Gospel Emem Esịm Obot Chiapas
“Ke ndiọkn̄kan uwotowo oro owo ekededi ke Chiapas Stet ekemede nditi, otu iren oro . . . ẹkamade n̄kpọekọn̄ ẹma ẹwot ọtọin̄wan̄ 45 oro mîkenyeneke ukpeme, esịnede nditọwọn̄ 13.” Ntem ke n̄wedmbụk n̄kpọntịbe oro “El Universal” ọkọtọt aban̄a se iketịbede ke Acteal, Chiapas Stet, ke December 22, 1997.
CHIAPAS edi ata usụk usụk stet ke Mexico, emi odude ke adan̄a Guatemala. Sia ẹdude ke unana ye idiọk idaha ke anyan ini, otu mme amanaisọn̄ India emi ẹsemde usem Maya ẹma ẹtọn̄ọ en̄wan ke January 1994, ẹdade enyịn̄ oro Ejército Zapatista de Liberación Nacional (EZLN, Udịmekọn̄ Zapatista eke Idụt Kaban̄a Uwọrọ Ufụn). Owo isọpke inam ediomi emem. Ntịme ye en̄wan udịmekọn̄ mbon nsọn̄ibuot ye eke ukara ẹsụn̄ọ ke uduọkiyịp ye n̄kpa. Ndutịme oro ama anam ediwak ọtọin̄wan̄ ke n̄kann̄kụk oro ẹfen̄e ẹkeyom ubọhọ.
Ke ufọt mme utọ anana-iwụk idaha oro, odu otu mme ama emem oro ẹdade san̄asan̄a ke en̄wan ukaraidem. Mmọ ẹdụri ntịn̄enyịn mme owo ifịk ifịk ẹwụt Obio Ubọn̄ Abasi nte n̄kukụre idotenyịn ke ndikọk mme mfịna oro mme owo ẹsobode, ke n̄kann̄kụk ye ke ofụri ererimbot. (Daniel 2:44) Mmọ ẹdi mmanie? Mme Ntiense Jehovah. Ke ndisụk ibuot nnọ ewụhọ Jesus, mmọ ke ẹsịn ukeme ndida eti mbụk Obio Ubọn̄ Abasi nsịm mme ikpehe obot Chiapas oro ẹdude ata nsannsan. (Matthew 24:14) Didie ke mmọ ẹkekeme ndikwọrọ ikọ ke mme utọ idaha oro, ndien nso ikedi utịp?
“Ami Ndi Kiet ke Otu Mme Ntiense Jehovah”
Adolfo, akparawa oro akakabarede edi asuanetop Obio Ubọn̄ ke ndondo emi, akanam utom usen kiet ke itieutom ekebe ukopikọ ke Ocosingo. Ke mbuari, ẹma ẹkọn̄ usụn̄ ọkpọsọn̄ ọkpọsọn̄. Otu iren oro ẹfụhọde n̄kpọ ke iso ẹma ẹbụmede ẹdụk ẹnyụn̄ ẹnyan enye ikan̄ ke iso. Mmọ ẹma ẹbụmede ẹdụk ubet unọ ntọt, ẹmen ukwak unọ ntọt, ẹnyụn̄ ẹtọt ke ekebe ukopikọ ẹte ke mmimọ imọtọn̄ọ ẹkọn̄ ye ukara.
Ke ẹwọn̄ọrede ẹse Adolfo, iren oro ẹkamade n̄kpọekọn̄ mi ẹma ẹdọhọ enye ẹte adiana ye mmimọ. Okposụkedi Adolfo mîkanaha baptism kan̄a, enye ama ọbọrọ ete: “Ami ndi kiet ke otu Mme Ntiense Jehovah.” Enye ama anam an̄wan̄a ete ke Obio Ubọn̄ Abasi edi n̄kukụre idotenyịn kaban̄a emem, ndien enye ama ọsọn̄ọ esịn ọfọn̄ ekọn̄ ye ikan̄ oro mmọ ẹkenọde enye. Ke ẹkụtde nsọn̄ọnda esie, mmọ ẹma ẹsana enye ẹyak. Ke etide n̄kpọntịbe oro, Adolfo ọdọhọ ete: “N̄kpọntịbe oro ama enen̄ede ọsọn̄ọ mbuọtidem mi.”
Nte ini akakade ntịme ama osụhọde ubọk, edi n̄kann̄kụk oro okosụk odu ke idak ukara ekọn̄. Kpa ye oro, Adolfo ke idatesịt ama enyịme ikot mbiowo esop n̄kann̄kụk ndikanam utom ye otu mme Christian oro ẹdude nsannsan ke n̄kann̄kụk oro. Ke mme itie unam ndụn̄ọde emi enye ekenyenede ndisan̄a mbe, mbonekọn̄ ẹma ẹkpono enye ke ini enye akayararede idemesie nte kiet ke otu Mme Ntiense Jehovah. Ke ukperedem enye ama ana baptism onyụn̄ okop uyụhọ ndin̄wam otu oro odude nsannsan do akabade edi esop Mme Ntiense Jehovah. Adolfo ọdọhọ ete: “Ke emi mma n̄kana baptism mi, mmekeme ndidọhọ ye ọyọhọ nsọn̄uyo nte ke ami ndi kiet ke otu Mme Ntiense Jehovah!”
“Jehovah Ama Ọsọn̄ọ Nnyịn Idem”
Esisịt ini ke EZLN ẹma ẹketọt ke ekebe ukopikọ ẹte ke imọtọn̄ọ ẹkọn̄ ye ukara, mbon obio ẹma ẹfen̄e. Francisco, asan̄autom uyọhọ ini, m̀mê asiakusụn̄, etịn̄ nte Jehovah ọkọsọn̄ọde imọ ye n̄wan imọ idem ke se mmimọ ikosobode.
“Nnyịn ima ibiere ndikedịbe ke ikpehe emi adade hour ita ndisan̄a ke ukot n̄kesịm. Esop kiet ama odu do, ntre nnyịn ikodu ye nditọete. Ikebịghike ini mbono circuit nnyịn oro ẹdinịmde ke Palenque ama edisịm. Ami ye n̄wan mi ikoyomke nditaba akpan mbono mme asiakusụn̄, edi nnyịn ima ikop ite ke mbon EZLN ẹma ẹsịri usụn̄ adade esịm itie mbono. Nnyịn ima ibiere ndisan̄a akai n̄ka, emi akadade nnyịn hour usụkkiet. Nnyịn ima ikesịm ke eti ini ndidụk mbono mme asiakusụn̄, oro ekenen̄erede enem nnyịn, ọkọrọ ye ofụri ndutịm mbono oro.
“Ke ini ikọnyọn̄de idi, nnyịn ima ikụt ke ẹma ẹfọp ufọk nnyịn ẹnyụn̄ ẹyịp mme ufene nnyịn. N̄kukụre se ikosụhọde ekedi ekpri ekpat ọfọn̄. Nnyịn ima ifụhọ iban̄a se nnyịn ikatabade, edi nditọete ke Ocosingo ke mfọnido ẹma ẹda nnyịn ẹsịn ke ufọk. Mmọ ẹma ẹkpep nnyịn n̄ko ndinam mme utom oro akananam nnyịn nte mme ọtọin̄wan̄ mîkanamke. Eyenete kiet ama ekpep mi ndisio ndise, efen ama ekpep mi ndidiọn̄ ikpaukot. Oro edi nte ami ye n̄wan mi ikemede ndin̄wam idem tutu esịm emi, ye unana edikpọn̄ utom usiakusụn̄. Ke itiede ikere se iketịbede, nnyịn imekeme ndikụt nte ke adan̄aemi mîkedịghe mmemmem n̄kpọ inọ nnyịn ndiyọ, Jehovah ama ọsọn̄ọ nnyịn idem.”
Mbun̄wụm Utom Ukwọrọikọ
Mme Ntiense ke Chiapas Stet ikayakke nsọn̄ọn̄kpọ ye n̄kpọndịk oro ẹbiọn̄ọ mmọ ndibuana ke akpan utom edida eti mbụk nsọk mme owo ke n̄kann̄kụk oro. Ke uwụtn̄kpọ, ko ke edem ke April ye May 1995, mmọ ẹma ẹdiana ye mme ekemmọ Christian ke ofụri ererimbot ke ubịnikọt edisuan Mbụk Obio Ubọn̄ Nọ. 34, enyenede ibuotikọ oro ekenen̄erede odot, Ntak Emi Uwem Ọyọhọde Ntem ye Mme Mfịna?
Ke ini ubịnikọt oro—ke ebiet emi ẹkotde Pueblo Nuevo—Ciro emi edide asiakusụn̄ ofụri ini, ama osobo ubon kiet emi ẹkewụtde udọn̄. Ke afiakde aka usen ita ke ukperedem, enye ama ekeme nditọn̄ọ ukpepn̄kpọ Bible ye mmọ. Edi ke ini Ciro ye nsan̄a esie ẹkefiakde ẹka ndika iso ke ukpepn̄kpọ ye ubon oro, ete enyeneufọk ikodụhe. Utu ke oro, otu iren emi ẹfụhọde n̄kpọ ke iso ẹma ẹtie ẹbet enye man ẹnam enye ibak. Mmọ ẹma ẹbụp Ciro ye nsan̄a esie m̀mê nso ke mmọ ẹyom, ẹnyụn̄ ẹdịghe ndiwot mmọ. Ke ẹma ẹkebọn̄ akam ke ndopuyo ẹnọ Jehovah, Christian iba oro ẹma ẹtịn̄ uko uko ẹte ke mmimọ ikedi ndikpep ubon oro Bible. Ke ẹma ẹketịn̄ ntre, iren oro ẹkefụhọde n̄kpọ ke iso ẹma ẹyak mmọ ẹnyọn̄ọ. Ke ndusụk ntak, ete enyeneufọk oro ikọnyọn̄ke idi ufọk usen oro.
Usen kiet ke se ikperede ndisịm isua ita ke ukperedem, Ciro ama okop n̄kpaidem ndikụt eren oro ke enyịnusụn̄ esie. Ciro okokop inemesịt didie ntem ndifiọk nte ke ofụri ubon oro ẹma ẹna baptism ye nte ke mmọ idahaemi ẹkebuana ye esop kiet ke Guatemala! Kiet ke otu nditọ esie iban akakam anam utom nte asiakusụn̄ ofụri ini.
Ndiwụt Esịtekọm Mban̄a Udia eke Spirit
Kpa ye n̄kaiso nsọn̄ọn̄kpọ ke Chiapas, esenyịn district kiet ọtọt ete ke Mme Ntiense ke n̄kann̄kụk oro ẹnen̄ede ẹfiọk nte edisop idem ọtọkiet edide akpan n̄kpọ. (Mme Hebrew 10:24, 25) Enye obụk se iketịbede ke usen akpan mbono eke ndondo emi, oro ẹkediomide nditọn̄ọ ke tụhi-tụhi usenubọk man mme andidụk ẹkpekeme ndifiak nnyọn̄ọ ufọk ke uwemeyo emi ukeuke ifụre odude. Idem okposụkedi ata ediwak mmọ ẹkenyenede ndisan̄a ke se ibede hour ita ke akai man ẹdisịm itie mbono, kpukpru owo ẹma ẹdu ke itie mmọ ke n̄kanika itiaba usenubọk. Mbon EZLN itiokiet ẹma ẹdu ke otuowo, ẹnọde n̄kpan̄utọn̄ ẹnyụn̄ ẹkwakde ubọk, nte an̄wan̄ade ẹmade edinam oro. Mmọ n̄ko ẹkesan̄a hour ita man ẹdidụk mbono oro. Owo 20 ke otu mmọ ẹma ẹdụk Editi n̄kpa Christ n̄ko, emi ẹkenịmde ke Ufọkmbono Obio Ubọn̄ n̄kann̄kụk.
Ikpọ mbonutom akparawa efen oro edide owo n̄ka en̄wan ukpụhọ ukara ẹma ẹnọ enye utom ndisan̄a n̄kanade akai n̄kann̄kụk kiet. Ke esịmde obio oro, enye ama okụt nte ke kpukpru mme andidụn̄, emi n̄wakn̄kan ẹkedide Mme Ntiense Jehovah, ẹma ẹfen̄e. Ntre enye ama anam idụn̄ ke kiet ke otu mme ufọk oro ẹkewọn̄ọde ẹkpọn̄. Sia mîkenyeneke ekese n̄kpọ ndinam, enye ama atan̄ ndusụk n̄wed oro enye okokụtde nte ẹsuanade ẹyọhọ ufọk oro ọtọn̄ọ ndikot. Mmọ emi ẹkedi mme n̄wed Watch Tower oro Mme Ntiense ẹkefen̄ede ẹkpọn̄. Sia okodude ikpọn̄, akparawa oro ama enyene ifet nditie n̄kere se enye okokotde. Enye ama ebiere ete ke ana imọ ikpụhọde uwem imọ inyụn̄ iduọn̄ọ n̄kpọekọn̄ imọ. Ke ndondo oro enye ekekemede, enye ama oyom Mme Ntiense okụt onyụn̄ ọtọn̄ọ ukpepn̄kpọ Bible. Ke ufan̄ ọfiọn̄ itiokiet, enye ke ọkọkwọrọ eti mbụk ọnọ mbon efen. Idahaemi enye ye mbonubon esie ita en̄wen oro ẹkedide mme andinọ n̄ka en̄wan ukpụhọ ukara ibetedem ẹdi mme Christian oro ẹma ẹkena baptism.
Ndikụt N̄kan̄ Oro Ọfọnde
Idem okposụkedi akadade ekese nsọn̄ọn̄kpọ edi, en̄wan oro ke akpanikọ ama ofori edu oro mme owo ẹnyenede ẹban̄a utom ukwọrọikọ. Ebiowo kiet ke obio emi en̄wan oro akasiahade obụk ete: “N̄kpọ nte usen ition ke ẹn̄wan oro ama akasiaha, nnyịn ima idiomi utom ukwọrọikọ ke esịt ye ke ọwọrọde ọkpọn̄ obio. Mme owo ẹma ẹkpan̄ utọn̄ ẹnọ nnyịn ye ọkpọsọn̄ udọn̄. Nnyịn ima inịm ediwak n̄wed Bible inyụn̄ itọn̄ọ ediwak ukpepn̄kpọ Bible. Ke n̄kann̄kụk kiet, ediwak owo ẹma ẹsibiọn̄ọ akpanikọ, edi ke ntak en̄wan oro, mmọ idahaemi ẹsikpan̄ utọn̄, ẹkpep Bible, ẹsinyụn̄ ẹdụk mme mbono esop ye mme mbono.”
Nditọete ẹkop inemesịt nte ke mmimọ imekeme ndika iso ke mme edinam ukara Abasi kpa ye mme anana-iwụk idaha oro. Ye unyịme udịmekọn̄ ukara ye eke EZLN, mmọ ẹka iso ndinịm mme mbono mmọ, emi ẹsọn̄ọde mmọ idem ke n̄kan̄ eke spirit. Mme esenyịn oro ẹsan̄ade-san̄a ndika n̄kese esidi n̄ko okopodudu n̄kpọ nsịnudọn̄ ndika iso ke utom ukwọrọikọ. Nte enemde, mbon en̄wan oro ẹsikam ẹnọ nsịnudọn̄ n̄ko, emi ẹsiwakde ndidọhọ Mme Ntiense ẹte ẹka iso ke utom ukwọrọikọ mmọ.
Okposụkedi mme idomo ye nsọn̄ọn̄kpọ oro mme owo ke Chiapas ẹsobode ẹtekde ubọk esisịt nte ini ebede, mmọ ikụreke. Kpa ye oro, n̄kpọ kiet edi akpanikọ—Mme Ntiense Jehovah ẹbiere ndika iso ke ukeme oro mmọ ẹsịnde ndida gospel emem otode Ikọ Abasi, kpa Bible, nsọk mme owo ye unana edikpa mba. (Utom 10:34-36; Ephesus 6:15) Nte prọfet Jeremiah ọkọdọhọde, mmọ ẹfiọk ẹte ke “usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Obio Ubọn̄ Abasi kpọt ke ubọk Eyen esie, Jesus Christ, ekeme ndida utịt nsọk ukwan̄ikpe ye unana ke ererimbot.—Matthew 6:10.
[Ndise obio ke page 9]
(Ama oyom ndikụt nte enye enen̄erede etie, se n̄wed)
Itụn̄ Inyan̄ibom Mexico
CHIAPAS
GUATEMALA
Inyan̄ibom Pacific
[Ebiet Ẹdade N̄kpọ Ẹto]
Mountain High Maps® Copyright © 1997 Digital Wisdom, Inc.
[Ndise ke page 9]
Mme Ntiense ẹkade ukwọrọikọ ke mme obot Chiapas