Ntọt M’ọkwọrọ Obio Ubọn̄
Jehovah Ọnọ Un̄wam
NDONDO emi, Mme Ntiense Jehovah ke South Africa ẹma ẹbọ etop ẹban̄a ọkpọsọn̄ nnanenyịn emi omụmde nditọete mmọ eke spirit ke mbọhọ idụt oro ẹkpande utom ukwọrọikọ mmọ. Ẹma ẹbụk ẹnọ mmọ ẹte ke ntak ọkpọsọn̄ ufiop ye unana edịm, nditọete mmọ ẹkedu uwem ke ndita ndusụk orụn̄eto. Mmọ n̄ko ẹma ẹnana eti edisịnen̄kpọ, emi akanamde ndusụk Mme Ntiense ẹkop mba ndibuana ke utom an̄wautom.
Inikiet inikiet nditọete ke South Africa ẹma ẹnam n̄kpọ ẹban̄a oro. Ẹma ẹsịn eben̄e ke mme esop n̄kann̄kụk ke ikpehe Johannesburg ẹban̄a edisịnen̄kpọ. Ke usen ifan̄, ẹma ẹnọ ọfọn̄ odobide tọn ita. Mme anamutom unyịmesịt ẹma ẹsat mme n̄kpọ enọ ẹmi. Ẹma ẹnam ndutịm ndinọ tọn ọkọti 3, tọn aran 1, tọn suọp 1, ye tọn udia ibokpot 17. Ke ini usiakifia oro ọkọnọde udia ibokpot ẹmi okokopde aban̄a nnanenyịn Mme Ntiense ke idụt oro ọkpọsọn̄ ufiop osịmde mi, mmọ ẹma ẹnọ se iwakde ikan tọn udia emi ẹtịmde ẹyomde mi kiet.
Ke Monday, April 16, 1990, moto mbiomo emi emende n̄kpọ un̄wam odobide tọn 25 ama ọkpọn̄ South Africa adaha isan̄ itiat 3,400 esie. Edi idahaemi akana ẹbọ unyịme eto ukara man ẹkpemen mme n̄kpọ ẹmi ẹbe ke idụt mmọ oro ẹkọn̄ an̄wanade.
Mme andida ke ibuot ukara emi ke esenidụt ẹma ẹdọhọ ẹte ke okposụkedi owo mînọhọ Mme Ntiense Jehovah unyịme ke idụt mmimọ, mmimọ imenen̄ede idiọn̄ọ ite ke mmọ ẹdu do. Ubiọn̄ọ ndomokiet idụhe ndinọ mme n̄kpọ un̄wam ẹsọk nditọete nnyịn. Ẹma ẹnọ unyịme. Ẹma ẹnọ kpukpru n̄wed oro ẹyomde, ndien ke Friday, April 20, Mme Ntiense oro ẹma ẹbe adan̄a obio ye unana mfịna. Edi, mmọ ẹma ẹsobo se iwakde ikan itie usịnusụn̄ 30, ẹmi kpukpru ini ẹkesiyomde mmọ ẹwụt n̄wed mmọ. N̄kukụre adan̄ado ke mmọ ẹkedifiọk adan̄a nte mme n̄wed oro ẹkedide akpan n̄kpọ.
Ke mmọ ẹma ẹkewat n̄kpọ nte itiat 90 ẹdụk idụt oro, akamba inyan̄ oro ọkọtọde ama ọbiọn̄ọ isan̄ mmọ. Ẹma ẹbiat akpa ebọp okodude ẹfep, ndien eke ibio ini akadade itie esie ikekemke se akamba moto mbiomo asan̄ade. Nte ededi, mmọ ẹma ẹkụt nte ke ekpri moto akasan̄ade ye moto emi ama ekeme ndibe ebọp oro ọtọ ofụkde mi ifụre ifụre. Ẹma ẹbiere ndibahade ke itie iba. Ẹma ẹnam itienna ẹnọ otu kiet ke n̄kan̄ ọtọ inyan̄ emi, ke adan̄aemi otu enye eken akakade iso man okosịm nditọete ke n̄kpọ nte itiat 160 ke nsannsan edem edere. Mmọ ẹkekop inemesịt didie ntem ke akpatre ndisobo ye nditọete oro! Mmọ ikekemeke nditre ndituak inua imam, ndifat kiet eken, nnyụn̄ n̄kọm ubọk. Ibịghike moto mbiomo obio oro iba ẹma ẹdaha isan̄ man ẹkesobo ye otu nditọete eken oro ẹbetde ke mben inyan̄. Do, ẹma ẹsion̄o mme n̄kpọ un̄wam oro ke akamba moto mbiomo ẹdọn̄ ke n̄kpri iba eken.
Mme ntọt ẹbọde ẹwụt ntotụn̄ọ esịtekọm ẹnyenede ẹban̄a enọ Jehovah ke un̄wam n̄kpọ eke obụk. Edi, kpa ye nnanenyịn eke obụk mmọ, ntuan̄a nditọete kaban̄a udia eke spirit ama akam ọdiọk akan. Esop kiet ekekeme ndinyene idem Enyọn̄-Ukpeme kiet kpọt, emi akanade ẹsion̄ọ ẹwet ẹnọ kpukpru ubon. Ekọm enyene Jehovah, ke ẹnam mme ndutịm idahaemi man ẹnọ nditọete ke idụt oro udia eke spirit ofụri ini.