Nduaidem Nduaidem N̄kukụt Ẹmi Ẹsọn̄ọde Mbuọtidem

Mme Akpan N̄kpọ Ẹtode Ediyarade

JOHN asan̄autom Jehovah odu ke ekpri isuo Patmos, emi odude nsannsan ọkpọn̄ esụk edem usoputịn Asia Minor. Do akanieren apostle emi okụt mme ndyọ ndyọ n̄kpọ—kpa ndamban̄a n̄kpọ, awakde ndikpa owo idem, ẹnyụn̄ ẹnyenede se ẹwọrọde ke akpanikọ! Enye odu ke usen Ọbọn̄, emi ọtọn̄ọde ke edimenede Jesus ndori ke ebekpo ke 1914 tutu osịm utịt Ukara Tọsịn Isua Esie. Okposụkedi John okụtde mme n̄kpọntịbe oro edidade itie ke akpatre ini ubonowo, edi ubọn̄ ubọn̄ n̄kpọ didie ntem enye ndibemiso nda n̄kụt Tọsịn Isua Ukara Christ! Nso mme edidiọn̄ ke okopitem ubonowo edinyene ntem adan̄aoro!

John ekewet mme n̄kukụt ẹmi ke n̄wed Bible eke Ediyarade. Ẹwetde ke n̄kpọ nte 96 C.E., enye ekeme ndisọn̄ọ mbuọtidem nnyịn ke Abasi ntịn̄nịmikọ, kpa Jehovah, ye ke Eyen esie, Jesus Christ.—Kaban̄a ọyọhọ ọyọhọ ntọt, se n̄wed Revelation—Its Grand Climax At Hand!, emi Watchtower Bible and Tract Society of New York, Inc., emịn̄de.

Christ Ọmọnọ Ima Ima Item

Ke ntọn̄ọ ntọn̄ọ ediyarade otode Abasi ebe ke Christ, leta ẹmodu ẹmi ẹnọde ẹsọk esop itiaba eke ekemmọ mme ada udeme Obio Ubọn̄ ye Jesus. (1:1–3:22) Ke ofụri ofụri, mme leta ẹmi ẹkama itoro, ẹnam ẹdiọn̄ọ mme mfịna, ẹnọ nnen̄ede ye/m̀mê nsịnudọn̄, ẹnyụn̄ ẹsiak mme edidiọn̄ ẹsụn̄ọde ẹto n̄kopitem edinam akpanikọ. Ọkposụkedi mbon Ephesus ẹkeyọde, mmọ ẹma ẹkpọn̄ ima oro mmọ ẹkenyenede ke akpa. Ẹsịn udọn̄ ẹnọ esop Symrna oro enyenede inyene ke n̄kan̄ eke spirit ndisọn̄ọ ndu ke edinam akpanikọ kpa ye ukụt. Ukọbọ ikanke esop Pergamum ubọk, edi enye ama onyịme utọ ubahade. Kpa ye n̄kọri ke utom oro mme Christian ke Thyatira ẹnamde, odudu Jezebel omodu do. Esop Sardis enyene ndidu ke edidemede ke n̄kan̄ eke spirit, ẹkpak enyeoro odude ke Philadelphia ndisọn̄ọ mmụm se enye enyenede n̄kama, ndien ndebe ndebe mbon Laodicea ẹyom usobo ke n̄kan̄ eke spirit.

Nso nti ikọ ke edi ntem ndida nnọ ndidem ini iso eke heaven ukpep—ke akpanikọ, kpukpru mme Christian! Ke uwụtn̄kpọ, nte odu owo nnyịn ekededi emi akabarede etie ndebe ndebe? Do nnam n̄kpọ ban̄a! Kabade nnọ nduọkodudu nte cup mbịt mbịt mmọn̄ ke ufiop ufiop usen edi n̄ko tọn̄ọ ndiwụt ufiop ufiop udọn̄ nnọ Jehovah ye utom esie.—Men Matthew 11:28, 29; John 2:17 domo.

Eyenerọn̄ Ọkûbọde Ikpan̄wed

Ekem ẹkụt Jehovah etiede ke ebekpo esie ke ubọn̄. (4:1–5:14) Mbiowo 24 ye n̄kpọ uwem inan̄ ẹkan enye ẹkụk. Ikpan̄wed ẹdiande ufịkn̄kpọ itiaba ẹdu enye ke ubọk. Anie ekeme ndikûbọde ikpan̄wed emi? Kamsi, Eyenerọn̄, kpa Jesus Christ, odot ndinam ntre!

Ẹyarade mme ndyọ ndyọ n̄kpọntịbe nte Eyenerọn̄ adianarede ufịkn̄kpọ itiokiet. (6:1-7:17) Nte ẹdianarede akpa ufịkn̄kpọ, Christ ọwọrọ edi ke afia enan̄-mbakara, ọbọde anyanya (ke 1914), onyụn̄ ọwọrọ edikan. Nte ẹdianarede ufịkn̄kpọ ita efen efen, mme awat enan̄-mbakara en̄wen ẹda ekọn̄, akan̄, ye n̄kpa ẹsọk ubonowo. Ye edidianade ọyọhọ ufịkn̄kpọ ition, mbon oro ẹkewotde kaban̄a Christ ẹfiori ẹte ẹsio usiene iyịp mmimọ, ndien ẹnọ mmọ kiet kiet “afia edisịnen̄kpọ,” owụtde eti idaha ke ebuana ye ediset mmọ ndi mme edibotn̄kpọ eke spirit oro mîkemeke ndikpa ye mme ubọn̄ ubọn̄ ifetutom. (Men Ediyarade 3:5; 4:4 domo.) Ke ini ẹdianarede ọyọhọ ufịkn̄kpọ itiokiet, unyekisọn̄ ọtọt usen iyatesịt Abasi ye eke Eyenerọn̄. Edi ẹmụm “ofụm isọn̄ mbinan̄,” emi adade aban̄a ubiereikpe nsobo ẹkama, tutu ẹfịk ikọt Abasi 144,000 idiọn̄ọ. Ke ini ẹyetde mmọ aran ke spirit Abasi ẹnyụn̄ ẹdade ẹbon nte nditọ esie eke spirit, mmọ ẹbọ mbemiso idiọn̄ọ—kpa ufịkn̄kpọ, m̀mê en̄wọn̄ọ—mmọ ndida heaven nnyene. N̄kukụre ke ẹma ẹkedomo ẹse ke edifịk oro ẹfịkde idiọn̄ọ edikabade edi ke nsinsi. (Rome 8:15-17; 2 Corinth 1:21, 22) Ndien anaedi ama enyene John ndyọ didie ntem ndikụt “akwa otuowo” ẹtode kpukpru idụt—akwa udịmowo ye idotenyịn nsinsi uwem ke paradise isọn̄! Mmọ ẹto ke “akwa ukụt” ẹwọn̄ọ, kpa ini afanikọn̄ ubonowo oro mînyeneke mbiet.

Nso akpa-owo-idem n̄kpọntịbe ẹda itie ntem nte ẹdianarede ọyọhọ ufịkn̄kpọ itiaba! (8:1–11:14) Ndobo odu ke ubak hour kiet, anamde ẹkop akam nte ikọt Abasi, emi etienede ye edin̄wan̄a ikan̄ itieuwa nduọk ke isọn̄. Ekem angel itiaba ẹben̄e idem ndifri ukorowo ẹtọtde ufen ẹmi Abasi ọnọde Christendom. Ẹfri ukorowo ẹmi ke ofụri utịt ini tutu ke akwa ukụt. Ukorowo inan̄ ẹtọt ufen ẹnọde isọn̄, inyan̄, idịm mmọn̄, ye utịn, ofiọn̄, ye mme ntantaọfiọn̄. Ndifri ọyọhọ ition okot n̄kukun̄kpọyọriyọ ẹwọn̄ọ ẹdi ẹmi ẹdade ẹban̄a mme Christian oro ẹyetde aran oro ẹwọn̄ọde ẹdi ndin̄wana ekọn̄ ọtọn̄ọde ke 1919 kaiso. Ye edifri ọyọhọ ukorowo itiokiet, mbonekọn̄ oro ẹdorode ke enan̄-mbakara ẹtọn̄ọ en̄wan. Ke edisu, mbon oro ẹyetde aran, emi “akwa otuowo” ẹsọn̄ọde idem toto ke 1935, ẹtan̄a etop ubiereikpe oro otụhọrede mme adaiso ido ukpono Christendom.

Ekem John ata ekpri ikpan̄wed, owụtde nte ke mbon oro ẹyetde aran ẹmenyịme utom mmọ ẹnyụn̄ ẹkop nsọn̄idem ẹto ikpehe Ikọ Abasi esịnede mme ikọ ubiereikpe Abasi oro mmọ ẹtan̄ade ẹdọri Christendom. Ẹwụk apostle emi ndidomo ikpehe temple, owụtde ke mme uduak Jehovah kaban̄a ndutịm temple enyene ndisu ke akpanikọ ye nte ke ana mbon oro ẹnyenede ebuana ye enye ẹsịm mme edumbet Abasi. Ekem ẹwot “ntiense” Abasi “iba” ẹmi ẹyetde aran, oro ẹtịn̄de prọfesi ye ọfọn̄ikpo, edi ẹnam ẹset. Emi anyan ubọk owụt 1918-1919, ke ini emi mme asua ẹkeperede nditre utom mmọ, edi ẹma ẹfiak ẹsịn mme asan̄autom Jehovah odudu ke idem ke utịbe utịbe usụn̄ ke ntak utom mmọ.

Obio Ubọn̄ Amana!

Edifri ọyọhọ ukorowo itiaba ọtọt emana Obio Ubọn̄. (11:15–12:17) Ke heaven ndamban̄a an̄wan (esop Jehovah Abasi eke heaven) aman eyen erenowo (Obio Ubọn̄ Abasi ye Christ nte Edidem), edi dragon (Satan) odomo ndita enye edi ikwe unen. Ke ndida ekọn̄ eke heaven oro etienede emana Obio Ubọn̄ ke 1914 n̄kosịm utịt, Michael (Jesus Christ)oro akande osio dragon ye mme angel esie ọduọn̄ọ ke isọn̄. Do dragon ke akaiso ndin̄wana ye nsụhọ mfri an̄wan eke heaven oro ẹyetde aran.

Ekem John okụt idiọk unam emi ẹnamde mbubiam mbiet ẹnọ. (13:1-18) Idiọk unam ukaraidem emi enyenede ibuot itiaba ye nnụk duop mi oto “inyan̄” ọwọrọ, kpa ntịme ntịme n̄ka ubonowo emi ukara owo ọtọn̄ọde oto. (Men Daniel 7:2-8; 8:3-8, 20-25 domo.) M̀mọ̀n̄ ke odudu ndamban̄a edibotn̄kpọ emi oto? Kamse, idịghe owo efen ikan Satan, kpa dragon! Ndien kam kere! Ẹkụt unam oro enyenede nnụk iba (Odudu Ukara Ererimbot eke Anglo-America) nte anamde “mbiet,” emi ẹdiọn̄ọde idahaemi nte Esop Edidiana M’idụt, ọnọ idiọk unam ukaraidem emi. Ẹnyịk ediwak owo ndituak ibuot nnọ idiọk unam emi nnyụn̄ mbọ “idiọn̄ọ” esie ebe ke ndinam mme n̄kpọ ke uduak esie nnyụn̄ nnyak enye akara uwem mmọ. Edi Mme Ntiense Jehovah ke edinam akpanikọ ẹsịn idiọn̄ọ demon eke idiọk unam emi!

Mme Asan̄autom Jehovah Ẹnam N̄kpọ

Nte ẹn̄wan̄ade eso iyatesịt esie itiaba ẹduọk, ẹkụt ediwak mme asan̄autom Abasi ke edinam. (14:1–16:21) Kpan̄ utọn̄! Ke Obot Zion eke heaven, John ada okụt owo 144,000 ẹkwọde ikwọ oro ebietde obufa ikwọ. Angel kiet emi efede ke ufọt enyọn̄ enyene nsinsi eti mbụk nditan̄a nnọ mme andidụn̄ isọn̄. Nso ke emi owụt? Mme Ntiense Jehovah ẹnyene un̄wam mme angel ke nditan̄a etop Obio Ubọn̄.

Anaedi John ama odu ke n̄kpaidem ndikụt ẹtetde vine isọn̄ ẹnyụn̄ ẹnuakde ofụri idụt nte ẹdịghide udịghi wine iyatesịt Abasi. (Men Isaiah 63:3-6; Joel 3:12-14 domo.) Ke ewụhọ Jehovah, ekem angel itiaba ẹn̄wan̄a eso iyatesịt Abasi itiaba ẹduọk. Akpa eso itiokiet oro ẹn̄wan̄ade ẹduọk otụk isọn̄, inyan̄, idịm mmọn̄, ọkọrọ ye utịn, ebekpo idiọk unam oro, ye Akpa Euphrates. Kere nte esịt akadatde John ke adan̄aemi enye okụtde nte andisuan ekikere demon atan̄de ndidem ẹdide owo obon ọtọkiet man ẹdi ekọn̄ Abasi ke Har–Magedon. Ndien mme utịp ẹkama nsobo nte ẹn̄wan̄ade ọyọhọ eso itiaba ẹduọk ke ofụm.

Ndamban̄a Iban Iba

Ke akpanikọ, aduai John idem ndikụt utịt Akwa Babylon, kpa ukara ererimbot eke nsunsu ido ukpono, nnyụn̄ nse idara idara n̄kpọntịbe oro ẹtienede nsobo esie. (17:1–19:10) Ke ọn̄wọn̄de iyịp nti ikọt Abasi ọyụhọ, ẹkụt enye atian̄arede etie ke edem ididuot unam emi enyenede ibuot itiaba ye nnụk duop (kpa Esop Ediomi M’idụt ye andida itie esie, Esop Edidiana M’idụt). Ah, edi nso nsobo ke enye okụt ntem nte nnụk oro akabarede asua enye!

Ẹkop mme uyo ke heaven ẹtorode Jah ke nsobo Akwa Babylon. Ndien nso akwa itoro itọt ndọ Eyenerọn̄ ye n̄wanndọ esie ntem, kpa mbon oro ẹyetde aran oro ẹnamde eset!

Christ Amakan onyụn̄ Akara

Ekem John okụt Edidem ndidem nte enye adade udịmekọn̄ eke heaven usụn̄ ke ndisobo editịm n̄kpọ Satan mfep. (19:11-21) Ih, Jesus, “Ikọ Abasi,” an̄wana ekọn̄ ye mme idụt. Apostle oro okụt nte ẹtopde idiọk unam (esop ukaraidem Satan) ye prọfet nsu (Odudu Ukara Ererimbot eke Anglo-America) ẹsịn ke “inyan̄ ikan̄,” kpa ndamban̄a ọyọhọ, nsinsi nsobo.

Nso efen? Kamse, John okụt ẹsịnde Satan ke editụn̄ọ ukpe. Edibemiso nda n̄kụt Tọsịn Isua Ukara Christ etiene oro, emi Jesus ye nsan̄a mme andikara esie oro ẹnamde eset ẹkpede ikpe ẹnọ ubonowo, ẹmenerede mbon n̄kopitem ẹsịm mfọnmma owo! (20:1-10) Idahaemi edi ini akpatre udomo. Ke ẹsiode ke editụn̄ọ ukpe, Satan eyewọrọ edi ndibian̄a mfọnmma ubonowo, edi nsobo eyeda utịt ọsọk kpukpru mme edinam demon ye owo oro ẹsọn̄de ibuot ye Abasi.

Ke afiakde aka ini edem, John okokop nduaidem didie ntem ndikụt ẹnamde kpukpru mbon oro ẹdude ke n̄kpa, Hades (udi ofụri ubonowo), ye inyan̄ibom ẹset ẹnyụn̄ ẹkpede ikpe mmọ ke iso Abasi, emi etiede ke akwa afia ebekpo! (20:11-15) Ndien nso ubọhọ ke ndinen owo edinyene ntem ke ini ẹtopde n̄kpa ye Hades ẹsịn ke n̄kpọdiọhọ ikan̄, ifiakke ida mbon unọmọ aba tutu amama!

Nte mme n̄kukụt John ẹsan̄ade ẹsịm utịt, enye okụt Obufa Jerusalem. (21:1–22:21) Obio ukara oro oto ke heaven osụhọde edi onyụn̄ ada un̄wana ọsọk mme idụt. “Akpa mmọn̄ uwem” ewet oto Obufa Jerusalem, adade aban̄a akpanikọ N̄wed Abasi ye kpukpru ndutịm eken oro Abasi ọnọde ọkọn̄ọde ke uwa Jesus man ẹfak mme okopitem owo ẹsio ke idiọkn̄kpọ ye n̄kpa ẹnyụn̄ ẹnọ mmọ nsinsi uwem. (John 1:29; 17:3; 1 John 2:1, 2) Ke mben akpa emi kiet kiet, John okụt mme eto ẹnyenede ikọn̄ ukọkudọn̄ọ, adade aban̄a ubak ndutịm Jehovah ndinọ okopitem ubonowo nsinsi uwem. Ikot etiene etop ediberi ẹtode Abasi ye Christ. Edi utịben̄kpọ didie ntem ndikop spirit ye n̄wanndo ẹkotde kpukpru owo ẹmi ẹkopde nsatitọn̄ ẹte “ẹdi ẹdibọ mmọn̄ uwem ke ikpîkpu”! Ndien nte nnyịn ikotde mme ikọ ediberi ke Ediyarade, nte eyịghe mîdụhe nnyịn imabuana ufiop ufiop mfiori John ite: “Amen. Di, Ọbọn̄ Jesus.”

[Ekebe/Ndise ke page 21]

Ẹdu ke Edidemede: Ke otu mme ikọ prọfesi ẹban̄ade ekọn̄ Abasi ke Har–Magedon (Armageddon), ẹdọhọ ẹte: “Sese, [ami Jesus] ndidi nte inọ; ọfọfọn ọnọ owo eke esịnede edisịnen̄kpọ etie ekpeme; mbak enye edisan̄a iferi, owo edinyụn̄ okụt mbubiam esie.” (Ediyarade 16:15) Emi ekeme ndidi editịn̄ ntụk utom esenyịn, m̀mê akamautom, ke obot temple ke Jerusalem. Ke ini ukpeme, enye ama esidụk temple man ese m̀mê mme Levite ẹdude ke ukpeme ke ẹtaba idap m̀mê ede idap ke itieutom mmọ. Ẹma ẹsimia owo ukpeme ekededi oro ẹkụtde edede idap ke eto, ndien ẹma ẹkeme ndifọp ewụra esie nte esuene esuene ufen. Ye Armegeddon ekperede etieti idahaemi, nsụhọ oro ẹyetde aran eke “oku ndidem,” m̀mê “ufọk eke spirit,” ẹbiere nditaba idap ke n̄kan̄ eke spirit. Kpasụk ntre ye nsan̄a mmọ, kpa “akwa otuowo,” ẹmi ẹnyenede idotenyịn eke isọn̄, koro mmọ n̄ko ẹnamde edisana utom ẹnọ Abasi ke temple. (1 Peter 2:5, 9; Ediyarade 7:9-17) Mme esenyịn ẹdide Christian akpan akpan ẹkpedu ke ukpeme mbak mme idiọk idaha editọn̄ọ ke esop. Koro ẹdude ke edidemede, kpukpru mme anam-akpanikọ andituak ibuot ke temple Abasi eke spirit ẹsịne “edisịnen̄kpọ” mmọ, adade aban̄a ukpono ukpono utom mmọ nte Mme Ntiense Jehovah.