Nam N̄kpọ Nditịm Ubon Fo Nnịm Ebe Odụk Obufa Ererimbot Abasi
“Afo, O Jehovah, eyekpeme mmọ, eyekama mmọ aban̄a emana emi ke nsinsi.”—PSALM 12:7.
1, 2. (a) Didie ke ndusụk ubon ẹnam n̄kpọ ke idak mfịghe eke ukperedem ini ẹmi? (b) Didie ke mme ubon Christian ẹkeme ndinam n̄kpọ man ẹbọhọ?
EBIOWO Christian kiet emi ekerede John ọkọdọhọ ete, “Mfịn esịt mi ọyọhọ ye idara!” Nso ikedi ntak akwa idatesịt emi? Enye obụk ete, “Eyeneren mi edide isua 14 ye eyen mi an̄wan edide isua 12 ẹma ẹna baptism.” Edi idatesịt esie iketreke do. Enye adian do ete, “Eyeneren mi edide isua 17 ye eyen mi an̄wan edide isua 16 mmọ mbiba ẹma ẹnam usiakusụn̄ unọ un̄wam ke isua emi ekebede.”
2 Ediwak ubon ke otu nnyịn ke ẹnyene ukem nti utịp oro nte mmọ ẹdade mme edumbet Bible ẹsin ke edinam. Ndusụk, nte ededi, ẹsisobo mme mfịna. Ebe ye n̄wan ẹmi ẹdide Christian ẹwet ẹte, “Nnyịn inyene nditọ ition, ndien amakabade edi ata ọkpọsọn̄ n̄kpọ ndinam n̄kpọ ye mmọ. Eyen kiet ama ọbọbọhọ nnyịn osop ke akani editịm n̄kpọ emi. Etie nte mme uyen nnyịn ẹdi akpan iso en̄wan Satan idahaemi.” Odu n̄ko mme ebe ye ibanndọ oro ẹsobode ata ọkpọsọn̄ utọk ke ndọ, ndusụk ini osụn̄ọde ke edidianade ntie m̀mê usiondọ. Edi, mme ubon oro ẹkọride mme edu Christian ẹkeme ndibọhọ “akwa ukụt” ẹnyụn̄ ẹdi se ẹnịmde ubon ẹbe ẹdụk obufa ererimbot Abasi oro edide. (Matthew 24:21; 2 Peter 3:13) Nso, ndien, ke afo ekeme ndinam man okụt ete ke ẹnịm ubon fo uwem?
Ndifori Nneme
3, 4. (a) Nneme edi akpan n̄kpọ adan̄a didie ke uwem ubon, ndien ntak emi mme mfịna ẹsiwakde ndidemerede mban̄a enye? (b) Ntak emi mme ebe ẹkpedomode ndidi nti mme andikpan̄ utọn̄?
3 Eti nneme edi iyịp-uwem ọnọ eti nsọn̄idem ubon; ke ini enye ananade, nsịn̄ede ye mfịghe ẹkọri. Mme N̄ke 15:22 ọdọhọ ete, “Unana item esịn uduak okpu.” Nte enemde, ọnọitem ndọ kiet ọtọt ete: “Ọsọ eseme oro nsikopde nto ibanndọ oro nnọde item edi ‘Enye isinemeke nneme ye ami,’ ye ‘Enye isikpan̄ke utọn̄ inọ mi.’ Ndien ke ini mbuanade ntọt emi ye mme ebe mmọ, mmọ isikpan̄ke utọn̄ inọ mi n̄ko.”
4 Nso isidi ntak unana nneme? N̄kpọ kiet edi, iren ye iban ẹkpụhọde, ndien mmọ ẹsiwak ndinyene ata nsio nsio ido unyene nneme. Ibuotikọ kiet ama owụt ete ke ebe “esiyom nditịn̄ ikọ nnennen nnennen ye nte n̄kpọ etiede” ke mme nneme esie, ke adan̄aemi “se [n̄wan] esiyomde akan n̄kpọ efen ekededi edide andikpan̄ utọn̄ oro owụtde edikere mban̄a.” Edieke emi esịnde mfịna ke ndọ mbufo, ẹnam n̄kpọ ndinen̄ede mme n̄kpọ mbon. Ekeme ndiyom Christian ebe anam utom ọkpọsọn̄ man akabade edi eti andikpan̄ utọn̄. James ọdọhọ ete, “Yak kpukpru owo ẹsọp ndikop ikọ, ẹkûsọp nditịn̄ ikọ.” (James 1:19) Kpep ndifep ndinọ ewụhọ, ndinọ item, m̀mê ndinọ utịn̄ikọ ke ini n̄wan fo n̄kukụre oyomde “[edikop] mbọm ye kiet eken.” (1 Peter 3:8) Mme N̄ke 17:27 ọdọhọ ete, “Owo eke afarade ke ikọ esie ọfiọk ifiọk.”
5. Nso idi ndusụk usụn̄ oro mme ebe ẹkemede ndinam n̄kọri ke nditịn̄ mme ekikere ye nte etiede mmọ ke idem?
5 Ke n̄kan̄ eken, odu “ini eke ẹtịn̄de ikọ,” ndien ekeme ndiyom afo ekpep nditịn̄ mme ekikere fo ye nte etiede fi ke idem ọfọn akan. (Ecclesiastes 3:7) Ke uwụtn̄kpọ, nte afo amatat ubọk ke nditoro n̄wan fo ke mme n̄kpọ oro enye anamde? (Mme N̄ke 31:28) Nte afo omowụt esịtekọm ke ọkpọsọn̄ utom oro enye esinamde ke ndinọ fi ibetedem ye edise mban̄a ufọk? (Men Colossae 3:15 domo.) Mîdịghe eyedi oyom afo anam n̄kọri ke nditetịn̄ “ima fo.” (Ikwọ Solomon 1:2) Ndinam ntre ekeme nditie fi ntre ntre ke akpa, edi enye ekeme ndin̄wam ke ndinam n̄wan fo enyene nsọn̄ọ ke ima oro afo enyenede ọnọ enye.
6. Nso ke ibanndọ ẹkeme ndinam man ẹfori nneme ubon?
6 Nso kaban̄a ibanndọ Christian? Ẹkot ẹto n̄wan kiet nte ọdọhọde ete ke ebe imọ ọfiọk ete ke imọ imowụt esịtekọm inọ enye, ntre ke iyomke imọ itetịn̄ inọ enye. Nte ededi, irenowo n̄ko ẹsinam n̄kọri ke ẹwụtde esịtekọm ye itoro. (Mme N̄ke 12:8) Ndi oyom fi otịm an̄wan̄a esịt ke afan̄ emi? Ke n̄kan̄ eken, eyedi oyom afo ọnọ ntịn̄enyịn efen efen ke nte afo esikpan̄de utọn̄. Edieke esisọn̄de ebe fo ndineme mme mfịna, ndịk, m̀mê editịmede esịt esie in̄wan̄în̄wan̄, nte afo emekpep nte akpanamde enye enyene nneme ye afo ifụre ifụre, mfọnido mfọnido ye ke usọ?
7. Nso ikeme ndinam utọk ẹbụbede ke ndọ, ndien didie ke ẹkeme ndikpan mmọ?
7 Nte ededi, idem mme ebe ye ibanndọ oro ẹsinamde ọfọn ẹkeme ke ndusụk ini nditre ndinyene nneme. Ntụk ekeme ndikara n̄kọkibuot, mîdịghe ifụre ifụre nneme ekeme ndikabade uyat uyat mfan̄a inikiet inikiet. (Mme N̄ke 15:1) “Kpukpru nnyịn idedue ke ediwak n̄kpọ”; nte ededi, ndutan̄uyo ke ndọ isiwụtke utịt ndọ. (James 3:2) Edi “utọk, ye isụn̄i” ẹdi se mîdotke ẹnyụn̄ ẹbabiat itie ebuana ekededi. (Ephesus 4:31) Sọp ndinam emem odu ke ini ẹtịn̄de uyat iyat ikọ. (Matthew 5:23, 24) Ẹmekeme ndisikpan utọk ke ntọn̄ọ edieke mbufo mbiba ẹdade mme ikọ Paul ke N̄wed Mbon Ephesus 4:26 ẹsịn ke edinam: “Ẹkûyak utịn osụhọde edisịm iyatesịt mbufo.” Ih, ẹbiere mme mfịna ke ini mmọ ẹdide kan̄a n̄kpri ẹnyụn̄ ẹkemede ndinam n̄kpọ mban̄a; kûbet tutu ntụk fo ẹsịm idaha oro afo obụmerede anam n̄kpọ. Ndibiat minit ifan̄ ke usen kiet kiet ndineme mme akpan n̄kpọ ekeme ndinam ekese ke ndinam nneme ọkọri onyụn̄ akpan utọk.
“Ntụnọ ye Item Ọbọn̄”
8. Ntak emi ndusụk uyen ẹkemede ndifiọrọ n̄kpọn̄ akpanikọ?
8 Etie nte ndusụk ete ye eka ẹkop uyụhọ ke ndiyak nditọ mmọ ẹkọri ye unana ndausụn̄. Nditọ ẹmi ẹsidụk mme mbonoesop ẹnyụn̄ ẹnyene ndusụk ebuana ke an̄wautom, edi mmọ isiwakke ndikọri itie ebuana mmọ ye Abasi. Nte ini akade “mbumek obụkidem, ye mbumek enyịn” ẹkeme ndidụri ediwak utọ uyen oro nsio ke akpanikọ. (1 John 2:16) Ekpedi n̄kpọ mbọm didie ntem mme ete ye eka ndibọhọ Armageddon edi ke ntak mme n̄kpọ oro ẹkefụmide ke ini edem ẹtaba nditọ mmọ ke n̄kpa!
9, 10. (a) Nso ke ndikama nditọ “ke ntụnọ ye item Ọbọn̄” abuana? (b) Ntak emi edide akpan n̄kpọ ndiyak nditọ ẹtịn̄ ekikere mmọ ifụre ifụre?
9 Paul ke ntem ekewet ete: “Mbufo mme ete, ẹkûfiomo nditọ mbufo; edi ẹkama mmọ ke ntụnọ ye item Ọbọn̄.” (Ephesus 6:4) Man anam ntre, ana afo ke idemfo enen̄ede emehe ye mme edumbet Jehovah. Afo enyene ndinịm nnennen uwụtn̄kpọ ke edide edisịm mme utọ n̄kpọ nte unọ idem inemesịt oro afo emekde, ukpepn̄kpọ idemowo, edidụk mme mbonoesop, ye an̄wautom. Mme ikọ Paul ẹwọrọ n̄ko ete ke ana ete m̀mê eka (1) edi enyene-mbufiọk anditịn̄ enyịn ke nditọ esie onyụn̄ (2) ọsọn̄ọ omụm eti edu unyene nneme ye mmọ akama. Edi n̄kukụre ke emi ke afo ekeme ndifiọk ebiet emi mmọ ẹyomde “ntụnọ ye item.”
10 Edi ndammana n̄kpọ mme uyen oro ẹwọrọde ẹdi n̄kparawa ndiyom ndusụk udomo nda-ke-idem. Nte ededi, ana afo odu ke edidemede aban̄a in̄wan̄în̄wan̄ idiọn̄ọ odudu ererimbot ke utịn̄ikọ, ekikere, ọfọn̄ ye ukamaidem mmọ, ye mme ufan oro ẹmekde. Enyene-ọniọn̄ ete kiet eketịn̄ nte ẹwetde ke Mme N̄ke 23:26 ẹte: “Eyen mi, nọ mi esịt fo.” Nte nditọ fo ẹsinyene ifụre edibuana mme ekikere mmọ ye nte etiede mmọ ke idem ye afo? Ke ini nditọ mîkopke ndịk iban̄a usọp usọp nsuannọ, mmọ ẹkeme ndinen̄ede nyarade nte mmọ ẹnen̄erede ẹkere ẹban̄a mme utọ n̄kpọ nte mme udiana edinam ufọkn̄wed, uwọrọ an̄wa ye owo isio uduot, akwa ifiọkn̄wed, m̀mê akpanikọ Bible ke idemesie.
11, 12. (a) Didie ke ẹkeme ndida mme ini udia ndifori nneme ubon? (b) Nso ikeme ndidi utịp n̄kaiso ukeme oro ete m̀mê eka esịnde ndinyene nneme ye nditọ esie?
11 Ke ediwak idụt edi ido ubon ndidia udia ọtọkiet. Ntem ini udia ekeme ndinọ kpukpru mme andibuana ke ubon eti ifet ndibuana nneme oro ọbọpde-bọp. Ata ekese ini TV ye mme n̄kpọ eken oro ẹtịmerede owo ekikere ẹsimen udia ubon ẹfep. Nte ededi, ke ediwak hour ẹsimụm nditọ fo nte ubiọn̄ ke ufọkn̄wed ẹnyụn̄ ẹsio ẹnyan ẹnọ mme ekikere ererimbot. Mme ini udia ẹdi eti ini ndida nnyene nneme ye nditọ fo. Eka kiet ọkọdọhọ ete, “Nnyịn isida ini udia ndineme mme n̄kpọ oro ẹketịbede ke usen.” Edi, iyomke mme ini udia ẹkabade ẹdi mme ini ubiak ubiak ntụnọ m̀mê ini edibụp mme mbụme ndụn̄ọde. Nam idaha oro edi ifụre ifụre onyụn̄ esịne inem!
12 Ndinam nditọ ẹnyene nneme ye afo ifụre ifụre ekeme ndidi n̄kpọ-ata onyụn̄ ekeme ndiyom ime oro mînyeneke adan̄a. Nte ededi, nte ini akade afo emekeme ndikụt mme utịp oro ẹnọde idatesịt. Eka kiet oro owụtde edikere mban̄a eti ete, “Eyeneren nnyịn oro edide isua 14 ke emana ama okop mfụhọ onyụn̄ etre ndinyene nneme. Ebede ke akam ye edisọn̄ọ nyịre nnyịn, enye ọmọtọn̄ọ ndinyene nneme ifụre ifụre!”
Ukpepn̄kpọ Ubon Oro Ọbọpde-bọp
13. Ntak emi edibak nnọ nditọ ukpep edide akpan n̄kpọ ntre, ndien didie ke ẹkeme ndinam oro?
13 “Ntụnọ ye item” n̄ko abuana ataata edinọ ukpep ke Ikọ Abasi. Nte ekedide ye Timothy, utọ ukpep oro ọkpọtọn̄ọ “toto ke uyen.” (2 Timothy 3:15) Edibabak ntọn̄ọ ukpep ọsọn̄ọ nditọwọn̄ idem ọnọ mme udomo mbuọtidem oro ẹkemede ndidi ke mme isua uka ufọkn̄wed—mme usọrọ usen emana, mme edinam ufreidụt, m̀mê mme usen nduọkodudu ido ukpono. Ye unana editịm idem nnọ mme utọ udomo oro, ẹkeme ndibiat mbuọtidem eyenọwọn̄. Ntre da mme n̄kpọutom oro Watch Tower Society otịmde ọnọ n̄kpri nditọ, utọ nte n̄wed Edikpañ Utöñ Nö Aqua Andikpep ye N̄wed Mi eke Mme Mbụk Biblea nnam n̄kpọ.
14. Didie ke ẹkeme ndinịm ukpepn̄kpọ ubon kpukpru ini, ndien nso ke afo anam man onịm ukpepn̄kpọ ubon ofụri ini?
14 Ikpehe efen oro oyomde ẹnọ ntịn̄enyịn edi ukpepn̄kpọ ubon, oro ekemede ndidi se owo mînịmke ofụri ini mîdịghe akabarede edi ndebe ndebe edinam oro etiede eto eto, emi onịmde n̄kpọ-ata ọnọ mme ete ye eka ye nditọ. Didie ke afo ekeme ndinen̄ede mme n̄kpọ mbon? Akpa, ana afo “ededep ifet” ọnọ ukpepn̄kpọ emi, uyakke mme edinam TV m̀mê mme n̄kpọ eken ẹmen enye ẹfep. (Ephesus 5:15-17) Ibuotufọk kiet eketịn̄ ete, “Nnyịn ima inyene mfịna ndinịm ukpepn̄kpọ ubon nnyịn kpukpru ini. Ima idomo nsio nsio ini tutu nnyịn ke akpatre idikụt ini ke okoneyo oro ọkọfọnde ye nnyịn. Idahaemi inịm ukpepn̄kpọ ubon nnyịn kpukpru ini.”
15. Didie ke afo ekeme ndinam ukpepn̄kpọ ubon fo ekekem ye mme udọn̄ ubon fo?
15 Ekem, kere ban̄a mme akpan udọn̄ ubon fo. Ediwak ubon ẹsidara nditịm idem nnọ ukpepn̄kpọ Enyọn̄-Ukpeme mmọ eke urua ke urua ọtọkiet. Nte ededi, ke ini ke ini, ubon mbufo ẹkeme ndinyene mme akpan n̄kpọ oro anade ẹneme, esịnede mme mfịna oro ẹsisobode ke ufọkn̄wed. N̄wed oro Questions Young People Ask—Answers That Work ye mme ibuotikọ ke Enyọn̄-Ukpeme ye Awake! ẹkeme ndiyụhọ udọn̄ emi. Ete kiet ọdọhọ ete, “Edieke nnyịn ikụtde mme edu ke idem nditọiren nnyịn oro oyomde ẹnen̄ede, nnyịn imesiwụk ntịn̄enyịn ke akpan ibuotikọ ke n̄wed Young People Ask oro enemede aban̄a oro.” N̄wan esie adian do ete: “Nnyịn imesidomo ndikpụhọde nda ekekem. Edieke nnyịn ikodiomide n̄kpọ oro idikpepde ke ukpepn̄kpọ nnyịn, ndien udọn̄ ndineme n̄kpọ efen edemerede, do nnyịn imesinam ukpụhọde nte ekemde ye udọn̄ oro.”
16. (a) Didie ke afo ekeme nditịm mfiọk nte ke se nditọ fo ẹkpepde an̄wan̄a mmọ? (b) Nso ke ẹkpesifep ke ini ẹnịmde ukpepn̄kpọ ubon?
16 Didie ke afo ekeme nditịm mfiọk nte ke nditọ fo ẹnen̄ede ẹfiọk se mmọ ẹkpepde? Akwa Andikpep oro, Jesus, ama esibụp mme mbụme oro anamde ẹfiọk ekikere owo, utọ nte, “Ekere didie?” (Matthew 17:25) Ke ndinam ukem ntre, domo ndifiọk se nditọ fo ẹnen̄erede ẹkere. Sịn udọn̄ nọ eyen kiet kiet ndinọ ibọrọ ke mme ikọ idemesie. Nte ededi, edieke afo enen̄erede okop iyatesịt m̀mê n̄kpaidem ke mme ikọ esịt akpanikọ oro mmọ ẹtịn̄de, mmọ ẹkeme ndinyene ekikere efen ẹban̄a edifiak nnyene nneme in̄wan̄în̄wan̄ ye afo. Ntre tie sụn̄sụn̄. Fep ediwọn̄ọde ini ukpepn̄kpọ ubon nsịn ke ini unọ ntụnọ ke ọkpọsọn̄ ubọk. Enye ekpedi idara idara ini, oro ọbọpde-bọp. Ete kiet ọdọhọ ete, “Edieke n̄kụtde nte ke eyen mi kiet enyene mfịna, nnyene ndinam n̄kpọ mban̄a oro ini efen.” Eka kiet adian do ete, “Ke ini ẹnamde n̄kpọ ye eyen oro san̄asan̄a, eyen oro isikopke bụt nte okpokopde onyụn̄ odu ke mben̄eidem nditịn̄ ikọ ata ifụre ifụre akan edieke ẹkpenọde item ke ini ukpepn̄kpọ ubon.”
17. Nso ke ẹkeme ndinam man ẹnam ukpepn̄kpọ ubon etie inem inem, ndien ewe ọfọn ye ubon fo?
17 Ndinam nditọ ẹnyene ẹbuana ke ukpepn̄kpọ ubon ekeme ndinịm n̄kpọ-ata, akpan akpan ke ini afo anamde n̄kpọ ye nditọ oro ẹdude ke nsio nsio isua emana. Ata n̄kpri nditọ ẹkeme ndinyene ntụhọ ubre mbre, unana editie itie kiet, mîdịghe ẹwụt ukeme unọ n̄kpan̄utọn̄ ke esisịt ini. Nso ke afo ekeme ndinam? Domo ndinam idaha ukpepn̄kpọ etie ifụre ifụre. Edieke nditọ fo ẹnyenede esisịt ukeme unọ n̄kpan̄utọn̄, domo mme idaha oro ẹdide mbio mbio se edi yak edi ke ediwak ini. Eyen̄wam n̄ko edieke afo owụtde ufiopesịt. “Owo eke akarade, yak enye esịn ifịk ke edikara esie.” (Rome 12:8) Nam kpukpru owo ẹnyene ẹbuana. Ata n̄kpri nditọ ẹkeme ndinyene n̄kpọ nditịn̄ mban̄a mme ndise mîdịghe ndibọrọ n̄kpri mbụme. Ẹkeme ndidọhọ mme uyen ẹnam mme ndụn̄ọde efen efen mîdịghe ẹda n̄kpọ oro ẹkpepde ẹdibuan ye ata idem n̄kpọ.
18. Didie ke mme ete ye eka ẹkeme ndisiak Ikọ Abasi ke kpukpru idaha, ndien ye nso utịp?
18 Nte ededi, kûsụhọde ini unọ ukpep ke n̄kan̄ eke spirit unịm ke hour kiet kpọt ke urua. Siak Ikọ Abasi nnọ nditọ fo ke kpukpru idaha. (Deuteronomy 6:7) Da ini ndikpan̄ utọn̄ nnọ mmọ. Nọ item nyụn̄ dọn̄ mmọ esịt ke ini oyomde. (Men 1 Thessalonica 2:11 domo.) Wụt ima ye mbọm. (Psalm 103:13; Malachi 3:17) Ke ndinam ntre, afo ‘eyenyene idatesịt’ ke nditọ fo onyụn̄ an̄wam ke ndinịm mmọ uwem mbe ndụk obufa ererimbot Abasi.—Mme N̄ke 29:17.
“Ini eke Ẹsakde”
19, 20. (a) Nso ufọn ke unọ idem inemesịt enyene ke uwem ubon? (b) Nso idi ndusụk usụn̄ ẹmi mme ete ye eka ẹkemede ndidiomi unọ idem inemesịt nnọ ubon mmọ?
19 Odu “ini eke ẹsakde . . . , ye ini eke ẹnekde.” (Ecclesiastes 3:4) Ẹkeme ndikabade ikọ Hebrew oro adade ọnọ ‘sak’ nte mme utọ ikọ nte “dia usọrọ,” “bre mbre,” “bre mbre mbuba,” m̀mê idem “dat esịt.” (2 Samuel 6:21, NW; Job 41:5, NW; Judges 16:25, NW; Exodus 32:6, NW; Genesis 26:8, NW) Mbre ekeme ndinyene uduak oro ọnọde ufọn, ndien enye edi akpan n̄kpọ ọnọ nditọwọn̄ ye mme uyen. Ke mme ini Bible mme ete ye eka ẹma ẹsidiomi unọ idem inemesịt ye mbre ẹnọ mme ubon mmọ. (Men Luke 15:25 domo.) Nte afo emesinam ukem ntre?
20 Christian ebe kiet ọdọhọ ete, “Nnyịn imesida itie inemesịt obio inam n̄kpọ ediye ediye. Nnyịn imesinọ ndusụk n̄kparawa nditọete iren ikot inyụn̄ ibre bọl inyụn̄ inam isan̄ ubọ ofụm. Mmọ ẹsidat esịt ẹnyụn̄ ẹdara ebuana oro ọbọpde-bọp.” Ete efen adian do ete: “Nnyịn imesidiomi mme n̄kpọ oro idinamde ye nditọ nnyịn. Nnyịn imesika ewọk, ibre bọl, ika nduọkodudu. Edi nnyịn isinịm unọ idem inemesịt ke nnennen itie esie. Mmesidori nsọn̄uyo ke ufọn oro odude ke ndida ukem ukem.” Unọ idem inemesịt oro ọbọpde-bọp, utọ nte mboho oro odotde m̀mê ndinam isan̄ n̄ka mme itie ubon unam ye mme itie ubon n̄kpọeset, ẹkeme ndinam ekese ke ndibiọn̄ọ eyenọwọn̄ ndidi se mme unọ idem inemesịt ererimbot ẹtapde.
21. Didie ke mme ete ye eka ẹkeme ndinam nditọ mmọ ẹkûkere ẹte ke ẹtụk mmimọ ke ntak oro mîtieneke inịm mme usen nduọkodudu ererimbot?
21 Edi akpan n̄kpọ n̄ko ete nditọ fo ẹkûkere ẹte ke ẹtụk mmimọ ke ntak mmimọ mîtieneke inịm mme usọrọ usen emana m̀mê mme usen nduọkodudu oro mîdịghe eke mme Christian. Ye ndusụk ndutịm ke n̄kan̄ fo, mmọ ẹkeme ndidori enyịn ke ekese ini inemesịt ke ofụri isua. Kamse, eti ete m̀mê eka isitiehe ibet ndusụk usen nduọkodudu man owụt ima esie ke n̄kan̄ n̄kpọ obụkidem. Ukem nte Ete esie eke heaven, enye ‘ọfiọk ndinọ nditọ esie nti enọ’—ke unyịme idemesie.—Matthew 7:11.
Ndimụm Nsinsi Ini Iso Nnịm Nnọ Ubon Fo
22, 23. (a) Nte akwa ukụt asan̄ade ekpere, nso ke mme ubon oro ẹbakde Abasi ẹkeme ndidori enyịn mban̄a? (b) Nso ke mme ubon ẹkeme ndinam ke ndinam n̄kpọ mbịne edidi se ẹnyan̄ade ẹsin ke obufa ererimbot Abasi?
22 Andiwet psalm ọkọbọn̄ akam ete: “Afo, O Jehovah, eyekpeme mmọ, eyekama mmọ aban̄a emana emi ke nsinsi.” (Psalm 12:7) Mfịghe otode Satan eyetetịm ọkọri—akpan akpan ke ubon Mme Ntiense Jehovah. Edi, ẹkeme ndikan utọ en̄wan oro akade-kaiso ndikọri mi. Ye un̄wam Jehovah ye ọkpọsọn̄ ubiere ye ọkpọsọn̄ utom ke n̄kan̄ mme ebe, ibanndọ, ye nditọ, mme ubon—esịnede ubon fo—ẹkeme ndidori enyịn ndidi se ẹnịmde uwem ke ini akwa ukụt.
23 Mme ebe ye ibanndọ, ẹnam emem ye edidianakiet odu ke ndọ mbufo ebe ke ndiyọhọ utom mbufo oro Abasi ọnọde. Mme ete ye eka, ẹkaiso ndinịm nnennen uwụtn̄kpọ nnọ nditọ mbufo, ẹdepde-dep ifet ndinọ mmọ ukpep ye ntụnọ oro mmọ ẹnen̄erede ẹyom. Neme nneme ye mmọ. Nọ mmọ n̄kpan̄utọn̄. Uwem mmọ ẹdu ke itiendịk! Nditọ, ekpan̄ utọn̄ ẹnyụn̄ ẹkop uyo ẹnọ mme ete ye eka mbufo. Ye un̄wam Jehovah mbufo ẹmekeme ndikụt unen ẹnyụn̄ ẹnịm nsinsi ini iso ẹnọ idem mbufo ke obufa ererimbot Abasi oro edide.
[Mme Ikọ idakisọn̄]
a Ẹdu n̄ko ke kaset ke ndusụk usem.
Nte Afo Emeti?
◻ Didie ke mme ebe ye ibanndọ ẹkeme ndifori nneme mmọ?
◻ Didie ke mme ete ye eka ẹkeme ndikama nditọ ke “ntụnọ ye item [Jehovah, NW]”? (Ephesus 6:4)
◻ Nso idi ndusụk usụn̄ oro ẹkemede ndinam ukpepn̄kpọ ubon edi se ibọpde-bọp onyụn̄ otịm etie inem inem?
◻ Nso ke mme ete ye eka ẹkeme ndinam ke ndidiomi mbre ye unọ idem inemesịt nnọ mme ubon mmọ?
[Ekebe ke page 16]
Ikwọukwak—Ọkpọsọn̄ Odudu
Andiwet n̄wed kiet aban̄ade edibọk nditọ ọdọhọ ete: “Edieke n̄kpadade ke iso otuowo . . . nnyụn̄ ntorode idat idat usọrọ idan̄ ye ukpammịn, ndida cocaine, ikọn̄ekpo, m̀mê n̄kpọsọn̄ ibọk ekededi oro anamde idem aduai owo, mmọ ẹkpese mi ke ata n̄kpaidem. . . . [Edi] mme ete ye eka ẹsinọ nditọ mmọ okụk ediwak ini ẹda ẹdep mme usanikwọ m̀mê mme kaset ẹdọn̄ọde mme ikwọ oro ẹtorode mme utọ n̄kpọ oro an̄wan̄wa.” (Raising Positive Kids in a Negative World, emi Zig Ziglar ewetde) Ke uwụtn̄kpọ, ke United States, mme uyen ẹsikwọ enyụn̄ ẹfiak ẹkwọ mme an̄wan̄wa ikọ ikwọ idan̄ oro ẹkwọde usọp usọp. Nte afo ke an̄wam nditọ fo ẹsasat mme ikwọukwak oro mmọ ẹmekde man mmọ ẹfep mme utọ afia demon oro?
[Ndise ke page 15]
Mme ini udia ẹkeme ndidi mme idaha idatesịt oro ẹnamde edidianakiet ye nneme ẹdu ke ubon