Akpakam Nnyịn Idehede Ifiak Edem Ika Nsobo!

“Nnyịn idịghe mbon mfiakedem n̄ka nsobo.”—MME HEBREW 10:39.

1. Mme idaha ewe ẹkeda ẹkesịm apostle Peter ndiyak idem nnọ ndịk?

ANAEDI mme apostle ẹma ẹkop n̄kpaidem ke ini edima Andikpep mmọ, Jesus, akasiande mmọ ete ke kpukpru mmọ ẹyesuana ẹnyụn̄ ẹkpọn̄ imọ. Didie ke utọ n̄kpọ oro ekpekeme nditịbe—ke ini emi enye oyomde un̄wam akan mi? Peter ama ọsọn̄ọ etịn̄ ete: “Kpukpru owo ẹkpeduọn̄ọ, ami ndiduọhọ.” Ke akpanikọ, Peter ekedi eren uko. Edi ke ini ẹkedade Jesus ẹnọ ẹnyụn̄ ẹmụmde, mme apostle—esịnede Peter—ẹma ẹsuana. Ke ukperedem, ke adan̄aemi ẹkesụk ẹbụpde Jesus mbụme ke ufọk Akwa Oku Caiaphas, Peter ama ọsọn̄ọ odu ke okụre oro ye ọkpọsọn̄ udọn̄. Nte okoneyo etuep oro ekekperede usiere, ekeme ndidi Peter ama ọtọn̄ọ ndikop ndịk nte ke ẹyewot Jesus ye owo ekededi oro akasan̄ade ye enye. Ke ini ndusụk mme andida nse ẹkediọn̄ọde Peter nte kiet ke otu mme n̄kpet n̄kpet nsan̄a Jesus, ndịk ama anam enye. Enye ama akan̄ utịm ikata ete ke imọ inyeneke ebuana ye Jesus. Peter ama akan̄ ete ke imọ ikam idiọn̄ọke enye!—Mark 14:27-31, 66-72.

2. (a) Ntak emi Peter ndikop ndịk ke okoneyo oro ẹkemụmde Jesus mînamke enye odu ke otu “mbon mfiakedem”? (b) Nso ikpedi ubiere nnyịn?

² Oro ekedi ata ini mmemidem ke uwem Peter, ini oro enye nte eyịghe mîdụhe akatuade n̄kpọfiọk aban̄a ke ofụri uwem esie. Edi nte usụn̄ emi Peter akanamde n̄kpọ ke okoneyo oro ama anam enye edi owo esịt ndịk? Nte emi ama anam enye edi kiet ke otu “mbon” oro apostle Paul eketịn̄de aban̄a ke ukperedem ke ini enye ekewetde ete: “Edi nnyịn idịghe mbon mfiakedem n̄ka nsobo”? (Mme Hebrew 10:39) Ekeme ndidi ata ediwak nnyịn iyenyịme ite ke ikọ Paul inyeneke n̄kpọ ndinam ye Peter. Ntak-a? Koro ndịk Peter ekedi eke ekpri ini, ibio ibio edikpu ke uwem oro ọkọyọhọde ye n̄wọrọnda uko ye mbuọtidem. Ukem ntre, ediwak nnyịn imenyene mme idaha ke ini edem oro nnyịn ikesikopde ndusụk udomo bụt iban̄a ke ini itide, kpa mme idaha oro ndịk akanamde nnyịn ke unana idotenyịn onyụn̄ ọbiọn̄ọde nnyịn ndida uko uko nnọ akpanikọ nte nnyịn ikpamade ndinam. (Men Rome 7:21-23 domo.) Nnyịn imekeme ndinịm ke akpanikọ nte ke mme utọ edikpu eke ibio ini oro inamke nnyịn idi mbon mfiakedem n̄ka nsobo. Edi, oyom ibiere ite ke nnyịn idikabakede idi utọ owo oro. Ntak-a? Ndien didie ke nnyịn ikeme ndifep ndikabade ndi utọ owo oro?

Se Ndifiak Edem N̄ka Nsobo Ọwọrọde

3. Didie ke prọfet Elijah ye Jonah ẹkeyak idem ẹnọ ndịk?

³ Ke ini Paul ekewetde aban̄a “mbon mfiakedem,” enye iketịn̄ke iban̄a mbon oro ẹkemede ndiduọk uko mmọ ke ibio ini. Ke akpanikọ, Paul ama enyene ifiọk aban̄a se iketịbede inọ Peter ye mme ukem n̄kpọntịbe oro. Elijah, prọfet oro ekenyenede uko onyụn̄ etiede in̄wan̄în̄wan̄, ama ayak idem inikiet ọnọ ndịk onyụn̄ efehe ke ntak uwem esie koro idiọk Ọbọn̄ An̄wan Jezebel ekedịghede ndiwot enye. (1 Ndidem 19:1-4) Prọfet Jonah ama okop ndịk emi okponde akan oro. Jehovah ama ọnọ enye utom ndika mbịne ọwọrọetop afai afai, idiọk obio Nineveh. Jonah ama odụk ubom usọp usọp aka Tarshish—kilomita 3,500 ke isio isio ikpehe! (Jonah 1:1-3) Kpa ye oro, owo ikemeke nditịn̄ mban̄a ndomokiet ke otu mme anam-akpanikọ prọfet ẹmi m̀mê apostle Peter nte mbon mfiakedem. Ntak-a?

4, 5. (a) Didie ke udọn̄ikọ eke Mme Hebrew 10:39 an̄wam ndibiere se ikọ Paul oro “nsobo” ọwọrọde? (b) Nso ke ikọ Paul ọkọwọrọ ke ini enye ọkọdọhọde ete: “Nnyịn idịghe mbon mfiakedem n̄ka nsobo”?

⁴ Kere ban̄a ọyọhọ ubak udịmikọ oro Paul akadade: “Edi nnyịn idịghe mbon mfiakedem n̄ka nsobo.” (Sịghisịghi ubọkn̄wed edi eke nnyịn.) Ikọ esie oro “nsobo” ọkọwọrọ nso? Ikọ Greek oro enye akadade ndusụk ini etịn̄ aban̄a nsinsi nsobo. Edikabade emi odot ye udọn̄ikọ emi. Ibịghike Paul ọkọtọt ete: “Edieke nnyịn iduede ke n̄koi-nnam, ke ini nnyịn ima ikọbọ ifiọk akpanikọ, uwa idụhe aba inọ idiọk-n̄kpọ, edi idotenyịn ikpe eke enyenede ndịk, ye ikan̄-ikan̄ iyatesịt eke edifọbọde mmọ ẹmi ẹn̄wanade ye Abasi.”—Mme Hebrew 10:26, 27.

⁵ Ntre ke ini Paul ọkọdọhọde mme ekemmọ andinịm ke akpanikọ ete, “Nnyịn idịghe mbon mfiakedem n̄ka nsobo,” ikọ esie ọkọwọrọ ete ke enye ye mme andikot n̄wed esie oro ẹdide mme anam-akpanikọ Christian ẹma ẹbiere ke mmimọ idiwọn̄ọkede ikpọn̄ Jehovah inyụn̄ itre ndinam n̄kpọ esie. Ndinam ntre ekeme n̄kukụre ndida nsịm nsinsi nsobo. Judas Iscariot ekedi owo oro akafiakde edem aka utọ nsobo oro, ukem nte mme asua akpanikọ eken oro ẹkekoide-koi ẹnam n̄kpọ ẹbiọn̄ọ spirit Jehovah. (John 17:12; 2 Thessalonica 2:3) Mme utọ owo oro ẹdu ke otu “mbon esịt-ndịk” ẹmi ẹdibọde ufen nsinsi nsobo ke ndamban̄a n̄kpọdiọhọ ikan̄. (Ediyarade 21:8) Baba, nnyịn idehede iyom ndidi utọ mbon oro!

6. Nso ke Satan kpa Devil oyom nnyịn inam?

⁶ Satan kpa Devil oyom nnyịn ifiak edem ika nsobo. Nte etubom “mme n̄kari n̄kari edinam,” enye ọfiọk ete ke utọ usụn̄ uwem nsobo oro esiwak nditọn̄ọ ke n̄kpri usụn̄. (Ephesus 6:11, ikọ idakisọn̄ NW) Edieke ata ata ukọbọ okpude ndiyọhọ uduak esie, enye oyom ndibiat mbuọtidem mme ata Christian ebe ke n̄kari n̄kari usụn̄. Enye oyom ndikịbi uko uko ifịk ifịk Mme Ntiense Jehovah inua. Ẹyak nnyịn ise mme usụn̄ oro enye akadade ke ndibiọn̄ọ mme Christian ẹdide mme Hebrew ẹmi Paul ekewetde n̄wed ọnọ.

Nte Ẹkenyịkde Mme Christian Ndifiak Edem

7. (a) Nso etop ke esop oro okodude ke Jerusalem ọkọwọrọ? (b) Nso ikedi mme idaha eke spirit ndusụk mme andikot n̄wed Paul?

⁷ Uyarade owụt nte ke Paul ekewet leta esie ọnọ mme Hebrew ke n̄kpọ nte 61 E.N. Esop oro okodude ke Jerusalem ama enyene ntịme ntịme mbụk. Ke Jesus ama akakpa, ibak ibak ukọbọ ama ọtọn̄ọ, enyịkde ediwak Christian ke obio oro ndisuana. Nte ededi, ini emem ama etiene, ayakde ibat mme Christian ọkọri. (Utom 8:4; 9:31) Nte mme isua ẹkebede, mme ukọbọ efen ye nsọn̄ọn̄kpọ ẹma ẹsitịbe ke ini ke ini. Etie nte etisịm ini oro Paul ekewetde leta ọnọ ẹsọk mme Hebrew, esop oro ama afiak enyene ekpri ini emem. Edi, mme mfịghe ẹma ẹdu. Se ikperede ndisịm isua 30 ẹma ẹbe tọn̄ọ nte Jesus ekebem iso etịn̄ aban̄a nsobo Jerusalem. Eyedi ndusụk owo ẹma ẹdu oro ẹkekerede ke utịt ama ebịghi akaha ndien ke ekeme ndidi ididịghe ke eyo uwem mmimọ. Mbon efen, akpan akpan mbon oro ẹdide obufa ke mbuọtidem, ikosoboke ọkpọsọn̄ ukọbọ kan̄a ndien ẹkediọn̄ọ ata esisịt ẹban̄a ufọn oro odude ke ndiyọ idomo. (Mme Hebrew 12:4) Satan ama enen̄ede oyom ndida mme utọ idaha oro nnam n̄kpọ. “Mme n̄kari n̄kari edinam” ewe ke enye akada?

8. Nso edu ke ediwak mme Jew ẹkenyene ẹban̄a obufa esop Christian?

⁸ Mme Jew ke Jerusalem ye Judea ẹkese obufa esop Christian ke ndek. Ke idade se isịnede ke leta Paul ibiere, nnyịn imenyene ndusụk ekikere iban̄a mme isụn̄i oro mme atan̄idem adaiso ido ukpono mme Jew ye mme anditiene mmọ ẹkedade ẹtiene mme Christian. Ke nditịm ntịn̄, ekeme ndidi mmọ ẹkedọhọ ẹte: ‘Nnyịn imenyene akwa temple ke Jerusalem, odude ke ediwak isua ikie! Nnyịn imenyene n̄wọrọnda akwa oku anamde utom do, ke adianade ye mme udiana oku esie. Ke ẹwa mme uwa ke usen ke usen. Nnyịn imenyene Ibet, emi ẹkenọde Moses ebe ke mme angel ẹkenyụn̄ ẹdade ikpọ idiọn̄ọ ẹsọn̄ọ ke Obot Sinai. Obufa n̄ka emi, mme Christian ẹmi ẹkewọn̄ọrede ẹkpọn̄ Ido Ukpono Mme Jew, inyeneke ndomokiet ke otu n̄kpọ ẹmi!’ Nte utọ nsahi oro ama enyene utịp ẹkeyomde? Nte an̄wan̄ade mme ikọ ẹmi ẹma ẹfịna ndusụk mme Christian ẹdide mme Hebrew. Leta Paul ama ọnọ mmọ un̄wam ke ata nnennen ini.

Ntak Mmọ Mîkpedehede Ifiak Edem Ika Nsobo

9. (a) Ewe ibuotikọ akara leta ẹkenọde ẹsọk mme Hebrew? (b) Ke ewe usụn̄ifiọk ke mme Christian ẹkenam utom ke temple oro ọfọnde akan enye oro okodude ke Jerusalem?

⁹ Ẹyak nnyịn idụn̄ọde ntak iba oro Paul ọkọnọde nditọete esie ke Judea emi akpanamde mmọ ẹkûdede ẹfiak edem ẹka nsobo. Akpa—nte ndutịm utuakibuot Christian ọfọnde akan—akara leta ẹkenọde ẹsọk mme Hebrew. Paul ekeneme ibuotikọ emi ke ofụri leta esie. Temple okodude ke Jerusalem ekedi sụk mbiet ata idem n̄kpọ oro okponde akan, kpa temple Jehovah eke spirit, ufọk “eke mîdaha ubọk inam.” (Mme Hebrew 9:11) Mme Christian oro ẹma ẹnyene ifet ndinam utom ke ndutịm eke spirit oro kaban̄a edisana utuakibuot. Mmọ ẹkenam utom ke idak ediomi eke ọfọnde akan, obufa ediomi oro ẹken̄wọn̄ọde ke anyanini, emi ekenyenede Esịne-Ufọt oro okokponde akan Moses, Jesus Christ.—Jeremiah 31:31-34.

10, 11. (a) Ntak emi udịm ubon Jesus mîkanamke enye okûdot ndinam utom nte Akwa Oku ke temple eke spirit oro? (b) Ke mme usụn̄ ewe ke Jesus ekedi Akwa Oku oro okponde akan enye oro akanamde utom ke temple ke Jerusalem?

¹⁰ Mme Christian oro ẹma ẹnyene n̄ko Akwa Oku oro ọkọfọnde akan, Jesus Christ. Baba, enye ikọwọrọke ito ubon Aaron. Utu ke oro, enye ekedi Akwa Oku “nte utọ Melchizedek asan̄ade.” (Psalm 110:4) Melchizedek, emi owo mîwetke n̄kpọ iban̄a udịm ubon esie, ekedi edidem ọkọrọ ye akwa oku ke Salem eset. Enye ke ntem ama odot ndida mban̄a Jesus, emi itie oku esie mîkọn̄ọke ke udịm ubon anana-mfọnmma owo ekededi, edi ọkọn̄ọde ke n̄kpọ oro okponde akan—un̄wọn̄ọ Jehovah Abasi. Ukem nte Melchizedek, Jesus inamke utom nte Akwa Oku kpọt edi n̄ko nte Edidem, enye emi mîdikpaha tutu amama.—Mme Hebrew 7:11-21.

¹¹ N̄ko-n̄ko, ke mîbietke akwa oku ke temple eke Jerusalem, Jesus ikenyeneke ndiwa mme uwa kpukpru isua. Uwa esie ekedi mfọnmma uwem esie, emi enye akawade ini kiet. (Mme Hebrew 7:27) Kpukpru uwa oro ẹkewade ke temple ẹkedi mbukpọn̄ kpọt, ẹdade ẹban̄a se Jesus akawade. Mfọnmma uwa esie ama eberede usụn̄ ọnọ ata ata edifen mme idiọkn̄kpọ kpukpru mbon oro ẹkewụtde mbuọtidem. Mme utịn̄ikọ Paul oro ẹwụtde ke Akwa Oku emi edi kpa Jesus emi mîkpụhọkede emi mme Christian ke Jerusalem ẹkediọn̄ọde ẹdi n̄kpọ nsịnudọn̄ n̄ko. Enye ama osụhọde idem, ọfọn ido, onyụn̄ edi enye emi ekemede “nditiene nnyịn n̄kụt mmem-idem nnyịn.” (Mme Hebrew 4:15; 13:8) Mme Christian oro ẹkeyetde aran do ẹma ẹnyene idotenyịn ndinam utom nte mme udiana oku Christ! Didie ke mmọ ẹkpekekeme ndikam n̄kekere mban̄a ndifiak edem mbịne mme “mmeme nditaha” n̄kpọ eke mbiara Ido Ukpono Mme Jew?—Galatia 4:9.

12, 13. (a) Nso ọyọhọ ntak iba nditre ndifiak edem ke Paul ọkọnọ? (b) Ntak emi mbụk ini edem eke mme Christian ẹdide mme Hebrew ekpesịnde udọn̄ ọnọ mmọ ẹkûdede ẹfiak edem ẹka nsobo?

¹² Nte n̄kpọ eke oro mîkemke, Paul ama ọnọ mme Hebrew ọyọhọ ntak iba emi mmọ mîkpedehede ifiak edem ika nsobo—mbụk ime mmọ. Enye ekewet ete: “Edi ẹti mme usen ini oko, ini oro enyịn ẹketarade mbufo, mbufo ẹkenyụn̄ ẹbiomde ọkpọsọn̄ ndusịhede ndutụhọ.” Paul ama eti mmọ ete ke ẹma ẹnam mmọ ẹdi “n̄kpọ ndise” ke ntak esuene ye ukụt. Ẹma ẹsịn ndusụk ke ufọk-n̄kpọkọbi; mbon eken ẹma ẹkop mbọm ẹban̄a ẹnyụn̄ ẹn̄wam mbon oro ẹkedude ke ufọk-n̄kpọkọbi. Ih, mmọ ẹma ẹwụt mbuọtidem oro odotde ẹkpebe ye ifịk. (Mme Hebrew 10:32-34) Edi, ntak emi Paul ọkọdọhọde mmọ “ẹti” utọ ubiak ubiak ifiọk n̄kpọntịbe oro? Nte oro idinamke idem emem mmọ?

¹³ Ke edide isio, ‘nditi mme usen ini oko’ eyeti mme Hebrew aban̄a nte Jehovah ọkọsọn̄ọde mmọ idem ke ẹsobode idomo. Ye un̄wam esie, mmọ ẹma ẹbọbiọn̄ọ ediwak en̄wan Satan. Paul ekewet ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.” (Mme Hebrew 6:10) Ih, Jehovah ama eti kpukpru utom mbuọtidem mmọ, ọdọn̄de mmọ ke akakan ibuot uti n̄kpọ esie. Ẹti nnyịn item Jesus oro nte yak ibon mme n̄kpọuto ke heaven. Inọ ndomokiet ikemeke ndiyịp mme n̄kpọuto ẹmi; utan̄kpọ ndomokiet m̀mê n̄karafan̄ ikemeke ndibiat mmọ. (Matthew 6:19-21) Ke akpanikọ, ẹkeme ndibiat mme n̄kpọuto ẹmi n̄kukụre edieke Christian afiakde edem aka nsobo. Oro ayatahade n̄kpọuto ekededi emi enye okobonde ke heaven. Nso okopodudu ntak ke Paul ọkọnọ mme Christian ẹdide mme Hebrew ntem nditre ndibịne utọ usụn̄ uwem oro! Ntak ẹkpebiatde ofụri isua utom mbuọtidem mmọ? Ekpedi nnennen n̄kpọ ye se itịmde ifọn ikan ndika iso nyọ.

Ntak Nnyịn Mîkpedehede Ifiak Edem Ika Nsobo

14. Mme n̄kpọ-ata ewe ẹbietde eke mme Christian akpa isua ikie ke nnyịn isobo?

¹⁴ Mme ata Christian mfịn ẹnyene n̄ko mme okopodudu ntak nditre ndifiak edem. Akpa, ẹyak nnyịn iti mme edidiọn̄ ẹmi inyenede ke edisana utuakibuot oro Jehovah ọnọde nnyịn. Ukem nte mme Christian akpa isua ikie, nnyịn idu uwem ke ini emi mme andibuana ke mme ido ukpono oro ẹtịmde ẹwọrọ etop ẹsakde ẹnyụn̄ ẹmiomde nnyịn, ke ntan̄idem ẹnyande ubọk ẹwụt ndiye ufọk ido ukpono ye mme ido edinam eset mmọ. Nte ededi, Jehovah ọsọn̄ọ etịn̄ ọnọ nnyịn ete ke imọ imenyịme orụk utuakibuot nnyịn. Ke akpanikọ, mfịn nnyịn imenyene mme edidiọn̄ oro mme Christian akpa isua ikie mîkenyeneke. Afo emekeme ndikere, ‘Asan̄a didie edi ntre?’ Kamse, mmọ ẹkedu uwem ke ini temple eke spirit ekedide edidu ke edinam. Christ ama akabade edi Akwa Oku esie ke enye ama akana baptism ke 29 E.N. Ndusụk ke otu mmọ ẹma ẹkụt anam-utịben̄kpọ Eyen Abasi. Idem ke enye ama akakpa, mme utịben̄kpọ efen efen ẹma ẹdu. Nte ededi, nte ẹkebemde iso ẹtịn̄, ke akpatre mme utọ enọ oro ẹma ẹtre.—1 Corinth 13:8.

15. Mme ata Christian mfịn ẹdu uwem ke ini edisu ewe ntịn̄nnịm ikọ, ndien nso ke oro ọwọrọ ọnọ nnyịn?

¹⁵ Nte ededi, nnyịn idu uwem ke ini ntatara ntịn̄nnịm ikọ aban̄ade temple eke Ezekiel ibuot 40-48 osude akamba akamba.a Ntem, nnyịn imokụt nte ẹfiakde ẹwụk ndutịm Abasi kaban̄a edisana utuakibuot. Ẹmenam temple eke spirit oro asana ọbọhọ kpukpru orụk usabaden̄kpọ eke ido ukpono ye ukpono ndem. (Ezekiel 43:9; Malachi 3:1-5) Kere ban̄a mme ufọn ẹmi edinam asana emi ọnọde nnyịn.

16. Nso edu oro ekemede ndinam idem emem mmọ ke mme Christian akpa isua ikie ẹkesobo?

¹⁶ Ke akpa isua ikie, ini iso eketie n̄kịmn̄kịm n̄kịmn̄kịm ọnọ esop Christian oro ẹketịmde. Jesus ama ebem iso etịn̄ ete ke enye editie nte n̄kpọ eke ẹkesuande idiọk n̄kpasịp ke in̄wan̄ oro ẹketọde ibokpot obufa obufa, anamde edi ọkpọsọn̄ n̄kpọ ndidiọn̄ọ ukpụhọde oro odude ke ufọt ibokpot ye idiọk n̄kpasịp. (Matthew 13:24-30) Ndien oro ama etịbe. Etisịm utịt akpa isua ikie, ke ini akanieren apostle John akanamde utom nte akpatre andibiọn̄ọ mbiara, nsọn̄ibuot ama atatara asuana. (2 Thessalonica 2:6; 1 John 2:18) Ikebịghike ke mme apostle ẹma ẹkekpan̄a, san̄asan̄a otu mme ọkwọrọ ederi ẹma ẹwọn̄ọ ẹdi, ẹfịkde otuerọn̄ ẹnyụn̄ ẹsịnede san̄asan̄a ọfọn̄. Nsọn̄ibuot ama atara nte ọnọk. Emi akanam idem emem mme anam-akpanikọ Christian didie ntem! Mmọ ẹma ẹkụt nte mbiara ndutịm akakarade obufa ndutịm edisana utuakibuot oro ẹkewụkde mi. Emi eketịbe ke se isụhọrede ikan isua ikie ke Christ ama ọkọtọn̄ọ esop oro.

17. Ke nso usụn̄ ke esop Christian eke eyomfịn ebịghi akan mbiet esie eke akpa isua ikie?

¹⁷ Idahaemi, kere ban̄a se idide isio. Mfịn, edisana utuakibuot emebịghi akan nte enye ekebịghide ke ikpehe ini emi mme apostle ẹkedude ke uwem. Ọtọn̄ọde ke ini ẹkemịn̄de akpa nsiondi magazine emi (ke Ikọmbakara) ko ke edem ke 1879, Jehovah amanam nnyịn inyene utuakibuot oro ọdiọn̄de-diọn̄ asana. Jehovah ye Christ Jesus ẹma ẹdụk temple eke spirit ke 1918 ye uduak ndinam enye asana. (Malachi 3:1-5) Toto ke 1919, ke ẹnam ndutịm utuakibuot nnọ Jehovah Abasi asana sụn̄sụn̄. Ifiọk nnyịn kaban̄a mme ntịn̄nnịm ikọ ye mme edumbet Bible emenen̄ede an̄wan̄a. (Mme N̄ke 4:18) Anie ke itoro aka ebịne? Idịghe mme ikpîkpu anana-mfọnmma owo. Jehovah kpọt, ye Eyen esie nte Ibuot esop, ẹkeme ndikpeme ikọt Esie nsio ke mbiara ke mme ini mbiara ẹmi. Do, ẹyak nnyịn ikûdede ikpu ndikọm Jehovah ke ndiyak nnyịn inyene ebuana ke edisana utuakibuot mfịn. Ndien ẹyak isọn̄ọ ibiere ite ke nnyịn idifiakke edem ika nsobo tutu amama!

18. Nso ntak ke nnyịn inyene nditre ndifiak edem n̄ka nsobo?

¹⁸ Ukem nte mme Christian ẹdide mme Hebrew oro, nnyịn imenyene ọyọhọ ntak iba ndisịn ufep ufep usụn̄uwem mfiakedem—mbụk ime nnyịn. Edide nnyịn itọn̄ọ ndinam n̄kpọ Jehovah ke mme isua ndondo emi m̀mê imanam ntre ke edinam akpanikọ ke ediwak iduọk isua, nnyịn imenyene n̄wetnnịm n̄kpọ eke utom Christian. Ediwak nnyịn imosobo ukọbọ, edide n̄kpọkọbi, ukpan, ibak, m̀mê editaba inyene. Ediwak efen efen ẹsobo ubiọn̄ọ otode ubon, edisịn ke ndek, nsahi, ye unana udọn̄. Kpukpru nnyịn imọyọ, ikade iso ndinam utom ke edinam akpanikọ nnọ Jehovah kpa ye mme n̄kpọ-ata eke uwem ye mme idomo. Ke ndinam ntre, nnyịn imenịm mbụk ime oro Jehovah mîdifreke, ufọk ubon n̄kpọuto ke heaven. Do, ke akpanikọ, idịghe ini edi emi ndifiak edem mbịne oburobụt akani editịm n̄kpọ emi ikọkpọn̄de ke edem! Ntak ikpanamde ofụri ọkpọsọn̄ utom nnyịn ẹdi ikpîkpu? Emi enen̄ede edi ntre mfịn, emi osụhọde “ata ekpri esisịt” mbemiso utịt.—Mme Hebrew 10:37.

19. Nso ke idineme ke ibuotikọ nnyịn efen?

¹⁹ Ih, ẹyak nnyịn ibiere ite ke “nnyịn idịghe mbon mfiakedem n̄ka nsobo”! Utu ke oro, ẹyak nnyịn idi “mmọ ẹmi ẹbuọtde idem isịm edinyan̄a ukpọn̄.” (Mme Hebrew 10:39) Didie ke nnyịn ikeme ndinam n̄kpọ man idot ndidi utọ mbon oro, ndien didie ke nnyịn ikeme ndin̄wam mme ekemmọ Christian ẹnam ukem oro? Ibuotikọ nnyịn oro etienede eyeneme n̄kpọ emi.

[Ikọ idakisọn̄]

Nte Afo Emeti?

◻ Nso ke ndifiak edem n̄ka nsobo ọwọrọ?

◻ Mme ewe mfịghe ẹkebiomo mme Christian ẹdide mme Hebrew ẹmi Paul ekewetde n̄wed ọnọ?

◻ Mme ntak ewe nditre ndifiak edem n̄ka nsobo ke Paul ọkọnọ mme Hebrew?

◻ Mme ntak ewe ke nnyịn inyene ke ndibiere nditre ndifiak edem n̄ka nsobo?

[Mme ndise ke page 15]

Peter ndiyak idem nnọ ndịk ikanamke enye odu ke otu “mbon mfiakedem n̄ka nsobo”