Mmọ ke Ẹkop Ata Inemesịt ke “Paradise”
PARADISE! Ẹsiwak nditi ikọ oro ke ini mme owo ẹkerede ẹban̄a Hawaii—ndien ye nti ntak. Ke otu mme akpakịp n̄kpọ ẹdude mi ẹdi mfụt mfụt eyo, awawa ikpaenyọn̄, mme eyop oro ẹnyen̄ede, mbịtmbịt ofụm, ye utan utan esụkinyan̄—kpa mme n̄kpọ oro ediwak owo ẹkemede ndikere ke ebiet paradise.
Mme n̄kpọ ẹmi ẹma ẹdụri mme owo ke kpukpru ebiet edi. Mmọ ẹma ẹto Asia, Pacific, America, ye idem mme ebiet nte mme isuo Caribbean ye Europe. Ediwak owo ẹwọrọ ẹka mi ke ntak mfụt mfụt eyo oro odude kpukpru isua. Mmọ en̄wen ẹkedi ndiyom ifụre ke afan̄ ndutịm uforo—ye inemesịt, nte ededi. Utịp edi ebiet emi ndidi se mme owo eke ediwak idụt ye ekpụk, ye nsio nsio ido edinam ye ekikere ido ukpono ẹbuahade kiet.
Nte ededi, n̄kpọ efen odu. Ukem nte ata ediwak ndiye itie ke isọn̄, Hawaii enyene mfịna ubiatibet, n̄kpọsọn̄ ibọk, nsọn̄ibuot, usabade n̄kpọ, ye ediwak mfịna eken oro ẹsịmde ubonowo inamke n̄kpọ m̀mê m̀mọ̀n̄ ke owo odụn̄. Ke ntak unana ntịn̄enyịn owo ye ibụk, ke ẹbiat oto-obot uyai eke mme isuo Hawaii ẹmi sụn̄sụn̄. Mme owo ẹyom paradise, edi idịghe kpukpru owo ẹmi ẹdụn̄de mi ẹtịn̄ enyịn ekem ndinam mîdịghe ke nsụhọde n̄kaha ẹnam mme isuo ẹmi ẹbiet paradise. Oyom se ikponde ikan ediye ebiet ye idaha eyo oro ẹmade man paradise odu.
Nte ededi, odu otu owo oro ọkọride-kọri oro ẹdụn̄de mi ẹmi ẹnyenede ata inemesịt ke idaha ebietde paradise mi. Mmọ ẹdi mme owo oro ẹnyịmede akpanikọ Bible ẹnyụn̄ ẹdade utịbe utịbe un̄wọn̄ọ Abasi emi ẹsịn ke esịt: “Mmọn̄ mbot Mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt.” Mme owo ẹmi ye inemesịt ke ẹsak iso ẹse ini iso ye mme ikọ apostle Peter ẹmi ke ekikere: “Nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.” (Isaiah 65:17; 2 Peter 3:13) Mmanie ẹdi mmọemi? Didie ke mmọ ẹkedi ẹdikpep ẹban̄a utịbe utịbe idotenyịn emi ẹwụtde ke Bible mi? Ndien nso ukpụhọde ke emi akada edi ke uwem mmọ?
Ẹkan Ndịk N̄kpa
Isabel ye ebe esie, George, ẹto Philippines. Ẹkebọk n̄wan emi nditiene ido ukpono ete ye eka esie emi edide Roman Catholic, okposụkedi akananam enye mîkotke Bible. Ẹma ẹkpep Isabel nte ke ukpọn̄ owo ikemeke ndikpa. Didie ke enye akanam n̄kpọ aban̄a nsunsu ukpepn̄kpọ emi? Ọfọn, ekikere n̄kpa ama esịn n̄wan emi ndịk ke idem koro enye ekenyenede ekikere nte ke imọ idisịne ke ekebe-okpo ye uwem ke nsinsi, emi ukpọn̄ esie nte ẹdọhọde mîdikemeke ndiwọrọ. Nte ededi, ke 1973, Isabel ama ọtọn̄ọ ndikpep Bible ye Mme Ntiense Jehovah. Ke ini enye ekekpepde nte ke ukpọn̄ owo esikpa ye nte ke Abasi eyekan n̄kpa ebe ke ediset ke n̄kpa, enye ama enen̄ede okop inemesịt onyụn̄ enyene akwa ubọhọ. (Ezekiel 18:4, 20; John 5:28, 29) Akpanikọ Bible ama otịm otụk enye ke esịt tutu enye anam n̄kọri usọp usọp.
Nso kaban̄a George? Enye n̄ko ama esitiene etie ke itie nneme Bible edi n̄kukụre man okụt ndudue ọnọ Mme Ntiense. Nte ededi, enye ikekemeke ndikụt n̄kpọ ndomokiet oro akwan̄ade ke se ẹkekpepde enye ye n̄wan esie. Nte ededi, esisịt ini ke mmọ ẹma ẹketọn̄ọ ndikpep n̄kpọ, eneni aban̄ade iyịp ama edemede. Tutu edisịm ini oro, George ama esima ndidia udia oro ẹsịnde iyịp. Edi ke ini enye ama ekedikụt nte ke Bible obiom edidia iyịp ikpe in̄wan̄în̄wan̄, enye ama etre ndidia udia emi iyịp esịnede. (Genesis 9:3, 4; Leviticus 17:10-12; Utom 15:28, 29) Enye ama akaiso nditiene mbuana ke ukpepn̄kpọ Bible ama onyụn̄ okop inemesịt nte ke imọ ima idikụt akpanikọ ke akpatre. Mfịn, George, Isabel, ye nditọ mmọ inan̄ ke ẹkop ata inemesịt ke ndidu uwem ekekem ye mme edumbet Abasi.
Ata Ido Ukpono Christ Odụri Ada
Eren kiet otode Japan emi ekerede George ye n̄wan esie Lillian, edide owo Portugal, ẹdu ke iduọk isua 60 ke emana. Ẹkeman ẹnyụn̄ ẹbọk mmọ mbiba ke Hawaii. Sia George mîkọbọhọ ukpep ido ukpono baba kiet ito ete ye eka esie, enye akananam idaha ido ukpono ke akpan n̄kpọ. Edi, enye kpukpru ini ama esinịm Abasi ke akpanikọ. Ke n̄kan̄ eken, ete ye eka Lillian ẹkebọk enye ke ido ukpono mmọ, nte owo Roman Catholic.
Okposụkedi George mîkedịghe enyene-udọn̄ andikot Bible, enye ama esikot mme magazine Enyọn̄-Ukpeme ye Awake! ke n̄kpọ nte isua 30. Enye ke ntre ama ekpep ekese n̄kpọ aban̄a Bible. Sia ekesin̄wọn̄de sika ye mmịn etieti, nte ededi, enye ikọsọpke inam ukpụhọde ke uwem esie. Nte mme isua ẹkebede, George ama akaiso ndikot mme magazine ẹmi onyụn̄ esidụk mme mbonoesop Christian ke ini ke ini ke Ufọkmbono Obio Ubọn̄. Ntak-a? Koro, nte enye ọkọdọhọde, “mbubịk ido awak akaha ke mme ido ukpono eken” ke ndinyịme mme idiọkn̄kpọ oro Bible obiomde ikpe. Enye ama edikụt nte ke Mme Ntiense Jehovah ẹma ẹnyene ukpụhọde.
Nso ikodụri Lillian, anam-akpanikọ n̄wan George, inọ akpanikọ Ikọ Abasi idem okposụkedi oro enye ekesịnde idem ntotụn̄ọ ntotụn̄ọ ke ido ukpono ete ye eka esie? Ọfọn, eyeneka esie an̄wan ama ọnọ enye ikot ndidụk mme mbonoesop ke Ufọkmbono Obio Ubọn̄. Lillian eti ete, “Ami mma ndara inem inem idaha ubon oro okodude ye ufan ufan inua imam.” Ata ima oro enye okokụtde nte ẹnyenede ke otu ikọt Jehovah ama anam enye onịm ke akpanikọ nte ke emi edi akpanikọ. (John 13:34, 35) Enye ama onyịme ukpepn̄kpọ Bible, ke akpatre ayak uwem esie ọnọ Jehovah Abasi, onyụn̄ ana baptism ọfiọn̄ ifan̄ ke ebe esie ama akana baptism.
George in̄wọn̄ke sika inyụn̄ ikpaha mmịn̄ aba, ndien Lillian ama otop mme ndisọi n̄kpọ ido ukpono esie ọduọn̄ọ. Ye esịt ọyọhọde ye ima, mmọ ke ẹbuana se mmọ ẹkekpepde ye mmọ en̄wen, esịnede nditọ nditọ mmọ 25 ye nditọ nditọ nditọ 4. Kam se iso mmọ, nnyụn̄ kụt nte George ye Lillian ẹkopde inemesịt!
Ẹnyene Emem ye Inemesịt
Patrick, owo Ireland emi odude ke ufọt ufọt isua emana esie ye n̄wan esie, Nina, edide owo Jew, mmọ mbiba ẹma ẹwọrọ ẹkpọn̄ usụk usụk edem usiahautịn United States ẹkedụn̄ ke Hawaii. Ke mbemiso, mmọ ẹkedu uwem nnam-se-mmade ke ndida n̄kpọsọn̄ ibọk, ndidomo mme ido ukpono nse, ye oburobụt ido. Mmọ n̄ko ẹma ẹbiat ediwak isua nte mbon n̄ka utuakibuot nnọ owo, ẹdomode ndisịm n̄kokon̄ idaha ifiọk ebe ke ndida n̄kpọsọn̄ ibọk, editie n̄kere n̄kpọ, ye ọkpọkpọ andikpep mmọ. Nte ini akade Patrick ama akpa mba ọnọ ufụp, ndomoidem, ye utọhọ utọk ndien ndien ke otu n̄ka mbon utuakibuot nnọ owo ẹmi ẹdọhọde nte ima ikosịm ‘n̄kokon̄ idaha ke ifiọk.’ Enye ama ọkpọn̄ otu oro onyụn̄ afiak ọnyọn̄ Hawaii, emi enye okodụn̄de inikiet, odoride enyịn ndinyene ifụre ekikere. Ke oro ebede, Patrick ama anam Nina, emi ekedide ufan esie an̄wan adan̄aoro, onyịme ndika n̄kese enye. Ke akpatre, mmọ ẹma ẹdọ ndọ ẹnyụn̄ ẹdụn̄ ke Hawaii.
Patrick ye Nina ikọfiọkke ite ke ediyom oro mmimọ iyomde emem ye inemesịt eyeda mmimọ ke akpatre okosịm edikpep Bible ye Mme Ntiense Jehovah. Nte ọkpọsọn̄ owo emi mînịmke edidu Abasi ke akpanikọ ke ofụri uwem esie, Nina ama ọtọn̄ọ ndinyene mme ibọrọ Bible oro ẹyụhọde owo ọnọ mme utọ etịmede owo ekikere mbụme nte ntak emi idiọkn̄kpọ odude ye ntak emi idiọkn̄kpọ otịbede ọnọ nti owo. Isua duop oro Patrick akadade oyom akpanikọ ama osịm idara idara utịt ukem ntre. Ikebịghike, se enye ye Nina ekekpepde ẹto Bible ama ọtọn̄ọ ndikpụhọde ido uwem mmọ. Ke ama akan̄wana ọkpọsọn̄ en̄wan ke anyanini, Patrick ama ekeme ndikan ọkpọsọn̄ mbumehe uda un̄wọn̄ esie. Ke se ikperede ndisịm isua duop idahaemi, enye ye n̄wan esie ke ẹdu edisana, eti uwem nte ekemde ye mme edumbet Abasi. Ye edisana esịt ye edisana ubieresịt, mmọ ke ẹdara emem oro mmọ ẹkeyomde.
Mme N̄waidem ye Mme Utịp
“Mbufo ẹn̄wana etieti ndibe ke mfafaha inuaotop ndụk: koro ndọhọ mbufo nte, ediwak owo ẹyeyom ndidụk, ndien idikemeke.” (Luke 13:24) Mme ikọ Jesus Christ oro ẹwụt in̄wan̄în̄wan̄ nte ke idịghe mmemmem n̄kpọ ndinam n̄kpọ Abasi nnyụn̄ nda mme edumbet Bible ndu uwem. Inaha kpukpru owo eke ẹyomde ndinam oro ẹsịn ukeme oro ẹyomde ikpọn̄îkpọn̄ edi n̄ko ana ẹnam mme n̄waidem oro ẹyomde. Emi ke akpanikọ ekedi ntre aban̄a mme owo oro ẹsiakde ke mbụk emi. Edi ẹkenọ mmọ utịp ke utịbe utịbe usụn̄ didie ntem!
Ke uwụtn̄kpọ, kere ban̄a Patrick ye Nina, oro ẹsụk ẹsiakde. Mmọ ẹma ẹnam akwa ukpụhọde ke usụn̄uwem emi mmọ ẹkenyenede ediwak okụk ẹdụk utom Christian uyọhọ-ini ẹda utom idịbi udia eke ibio ini ẹn̄wam idem. Edi, mmọ ẹnịm ke akpanikọ ẹte ke udori eke spirit enen̄ede okpon akan mme n̄waidem n̄kpọ eke obụkidem ekededi oro mmimọ ikanamde. Ndien mmọ ke ẹkop ata inemesịt.
Ke ntak isua emana mmọ, mme ukpụhọde ikememke utom inọ George ye Lillian. Ndibuana ke mme mbonoesop Christian ye ke utom ukwọrọikọ esiyom ini, ntịn̄enyịn, ye ukeme ikpọkidem. Nte n̄kpon n̄kan inemesịt mmọ, nte ededi, nsọn̄idem mmọ ama enyene uforo, ndien ẹkeme nditịn̄ mban̄a uwem oro mmọ ẹdude idahaemi nte okopodudu, ọyọhọ, uwem inemesịt.
Amaedi George ye Isabel, akakan n̄kpọ-ata mmọ edi ke ndikpep nditọ mmọ nnyụn̄ n̄n̄wam mmọ ẹdụk usụn̄ adade osịm uwem. Ẹyom ekese ini ye ukeme man ẹnam n̄kpri owo inan̄ ẹtịm idem ẹnọ mme mbonoesop Christian m̀mê ẹnam mmọ ẹtiene ẹbuana ke utom ukwọrọikọ Christian. Ke idaha kiet mfịghe ofụri ini ama anam George ye Isabel ẹfụmi mbiomo mmọ nte mme ete ye eka. Edi utịn̄ikọ Bible kiet oro ọkọdọhọde “Ndifiak Ndemede Edu N̄waidem” ama edemede mmọ ndifiak nsịn ukeme mmọ ndinọ nditọ mmọ mbinan̄ ntịn̄enyịn ye ukpep oro ẹyomde ke ‘ndibọk mmọ ke ntụnọ ye item Jehovah.’ Idịghe se ẹkpetịn̄de-tịn̄, ẹma ẹnọ mme utọ ukeme oro utịp uwak uwak.—Ephesus 6:4.
Idịghe ediye idaha, idaha eyo oro ẹmade, m̀mê inem inem uwem ada ata inemesịt ọsọk mmọemi ye ediwak eken. Utu ke oro, edi ifiọk oro mmọ ẹnyenede nte ke mmimọ ke ida uwem mmimọ inam n̄kpọ nte ekemde ye uduak Abasi ndien ke ẹnyụn̄ ẹda mme edumbet eke Ikọ esie, kpa Bible edu uwem. (Ecclesiastes 12:13) Akande oro, ata inemesịt ọyọhọ esịt mmọ nte mmọ ẹtiede ẹkere inem inem ini emi ẹdifiakde ẹwụk paradise isọn̄ ke ofụri isọn̄.—Luke 23:43.
[Ndise ke page 25]
George, Isabel, ye nditọ mmọ ẹsikop idatesịt ke ndikot Bible
[Ndise ke page 26]
George ye Lillian ẹkop inemesịt ke utom ukwọrọikọ Christian
[Ndise ke page 27]
Patrick ye Nina ke ẹdara ata emem ke utom Jehovah