a uduak unọ ikọ ntiense. Enye ama onịm magazine 12 ke hour kiet ke ndisan̄a n̄kosobo ye mbon oro ẹdụkde-dụk ẹnyụn̄ ẹwọrọde-wọrọ ke ufọk oro.

Eyenete an̄wan kiet ke Obio Muroran, Hokkaido, okodu ke utom unọ ikọ ntiense efak ke an̄wa ikpọ ufọkurua ke esịt obio oro. Enye ama ọdọhọ eren kiet oro ọkọbọde mme magazine ete: “Edieke afo oyomde ndikpep ekese nnyịn imekeme ndiwaha ke ufọk fo.” Eren emi ama ọnọ enye nọmba ufọk ye nọmba urụk ukopikọ esie, ye n̄wed ndisan̄a nsịm ufọk esie ye ini oro enye edidude ke ufọk! Ke urua oro eketienede, enye ye eyenete eren kiet ẹma ẹwaha ke ufọk esie ẹnyụn̄ ẹkụt ẹte ke enye okodụn̄ ke ufọk oro ẹkesiberide usụn̄ ẹbaha utom ukwọrọikọ ofụri ini eke Mme Ntiense Jehovah. Otode ọkpọ ọkpọ ukot Bible esie, akparawa emi ama onịm ke akpanikọ nte ke Christendom inyeneke unyịme Abasi. Enye ke okoyom ata Ido Ukpono Christ ama onyụn̄ okop inemesịt nditọn̄ọ ukpepn̄kpọ Bible ofụri ini.

Asuanetop kiet ke Obio Kawasaki akabuana ke utom unọ ikọ ntiense efak ke uwemeyo April 8. Ke utịt ini oro n̄wan emi okonịmde, enye ama etịn̄ ikọ ye akpatre owo, kpa akparawa an̄wan oro ọkọdọhọde ke imọ ke akpa ima ikpep Bible ye Mme Ntiense Jehovah. Edi ke imọ ima isobo ubiọn̄ọ otode ete ye eka imọ ndien edikem imọ ima ika ufọkn̄wed ntaifiọk inyụn̄ ikodụn̄ ke okụre ufọkn̄wed oro. Ntem imọ ima itre ukpepn̄kpọ imọ. Nte ededi, ekọm enyene utom unọ ikọ ntiense efak, enye ke idara ama ọtọn̄ọ ukpepn̄kpọ Bible esie ndien ama ọtọtọn̄ọ ndidụk mme mbonoesop.

Edisuan Magazine

Nte utịp ke ata ediwak owo ndin̄wam akpan utom emi, ibat magazine ẹkenịmde​—akpan akpan mme magazine ẹkamade etop ubiereikpe oro ẹnọde Akwa Babylon​—ekedi ata akamba. Asuanetop esop kiet ke mbahade Obio Osaka ama onịm magazine 205 ke April. Ke Obio Kagoshima, Esop Edem Usiahautịn, asuanetop 14 ẹma ẹnịm magazine awakde ebe ikie ke idem owo kiet kiet, ke adan̄aemi otu asuanetop 12 ẹdude nsannsan ke Obio Ogawa, mbahade Obio Ibaraki, ẹkenịmde ofụri ibat magazine 1,388 ke April.

Ke akpanikọ, ke Japan ke ofụri ofụri, ẹma ẹnịm magazine 3,293,266 ke April isua oko​—adade mbahade 92 eke ikie awak akan eke 1988 ke April! Etop ubiereikpe Jehovah ọwọrọ odudu odudu didie ntem osịm Akwa Babylon!

Akwa Ubom Odudu

Ke akpanikọ, nte edide ke kpukpru ikpehe eken ke ererimbot, Mme Ntiense Jehovah ke Japan ẹma ẹnyene in̄wan̄în̄wan̄ edu ẹnyụn̄ ẹsịn ifịk ke ini-utọ eke 1989. Mme ifiọkutom mmọ ẹnọ in̄wan̄în̄wan̄ uyarade nte ke Jehovah ama ọdiọn̄ ifịk mmọ onyụn̄ ọnọ ukeme mmọ ibetedem nditan̄a ubiereikpe esie ndori nsunsu ido ukpono. Ye ndusụk owo, ikedịghe mmemmem n̄kpọ inọ mmọ ndibuana; nte ededi, mmọ ẹma ẹbiere, Jehovah ama onyụn̄ ọdiọn̄ ifịk mmọ. Ediwak owo ẹdu ke efakutom oro ẹsinamde utom ndien ndien, edi mmọ ẹma ẹwụt ukem edu unam n̄kpọ usọp usọp ye ifiopesịt nte nditọete mmọ ke mme ebiet eken. Ke kpukpru idaha, ikọ Isaiah edi akpanikọ: “Enye ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem.”​—Isaiah 40:29.

Nte eyịghe mîdụhe, ifiọkutom mmọ ama anam mmọ ẹti ikọ apostle Paul: “Nnyịn ikama ọsọn̄urua n̄kpọ emi ke aban̄ mbat, man akwa ubom odudu esie okpoto Jehovah itoho nnyịn.” (2 Corinth 4:7) Ih, ke ini owo onịmde utom Christian, kpa “ọsọn̄urua n̄kpọ emi,” akpa ke uwem esie, enye esikụt “akwa ubom odudu” oro Abasi ọnọde. Jehovah akpakam akaiso ndida ikọt esie ke Japan ye ke ofụri idụt eken ndinọ ọyọhọ ikọ ntiense mbemiso utịt edide.​—Matthew 24:14.

Isua emi, mme nsiondi Enyọn̄-Ukpeme eke April ye May ẹyekama udịm udịm ibuotikọ ẹmi, “Anie Edida Ubonowo Osịm Emem?” “Emem Ererimbot​—Nso ke Enye Edinen̄ede Ọwọrọ?” “Million Mme Akpan̄kpa Kemi Ẹyefiak Ẹdu Uwem,” ye “Armageddon​—Ini Ewe?” Ntak mûdiomike ndibuana ntọt emi ye mme mbọhọidụn̄ fo-o? Kụt ete imanam ediwak owo nte ekekeme ẹdiọn̄ọ ẹban̄a utịbe utịbe eti mbụk oro Abasi otịmde onịm ke Bible ọnọ eyo nnyịn.