Nso Inam Ediwak Owo Ẹkop Ndịk?
“Idịghe owo ededi owo ido ukpono mbemiso enye ọfiọk ke ini iso ubonowo edidi afanikọn̄.”—STEPHEN O’LEARY, UDIANA PRỌFESỌ, UFỌKN̄WED NTAIFIỌK EDEM USỤK CALIFORNIA.a
NDI afo emenyịme ye se ẹtịn̄de oro? Ibuotikọ emi ye iba oro ẹtienede ẹyeneme ntak emi ndusụk owo ẹkopde ndịk ẹban̄a ini iso. Edi mmọ ẹyeneme n̄ko ntak emi afo ekemede nditịm nnịm ke mme owo ẹyeka iso ẹdu uwem ke isọn̄. Odu akpan ntak emi akpanamde fi enyene idotenyịn, kpa ye mme n̄kpọ oro ẹnamde esịt ẹtịmerede owo, emi afo edikotde iban̄a.
Enen̄ede etie nte ekọn̄ nuclear ekeme ndin̄wana. Ke 2007, Bulletin of the Atomic Scientists ama odụri mme owo utọn̄ ete: “Akanam ererimbot ikopke orụk ndịk oro ẹkopde tọn̄ọ ẹkeduọk bọmb atọm ke Hiroshima ye Nagasaki.” Ntak emi ẹkopde ndịk ntre? N̄wed oro ama ọtọt ete ke 2007, ke n̄kpọ nte n̄kpọekọn̄ nuclear 27,000 ẹkesụk ẹsosụhọ, ndien ke “ẹma ẹben̄e [2,000] ke otu oro ẹbon nditop ini ekededi.” Idem ọkpọkọm ata ekpri ke otu n̄kpọekọn̄ oro ke ẹtop, oro akpabiat n̄kpọ aka anyan!
Tọn̄ọ ke 2007, ndi owo ikopke aba ndịk ke ekọn̄ nuclear ekpere ndin̄wana nte ẹkekopde? SIPRI Yearbook 2009bc ọdọhọ ke idụt ition oro ẹnyenede n̄kpọekọn̄ nuclear ẹkan—China, France, Russia, United Kingdom, ye United States—ke “ẹtịm mbufa n̄kpọekọn̄ nuclear mîdịghe ẹtọt ke mmimọ imọn̄ itịm.” Edi n̄wed oro ọdọhọ ke idịghe mme idụt oro kpọt ẹnyene mme n̄kpọekọn̄ nuclear. Mme anam-ndụn̄ọde ẹdọhọ ke India, Pakistan, ye Israel ẹnyene n̄kpọ nte bọmb nuclear 60 esịm 80 ke idụt mmọ kiet kiet. Mmọ ẹdọhọ n̄ko ke n̄kpọekọn̄ nuclear 8,392 ẹdu idahaemi ke ofụri ererimbot, emi ẹnamde ẹma ẹben̄e nditop!
Idaha eyo ndikpụhọde ekeme ndida afanikọn̄ ndi. Bulletin of the Atomic Scientists ọdọhọ ete: “Afanikọn̄ emi asan̄ade ye idaha eyo ndikpụhọde ekpere ndidiọk nte eke n̄kpọekọn̄ nuclear.” Mme utọ ntaifiọk oro ẹkponode, nte Stephen Hawking, akani prọfesọ ke Ufọkn̄wed Ntaifiọk Cambridge, ye Sir Martin Rees, Etubom Trinity College ke Ufọkn̄wed Ntaifiọk Cambridge, ẹtiene ẹnọ enyene-ndịk ntọt emi. Mmọ ẹdọhọ ke edida ifiọk ubotn̄kpọ nnam n̄kpọ nte ẹmama ye nte mme owo ẹkamade isọn̄ ẹkeme ndikpụhọde ofụri ofụri nte uwem etiede ke isọn̄ emi, mîdịghe etre ntatenyịn.
Edidọhọ ke afanikọn̄ ke edi anam esịt etịmede ata ediwak owo. Ama ataip ikọ oro “utịt ererimbot” ye isua emi “2012” ke ikpehe unam ndụn̄ọde ke Intanet, oyokụt ata ediwak n̄kpọ emi ẹtịn̄de ẹban̄a ke utịt edidi ke isua oro. Ntak-a? N̄wed usenọfiọn̄ mbon Maya eset, emi ẹdiọn̄ọde nte “Anyan Ubatini,” edikụre ke isua 2012. Ediwak owo ẹkop ndịk ke emi edidi utịt se nnyịn idade nte ntatenyịn.
Ediwak mbon ido ukpono ẹnịm ke Bible ekpep ke ẹdisobo ata isọn̄. Mmọ ẹnịm ke ẹyetan̄ kpukpru mme andinịm ke akpanikọ oro ẹnamde akpanikọ ẹka heaven, ke adan̄aemi mbon eken ẹdisụhọde ke isọn̄ emi ndutịme odude mîdịghe ke ẹyetomo mmọ ẹdọn̄ ke hell.
Ndi Bible enen̄ede ọdọhọ ke ẹyebiat m̀mê ẹsobo isọn̄ ofụri ofụri? Apostle John okodụri mme Christian utọn̄ ete: “Ẹkûnịm kpukpru ikọ odudu spirit ke akpanikọ, edi ẹdomo mme ikọ odudu spirit ẹse man ẹkụt m̀mê mmọ ẹtọn̄ọ ẹto Abasi.” (1 John 4:1) Utu ke ikpîkpu edinyịme se mbon en̄wen ẹtịn̄de, ntak mûkụbọkede Bible fo use ke idemfo se enye etịn̄de aban̄a utịt ererimbot? Se Bible ekpepde aban̄a utịt ererimbot ekeme ndikpa fi idem.
[Mme Ikọ Idakisọn̄]
a Ẹda ẹto ibuotikọ oro “Mme Afanikọn̄ Ẹnam Mme Owo Ẹdọhọ ke Ubonowo Eyebe Efep,’ ke ikpehe Intanet MSNBC, October 19, 2005.
b SIPRI ada ọnọ Stockholm International Peace Research Institute (Itie Unam Ndụn̄ọde Mban̄a Emem Ofụri Ererimbot ke Stockholm).
c Shannon N. Kile, akwa anam-ndụn̄ọde emi onyụn̄ edide ibuot ke se iban̄ade n̄kpọekọn̄ nuclear ke Ndutịm SIPRI Kaban̄a Edikpeme ye Edikpan Ndibot Mbufa N̄kpọekọn̄; Vitaly Fedchenko, anam-ndụn̄ọde Ndutịm SIPRI Kaban̄a Edikpeme ye Edikpan Ndibot Mbufa N̄kpọekọn̄; ye Hans M. Kristensen, adausụn̄ unọ ntọt mban̄a ndutịm nuclear ke N̄ka Ntaifiọk America ẹkewet n̄kpọ oro ke SIPRI Yearbook 2009.
[Mme Ebiet Ẹdade Ndise Ẹto ke page 4]
Ntọn̄enyọn̄ emi etiede nte udịp: U.S. National Archives photo; foto oyobio: WHO/League of Red Cross and U.S. National Archives photo