Ẹn̄wọn̄ọ Eti Uwem
NTE afo akpama ndibọhọ mme mfịna ẹmi ẹnamde uwem ọsọn̄? Ndi afo omoyom ndidu uwem ke ererimbot emi uwem enyenede inem nte oro odude ke ndise emi ẹwụtde ke iso ye edem magazine emi? Tịm se ndise oro. Mme owo ẹnyene uwak n̄kpọ ndidia. Mmọ ẹyenen̄ede ẹkop inem edinem udia oro. Kpukpru owo ẹkop inemesịt. Mme owo ẹtode nsio nsio orụk ẹdu ke emem ye kiet eken. Idem mme unam ẹdu ke emem! Owo ndomokiet in̄wanake en̄wan. Owo ndomokiet ibueneke. Owo ndomokiet idọn̄ọke. Ndiye n̄kann̄kụk, ndiye eto, ye eti, nsasana mmọn̄ ẹdu. Nso ediye ebiet ke emi edi ntem!
Nte isọn̄ emi eyetie ntre tutu amama? Ih, enye eyedi paradise. (Luke 23:43) Abasi, emi okobotde isọn̄, amaduak ete ke mme owo ẹyedara eti uwem ke paradise isọn̄. Afo omonyụn̄ ekeme ndidu do!
Ewe Uwem ke Afo Edimek?
Didie ke Paradise isọn̄ ini iso edikpụhọde ye ererimbot emi nnyịn idude uwem idahaemi? Idahaemi, se ibede biliọn owo kiet ẹsisan̄a biọn̄ kpukpru usen. Edi ke Paradise emi Abasi ọn̄wọn̄ọde ọnọ isọn̄, kpukpru owo ẹyenyene uwak n̄kpọ ndidia. Bible ọn̄wọn̄ọ ete: “Jehovah mme udịm edinam akamba udia ọnọ kpukpru mme idụt, n̄kpọ eke enyenede isek, ndia ke wine eke anade ke ntak.” (Isaiah 25:6) Unana udia ididụhe, koro Bible ọdọhọ ete: “Uwak ibokpot ẹyedu ke isọn̄ ke nsom ikpọ obot.”—Psalm 72:16.
Mfịn, ediwak owo ẹdụn̄ ke ntan̄wan̄ ufọk ye ke mme obio oro ntatenyịn mîsịmke, mîdịghe mmọ ẹn̄wan̄wana ndikpe okụk ufọk mmọ. Mmọ eken inyeneke ufọk ẹnyụn̄ ẹna ke efak. Nte Esop Kaban̄a Nsọn̄idem Ererimbot ọdọhọde, n̄kpọ nte miliọn 100 ke otu nditọwọn̄ ke ererimbot inyeneke ufọkidụn̄. Edi ke Paradise emi edide, kpukpru owo ẹyenyene ọkpọkpọ ufọkidụn̄. Ikọ Abasi ọdọhọ ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄ vine, ẹnyụn̄ ẹdia mfri mmọ.”—Isaiah 65:21.
Ediwak owo ẹnam utom oro mmọ mîmaha. Mmọ ẹsinam ọkpọsọn̄ utom ẹbịghi ediwak ini edi ẹbọ esisịt okụk. N̄kpọ nte owo 1 ke otu kpukpru owo 5 ke ererimbot ẹsidu uwem ke okụk oro osụhọrede akan $500 ke isua kiet. Ke Paradise emi edide, nte ededi, mme owo ẹyekop inem utom mmọ ẹyenyụn̄ ẹkụt enye osion̄ode nti utịp. Abasi ọn̄wọn̄ọ ete: “Edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu.”—Isaiah 65:22, 23.
Idahaemi, ndiọkidem ye udọn̄ọ ẹdu ke kpukpru ebiet. Ediwak owo ẹdi nnan. Ndusụk owo ẹdi inan. Mmọ eken ikemeke ndisan̄a isan̄. Edi ke Paradise, mme owo ẹyebọhọ ndiọkidem ye udọn̄ọ. Jehovah ọdọhọ ete: “Andidụn̄ ididọhọke ite, Ndọdọn̄ọ.” (Isaiah 33:24) Amaedi mbon oro ẹma ẹkebobiomo ndo, ima ima un̄wọn̄ọ edi: “Ndien enyịn eyen̄wan̄a mme nnan, utọn̄ eyenyụn̄ ẹsịrede mbon inan. Ndien mbụn̄ọ eyenek nte edop, edeme imụm eyenyụn̄ ọkwọ.”—Isaiah 35:5, 6.
Idahaemi, ndutụhọ ye ubiak, mfụhọ ye n̄kpa, ẹdu. Edi ke Paradise edidude ke isọn̄, kpukpru n̄kpọ ẹmi ididụhe. Ih, idem n̄kpa eyebe efep! Bible ọdọhọ ete: “Abasi ke Idem Esie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ ẹfep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:3, 4.
Nte an̄wan̄ade, ndien, Paradise isọn̄ emi Jehovah ọn̄wọn̄ọde ediwọrọ eti uwem ọnọ ubonowo. Edi nnyịn ikeme didie nditịm mfiọk nte ke enye eyedi? Ini ewe ke enye edidi, ndien didie? Nso ke afo enyene ndinam man odu do?