“Nịm Esịt Fo Ke” Temple Abasi!

“Eyen owo, . . . nịm esịt fo ke kpukpru se ami ndiyakde fi okụt . . . men kpukpru se afo okụtde tịn̄ nọ Israel.”—EZEKIEL 40:4.

1. Ke nso idaha ke ndimek ikọt Abasi ẹkekụt idemmọ ke 593 M.E.N.?

ISUA oro ekedi 593 M.E.N., ọyọhọ isua 14 nte Israel okodu ke ntan̄mfep. Ye mme Jew oro ẹkedụn̄de ke Babylon, anaedi eketie nte edima obio emana mmọ ama enen̄ede oyom usụn̄. Akpatre ini oro ata ediwak mmọ ẹkekụtde Jerusalem, enye ke akata ikan̄, akwa ibibene esie ama owụre, ikpọ ufọk esie ẹwụre. Ẹma ẹwụri temple Jehovah—emi inikiet ko ekedide ubọn̄ obio oro, n̄kukụre iwụk ebiet edisana utuakibuot ke ofụri isọn̄. Idahaemi ekese isua ntan̄mfep Israel ẹkesụk ẹdodu ke iso. N̄kpọ nte isua 56 ẹyebe mbemiso ẹnyenede edinyan̄a oro ẹken̄wọn̄ọde.—Jeremiah 29:10.

2. Ntak emi editi temple Abasi ke Jerusalem akanamde Ezekiel okop mfụhọ?

² Anaedi anam-akpanikọ prọfet Ezekiel ama okop mfụhọ ndikere mban̄a temple Abasi nte anade ndon ke ebiet oyomde usụn̄ ke ediwak kilomita ke mme itie ikie, nte ndon ndiọi unam. (Jeremiah 9:11) Ete esie, Buzi, ama anam utom nte oku do. (Ezekiel 1:3) Ezekiel ekpekenyene ukem ifetutom oro, edi ẹma ẹmen enye ye otu ikpọ owo Jerusalem ẹka ntan̄mfep ke 617 M.E.N., ke ini okosụk edide eyenọwọn̄. Idahaemi ke edide n̄kpọ nte isua 50 ke emana, anaedi Ezekiel ama ọfiọk ete ke imọ idikwe Jerusalem aba tutu amama m̀mê ndinyene udeme ekededi ke edifiak mbọp temple esie. Kere, ndien, nte ekedide akpan n̄kpọ ọnọ Ezekiel ndibọ n̄kukụt ubọn̄ ubọn̄ temple!

3. (a) Nso ikedi uduak n̄kukụt temple eke Ezekiel? (b) Nso idi akpan ikpehe inan̄ eke n̄kukụt oro?

³ Ntatara n̄kukụt emi, adade ibuot usụkkiet ke n̄wed Ezekiel, ama ọnọ mme Jew ẹdude ke ntan̄mfep un̄wọn̄ọ oro ọsọn̄ọde mbuọtidem. Ẹyefiak ẹwụk edisana utuakibuot! Ke ediwak isua ikie toto ke ini oro, idem tutu esịm eyo nnyịn, n̄kukụt emi edi n̄kpọ nsịnudọn̄ ọnọ mme andima Jehovah. Didie ke edi ntre? Ẹyak nnyịn idụn̄ọde se ntịn̄nnịm n̄kukụt Ezekiel ọkọwọrọde ọnọ nditọ Israel oro ẹkedude ke ntan̄mfep. Enye enyene akpan ikpehe inan̄: temple, itie oku, ọbọn̄ obio, ye isọn̄ oro.

Temple Oro Ẹkefiakde Ẹwụk

4. Ẹda Ezekiel ẹka m̀mọ̀n̄ ke ntọn̄ọ ntọn̄ọ n̄kukụt esie, nso ke enye okụt do, ndien anie ada enye asan̄a akanade?

⁴ Akpa, ẹda Ezekiel ẹdọk “ata edikon̄ obot.” N̄kokon̄ temple, oro ebietde obio emi ẹbọpde ibibene ẹkanade, odu ke edem usụk obot oro. Angel, emi “idem esie ebietde idem okpoho,” emen prọfet oro etịm asan̄a akanade okụre oro. (Ezekiel 40:2, 3) Nte n̄kukụt oro akade iso, Ezekiel okụt angel etịn̄de enyịn odomo usụn̄ itiokiet ẹmi ita ẹsakde iso ẹse ita ye mme adaha mmọ, an̄wa okụre, esịt okụre, mme ubet udia, itieuwa, ye edisana ebiet temple ye Edisana ye Ata Edisana ubet esie.

5. (a) Nso nsọn̄ọ ke Jehovah ọnọ Ezekiel? (b) Nso ikedi “mme okpo ndidem mmọ” oro ẹkenyenede nditan̄ mfep ke temple, ndien ntak emi ekedide akpan n̄kpọ?

⁵ Ekem, Jehovah ke idemesie ọbiọn̄ọde ke n̄kukụt oro. Enye odụk temple oro onyụn̄ ọn̄wọn̄ọ ọnọ Ezekiel ete ke Imọ iyodụn̄ do. Edi Enye ọdọhọ ete yak ẹnam ufọk Imọ asana, ọdọhọde ete: “Yak mmọ ẹmen ndien mme use mmọ, ye mme okpo ndidem mmọ, ẹkpọn̄ mi anyan ebiet, ndien ami nyodụn̄ ke otu mmọ ke nsinsi.” (Ezekiel 43:2-4, 7, 9) Nte an̄wan̄ade “mme okpo ndidem mmọ” ẹmi ẹda ẹban̄a ndisọi n̄kpọ. Mme ọsọn̄ibuot oro ẹkekarade ke Jerusalem ye mbio obio ẹma ẹda ndisọi n̄kpọ ẹsabade temple Abasi ndien, ke ntem, ẹnamde mmọ ẹdi ndidem. (Men Amos 5:26 domo.) Utu ke ndidi mme odu-uwem abasi m̀mê ndidem, mmọ ẹmi ẹkedi mme n̄kpọ oro mînyeneke uwem, ndedehe n̄kpọ ke enyịn Jehovah. Akana ẹsion̄o mmọ ẹfep.—Leviticus 26:30; Jeremiah 16:18.

6. Nso ke edidomo temple akada aban̄a?

⁶ Nso ikedi akpan n̄kpọ ke ikpehe n̄kukụt enye emi? Enye ama ọsọn̄ọ ọnọ mbon ntan̄mfep oro aban̄a ọyọhọ ọyọhọ edifiak n̄wụk edisana utuakibuot ke temple Abasi. Ke adianade do, edidomo temple oro ama ọnọ ubiọn̄ otode Abasi nte ke n̄kukụt emi oyosu ke ata akpanikọ. (Men Jeremiah 31:39, 40; Zechariah 2:2-8 domo.) Ẹyesọhi kpukpru ukpono ndem ẹfep. Jehovah ọyọtọn̄ọ ntak ọdiọn̄ ufọk esie.

Itie Oku ye Ọbọn̄ Obio

7. Nso ntọt ke ẹnọ ẹban̄a mme Levite ye mme oku?

⁷ Akana ẹnam itie oku n̄ko asana, m̀mê ẹfiak ẹdiọn̄. Akana ẹsua ẹnọ mme Levite ke ntak ẹkeyakde idem ẹnọ ukpono ndem, ke adan̄aemi akanade ẹnọ nditọ Zadok ẹmi ẹkedide mme oku utịp ke ndikaka iso nsana.a Edi, otu mbiba ẹyenyene itie utom ke ufọk Abasi oro ẹkefiakde ẹwụk—nte eyịghe mîdụhe, ọkọn̄ọde ke edinam akpanikọ mmọ nte owo kiet kiet. Ke adianade do, Jehovah ama owụk ete: “Yak mmọ ẹnyụn̄ ẹtịm ẹsian ikọt mi n̄kpọ Abasi ye n̄kpọ owo, ẹnyụn̄ ẹteme mmọ ẹdiọn̄ọ se idehede dehe, ye se isanade sana.” (Ezekiel 44:10-16, 23) Ntre akana ẹfiak ẹnyene itie oku, ndien ẹyenọ ime edinam akpanikọ mmọ utịp.

8. (a) Mmanie ẹkedi mbọn̄ Israel eset? (b) Ke mme usụn̄ ewe ke ọbọn̄ oro ke n̄kukụt Ezekiel ekesịn ifịk ke edisana utuakibuot?

⁸ N̄kukụt oro etịn̄ n̄ko aban̄a owo kiet emi ẹkotde ọbọn̄. Toto ke eyo Moses, idụt oro ama esinyene mbọn̄. Ikọ Hebrew adade ọnọ ọbọn̄, na·siʼʹ, ekeme ndida nnọ ibuot ufọk ke edem ete, ekpụk, m̀mê idem idụt. Ke n̄kukụt Ezekiel, ẹsua ẹnọ mme andikara Israel nte otu ke ndifịk mme owo ẹnyụn̄ ẹteme mmọ ẹte ẹfọn ido ẹnyụn̄ ẹkpe edinen ikpe. Okposụkedi mîtoho otu oku, ọbọn̄ anam n̄kpọ ifịk ifịk ke n̄wọrọnda usụn̄ ke edisana utuakibuot. Enye asan̄a ye mme esien ẹmi mîdịghe eke oku odụk onyụn̄ ọwọrọ ke an̄wa okụre, etie ke etehe Inuaotop Edem Usiahautịn, onyụn̄ ọnọ mme owo oro ndusụk uwa ndiwa. (Ezekiel 44:2, 3; 45:8-12, 17) N̄kukụt oro ke ntem ama ọsọn̄ọ ọnọ ikọt Ezekiel nte ke ẹyenọ idụt oro mme adausụn̄ oro ẹnịmde eti uwụtn̄kpọ, kpa irenowo oro ẹdinọde itie oku ibetedem ke nditịm ikọt Abasi nnyụn̄ ndi nti uwụtn̄kpọ ke mme n̄kpọ eke spirit.

Isọn̄ Oro

9. (a) Didie ke ẹkenyene ndibahade isọn̄, edi mmanie mîdinyeneke udeme? (b) Nso ikedi edisana ebiet, ndien nso ke enye ekesịne?

⁹ Ke akpatre, n̄kukụt Ezekiel ama esịne ibio ibio editịn̄ se idude ke isọn̄ Israel. Akana ẹbaharede enye, esien kiet kiet enyenede udeme esiemmọ. Ọbọn̄ n̄ko eyenyene udeme esie. Nte ededi, mme oku idinyeneke, koro Jehovah ọkọdọhọ ete, “ami ndi se mmọ ẹdidade ẹnyene.” (Ezekiel 44:10, 28; Numbers 18:20) N̄kukụt oro ama owụt ete ke udeme isọn̄ ọbọn̄ edidu ke edem mbiba ke san̄asan̄a ikpehe ẹkotde edisana ebiet. Emi ekedi ekpri ọsọbọ-inan̄ isọn̄ oro ẹkebaharede ke itie ita—enyọn̄ enyọn̄ enyenede mme Levite oro ẹkabarede esịt, ufọt ufọt enyenede mme oku, ndien isọn̄ isọn̄ enyenede obio ye n̄kann̄kụk eti isọn̄ esie. Temple Jehovah edidu ke ikpehe isọn̄ mme oku, ke ufọt ufọt ebiet ọsọbọ-inan̄ isọn̄ oro.—Ezekiel 45:1-7.

10. Nso ke ntịn̄nnịm ikọ oro aban̄ade edibahade isọn̄ ọkọwọrọ ọnọ mme anam akpanikọ mbon Judah ke ntan̄mfep?

¹⁰ Anaedi kpukpru emi akadat mbon ntan̄mfep oro esịt didie ntem! Ẹma ẹn̄wọn̄ọ ẹnọ ubon kiet kiet ke eyenyene udeme ke isọn̄ oro. (Men Micah 4:4 domo.) Edisana utuakibuot edinyene n̄kokon̄, akpan itie do. Ndien tịm fiọk ke n̄kukụt Ezekiel oro nte ke ọbọn̄, ukem nte mme oku, edidụn̄ ke isọn̄ oro mme owo ẹtịpde. (Ezekiel 45:16) Ntre ke isọn̄ oro ẹfiakde ẹwụk, mme owo oro ẹkenyene nditịp n̄kpọ nnọ ke utom mbon oro Jehovah edimekde ndida usụn̄, ẹnọde mmọ ibetedem ebe ke nditiene ndausụn̄ mmọ. Ke ofụri ofụri, isọn̄ emi ekedi uwụtn̄kpọ ndutịm, edidianakiet, ye ifụre.

11, 12. (a) Didie ke Jehovah ọsọn̄ọ ọnọ ikọt esie ke ntịn̄nnịm ikọ nte ke imọ iyọdiọn̄ isọn̄ oro mmọ ẹkefiakde ẹda ẹnyene? (b) Nso ke mme eto oro ẹkedade ke mben akpa ẹda ẹban̄a?

¹¹ Nte Jehovah ọyọdiọn̄ isọn̄ mmọ? Ntịn̄nnịm ikọ oro ọbọrọ mbụme emi ke nditịn̄ mban̄a ke inem inem usụn̄. Idịm oto ke temple ewet, atarade nte enye ewetde aka, akabade akpa etisịm ini emi odụkde Inyan̄ Inụn̄. Do enye anam anana-uwem mmọn̄ afiak enyene uwem, ndien mbubehe ukọiyak ọkọri ke ikpehe mben inyan̄ oro. Ediwak eto ẹmi ẹn̄wụmde mfri kpukpru ini ke isua ẹdu ke mben akpa oro, ẹnọde udia ẹnyụn̄ ẹkọkde udọn̄ọ.—Ezekiel 47:1-12.

¹² Ye mbon ntan̄mfep oro, un̄wọn̄ọ emi ama afiak etịn̄ onyụn̄ ọsọn̄ọ mme akpa ntịn̄nnịm ikọ edifiak n̄wụk oro mmọ ẹkemade etieti. Ediwak ini, mme prọfet Jehovah oro ẹnọde odudu spirit ẹma ẹda mme idaha paradise ẹtịn̄ ẹban̄a Israel oro ẹdifiakde ẹwụk, emi mme owo ẹdifiakde ẹdụn̄. Mme ndon ndidi se ẹfiakde ẹdụn̄ọ ekedi ibuotikọ ntịn̄nnịm ikọ oro ẹketịn̄de ndien ndien. (Isaiah 35:1, 6, 7; 51:3; Ezekiel 36:35; 37:1-14) Ntre mme owo oro ẹma ẹkeme ndidori enyịn nte ke mme ọnọ-uwem edidiọn̄ Jehovah ẹyefiọrọ nte akpa ẹto temple oro ẹfiakde ẹbọp. Nte utịp, idụt oro akakpade ke n̄kan̄ eke spirit ayafiak odu uwem. Ẹyenọ mme owo oro ẹdifiakde ẹtan̄ ẹbok do n̄wọrọnda irenowo eke spirit—irenowo oro ẹnende ẹnyụn̄ ẹsọn̄ọde ẹda nte mme eto oro ẹdude ke mben akpa ke n̄kukụt oro, irenowo ẹmi ẹdidade usụn̄ ke edifiak mbọp n̄wụre obio. Isaiah n̄ko ama ewet aban̄a “ofriyo eti ido” ẹmi ‘ẹdibọpde n̄wụre ebiet eset.’—Isaiah 61:3, 4.

Ini Ewe ke N̄kukụt Emi Osu?

13. (a) Ke nso usụn̄ ke Jehovah akada “ofriyo eti ido” ọdiọn̄ ikọt esie oro ẹkefiakde ẹnyọn̄ọ? (b) Didie ke ntịn̄nnịm ikọ aban̄ade Inyan̄ Inụn̄ okosu?

¹³ Ndi mbon ntan̄mfep oro ẹkenyọn̄ọde ẹdi ẹma ẹkụt edikpu? N̄wan̄ansa-o! Nsụhọ oro ẹfiakde ẹtan̄ ẹbok ẹma ẹnyọn̄ ẹdi edima obio emana mmọ ke 537 M.E.N. Nte ini akakade, ke idak ndausụn̄ mme “ofriyo eti ido” ẹmi—utọ nte Ezra ewetn̄wed, prọfet Haggai ye Zechariah, ye Akwa Oku Joshua—ẹma ẹfiak ẹbọp mme ebiet oro ẹkenade ndon ke anyan ini. Mbọn̄, utọ nte Nehemiah ye Zerubbabel, ẹma ẹkara obio ke eti usụn̄ ye nte enende. Ẹma ẹfiak ẹwụk temple Jehovah, ndien ndutịm esie kaban̄a uwem—mme edidiọn̄ eke edida ediomi esie ndu uwem—ẹma ẹfiak ẹdidu. (Deuteronomy 30:19; Isaiah 48:17-20) Edidiọn̄ kiet ekedi ifiọk. Ẹma ẹfiak ẹtọn̄ọ utom oku, ndien mme oku ẹma ẹda Ibet ẹteme mme owo. (Malachi 2:7) Nte utịp, mme owo oro ẹma ẹfiak ẹset ke n̄kan̄ eke spirit ẹnyụn̄ ẹfiak ẹkabade ẹdi mme asan̄autom Jehovah oro ẹn̄wụmde mfri, nte Inyan̄ Inụn̄ ndikabade mfọn nnyụn̄ nnam uforo uforo mbubehe ukọ iyak ọtọn̄ọ akadade aban̄a.

14. Ntak emi ntịn̄nnịm ikọ Ezekiel ekpenyenede ndisu ke usụn̄ oro okponde akan se iketịbede ke mme Jew ẹma ẹkenyọn̄ọ ntan̄mfep ke Babylon?

¹⁴ Ndi edisu n̄kukụt Ezekiel ama okụre ke mme n̄kpọntịbe ẹmi? Baba; ẹwụt n̄kpọ oro etịmde okpon akan. Kere: Owo ikekemeke ndinen̄ede mbọp temple oro Ezekiel okokụtde nte ẹketịn̄de ẹban̄a. Edi akpanikọ, mme Jew ẹma ẹda n̄kukụt oro ke akpan n̄kpọ, ẹma ẹnyụn̄ ẹkam ẹda ndusụk ọyọhọ ntọt ẹnam n̄kpọ ke ata ata usụn̄.b Nte ededi, temple eke n̄kukụt oro ke ofụri ofụri ama okpon akaha ndikam ndi se Obot Moriah, itie akani temple, ekemde. Ke adianade do, temple eke Ezekiel ikodụhe ke obio oro edi ama odu oyom usụn̄ esisịt ke san̄asan̄a ikpehe isọn̄, ke adan̄aemi ẹkebọpde udiana temple ke ebiet emi enye oro ekebemde enye iso akadade, ke obio Jerusalem. (Ezra 1:1, 2) Ke adianade do, akananam ata ata akpa ikotoho ke temple Jerusalem iwet iwọrọ. Ntre Israel eset ẹkekụt sụk esisịt edisu eke ntịn̄nnịm ikọ Ezekiel. Emi ọwọrọ ete ke ana edisu oro okponde akan odu, kpa edisu n̄kukụt emi ke n̄kan̄ eke spirit.

15. (a) Ini ewe ke temple Jehovah eke spirit ọkọtọn̄ọ edinam? (b) Nso iwụt nte ke n̄kukụt Ezekiel ikosụhu ke ini uwem Christ ke isọn̄?

¹⁵ Nte an̄wan̄ade, ana nnyịn idori enyịn iban̄a edisu n̄kukụt Ezekiel ke akwa temple Jehovah eke spirit, emi apostle Paul adade ini eneme ke Mme Hebrew. Temple oro ama ọtọn̄ọ edinam ke ini ẹkeyetde Jesus Christ aran nte Akwa Oku esie ke 29 E.N. Edi ndi n̄kukụt Ezekiel ama osu ke eyo Jesus? Nte an̄wan̄ade ikosụhu. Jesus, nte Akwa Oku, ama osu se ntịn̄nnịm Usen Usio-Isop ọkọwọrọde ebe ke baptism esie, n̄kpa uwa esie, ye enye ndibe ndụk Ata Edisana, kpa heaven. (Mme Hebrew 9:24) Nte ededi, nte enemde, n̄kukụt Ezekiel itịn̄ke n̄kpọ ke itie ndomokiet iban̄a akwa oku m̀mê Usen Usio-Isop. Ntre itiehe nte ke n̄kukụt emi eketịn̄ aban̄a akpa isua ikie E.N. Ini ewe, ndien, ke enye enyene n̄kpọ ndinam?

16. Nte ẹtịmde n̄kukụt Ezekiel eti nnyịn aban̄a ewe ntịn̄nnịm ikọ, ndien didie ke emi an̄wam nnyịn ndifiọk ini oro n̄kukụt Ezekiel ekenyenede akpan edisu?

¹⁶ Man inyene ibọrọ, ẹyak nnyịn ifiak ika n̄kukụt oro ke idemesie. Ezekiel ekewet ete: “Enye ada mi ke n̄kukụt Abasi edi ke isọn̄ Israel, onyụn̄ enịm mi ke enyọn̄ ata edikon̄ obot kiet, ndien se ibietde obio eke ẹbọpde odoro enye ke enyọn̄, ke edem usụk usụk.” (Ezekiel 40:2) Idaha n̄kukụt emi, kpa “enyọn̄ ata edikon̄ obot,” anam nnyịn iti Micah 4:1: “Ama ekem ke akpatre ini oro, obot ufọk Jehovah oyowụhọ ke ibuot ikpọ obot, ẹyenyụn̄ ẹmenede enye ẹkan n̄kpri obot: ndien mme idụt ẹyebụn̄ọ ẹka do.” Ini ewe ke ntịn̄nnịm ikọ emi osu? Micah 4:5 owụt ete ke emi ọtọn̄ọ ke adan̄aemi mme idụt ẹsụk ẹtuakde ibuot ẹnọ mme nsunsu abasi. Ke akpanikọ, edi ke eyo nnyịn, “akpatre ini,” ke ẹmenerede edisana utuakibuot oro ke enyọn̄, ẹfiak ẹwụk enye ke nnennen itie esie ke uwem mme asan̄autom Abasi.

17. Didie ke ntịn̄nnịm ikọ oro ke Malachi 3:1-5 an̄wam nnyịn ndibiere ini emi ẹkenamde temple eke n̄kukụt Ezekiel asana?

¹⁷ Nso inam edifiak n̄wụk emi ekeme ndida itie? Ti, ke ata n̄wọrọnda n̄kpọntịbe eke n̄kukụt Ezekiel, Jehovah odụk edi temple oro onyụn̄ ọsọn̄ọ etịn̄ ete ke ana ẹnam ufọk imọ asana ọbọhọ ukpono ndem. Ini ewe ke ẹkenam temple Abasi eke spirit asana? Ke Malachi 3:1-5, Jehovah ama ebem iso etịn̄ aban̄a ini emi enye ‘edide ke temple esie,’ asan̄ade ye “angel ediomi” esie, kpa Jesus Christ. Nso idi uduak? “Enye [edibiet] ikan̄ usọ-gold, onyụn̄ ebiet soap mme ọdiọn̄-ọfọn̄.” Edinam asana emi ọkọtọn̄ọ ke ini akpa ekọn̄ ererimbot. Nso ikedi utịp? Jehovah omodụn̄ ke ufọk esie onyụn̄ ọdiọn̄ obio eke spirit ikọt esie ọtọn̄ọde ke 1919 ka iso. (Isaiah 66:8) Do, nnyịn imekeme ndibiere nte ke ntịn̄nnịm ikọ Ezekiel aban̄ade temple enyene akpan edisu ke ukperedem ini.

18. Ini ewe ke n̄kukụt temple edinyene akpatre edisu esie?

¹⁸ Ukem nte mme ntịn̄nnịm ikọ edifiak n̄wụk eken, n̄kukụt Ezekiel enyene n̄kaiso edisu, akpatre edisu, ke Paradise. Ini oro kpọt ke ubonowo oro enyenede edinen esịt edibọ ọyọhọ ufọn eke ndutịm temple Abasi. Adan̄aoro Christ ọyọnọ ufọn uwa ufak esie, ọtọkiet ye otu mme oku esie eke heaven ẹdide owo 144,000. Ẹyenam ofụri okopitem ubonowo emi odude ke idak ukara Christ edi mfọnmma. (Ediyarade 20:5, 6) Nte ededi, Paradise ikemeke ndidi akpan ini emi n̄kukụt Ezekiel osude. Ntak mîdịghe?

N̄kukụt Oro Owụk Ntịn̄enyịn ke Eyo Nnyịn

19, 20. Ntak anade akpan edisu eke n̄kukụt oro ada itie mfịn inyụn̄ idịghe ke Paradise?

¹⁹ Ezekiel ama okụt temple oro akanade ẹnam asana ọbọhọ ukpono ndem ye use eke spirit. (Ezekiel 43:7-9) Emi ke akpanikọ ikpekemeke nditịn̄ mban̄a utuakibuot Jehovah ke Paradise. N̄ko-n̄ko, mme oku eke n̄kukụt oro ẹda ẹban̄a otu oku oro ẹyetde aran ke adan̄aemi ẹsụk ẹdude ke isọn̄, idịghe ke ẹma ẹkeset ẹdọk ke heaven m̀mê ke Tọsịn Isua. Ntak-a? Tịm fiọk ete ke ẹwụt mme oku ẹmi nte ẹnamde utom ke esịt okụre. Mme ibuotikọ ke Enyọn̄-Ukpeme ẹwụt ẹte ke esịt okụre emi ada aban̄a san̄asan̄a idaha eke spirit eke mme udiana oku Christ ke adan̄aemi mmọ ẹsụk ẹdude ke isọn̄.c Fiọk n̄ko ete ke n̄kukụt emi ọsọn̄ọ etịn̄ aban̄a unana mfọnmma mme oku ẹmi. Ẹdọhọ mmọ ẹwa mme uwa kaban̄a mme idiọkn̄kpọ mmọ. Ẹdụri mmọ utọn̄ ẹban̄a n̄kpọndịk eke edikabade ndehe—ke n̄kan̄ eke spirit ye n̄kan̄ eke ido uwem. Ntre mmọ idaha iban̄a mbon oro ẹyetde aran ẹmi ẹsetde, ẹmi apostle Paul ekewetde aban̄a ete: “Ẹyefri ukotowo, ndien ẹyenam mme akpa-n̄kpa ẹset nte mmọ mîdikemeke ndibiara aba.” (1 Corinth 15:52, sịghisịghi ubọkn̄wed edi eke nnyịn; Ezekiel 44:21, 22, 25, 27) Mme oku ke n̄kukụt oro ẹbuaha ye mme owo ẹnyụn̄ ẹnam n̄kpọ ẹnọ mmọ nnennen nnennen. Emi ididịghe ntre ke Paradise, ke ini otu oku ẹdidude ke heaven. Ke ntre, n̄kukụt emi enen̄ede owụt usụn̄ oro mbon oro ẹyetde aran ẹnamde utom ikpat kiet ye “akwa otuowo” ke isọn̄ mfịn.—Ediyarade 7:9; Ezekiel 42:14.

²⁰ Ntem n̄kukụt Ezekiel aban̄ade temple owụt nti utịp eke edinam asana eke spirit oro osụk osude mfịn. Edi nso ke oro ọwọrọ ọnọ fi? Emi idịghe ikpîkpu mbụme ido ukpono emi ẹkerede-kere. N̄kukụt emi enyene ekese ebuana ye utuakibuot fo eke usen ke usen nnọ ata Abasi kierakiet, Jehovah. Ke ibuotikọ nnyịn efen, nnyịn iyokụt nte emi edide ntre.

[Mme Ikọ idakisọn̄]

Nte Afo Emeti?

◻ Nso ikedi akpa edisu eke n̄kukụt Ezekiel aban̄ade temple ye itie oku esie?

◻ Didie ke n̄kukụt Ezekiel aban̄ade edibahade isọn̄ ekenyene akpa edisu?

◻ Ke edifiak ntan̄ Israel eset mbok, mmanie ẹkenam n̄kpọ nte mme anam-akpanikọ mbọn̄ ndien mmanie ẹkenam n̄kpọ nte “ofriyo eti ido”?

◻ Ntak anade n̄kukụt temple Ezekiel enyene akpan edisu ke ukperedem ini emi?