Ntak Emi Kpukpru Nnyịn Ikpotorode Abasi?

HALLELUJAH! Ata ediwak mme aka ufọkabasi ke Christendom ẹtịm ẹmehe ye ikọ emi. Ndusụk mmọ ẹsifiori enye ke ọkpọsọn̄ uyo ke ederi mmọ ke Sunday. Edi, owo ifan̄ ẹfiọk se ikọ emi enen̄erede ọwọrọ? Ke akpanikọ, enye edi ikọ Hebrew adade ọnọ “Ẹtoro Jah!” Enye edi idara idara, in̄wan̄în̄wan̄ itoro ẹnọde Andibot, emi enyịn̄ esie edide Jehovah.a

Ikọ oro “Hallelujah” odu ndien ndien ke Bible. Ntak-a? Koro ediwak ntak ẹdu nditoro Abasi. Jah (Jehovah) edi Andibot ye Andinọ uwem ke akaka ekondo emi. (Psalm 147:4, 5; 148:3-6) Enye akanam ndutịm ebuana odude ke ufọt unam ye eto emi anamde uwem ekeme ndidu ke isọn̄. (Psalm 147:8, 9; 148:7-10) Ndien enye enyene san̄asan̄a udọn̄ aban̄a ubonowo. Edieke nnyịn inamde uduak esie, enye ọdiọn̄ nnyịn onyụn̄ ọnọ nnyịn un̄wam ke uwem emi onyụn̄ ọnọ nnyịn idotenyịn oro enyenede iwụk kaban̄a uwem oro akam ọfọnde akan ke ini iso. (Psalm 148:11-14) Jah (Jehovah) ọkọnọ odudu ẹwet mme ikọ ẹmi: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

Ntem, ẹnọ kpukpru owo item ẹte: “Hallelujah!” “Mbufo ẹtoro Jah!” (Psalm 104:35, NW; ikọ idakisọn̄) Nte ededi, ke mfụhọ, idịghe kpukpru owo ẹkere ke akpana itoro. Mfịn, mme owo ke ẹkụt ndutụhọ. Ediwak owo ẹkop biọn̄, ẹdọn̄ọ, mîdịghe ẹfịk mmọ. Ediwak owo ẹdu ke akamba mfụhọ ke ntak edida n̄kpọsọn̄ ibọk m̀mê n̄kpọsọn̄ mmịn ke idiọk usụn̄ m̀mê nte utịp oburobụt uwem m̀mê nsọn̄ibuot mmọ. Nte ntak ndomokiet odu emi utọ mbon oro ẹkpetorode Abasi?

‘Jehovah Ikpọn̄ Ekeme Ndinọ Mi Idotenyịn’

Ih, ntak odu. Jehovah ọnọ kpukpru owo ikot, isioho owo eto, ete ẹfiọk imọ, ẹkpep ndinam uduak imọ, ẹnyụn̄ ẹbọ mme edidiọn̄ oro ẹnamde mme owo ẹnyene udọn̄ nditoro imọ. Ndien ediwak owo ẹnam oro. Da, Adriana ke Guatemala, ke uwụtn̄kpọ. Ke ini Adriana ekedide isua itiaba, eka esie ama akpa. Esisịt ini ke oro ebede ete esie ama ọkpọn̄ ufọk. Ke ini enye ekedide isua duop, enye ama ọtọn̄ọ ndinam utom man enyene se adade odu uwem. Sia eka esie ọkọdọhọde enye ete anam n̄kpọ Abasi ye eke ufọkabasi, Adriana ama abuana ye nsio nsio n̄ka Catholic, edi ke ini enye ekedide isua 12, enye ama okụt edikpu onyụn̄ ọwọrọ akadiana ye n̄ka ntịme ke efak. Enye ama ọtọn̄ọ ndin̄wọn̄ sika, ada n̄kpọsọn̄ ibọk, onyụn̄ eyịp n̄kpọ. Ntak emi utọ ekpri eyenan̄wan oro okpoyomde nditoro Abasi?

Eyeneka Adriana an̄wan ama ọtọn̄ọ ndikpep Bible ye Mme Ntiense Jehovah, edi Adriana ama asak enye. Ekem eyeneka eka mmọ ama akpa. Ke itie n̄kpa eyeneka eka mmọ, mme mbụme oro ẹtiede mfịna mfịna ẹma ẹtịmede Adriana esịt. Eyeneka eka esie akaka m̀mọ̀n̄? Nte enye odu ke heaven? Ndi enye aka ikan̄îkan̄ hell? Ekedi akwa n̄kpọ editịmede esịt, ndien Adriana ama aka ufọkakam ke itie ubụkowo ndikọbọn̄ akam nyom un̄wam, adade enyịn̄ Abasi oro Jehovah, nte eyeneka esie ekekpepde enye.

Ikebịghike enye ama ekpep Bible ye Mme Ntiense Jehovah onyụn̄ odụk mme mbonoesop Christian mmọ. Emi ama ọnọ enye ata obufa idotenyịn ke uwem, ndien enye ama enyene uko ndisịbe itie ebuana esie mfep ye n̄ka ntịme ke efak. Adriana, emi odude idahaemi ke ufọt ufọt iduọk isua 20 esie, ọdọhọ ete: “Ima nnyenede nnọ Jehovah kpọt akanam mi n̄kpọn̄ utọ idiọk usụn̄uwem oro. Jehovah ikpọn̄ ke akwa mbọm esie ekeme ndinọ mi idotenyịn nsinsi uwem.” Adriana, kpa ye oro ekenyenede ọkpọsọn̄ ntọn̄ọ ke uwem, enyene nti ntak nditoro Abasi.

Ẹtọt ẹban̄a idaha oro akam etịmde ọdiọk akan oro ke Ukraine. Eren kiet odu ke ufọk-n̄kpọkọbi ebet usen emi ẹdiwotde enye. Nte enye okop mbọm aban̄a idemesie? Okop mfụhọ? Baba, akam edi ata isio isio ye oro. Ke ama okosobo ye Mme Ntiense Jehovah ke ndondo emi, ke ama okonyụn̄ enyene ndusụk ifiọk aban̄a Jehovah, enye ama eben̄e mmọ ete ẹkesobo ye eka esie. Idahaemi enye esiwet mmọ koro enye ama okop ete ke mmọ ẹma ẹnam eben̄e esie. Enye ọdọhọ ete: “Ẹsọsọn̄ọ ke ndika n̄kese eka mi. Enye edi mbụk oro ọnọde idatesịt akan oro n̄kọbọde ke utịt isua oro.”

Ke etịn̄de aban̄a idemesie ye nsan̄a ufọk-n̄kpọkọbi esie emi enye ọkọnọde ikọ ntiense, enye ewet ete: “Idahaemi nnyịn imenyene mbuọtidem ke Abasi inyụn̄ idomo ndinam n̄kpọ ekekem ye mbuọtidem nnyịn.” Enye etre leta esie ke ndidọhọ: “Ẹsọsọn̄ọ ke ndin̄wam nnyịn ndikpep se ima edide ndinyụn̄ nnyene mbuọtidem. Edieke ndude uwem, ami nyan̄wam mbufo n̄ko. Ekọm enyene Abasi sia mbufo ẹdude ẹnyụn̄ ẹn̄wamde mbon en̄wen ndima Abasi nnyụn̄ nnịm enye ke akpanikọ.” Eren emi ama osion̄o ikpe n̄kpa esie. Edi edide ẹyewot enye m̀mê enye edibiat ediwak isua ke ufọk-n̄kpọkọbi, enye nte an̄wan̄ade enyene ntak nditoro Abasi.

‘Okposụkedi Ndide Nnan, Mmekeme Ndikụt Usụn̄’

Kere, idahaemi, ban̄a okop-idem n̄kaiferi kiet emi akakabarede edi nnan ke mbuari. Se iketịbede inọ Gloria, emi odụn̄de ke Argentina, edi oro. Gloria akakabade nnan ke mbuari ke ini enye ekedide isua 19 ke emana, ndien enye ikwe usụn̄ aba tọn̄ọ ke ini oro. Ke edide isua 29 enye ama odụk ebuana ufọk ndọ onyụn̄ oyomo idịbi ke mîbịghike. Enye kemi ama ekere ke uwem imọ enyene se ọwọrọde. Edi ke ini eyen esie akakpade, enye ama ọtọn̄ọ ndibụp mme mbụme. Enye ama obụp, ‘Ntak emi n̄kpọ emi etịbede ọnọ mi? Nso ke ami ndue? Nte Abasi enen̄ede odu?’

Ke ini emi, owo iba ke otu Mme Ntiense Jehovah ẹma ẹwaha enyịnusụn̄ esie. Enye ama ọtọn̄ọ ndikpep Bible onyụn̄ ekpep aban̄a mme un̄wọn̄ọ esie nte ke obufa ererimbot oro, nnan ayafiak okụt usụn̄. (Isaiah 35:5) Nso utịbe utịbe idotenyịn ke emi ekedi ntem ọnọ Gloria! Enye ama enen̄ede okop inemesịt, akpan akpan ke ini ebe esie ekenyịmede ndisịn ndọ mmọ ke n̄wedibet. Ekem ebe esie ama enyene mbabuat n̄kpọntịbe onyụn̄ akabade edi owo n̄kpọnnam, emi ẹsịnde ke n̄kpọitie mbon n̄kpọnnam. Mfịn n̄wan emi edide nnan mi enyene ndinam utom ọkpọsọn̄ man enyene se adade odu uwem. Adianade do, enye esinam kpukpru utom ke ufọk, ọkọrọ ye edinọ ebe esie ọkpọkpọ ntịn̄enyịn. Kpa ye oro Gloria otoro Jehovah! Ye un̄wam emi nditọete Christian esie iren ye iban ẹnọde, enye ekpep Bible mme nnan, ndien enye esibọ akamba nsịnudọn̄ ke mme mbonoesop Christian ke Ufọkmbono Obio Ubọn̄. Enye ọdọhọ ete: “Ọsọsọn̄ ndinam an̄wan̄a, edi okposụkedi ndide nnan, etie nte mmokụt usụn̄.”

Ndusụk ini ẹsikọbọ mme owo ke ini mmọ ẹtorode Abasi. N̄wan kiet ke Croatia ama okop inemesịt ke ini enye ekekpepde n̄kpọ aban̄a Abasi, edi ebe esie ama ọbiọn̄ọ obufa ido ukpono esie onyụn̄ esịn enye, ọbọde eyenan̄wan mmọ ekedide isua kiet. Ke odude ke efak, ebe ye ubon ẹsịnde enye, inyeneke ufọkidụn̄, utom, m̀mê idem eyen esie, enye ama okop akaka mfụhọ ke akpa. Edi ima oro enye enyenede ọnọ Abasi ama ọsọn̄ọ enye idem, okposụkedi enye ekenyenede ibat ibat ini ndisobo ye eyen esie an̄wan tutu ekpri owo oro ọkọri okpon. N̄wan emi ama okụt “pearl kiet emi okponde ekọm-urua” onyụn̄ ọsọn̄ọ omụm enye akama. (Matthew 13:45, 46) Didie ke enye okomụm idatesịt esie akama ke n̄kpọsọn̄ ini ẹmi? Enye etịn̄ ete: “Idatesịt edi mbun̄wụm spirit Abasi. Ẹkeme ndinyene enye inamke n̄kpọ m̀mê nso idi idaha owo, kpa nte eto ekemede ndikọri ke esịtufọk inamke n̄kpọ nte idaha etiede ke an̄wa.”

Ke Finland, ẹma ẹdụn̄ọrede ẹkụt ẹte ke Markus emi ekedide isua itiokiet ke emana ama enyene udọn̄ọ esịp oro mînyeneke usọbọ. Ikebịghike ẹma ẹsịn enye ke n̄kpọitie mbon n̄kpọnnam. Isua ifan̄ ke ukperedem, eka esie ama emen enye aka ebịne eren Pentecostal kiet oro ẹkediọn̄ọde ntatara ntatara oto edidọhọ emi ẹkedọhọde nte ọkọkde mme owo udọn̄ọ. Edi owo ikọkọkke udọn̄ọ esie ke utịbe utịbe usụn̄. Ntre Markus ama anana udọn̄ ke Abasi onyụn̄ esịn idem ke ukpepn̄kpọ ifiọk ntaifiọk ye mme ukpepn̄kpọ eken. Ekem ke n̄kpọ nte isua ition ẹmi ẹkebede, n̄wan kiet oro akparawa kiet akakpatde ke n̄kpọitie mbon n̄kpọnnam ama aka ufọk emi Markus okodụn̄de. Mmọ ẹkedi Mme Ntiense Jehovah. Idahaemi Markus ekedi owo oro mînịmke edidu Abasi ke akpanikọ, edi enye ikafan̄ake ndineme mban̄a ido ukpono ama onyụn̄ ọdọhọ mmọ ẹdụk ufọk.

Ekem, ebe ye n̄wan ẹma ẹwaha ẹkese enye, ndien ẹma ẹtọn̄ọ ukpepn̄kpọ Bible. Ke akpatre, odudu akpanikọ Bible ama okpụhọde ekikere Markus kaban̄a mme n̄kpọ, ndien enye ama ọfiọk ete ke kpa ye oro ibiomode ndo, imọ imenen̄ede inyene mme ntak nditoro Abasi. Enye ọdọhọ ete: “Ami mmenen̄ede n̄kop inemesịt koro mmokụt akpanikọ ye esop oro Jehovah adade anam n̄kpọ. Uwem mi enyene ndausụn̄ ye uduak idahaemi. Ẹma ẹkụt erọn̄ efen oro okosopde ndien enye iyomke ndikpọn̄ otuerọn̄ Jehovah!”—Men Matthew 10:6 domo.

Yak Kpukpru Owo “Ẹtoro Jah”

Mmọemi ẹdi sụk ibat ibat ke otu mme anana-ibat ifiọk n̄kpọntịbe ẹkemede ndibụk ndiwụt nte ke mme owo mfịn, inamke n̄kpọ m̀mê nso idi idaha mmọ, ẹkeme ndinyene ntak nditoro Abasi. Apostle Paul akanam an̄wan̄a ke usụn̄ emi: “Uten̄e Abasi ọwọrọ udori ke kpukpru usụn̄, koro un̄wọn̄ọ uwem emi odude ke emi ye eke uwem emi edidide asan̄ade ye enye.” (1 Timothy 4:8) Edieke nnyịn inamde uduak Abasi, enye oyosu “un̄wọn̄ọ uwem emi odude ke emi.” Nte ededi, ke editịm n̄kpọ emi enye idinamke ubuene akabade imọ m̀mê ndinam mbon udọn̄ọ ẹkop nsọn̄idem. Edi enye ọnọ mbon oro ẹnamde n̄kpọ esie spirit esie man mmọ ẹnyene idatesịt ye uyụhọ ke idaha ekededi oro mmọ ẹdude. Ih, idem ke “uwem emi odude ke emi,” mbon udọn̄ọ, mbon oro ẹfịkde, ye ubuene ẹkeme ndinyene ntak nditoro Abasi.

Edi nso kaban̄a uwem “emi edidide”? Kamse, ndikam n̄kekere mban̄a enye ekpenyene ndinam nnyịn itoro Abasi ye akwa ifiopesịt! Nnyịn imokop nduaidem ndikere mban̄a ini oro owo mîdifiọkke se idide unana aba; ini oro ‘andidụn̄ mîdidọhọke ite, Ndọdọn̄ọ’; ye ini oro Jehovah Abasi ‘edikwọhọrede kpukpru mmọn̄eyet ke enyịn mmọ efep. N̄kpa mîdinyụn̄ idụhe aba; eseme ye ntuan̄a ye ubiak mîdinyụn̄ idụhe aba; koro ebe-iso n̄kpọ ẹma ẹbe ẹfep.’ (Isaiah 33:24; Ediyarade 21:3, 4; Psalm 72:16) Didie ke afo ese mme un̄wọn̄ọ Abasi ẹmi?

Akparawa kiet ke El Salvador ama ọbọ tract Bible oro anamde ndusụk n̄kpọ ẹmi ẹn̄wan̄a. Enye ọkọdọhọ Ntiense oro ọkọnọde enye, “Mma, se tract emi etịn̄de iditịbeke.” Ediwak owo ẹsitịn̄ ntre. Kpa ye oro, ẹmi ẹdi un̄wọn̄ọ Owo oro okobotde ekondo, emi anamde mme oto-obot n̄kpọ ẹsan̄a ẹkanade isọn̄ nnyịn, emi onyụn̄ an̄wamde idem mme ubuene ye mbon udọn̄ọ ndikop idatesịt. Nnyịn imekeme ndinịm se enye etịn̄de ke akpanikọ. Akparawa oro ẹsiakde ke enyọn̄ emi ama ekpep Bible ye Mme Ntiense Jehovah onyụn̄ okụt ke emi edi akpanikọ. Edieke edide afo unamke emi kan̄a, nnyịn imesịn udọn̄ inọ fi ndinam ukem oro. Ndien, akpakam afo odu do ke ini editịm n̄kpọ emi odude kemi edibede efep, ndien kpukpru edibotn̄kpọ ẹdidianade kiet ẹfiori: “Hallelujah!” “Mbufo ẹtoro Jah!”—Psalm 112:1; 135:1, NW.

[Ikọ idakisọn̄]

[Ndise ke page 5]

Afo akpakam odu do ke ini kpukpru edibotn̄kpọ ẹdianade ọtọkiet ẹfiori: “Hallelujah!”