Ntak Emi Afo Anamde N̄kpọ Abasi?
Edidem kiet oro akabakde Abasi ama ọnọ eyen esie item emi: “Fiọk Abasi usọ, nyụn̄ nam n̄kpọ esie ke ofụri esịt, ye ke ima ukpọn̄.” (1 Chronicles 28:9) Nte an̄wan̄ade, Jehovah oyom mme asan̄autom esie ẹnam n̄kpọ esie ke idatesịt ye esịtekọm.
NTE Mme Ntiense Jehovah, nnyịn imesisọp inyịme nte ke esịt nnyịn ama ọyọhọ ye esịtekọm ke ini ẹketatde mme un̄wọn̄ọ Bible ẹnọ nnyịn ke akpa ini. Kpukpru usen, nnyịn ke ikpep obufa n̄kpọ iban̄a mme un̄wọn̄ọ Abasi. Adan̄a nte ikpepde iban̄a Jehovah, ntre ke udọn̄ nnyịn ndinam n̄kpọ esie “ke ofụri esịt, ye ke ima ukpọn̄” edikop odudu ikan.
Ediwak mbon oro ẹkabarede ẹdi Mme Ntiense Jehovah ẹka iso ndinam n̄kpọ Jehovah ye akwa idatesịt ke ofụri eyouwem mmọ. Nte ededi, ndusụk Christian ẹsitọn̄ọ nte ọfọnde, edi nte ini akade, ẹfre enyịn ẹban̄a akpan ntak oro onụkde nnyịn ndinam n̄kpọ Abasi. Nte oro etịbe ọnọ fi? Edieke edide etịbe, kûduọk idotenyịn. Ẹkeme ndifiak nnyene idatesịt oro ẹketabade. Didie?
Bat Mme Edidiọn̄ Fo
Akpa, tie kere mme edidiọn̄ eke usen ke usen oro afo ọbọde oto Abasi. Kere ban̄a nti enọ Jehovah: uwak utom obot esie—oro ẹsịmde kpukpru owo inamke n̄kpọ m̀mê nso idaha ke ẹnyene ke n̄kaowo, m̀mê ke ndutịm uforo—mme oto-obot enọ esie ẹdide udia ye edin̄wọn̄ n̄kpọ, idaha nsọn̄idem oro afo enyenede, ifiọk akpanikọ Bible oro afo enyenede, akakan onyụn̄ edi enye ndinọ Eyen esie. N̄kpa esie eberede usụn̄ ọnọ fi ndinam n̄kpọ Abasi ye edisana ubieresịt. (John 3:16; James 1:17) Adan̄a nte afo etiede ekere mfọn Abasi, ntre ke esịtekọm oro afo enyenede ọnọ enye edikọri. Do, esịt oyonụk fi ndinam n̄kpọ esie ke ntak esịtekọm ke kpukpru se enye anamde. Eyịghe idụhe nte ke afo ọyọtọn̄ọ ndifiak n̄kere n̄kpọ nte andiwet psalm emi ekewetde ete: “Afo, O Jehovah Abasi mi, amanam utịbe ido fo, ye ekikere fo eke ekerede nnyịn, ẹwak: idịghe nte ẹtịn̄de mmọ ẹnọ fi: . . . edi mmọ ẹkan nte ẹbatde.”—Psalm 40:5.
David, kpa owo emi okosobode afanikọn̄ ekewet mme ikọ emi. Nte akparawa, David akabiat n̄wakn̄kan ini esie ke itọk sia idiọk Edidem Saul ye mbon ukpeme esie ẹkeyomde ndiwot enye. (1 Samuel 23:7, 8, 19-23) David ama enyene mme ọkpọkpọ mmeme n̄ko ndikan. Enye ama ewet emi ke ọyọhọ Psalm 40 ete: “Koro mme idiọkn̄kpọ eke mînyeneke ibat ẹkande mi ẹkụk: mme idiọk ido mi ẹmesịm mi, ndien n̄kemeke ndikụt n̄kpọ; mmọ ẹwak ẹkan idet ibuot mi.” (Psalm 40:12) Ih, David ama enyene mme mfịna, edi enye ikayakke mmọ ẹmen enye ẹmen. Kpa ye mme mfịna esie, enye okowụk ekikere ke mme usụn̄ oro Jehovah ọkọdiọn̄de enye, ndien enye ama okụt ete ke mme edidiọn̄ emi ẹma ẹwak ẹkan mme nnama esie.
Ke ini etiede nte ke mfịna idemfo m̀mê ekikere unana edidot emen fi emen, ọfọn afo atuak ada abat mme edidiọn̄ fo, nte David akabatde. Nte eyịghe mîdụhe, esịtekọm oro afo enyenede ọnọ mme utọ edidiọn̄ oro okonụk fi ndiyak idemfo nnọ Jehovah; utọ ekikere oro ekeme n̄ko ndin̄wam fi ndifiak nnyene idatesịt oro ọkọduọkde onyụn̄ an̄wam fi ndinam n̄kpọ Abasi ye esịtekọm.
Mme Mbono Esop Ẹkeme Ndin̄wam
Ke adianade ye ọkpọkpọ editie n̄kere mban̄a nti ido Jehovah, oyom nnyịn isisop idem ye mme ekemmọ Christian. Edi n̄kpọ nsịnudọn̄ ndisobo kpukpru ini ye iren, iban, ye n̄kparawa owo oro ẹmade Abasi ẹnyụn̄ ẹbierede ndinam n̄kpọ esie. Uwụtn̄kpọ mmọ ekeme ndidemede nnyịn ndinam utom Jehovah ke ofụri ukpọn̄. Nnyịn ndidu ke Ufọkmbono Obio Ubọn̄ ekeme ndidi n̄kpọ nsịnudọn̄ nnọ mmọ n̄ko.
Nte ẹnyịmede, ke ini inyọn̄de ọkpọsọn̄ utom eke usen idi m̀mê ke ini idem ememde nnyịn ke ntak ndusụk mfịna m̀mê mmeme, ekeme ndidi ididịghe mmemmem ndikere mban̄a edidụk mbono esop ke Ufọkmbono Obio Ubọn̄. Ke utọ mme idaha oro, nnyịn imekeme ndisọn̄ esịt ye idem nnyịn, ‘itọn̄ọde idem nnyịn ita’ yak idọhọ ntre, man otodo inam ewụhọ edisop idem ọtọkiet ye mme ekemmọ Christian.—1 Corinth 9:26, 27; Mme Hebrew 10:23-25.
Edieke oro edide se ẹyomde, nte nnyịn ikpenyene ndibiere nte ke nnyịn inen̄ekede ima Jehovah? N̄wan̄ansa-o. Mme Christian eset oro ẹkekọride ẹsịm ọyọhọ idaha emi owo mîkekemeke ndiyịk ima emi mmọ ẹkenyenede ẹnọ Abasi ẹkenyene ndisịn ọkpọsọn̄ ukeme ndinam uduak Abasi. (Luke 13:24) Apostle Paul ekedi utọ Christian oro. Ntem ke enye eketịn̄ in̄wan̄ in̄wan̄ nte eketiede enye ke idem: “Mmọfiọk nte baba eti n̄kpọ kiet idụn̄ke mi ke idem, oro edi, ke obụkidem mi: koro ndinyịme ndinam eti n̄kpọ odu ye ami, edi ndinanam idụhe. Koro nnamke eti n̄kpọ eke ọdọn̄de mi ndinam, edi idiọk-n̄kpọ eke mîdọn̄ke mi ndinam, oro ke nnanam.” (Rome 7:18, 19) Ndien enye ama ọdọhọ mbon Corinth ete: “Koro edieke n̄kwọrọde gospel, nnyeneke ntak mbụre; utom oro obiomo mi ke idem nte n̄kpọ eke nnyenede ndinam. . . . Koro edieke nnamde utom emi ke edinyịme esịt mi, mmenyene utịp; edi edieke mmenamke ke edinyịme esịt, ntie nte akama-ukpọhọde emi ẹyakde utom ẹsịn enye ke ubọk, ẹte anam.”—1 Corinth 9:16, 17.
Paul ama enyene mme ntụhọ idiọkn̄kpọ oro ẹkebiọn̄ọde udọn̄ esie ndinam se inende, ukem nte nnyịn. Nte ededi, enye ama an̄wana ọbiọn̄ọ mme ntụhọ oro, ndien ke ata ediwak ini, enye ama esikụt unen. Edi akpanikọ, Paul ikanamke emi ke odudu idemesie. Enye ekewet ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Jehovah, kpa enye oro ọkọsọn̄ọde Paul idem, ọyọsọn̄ọ fi idem nde ndinam se inende edieke eben̄ede enye un̄wam. (Philippi 4:6, 7) Ke ntre ‘sọn̄ọ n̄wana kaban̄a ikọ mbuọtidem,’ ndien Jehovah ọyọdiọn̄ fi.—Jude 3.
Afo unyeneke ndin̄wana en̄wan emi ikpọn̄. Ke esop Mme Ntiense Jehovah, mbiowo Christian oro ẹkọride ẹsịm ọyọhọ idaha, emi ẹsịnde ifịk ke ‘en̄wan kaban̄a ikọ mbuọtidem’ ẹdu ke mben̄eidem ndin̄wam fi. Edieke asan̄ade ekpere ebiowo, enye oyodomo ‘ndisọn̄ọ’ fi idem. (1 Thessalonica 5:14) Utịtmbuba esie edidi nditie nte “ọtọ udịbe ofụm, ye etehe ubọhọ edịm.”—Isaiah 32:2.
“Abasi edi ima” ndien enye oyom mme asan̄autom esie ẹnam n̄kpọ ẹnọ enye ke ima. (1 John 4:8) Edieke oyomde afo afiak edemede ima emi afo enyenede ọnọ Abasi, nam nnennen usio-ukot ndinam ntre, nte ẹwụtde ke enyọn̄ emi. Afo oyokop inemesịt ke ndikanam oro.