Eti Uwem—Ke Mîbịghike!
KERE ban̄a owo emi esitịn̄de nte eyo editiede emi mme ikọ esie ẹsikperede ndidi akpanikọ kpukpru ini. Edieke enye etịn̄de ke mbụk n̄kpọntịbe mbubịteyo nte ke edịm eyedep ke edem usen, afo udumen̄eke ndisan̄a ye ufụkeyo fo ke ini ọkpọn̄de ufọk ke usenubọk. Edinam ini edem esie anam fi enyene mbuọtidem. Afo anam se enye ọdọhọde.
Idahaemi, un̄wọn̄ọ Jehovah aban̄ade eti uwem ke Paradise isọn̄ edi se ẹkemede ndiberi edem adan̄a didie? Ọfọn, nso ke edinam ini edem esie owụt? Edisu mme prọfesi Bible ẹwụt edinam Jehovah in̄wan̄în̄wan̄. Enye edi Abasi emi mme edinam esie ẹsidide nnennen ẹnyụn̄ ẹdide akpanikọ kpukpru ini. (Joshua 23:14; Isaiah 55:11) Mme un̄wọn̄ọ Jehovah Abasi ẹnen̄ede ẹdi se ẹkemede ndiberi edem tutu enye ke ndusụk ini esitịn̄ aban̄a mme n̄kpọntịbe ini iso ẹmi ẹn̄wọn̄ọde nte n̄kpọ eke edide mmọ ẹma ẹtetịbe. Ke uwụtn̄kpọ, ke etienede un̄wọn̄ọ esie eke obufa ererimbot emi n̄kpa ye eseme mîdidụhe aba, nnyịn ikot ite: “Kpukpru n̄kpọ [mme edidiọn̄ ẹmi ẹn̄wọn̄ọde] ẹma ẹsu ẹma.” Ke nditịn̄ ke usụn̄ en̄wen, “Mmọ ẹdi akpanikọ!”—Ediyarade 21:5, 6, ikọ idakisọn̄, NW.
Ih, edisu mme un̄wọn̄ọ Jehovah eke ini edem anam inyene mbuọtidem ke edisu un̄wọn̄ọ esie aban̄ade ubonowo ndinyene eti uwem. Edi ini ewe ke eti uwem emi edidi?
Eti Uwem—Ini Ewe?
Ata eti uwem eyedi ke mîbịghike! Nnyịn imekeme ndinịm oro ke akpanikọ koro Bible ọdọhọ ete ke ediwak ndiọi n̄kpọ ẹyetịbe ke isọn̄ mbemiso Paradise adade eti uwem edi. Ndiọi n̄kpọ oro ke ẹtịbe idahaemi.
Ke uwụtn̄kpọ, Jesus Christ ama ebemiso etịn̄ ete ikpọ ekọn̄ ẹyedu. Enye ọkọdọhọ ete: “Idụt eyedaha an̄wana ye idụt.” (Matthew 24:7) Prọfesi emi omosu. Ke ufan̄ isua 1914 osịm 1945, ekọn̄ ererimbot iba ẹma ẹdu ndien ediwak ekọn̄ eken ẹmi mme idụt ẹn̄wanade ye kiet eken ẹma ẹtiene mmọemi. “Ke ẹbaharede ukem ukem kpukpru isua, ibat mbon ẹmi ẹkpan̄ade ke ekọn̄ ke ikpehe ini emi [toto ke Ekọn̄ Ererimbot II] awak utịm ikaba akan mbon ẹmi ẹkekpan̄ade ke ọyọhọ isua ikie 19 onyụn̄ awak utịm ikatiaba akan eke isua ikie 18.”—World Military and Social Expenditures 1993.
Udọn̄ọ nditara nsuana edi uyarade en̄wen ndiwụt nte ke eti uwem ke Paradise emekpere. Jesus ama ebemiso etịn̄ ete ke ‘ndiọi udọn̄ọ ẹyedu ke nsio nsio ebiet.’ (Luke 21:11) Nte prọfesi emi omosu? Ih. Ke akpa ekọn̄ ererimbot ama okokụre, efiomnsa ama owot se ibede miliọn owo 20. Toto ke ini oro, kansa, udọn̄ọ esịt, utoenyịn, AIDS, ye mme udọn̄ọ eken ẹmewot ediwak miliọn owo. Ke mme idụt oro ẹtọn̄ọde-tọn̄ọ ntatenyịn, mme udọn̄ọ ẹtode idiọk mmọn̄ (ẹsịnede udọn̄ọ utọrọ ye utụn̄ nsia) ẹda uwem ediwak miliọn owo kpukpru isua.
Jesus ama ọdọhọ n̄ko ete: “Akan̄ . . . ẹyenyụn̄ ẹdu.” (Matthew 24:7) Nte ikokụtde ke ibuotikọ emi ekebemde iso, ubuene ke ererimbot inyeneke udia oro ekemde. Emi edi ikpehe uyarade en̄wen nte ke ata eti uwem ke Paradise ọmọn̄ edi ke mîbịghike.
Jesus ama ọdọhọ ete: “Ikpọ unyek-isọn̄ ẹyedu.” (Luke 21:11) Emi n̄ko omosu ke eyo nnyịn. Toto ke 1914 nsobo emi otode mme akama-nsobo unyekisọn̄ amada uwem ediwak tọsịn owo ke mme itie ikie.
Bible akaiso ọdọhọ ete ke ukpụhọde ke idem mme owo eyenịm “ukperedem ini” emi idiọn̄ọ. Mmọ ẹyedi “mme ama idem” ye “mme ama inyene,” nditọ ẹyenyụn̄ “ẹsọn̄ ibuot ye ete ye eka.” Mme owo ke ofụri ofụri “[ẹyema] mbre ẹkan Abasi.” (2 Timothy 3:1-5) Nte afo unyịmeke nte ke ediwak owo ẹkem ye se ẹtịn̄de emi?
Nte ata ediwak owo ẹnamde ndiọi n̄kpọ, ntre ke ukwan̄ido ọtọt. Ẹma ẹbemiso ẹtịn̄ emi n̄ko. Nte Matthew 24:12 ọdọhọde, Jesus ama etịn̄ aban̄a ‘ukwan̄ido nditọt.’ Eyedi afo eyenyịme nte ke ubiatibet ọdiọk idahaemi akan nte ekedide ke ediwak isua ẹmi ẹkebede. Mme owo ke kpukpru ebiet ẹkop ndịk nte ke ẹyewo, ẹtụk, m̀mê ẹnọ mmimọ unan ke ndusụk usụn̄.
Ekọn̄, ntatara udọn̄ọ, unana udia, unyekisọn̄, ubiatibet emi ọtọtde, ye mme itie ebuana owo ndikpụhọde ndiọk n̄kan nte ẹkedide—ẹkụt kpukpru ẹmi mfịn, kpa nte Bible ekebemde iso etịn̄. Afo emekeme ndibụp ete, ‘Nte mme n̄kpọ ẹmi ikotịbeke ke ofụri mbụk owo? Nso ukpụhọde odu aban̄a eyo nnyịn?’
Ndusụk ikpehe ẹdu ẹmi ẹtịmde ẹdi akpan n̄kpọ kaban̄a mme n̄kpọ ẹmi ẹtịbede mfịn. Bible idọhọke ite ke ikpehe kiet ekededi, utọ nte unana udia, ke idemesie edidi uyarade nte ke nnyịn idu ke utịt ini ndien nte ke eti uwem ekpere. Mme prọfesi Bible kaban̄a utịt ini ẹkenyene ndisu ke idem emana unana uten̄e Abasi.—Matthew 24:34-39; Luke 17:26, 27.
N̄ko-n̄ko, edi ata esen esen n̄kpọ nte ke ndusụk ikpehe prọfesi Jesus—akpan akpan mmọ oro ẹban̄ade unana udia ye ntatara udọn̄ọ—ke ẹsu mfịn. Ntak-a? Koro edikụt unen ke ifiọk ntaifiọk akananam ikponke ntem. Ifiọk ibọkusọbọ ye mme usụn̄ unọ usọbọ akananam inyeneke uforo m̀mê ndidu ntatara ntatara ntem. Abasi ikpọn̄ ekpekeme ndibem iso ntịn̄ ke Ikọ esie, kpa Bible, nte ke udọn̄ọ ye akan̄ ẹyedọdiọk ẹkan ke utọ ini oro, utu ke ndifọfọn n̄kan.
Sia kpukpru prọfesi Bible ẹban̄ade utịt ini, m̀mê “ukperedem ini,” ẹsude, nso ke nnyịn ikpebiere? Nte ke eti uwem emekpere! Edi didie ke emi editịbe?
Eti Uwem—Didie?
Nte afo emekere ke mme owo ẹkeme ndida Paradise ndi? Ke ofụri mbụk tutu osịm mfịn, ediwak uduot ukara owo ẹdu. Ndusụk ẹmedomo ọkpọsọn̄ ndiyụhọ udọn̄ mme owo. Edi, ediwak mfịna ke ẹdọdiọk ẹkan. Ke mme idụt uforo ye mme idụt unana, ukara ke ẹn̄wana ye edida n̄kpọsọn̄ ibọk ke idiọk usụn̄, idiọk ufọkidụn̄, unana, ubiatibet, unana utom, ye ekọn̄.
Idem edieke ukara ekpekemede ndikọk ndusụk mme mfịna ẹmi, tutu amama mmọ idikemeke ndinam ẹbọhọ udọn̄ọ ofụri ofụri; idinyụn̄ ikemeke nditre usọn̄ ye n̄kpa. Nte an̄wan̄ade, mme owo ididaha Paradise idi ke isọn̄ emi tutu amama.
Bible ke ọniọn̄ ọdọhọ ete: “Mbufo ẹkûbuọt idem ye mbọn̄, ẹkûbuọt ye eyen owo, emi edinyan̄a mîdụhe enye ke idem.” Nnyịn ikpenyene ndibuọt idem, ndien, ke anie? Bible ọbọrọ ete: “Ọfọfọn ọnọ owo eke Abasi Jacob edide andin̄wam enye, eke odoride enyịn ye Jehovah Abasi esie.” (Psalm 146:3, 5) Edieke nnyịn ikọn̄de idotenyịn ke Jehovah Abasi, nnyịn idikwe edikpu tutu amama.
Ke akpanikọ Enyeemi enyenede ọniọn̄ ye odudu ndibot isọn̄, utịn, ye mme ntantaọfiọn̄ ekeme n̄ko ndinam isọn̄ edi paradise. Enye ekeme ndinam mme owo ẹdara eti uwem. Se ededi oro Jehovah Abasi oyomde ndinam, enye ekeme ndinam ndien eyenyụn̄ okụt unen. Ikọ esie ọdọhọ ete: “Ikọ baba kiet eke otode Abasi idinanake odudu.” (Luke 1:37) Edi didie ke Abasi edida eti uwem edi?
Jehovah eyeda ata eti uwem ọsọk ubonowo ebe ke Obio Ubọn̄ esie. Ndien nso idi Obio Ubọn̄ Abasi? Enye edi ata ukara emi enyenede Andikara emi Abasi emekde, kpa Jesus Christ. Obio Ubọn̄ Abasi odu ke heaven, edi enye eyesọp ada mme utịbe utịbe edidiọn̄ ye ata eti uwem ọsọk mme andidụn̄ Paradise isọn̄ oro.—Isaiah 9:6, 7.
Eyedi afo emememehe ye akam uwụtn̄kpọ Jesus, emi ẹkụtde ke Bible ke Matthew 6:9-13. Ubak akam oro ẹbọn̄de ẹnọ Abasi mi ọdọhọ ete: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” Ke n̄kemuyo ye akam oro, Obio Ubọn̄ Abasi ‘eyedi’ ndinam uduak Jehovah Abasi ke isọn̄. Ndien edi uduak esie nte isọn̄ akabade edi paradise.
Akpatre mbụme kiet edemede: Nso ke ana afo anam man adara eti uwem ke Paradise emi edide?
Se Afo Enyenede Ndinam
Jehovah Abasi ke ima anam idotenyịn eti uwem ke Paradise odu ọnọ kpukpru owo ẹmi ẹnamde uduak esie. Bible asian nnyịn ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Edi nso inam owo edi eti owo ke enyịn Abasi?
Man inem Jehovah esịt nnyịn inyene ndikpep ekese mban̄a se enye oyomde nnyịn inam. Edieke nnyịn ikọde ifiọk Abasi inyụn̄ idade enye isịn ke edinam ke uwem nnyịn, nnyịn imekeme ndidu uwem ke nsinsi. Ke akam oro ọkọbọn̄de ọnọ Abasi, Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.”—John 17:3.
N̄wed oro etịn̄de ọnọ nnyịn aban̄a Jehovah Abasi ye Jesus Christ edi Ikọ Abasi, kpa Bible. Enye edi kiet ke otu enọ Jehovah emi ọsọn̄de urua akan. Bible etie nte leta emi ima ima ete ewetde ọnọ nditọ esie. Enye asian nnyịn aban̄a un̄wọn̄ọ Abasi ndida eti uwem nsọk ubonowo onyụn̄ owụt nnyịn usụn̄ nte ikemede ndinyene enye. Bible anam nnyịn ifiọk se Abasi akanamde ke ini edem ye se enye edinamde ke ini iso. Enye n̄ko ọnọ nnyịn nti item ke nte ikemede ndise mban̄a mme mfịna nnyịn uforo uforo idahaemi. Ke akpanikọ, Ikọ Abasi ekpep nnyịn nte ikemede ndinyene ndusụk udomo inemesịt idem ke ntịme ntịme ererimbot emi.—2 Timothy 3:16, 17.
Mme Ntiense Jehovah ẹyedara ndidiomi ukpepn̄kpọ Bible nnọ fi. Kpep nte ekemede ndidu uwem inemesịt idahaemi, ye idotenyịn ndidu ata eti uwem ke n̄kpet n̄kpet ini iso.
[Ndise ke page 5]
Mme prọfesi Bible ẹwụt nte ke eti uwem emekpere
[Ndise ke page 7]
Obio Ubọn̄ Abasi eyeda eti uwem ọsọk ubonowo