Nte Afo ke Esịn Ifịk Oyom Jehovah?
EREN Christian kiet ama enen̄ede enyene udọn̄ ndibuana eti mbụk Bible ye mbon oro enye ẹsisan̄ade ke tren aka utom. (Mark 13:10) Edi ndịk ama anam enye. Ndi enye ama etre ndibuana? Baba, enye ama ọbọn̄ akam ke ofụri esịt onyụn̄ ekpep nte ọkpọtọn̄ọde nneme. Jehovah Abasi ama ọbọrọ akam esie onyụn̄ ọnọ enye ukeme ndinọ ikọ ntiense.
Utọ ifịk oro edi akpan n̄kpọ ke ini iyomde Jehovah ye edidiọn̄ esie. Apostle Paul ọkọdọhọ ete: “Owo eke asan̄ade ekpere Abasi enyene ndinịm ete Enye ododu, onyụn̄ edi andinọ mmọ eke ẹsịnde ifịk ẹyom enye utịp.” (Mme Hebrew 11:6, NW) Ikpîkpu ediyom Jehovah ikemke. Ikọedinam Greek oro ẹkabarede “ẹsịnde ifịk ẹyom,” abuana edisịn odudu ye ọkpọsọn̄ ukeme. Emi abuana ofụri esịt, ekikere, ukpọn̄, ye odudu owo. Edieke nnyịn isịnde ifịk iyom Jehovah, nnyịn idinamke n̄kpọ ye unana udọn̄, itrede ndisịn̄ede idem nnyịn m̀mê itiede ifu. Utu ke oro, nnyịn iwụt ata ifịk ke ndiyom enye.—Utom 15:17.
Mbon Oro Ẹkesịnde Ifịk Ẹyom Jehovah
Uwụtn̄kpọ mbon oro ẹkesịnde ọkpọsọn̄ ukeme ẹyom Jehovah ẹyọyọhọ N̄wed Abasi. Kiet ke otu mmọ ekedi Jacob, emi ọkọsọn̄ọde an̄wana ye angel Abasi tutu eyo esiere. Nte utịp, ẹma ẹnọ Jacob enyịn̄ oro Israel (Andin̄wana ye Abasi) koro enye ‘akan̄wanade,’ m̀mê ọkọsọn̄ọde eyịre, ekesịn̄erede idem, okonyụn̄ esịnde ifịk oyom Abasi. Angel oro ama ọdiọn̄ enye ke ntak ọkpọsọn̄ ukeme oro enye ekesịnde.—Genesis 32:24-30.
Ndien ama odu n̄wan Galilee kiet oro owo mîsiakke enyịn̄ emi ọkọdọn̄ọde ediwọrọ iyịp ke isua 12, okonyụn̄ okụtde “ediwak ndutụhọ.” Ke utọ idaha emi, enye ikenyeneke nditụk mbon efen. Edi, enye ama enyene uko ndiwọrọ n̄kosobo ye Jesus. Enye ama aka iso ọdọhọ ete: “Mma n̄kam ntụk ekpedi ọfọn̄idem Esie, nyokop nsọn̄idem.” Kere nte enye akan̄wanade ndifaha mbe ‘ediwak owo oro ẹketienede Jesus ẹnyụn̄ ẹberede enye.’ Ke ndondo oro enye otụkde ọfọn̄idem Jesus, enye okụt ete ke ‘ediwọrọ iyịp etre imọ’—ẹma ẹkọk uyịre uyịre udọn̄ọ esie! Enye ama okop ndịk ke ini Jesus okobụpde ete: “Anie owo okotụk ọfọn̄idem mi?” Edi Jesus ama ọdọhọ enye ufan ufan ete: “Eyen-an̄wan, mbuọtidem fo akanam fi okop nsọn̄idem. Nyọn̄ ke odụk ke emem, nyụn̄ bọhọ idiọk udọn̄ọ fo.” Enye ama ọbọ utịp ukeme oro enye ekesịnde.—Mark 5:24-34; Leviticus 15:25-27.
Ke idaha efen, n̄wan Canaan kiet ama enen̄ede ekpe Jesus ubọk ete anam udọn̄ọ okụre eyen imọ an̄wan. Jesus ama ọbọrọ ete ke ifọnke ndimen udia nditọ nduọk nnọ ebua. Ikọ esie ọkọwọrọ ete ke imọ ikemeke ndise mban̄a mbon oro mîdịghe nditọ Israel ye unana edise mban̄a mme Jew oro ẹdotde. Nte ededi, ke ọfiọkde se n̄ke esie ọwọrọde, n̄wan oro ama ekpe ubọk ete: “[Emekeme], Ọbọn̄; koro mme ebua ẹnyụn̄ ẹdiade n̄ken̄e udia eke ẹtode ke okpokoro mme andinyene mmọ ẹduọn̄ọ.” Ọkpọsọn̄ mbuọtidem ye esịt akpanikọ esie ama onụk Jesus ndidọhọ ete: “O n̄wan, mbuọtidem fo omokpon, yak ọwọrọ ọnọ fi nte oyomde.”—Matthew 15:22-28.
Nso ikpeketịbe inọ mme owo emi edieke mmọ mîkpọkọsọn̄ọke iyịre ke mme ukeme mmọ? Nte mmọ ẹkpekebọ mme edidiọn̄ oro edieke mmọ ẹkpekekpade mba ke ini ẹkesobode akpa ubiọn̄ọ m̀mê ke ini ẹkefụmide mmọ? Baba! Mme uwụtn̄kpọ emi ẹnen̄ede ẹwụt akpan n̄kpọ oro Jesus ekekpepde, oro edi nte ke ‘edisọn̄ọ nyịre’ enen, idem edide akpan n̄kpọ ke ndiyom Jehovah.—Luke 11:5-13.
Nte Ekemde ye Uduak Esie
Ke mme mbụk oro ẹkebemde iso ẹtịn̄ ke enyọn̄ emi ẹban̄a mbon oro ẹkenamde udọn̄ọ okụre mmọ ke utịbe utịbe usụn̄, ndi ifịk ekedi n̄kukụre n̄kpọ oro ẹkeyomde man ẹnam udọn̄ọ okụre mmọ? Baba, mme eben̄e mmọ ẹkenyene ndidu ke n̄kemuyo ye uduak Abasi. Ẹma ẹnọ Jesus utịbe utịbe odudu ndiwụt ke n̄wọrọnda usụn̄ nte ke imọ idi Eyen Abasi, kpa Messiah oro ẹken̄wọn̄ọde. (John 6:14; 9:33; Utom 2:22) Ke adianade do, mme utịben̄kpọ oro Jesus akanamde ẹkedi ntabinse ikpọ edidiọn̄ eke isọn̄ oro Jehovah edinọde ubonowo ke Ukara Tọsịn Isua Christ.—Ediyarade 21:4; 22:2.
Idịghe aba uduak Abasi mbon oro ẹnamde ido ukpono akpanikọ ndinyene mme utịbe utịbe odudu, utọ nte ukeme ndikọk udọn̄ọ ye ndisem mme usem. (1 Corinth 13:8, 13) Uduak esie mfịn abuana ndinam ẹtan̄a eti mbụk Obio Ubọn̄ ke ofụri isọn̄ man ‘kpukpru owo ẹsịm ifiọk akpanikọ.’ (1 Timothy 2:4; Matthew 24:14; 28:19, 20) Mme asan̄autom Abasi ẹkeme ndinen̄ede ndori enyịn Abasi ndibọrọ akam ofụri esịt mmọ edieke mmọ ẹsịnde ukeme ofụri esịt nte ekemde ye uduak esie.
Ndusụk owo ẹkeme ndikere, ‘Ntak isịn̄erede idem nnyịn ke ini edide uduak Abasi oyosu ke akpatre? Okposụkedi Jehovah edisude uduak esie inamke n̄kpọ m̀mê nso ukeme ke mme owo ẹsịn, enye esikop inemesịt ndinam mme owo ẹbuana ke ndinam uduak esie. Ẹkeme ndimen Jehovah ndomo ye owo oro ọbọpde ufọk. Andibọp ọfiọk nte ufọk oro editiede, edi enye emek mme n̄kpọ ubọpufọk oro ẹdude ke n̄kann̄kụk oro. Ukem ntre, Jehovah enyene utom ndinam mfịn onyụn̄ okop inemesịt ndida mme asan̄autom esie oro ẹnọde idem mmọ unyịme unyịme nnam n̄kpọ.—Psalm 110:3; 1 Corinth 9:16, 17.
Kere ban̄a se iketịbede inọ ekpri Toshio. Ke ama okodụk akamba ufọkn̄wed, enye okoyom ndinen̄ede nnọ ikọ ntiense adan̄a nte ekekeme ke ufọkn̄wed. Enye ama esikama Bible kpukpru ini onyụn̄ esịn ukeme ofụri esịt ndidi Christian oro enịmde eti uwụtn̄kpọ. Ke ekperede utịt akpa isua ufọkn̄wed esie, ifet nditịn̄ ikọ nnọ otu nditọ ukpepn̄kpọ ama eberede. Toshio ama ọbọn̄ akam ọnọ Jehovah oyom un̄wam onyụn̄ okop inemesịt ndikụt nte kpukpru owo ke ubet ukpepn̄kpọ oro ẹkenen̄erede ẹkpan̄ utọn̄ ẹnọ utịn̄ikọ esie, oro ibuotikọ ekedide “Uduak Mi Ndinam Usiakusụn̄ Edi Ubọkọkọ.” Enye ama anam an̄wan̄a nte ke imọ iyom ndidi asan̄autom uyọhọ ini eke Mme Ntiense Jehovah. Kiet ke otu nditọ ukpepn̄kpọ oro ama enyịme ndikpep Bible ye enye onyụn̄ anam n̄kọri tutu ana baptism. Ẹma ẹnen̄ede ẹnọ Toshio utịp ke ntak ukeme ofụri esịt oro enye ekesịnde ndinam n̄kpọ ekekem ye akam esie.
Afo Esịn Ifịk Adan̄a Didie?
Afo emekeme ndiwụt ke nsio nsio usụn̄ nte ke imọ imesịn ifịk iyom Jehovah ye mme edidiọn̄ esie. Akpa, mme akpan n̄kpọ ẹdu oro afo ekemede ndinam, utọ nte edinen̄ede ntịm idem nnọ mme mbono esop Christian. Ebe ke mme ibọrọ oro ẹtịmde ẹkere, mme utịn̄ikọ oro ẹduaide owo idem, ye mme nnamn̄wụt oro ẹnyenede ufọn, afo owụt ifịk oro afo adade oyom Jehovah. Afo n̄ko emekeme ndiwụt ifịk oro afo enyenede ebe ke ndifori uduot utom ukwọrọikọ fo. Nso kaban̄a edinen̄ede ntie ufan ufan ke ini enemede nneme ye enyeneufọk ye edida mme ntọn̄ọikọ oro ẹnyenede uforo emi ẹdotde ye efakutom fo? (Colossae 3:23) Ebede ke ndisịn idem nnam utom, eren Christian ekeme ndinyịme mme ifetutom ke esop, utọ nte edidi asan̄autom unamutom m̀mê ebiowo. (1 Timothy 3:1, 2, 12, 13) Ebede ke ndinọ idemfo unyịme unyịme, afo emekeme ndinyene idatesịt oro odude ke edinọnọ. Afo emekeme ndisịn eben̄e ndinam utom edibọp n̄kọk itieutom m̀mê ndinam utom ke ọfis n̄kọk itieutom eke Mme Ntiense Jehovah. Edieke afo edide eren emi odotde oro mûdọhọ ndọ, ekeme ndidọn̄ fi ndidụk Ufọkn̄wed Unọ Mme Asan̄autom Ukpep, emi etịmde irenowo oro ẹmade n̄kpọ eke spirit idem ndidi nti ekpemerọn̄. Edieke edide ọmọdọ ndọ, utom isụn̄utom ekeme ndidi usụn̄ efen efen ndiwụt ọkpọsọn̄ udọn̄ fo ndinam n̄kpọ Jehovah. Afo emekeme ndiwọrọ n̄ka ebiet oro ẹnen̄erede ẹyom mme ọkwọrọ Obio Ubọn̄.—1 Corinth 16:9.
Se inen̄erede idi akpan n̄kpọ edi edu oro afo adade anam utom. Ifetutom ekededi oro ẹnọde fi, nam enye ifịk ifịk ye “esịt kiet.” (Utom 2:46; Rome 12:8) Afo ekpenyene ndise utom kiet kiet nte ifet ndiwụt ọkpọsọn̄ udọn̄ fo ndida itoro nsọk Jehovah. Bọn̄ akam kpukpru ini nọ Jehovah, nyụn̄ nam ofụri ukeme fo. Do afo ọyọbọ eti utịp.
Mme Utịp Ẹtode Ukeme Ofụri Esịt
Nte afo emeti eren Christian oro ọkọbọn̄de akam ndikan mme ndịk esie man enye ekeme ndikwọrọ ikọ nnọ mme akaisan̄ eken? Jehovah ama ọdiọn̄ udọn̄ ofụri esịt esie. Eyenete oro ama odomo ndida eti usụn̄ ntọn̄ọ nneme onyụn̄ emek mme ibuotikọ ndida ntọn̄ọ nneme. Enye ama ekeme ndida Bible nnam n̄kpọ uforo uforo ke nditịn̄ ikọ ntiense nnọ eren kiet oro eketịmede esịt aban̄a idiọk itie ebuana ubonowo. Ndinam ediwak mfiakn̄ka ke tren oro ama ada ekesịm ukpepn̄kpọ Bible. Jehovah ama enen̄ede ọdiọn̄ enye kaban̄a mme ukeme ofụri esịt esie!
Afo emekeme ndinyene mme ukem utịp oro edieke afo akade iso esịn ifịk oyom Jehovah. Edieke afo osụhọrede idem esịn ifịk onyụn̄ esịn ofụri esịt ke edinam ukara Abasi ekededi oro afo abuanade, Jehovah ayada fi anam n̄kpọ nte ekemde ye mme uduak esie oyonyụn̄ enen̄ede ọdiọn̄ fi.
[Ndise ke page 26]
Nso ikpeketịbe inọ n̄wan emi edieke enye mîkpọkọsọn̄ọke iyịre?
[Ndise ke page 27]
Nte afo emesisọn̄ọ eyịre ke ndiben̄e edidiọn̄ Jehovah?
[Mme ndise ke page 28]
Didie ke afo ekeme ndiwụt nte ke imọ ke isịn ifịk iyom Jehovah?