Ẹdinam Akpanikọ edi Ata Eti Ido
ẸTORO edinam akpanikọ etieti ke Bible, enye onyụn̄ edi se ẹyomde ẹto mme Christian akpanikọ. (Matthew 22:39; 2 Corinth 8:21) Akande oro, edinam akpanikọ enen̄ede edi ata eti ido, nte ẹwụtde ke uwem ediwak owo mfịn oro ẹma ẹkeda nnennen ifiọk Bible ẹkpụhọ ekikere ye esịt mmọ. Uwụtn̄kpọ kiet aban̄ade emi oto Liberia.
Ke ẹma ẹketie ẹkọk ibuot ke akam, ebiowo oro edide Christian ye n̄wan esie ẹma ẹberi ufọkutom ukịm-ọfọn̄ mmọ. Ntak-a? Sia emi akadiade ini mmọ akaha onyụn̄ akpan utom ukwọrọikọ ye ukpepn̄kpọ mmọ. Mmọ ẹma ẹnyịme ndiyụhọ ye ekpri okụk oro ẹnyenede ẹto edinyam mmọn̄-n̄wed udebi ọfọn̄. Ndondo oro ke mmọ ẹma ẹketọn̄ọ edinam emi, nte ededi, ekọmurua mmọn̄-n̄wed udebi ọfọn̄ ama ọduọ ke urua obio mmọ. Okụk mmọ idahaemi ikekemeke ndin̄wam ubon mmọ. Nso ke mmọ ẹkpenam?
Mmọ ẹma ẹdọhọ usiakifia oro ekesinọde mmọ mmọn̄-n̄wed udebi ọfọn̄ emi ndisụhọde urua mmọ, man mmimọ inyene udori eke ọfọnde. Owo okonyịmeke emi. Nte ededi, usiakifia oro ama onyịme ndisinọ orụk n̄wed ibatokụk iba, kiet owụtde ata ekọmurua ndien enye eken owụtde ekọmurua oro osụhọrede emi mmọ ẹkemede ndimen n̄wụt mbon Custom man otodo mmọ ẹkpe ekpri utomo. Emi akpanam ebiowo oro esinyene $2,000 nte udori ke isan̄-urua ini kiet.
Eyenete oro ama esịn ndibuana ke mbubehe unana edinam akpanikọ oro, enye okponyụn̄ oyịp ukara. Ikpọ owo usiakifia oro ẹma ẹdu ke n̄kpaidem. Mmọ ẹkewet ẹte: “Nnyịn imokpono ubieresịt fo,” ndien mmọ ẹma ẹmek ebiowo oro ndidi akpan isụn̄utom ke n̄kpọurua mmọ ke Liberia. Ke mmọ ndise mfọn mfọn idahaemi mban̄a se inanade ubon mmọ ke n̄kan̄ obụkidem, ebiowo emi ye n̄wan esie ẹma ẹkeme ndisiak usụn̄ unọ un̄wam, ẹtịmde ediana ye nditọete ẹnam utom ndinam esop ọkọri. Ke akpanikọ, edinam akpanikọ mmọ edi edidiọn̄ ọnọ mmọ.
Alfonso, ke Spain, n̄ko ama okụt nte edinam akpanikọ edide ata eti ido. Ekpri eyeneren emi ama ọkpọn̄ ufọk ke edide isua 12 ke emana, ndien ikebịghike enye ama esinyam n̄kpọsọn̄ ibọk, esinyụn̄ oyịp n̄kpọ ke moto, ke ufọkidụn̄ ye ke ufọkurua. Ndusụk ini enye ama esiyịp n̄kpọ ke ufọkurua awakde osịm duop ke usen. Ke edide isua 21 ke emana, owo inan̄ ke otu nsan̄a esie ẹma ẹmia enye idiọk idiọk, ẹyịp ofụri n̄kpọsọn̄ ibọk esie, ẹnyụn̄ ẹdọhọ ẹte mmimọ iyewot enye edieke enye okotde mme borisi ọnọ mmimọ. Sia mme borisi ẹkediọn̄ọde enye mfọn mfọn, enye ama okop ndịk ndika ufọkibọk n̄kọbọ usọbọ.
Ke adan̄aemi unan esie okokụrede sụn̄sụn̄, Alfonso ama ekere ọkpọsọn̄ aban̄a usụn̄uwem esie. Enye ama eti mme n̄kpọ ke Bible ye mme edumbet Christian oro eka esie ekesitịn̄de ọnọ enye ke ini enye edide eyenọwọn̄. Enye, adan̄aoro, ikesidọn̄ke enyịn ke ikọ eka esie, edi idahaemi enye ama eben̄e ete Mme Ntiense Jehovah ẹsinịm ukpepn̄kpọ Bible ye imọ. Ke ọfiọn̄ itiokiet enye ama okpụhọde edu uwem ye ido esie ofụri ofụri onyụn̄ odot ndina baptism.
Nte ededi, ke usen oro mbemiso baptism esie, enye ama ọbọ n̄wed ndika esop kaban̄a ikpe ama-uke. Ekedi ubiatibet oro enye akanamde anyanini ke edem. Nte ededi, Alfonso ama onyịme ubiatibet oro an̄wan̄wa ndien ẹma ẹbiere ndikọbi enye tutu ẹfiak ẹdomo ikpe esie ẹse. Loya esie ama akpak enye ndidọhọ nte ke imọ ikoyịpke n̄kpọ ndomokiet, n̄ko nte ke imo ikakamake ikan̄. Edi Alfonso ama ọkọbọ ke nditịn̄ akpanikọ. Ke ntak ubiatibet oro ye idiọk enyịn̄ oro enye ekenyenede ke n̄wed mme borisi, ekpeikpe ama ọdọhọ ẹnọ enye n̄kpọkọbi isua 13. Ẹdi ke ẹkerede ẹban̄a eti edu uwem esie ye editịn̄ akpanikọ, ẹma ẹnọ enye ọfiọn̄ itiokiet, ẹmi enye ama okokokụre ke adan̄aemi ẹdomode ikpe esie ẹse.
Idahaemi Alfonso ye n̄wan esie ke ẹnam n̄kpọ Jehovah ke esịt akpanikọ, ẹkopde inemesịt ndikokụt ata uduak ke uwem ndinyụn̄ n̄kụt ke se iketịbide inọ mmọ nte ke edinam akpanikọ edi ata eti ido.