Ufọkabasi Oro Abaharede—Emi Ọdiọk Adan̄a Didie?
“NTE akamba ubon oro odude ke itiendịk, emi ẹdụn̄de ke akani ufọk oro ẹbọpde idiọk idiọk emi ibibene an̄wa ọduọde ke mbuari, etie nte n̄kpọ eke ẹkopde uyom editịm ke se ikperede ndidi kpukpru ubet—ye tambourine oro ẹmiade, nditọ Jesus ke ẹfiori n̄kpo ẹnọ mme adan̄ ukem uduot mbon Anglo-Catholic ẹmi ẹsịnede mbubịt ọfọn̄ emi edide enyọn̄ ye isọn̄.”—The Sunday Times, London, April 11, 1993.
Ubon emi edi Ufọkabasi England. Editịm oro aban̄a edida iban nsịn ke itieutom oku. Se ẹtịn̄de in̄wan̄în̄wan̄ ẹban̄a ọkpọsọn̄ unana edidianakiet mi akam enyene ebuana n̄ko ye kpukpru Christendom. Ye edibiom emi mme eteekpụk Ufọkabasi Orthodox ye pope ẹbiomde ubiere oro nte yak ẹyak iban ẹdi mme oku ikpe, utịp ke ofụri ofụri, nte ntọt kiet eberide edi nte ke “idotenyịn edifiak ndiana kiet ye nsụhọ Christendom eken ototịm oyom usụn̄ akan nte akanam edide.”
Ufọkabasi Abahade Adan̄a Didie?
Nte nnyịn ikotde ke Matthew 7:21, Jesus Christ ama ọdọhọ ete ke ediwak owo ẹyedọhọ ke imenyene mbuọtidem ke imọ nte Ọbọn̄ edi kpa ye oro ẹkpu ‘ndinam uduak Ete esie.’ Magazine oro, Maclean’s ọdọhọ ete: “Ẹkeme ndifen nnọ mme andikot Matthew oro ẹyomde edinyan̄a ke ntak ndutịme oro aban̄ade nnennen se idide uduak Abasi, ke ini mme Christian, ye mme ufọkabasi mmọ, ẹnyenede akamba ukpụhọde ye se ẹnemede emi.” Etienede ndụn̄ọde oro ẹkenamde ye otu mbon Canada, ẹma ẹsịm ubiere nte ke “akamba ukpụhọde odu ke mme edinịm ke akpanikọ ye mme edinam eke mme Christian ke Canada—ke akpanikọ, ukpụhọde oro odude ke otu mme andibuana ke ukem ido ukpono okpon akan enyeoro odude ke nsio nsio ido ukpono ke idemmọ.”
Nte ekemde ye ndụn̄ọde esie, mbahade 91 eke ikie ke otu mbon Catholic ẹnyịme ye edida ibọk n̄kpan uyomo idịbi idem okposụkedi oro ufọkabasi mmọ obiomde oro ikpe; mbahade 78 eke ikie ẹkere ẹte ke ẹkpenyene ndiyak iban ẹkabade ẹdi mme oku; ndien mbahade 41 eke ikie ẹnyịme usion̄o idịbe “ke ndusụk idaha.” Unana edinyịme oro odude ke nsio nsio ido ukpono ke “ediwak n̄kpọ aban̄ade ukpepn̄kpọ ido ukpono,” nte Maclean’s ọdọhọde, “ọsọn̄ọ owụt mme ubahade oro abaharede mme akpan ufọkabasi.”
Nsio Nsio Edumbet
Nsio nsio edumbet ọkọrọ ye mme edumbet oro ẹnyenede ntuaha ẹdu kaban̄a ido uwem. Ndusụk owo ẹdọhọ nte isọn̄ọde imụm mme edumbet Bible ikama, edi mmọ eken ẹda mmọ ẹnam nsahi. Ke uwụtn̄kpọ, nte usọrọ “ndọ” oro ẹkenamde ẹnọ iban iba ẹmi ẹdide mme Adan̄ Ukem Uduot ke Ufọkabasi Akwa Obio eke Toronto ama ekem ye uduak Abasi? Nte an̄wan̄ade mme andibuana ẹkekere ntre. Mmọ ẹkedọhọ ete, “Nnyịn iyom ndinam ima nnyịn n̄wụt an̄wan̄wa ye ke iso Abasi.”
Ewetmbụk kiet ama obụp ntak emi “akwa bishop Catholic emi esitọtde ikọ ẹnọ ndien ndien, ọkọnọde mme oku ẹmi ẹsidan̄de n̄kpri nditọiren ẹka ufọkabasi efen ẹmi mmọ ẹdisobode n̄kpri nditọiren efen efen.” Oku Andrew Greeley ama ọnọ ekikere ete ke ekeme ndidi ọtọn̄ọde ke mme oku 2,000 osịm 4,000 ẹma ẹsabade mme uyen 100,000, ediwak ini owo isinamke n̄kpọ iban̄a oro.
Ufọkabasi oro mîdianake kiet osion̄o mme owo oro mîdianake kiet edi. Ke mme idụt Balkan, “mme Christian” ẹdide mbon Serbia ye mbon Croatia ẹsikere ẹte ke Christ odu ye mmimọ ke “edinen” ekọn̄ mmọ. Ediwak owo ẹsikọn̄ọ cross ke en̄wan; owo kiet, nte ẹdọhọde, “kpukpru ini esifak cross esie ke inua ke ini en̄wan ọsọn̄de ubọk akan.”
“Ubahade Okûnyụn̄ Odu ke Otu Mbufo”
Edi akpanikọ, Bible ayak ndusụk n̄kpọ ọnọ ubieresịt, edi emi ikpenyeneke ndinam ufan̄ odu ọnọ utọ ubahade oro. Apostle Paul etịn̄ in̄wan̄în̄wan̄ ete: “Mbufo kpukpru ẹnyene ikọ inua kiet [ẹnyụn̄ ẹnam n̄kpọ ke n̄kemuyo], ubahade okûnyụn̄ odu ke otu mbufo.”—1 Corinth 1:10; Ephesus 4:15, 16.
Edidụn̄ọde “Ido Ukpono Christ” ke esịt akpanikọ ke n̄kpọ nte tọsịn isua iba ẹmi ẹbede nte apostle Paul ama ekewet mme ikọ oro amanam ndusụk ata akpan mbụme edemede. Ntak emi “mme Christian” ẹbaharede ntre? Nte utọ ufọkabasi oro abaharede ntre ekeme ndibọhọ? Nte Christendom oro adianade kiet eyedu tutu amama? Udiana ibuotikọ eyeneme aban̄a mme mbụme ẹmi.
[Ndise ke page 3]
Mme oku oro ẹfan̄ade ẹban̄a usion̄o idịbe
[Ebiet Ẹdade N̄kpọ Ẹto]
Ikpaedem ye enyọn̄ enyọn̄: Eleftherios/Sipa Press