Mme Ntiense Jehovah ke Ofụri Ererimbot—New Zealand
NTE mme isuo ẹkeme nditoro Jehovah? Ih, nte Isaiah 42:10 ọdọhọde: “Mbufo ẹkwọ obufa ikwọ ẹnọ Jehovah, ye itoro esie ke utịt ererimbot, . . . mbufo mme isuo ye mme andidụn̄ mmọ.” Ke akpanikọ mme isuo ẹmi ẹnamde New Zealand ẹtoro Jehovah. Ke edide se ẹdiọn̄ọde ke ererimbot kaban̄a n̄kpọdiọhọ mmọn̄, edịk, edikon̄ obot, udiọn̄ ice, mbenesụk, ikpọ akai, ndiye isọn̄ awawa mbiet ndibọk ufene, New Zealand etịn̄ in̄wan̄în̄wan̄ aban̄a ubọn̄ ye ubom Andibot enyọn̄ ye isọn̄.
Toto nte isua ikie emi ọkọtọn̄ọ, ata ediwak mme andidụn̄ New Zealand ẹmedian uyo mmọ ke nditoro Jehovah ebe ke ndiwọn̄ọde mbịne enye ke edisana utuakibuot ye edibuana eti mbụk Obio Ubọn̄ Abasi ye mmọ en̄wen. Ke ndondo emi, Ntiense kiet emi okokopde eti ifiọkutom aban̄a nte ẹkenọde mme iman ikọ ntiense ama ebiere ndinọ ubon esie ikọ ntiense. Enye ama ọnọ ekese mme andibuana ke ubon esie n̄wed Afo Emekeme Ndidu Uwem ke Nsinsi ke Paradise ke Isọn̄ ke mfọn. Nso idi utịp kan̄a? Enye ọtọt ete ke eyeneka an̄wan kiet ye eyeneka eren kiet ke ẹkpep Bible idahaemi, eyen eyeneka esie kiet amana baptism nte kiet ke otu Mme Ntiense Jehovah, ndien mmọ eken ẹnyene udọn̄ idahaemi ke akpanikọ Ikọ Abasi ẹkan nte ekedide. Enye osụk enyenyene akamba efakutom ndinam utom, ke ẹsiode ete ye eka esie ẹfep, enye enyene nditọeka iren itiokiet ye nditọeka iban usụkkiet!
Esisụn̄ọ n̄ko ke nditoro Jehovah ke ini Mme Ntiense ẹdiande ubọk ke ndibọp Mme Ufọkmbono Obio Ubọn̄. Ke uwụtn̄kpọ, Roy Perkins, ewet n̄wedmbụk n̄kpọntịbe, ekewet ke Opotiki News eke May 17, 1994 ete: “Ke ndide owo emi mînịmke ke akpanikọ, mma n̄kop inemesịt etieti mban̄a utom ye ukeme eke kpukpru ifịk ifịk mbonutom ẹmi ẹsịnde ata ekese ini ye ukeme ke utom oro ke ntak ima oro ẹnyenede ẹnọ Abasi mmọ.
“Ke ofụri hour ẹmi ẹkesịnde ke utom ke utịt urua oro akananam n̄kwe m̀mê ndikop eneni n̄ka mbonutom . . . Iban ẹkedoro ke enyọn̄ ẹnam utom ye irenowo mmọ, ẹdian̄ade n̄kani semen ẹsion̄o, ẹmenede n̄kpọ, ẹbiomde n̄kpọutom, ẹnamde kpukpru ke ido oro etiede emem emem ye ufan ufan.
“Owo ndomokiet ikabiatke ndomo minit kiet ke ntak edin̄wọn̄ sika. Se ededi utom emi ofụri mbon oro ẹkenamde ofụm ama asana ke mîbọhọke uye oro ọkọwọrọde ke benti ye ntọn̄ kọrikọri.”
Otu mbiowo Esop Opotiki ekewet ete: “Ofụri utom oro emenyen̄e mbon obio. Etie nte kpukpru owo ẹditịn̄ ẹban̄a oro. Ẹtọn̄ọ ekese ukpepn̄kpọ Bible. Kiet oro enen̄erede esịn idem aduai owo akpan akpan edi ebe ye n̄wan oro ẹkesịnde idem etieti ke ido ukpono ẹmi ke ediwak isua ẹkedọhọde nnyịn ikûwaha ọtọ mmimọ. Mmọ ẹma ẹsidi itieutom oro kpukpru usen ndien ekem ẹsidi mbonoesop. Ekem ebe ama ọdọhọ ete: “Ami mmekeme ndikụt nte ke mbufo ẹdi ikọt Abasi. Ke esịt idemmi, ama esidọn̄ mi ke ofụri uwem mi ndinyene ebuana ye mme owo ẹtiede ntem.’”
Ke isua oro ekebede, ewet n̄wedmbụk n̄kpọntịbe ke Otago Daily Times ama etịn̄ se itienede mi aban̄a Ufọkmbono Obio Ubọn̄ emi ẹkebọpde usọp usọp ke Dunedin ete: “Emi ekedi n̄wọrọnda edinam, n̄wọrọnda uwụtn̄kpọ nsịnudọn̄ ye edinọ idem ndin̄wam.” Ukem n̄wedmbụk n̄kpọntịbe oro ama ọdọhọ ete: “Mbon obio ẹma ẹkop n̄kpaidem ke adan̄aemi ẹkụtde ke enyịn mmọ nte ẹbọpde akamba ufọk, ndien anaedi ekese ke ẹkere ẹban̄a mme ukpụhọde ye nti utom efen emi ẹkemede ndinam edieke ukem akpakịp udịm mme anamutom unyịmesịt ẹmi ye ekese edu edidianakiet okpodude. Ufọkmbono Obio Ubọn̄ edi ata ediye idiọn̄ọ eti ukeme emi ọnọde utịp.”
Ke otu ediwak owo ke mme itie ikie ẹmi ẹkekade ẹkese itieutom emi, akparawa kiet ama okụt nte ke Mme Ntiense ke ẹkebọp “mme ufọkabasi” ke adan̄aemi ido ukpono esie akanyamde-nyam mmọ ke ntak emi ibat mme andidụk osụhọrede. Enye ama ọdọhọ ete: “Ekpedi mbufo ẹma ẹbet ke n̄kpọ nte ọfiọn̄ duopeba en̄wen, mbufo ẹkpedep kiet ke otu eke nnyịn. Nnyịn inyene ndinyam kiet koro akak nnyịn ndikpe okụk. Nte ededi, mbufo inyeneke mme ọkwọrọ ederi oro ẹkpede-kpe okụk. . . . Ndien mme ufọk mbufo ikpaha ekese ke ndise mban̄a, idịghe mme edikon̄ ufọk ẹnyenede tọwa ẹmi ọsọn̄de ndise mban̄a.”
Nte an̄wan̄ade, mme isuo ke akpanikọ ẹkeme nditoro Abasi. Ẹkpekam ẹkaiso ndifiori itoro Jehovah ke ediye idụt Pacific emi—ye ke ofụri ererimbot!
[Ekebe ke page 9]
IDAHA IDỤT:
Isua Utom 1994
N̄WAKN̄KAN IBAT ẸMI ẸNỌDE IKỌ NTIENSE: 12,867
MBAHADE: Ntiense kiet ke owo 271
MME ANDIDỤK EDITI: 24,436
UKEM MBAHADE MME ASUANETOP ẸDIDE MME ASIAKUSỤN̄: 1,386
UKEM MBAHADE UKPEPN̄KPỌ BIBLE: 7,519
IBAT ẸKENADE BAPTISM: 568
IBAT ESOP: 158
ỌFIS N̄KỌK ITIEUTOM: MANUREWA
[Ndise ke page 9]
Mme asiakusụn̄ ẹkewọrọ an̄wautom ke n̄kpọ nte 1930
[Ndise ke page 9]
Ufọkutom n̄kọk itieutom ke Manurewa
[Ndise ke page 9]
Edikwọrọ etop Obio Ubọn̄ ke Devonport, Auckland