Ndịk Nuclear Ẹsio Ẹfep Taktak!
NDIDU uwem ye idiọk ndịk idịghe se Abasi aduakde ọnọ ubonowo. Nte “Abasi inemesịt,” enye oyom mmọ ẹnyene emem ẹnyụn̄ ẹdụn̄ ke ifụre—ke ibio ibio, ẹkop inemesịt. (1 Timothy 1:11, NW) Ke ererimbot oro ọyọhọde ye ndịk nuclear, emi nte an̄wan̄ade ikemeke nditịbe.
“Emem ye Ifụre”—N̄kpọ Abian̄a
Ekpenyene ndina in̄wan̄în̄wan̄ nte ke owo isioho ndịk nuclear ifep. Edi, kpa ye ndutịme ke ukaraidem, ndutịm uforo, ye n̄kaowo, etie nte mme idụt ke ofụri ofụri ẹnyene idotenyịn. Ukeme oro enyenede iwụk emi ẹsịnde ke ndinam n̄kpọndịk emi osụhọde ubọk toto ke Isua Emem Ofụri Ererimbot EM ke 1986 ana in̄wan̄în̄wan̄.
The Bulletin of the Atomic Scientists ke isua duop ẹmi ẹkebede ama ọwọn̄ọde ubọk n̄kanika usen nsobo esie—kpa usụn̄ oro enye adade ndiwụt m̀mê ekọn̄ nuclear eyesiaha—ọkpọn̄ minit 3 mbemiso usen nsobo okonịm ke minit 17 mbemiso usen nsobo. Ke 1989 Stockholm International Peace Research Institute ọkọdọhọ ete ke “idotenyịn odude ndibiere en̄wan ke emem emem usụn̄ otịm okpon akan nte ekedide ke isua efen ekededi toto nte Ekọn̄ Ererimbot II okokụre.”
Ke mme isua ndondo emi ẹmesọn̄ọ Edidiana M’Idụt idem ndinam n̄kpọ mban̄a mme idụt oro en̄wan osụk akade iso. Unen oro enye okụtde, ke adan̄aemi mîdịghe ọyọhọ ọyọhọ, omotịp n̄kpọ esịn ke idotenyịn oro ẹnyenede ke ofụri ofụri. Etie nte ini iso eyeda mbufa n̄kọri efen efen edi. Iso-ọfọn mme mfiori “emem ye ifụre” ẹyekabade ẹsọn̄ uyo ẹnyụn̄ ẹsọn̄ ubọk ẹkan. Mmọ ẹkam ẹkeme ndidi se ẹnịmde ke akpanikọ.
Edi kpeme idem! “Ini mme owo ẹdọhọde ẹte, idu ke emem ye ifụre,” Bible odụri owo utọn̄, “kpa adan̄aoro ke nsobo abuat mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” Ntem, mfiori “emem ye ifụre” edidi idiọn̄ọ ini Abasi “[ndisobo] mmọemi [ebede ke usabaden̄kpọ, nuclear ye usụn̄ efen] ẹsobode isọn̄.”—1 Thessalonica 5:3, 4; Ediyarade 11:18.
Tịmfiọk ete ke Bible idọhọke ite ke mme idụt ẹyenyene “emem ye ifụre.” Mmọ nte an̄wan̄ade ẹditetịn̄ ẹban̄a oro ke n̄wọrọnda usụn̄, ẹwụtde idotenyịn ye edinịm ke akpanikọ oro mîkodụhe ke mbemiso. Mme idaha ndinyene emem ye ifụre ẹyetie nte ẹtotịm ẹkpere ẹkan nte akanam edide. Kpa ye n̄kaiso ndịk nuclear, ẹyebian̄a mme idụt ndinyene abian̄a abian̄a ekikere ifụre.
Nte ededi, owo idibian̄ake mme ata Christian. Ye ọkpọsọn̄ udọn̄ mmọ ẹyese n̄kpọ ẹbe emem ye ifụre ubọk owo ẹsịm n̄kpọ oro ọfọnde akan!
Emem ye Ifụre—Ata Idem N̄kpọ
Nte ekemde ye Psalm 4:8, ẹkeme ndikụt ata emem ye ifụre n̄kukụre ke ndutịm oro Jehovah Abasi anamde: “Nyesụhọde nna ke isọn̄, nnyụn̄ nde idap sụn̄-n̄; koro edi afo, Jehovah, ikpọn̄îkpọn̄ anam mi ntie ke ifụre.” Mfiori “emem ye ifụre” ekededi oro ẹfioride ọwọrọ ọkpọn̄ usụn̄ ndutịm Obio Ubọn̄ Jehovah ekeme n̄kukụre ndidi abian̄a abian̄a. Enye ikemeke ndida eti n̄kpọ ndomokiet oro ebịghide ndi.
Obio Ubọn̄ Abasi ke ubọk Christ idinọhọ ubak ubak usọbọ. Ukara Abasi eyenam se ikande edisụhọde ibat n̄kpọekọn̄ nuclear; enye eyesio mmọ ye mme n̄kpọekọn̄ eken efep ofụri ofụri. Psalm 46:9 ọn̄wọn̄ọ ete: “Enye anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot ke ikan̄.”
Kpasụk ntre, mme ndịk nuclear emi mfịna ke mme ukwakutom usion̄o odudu nuclear adade edi m̀mê eke ndek otode idiọk ibọkn̄kpa edidi n̄kpọ eset. Mîdịghe ntre mme ikọ ẹmi ẹkpedi nsu: “Mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe: koro edi inua Jehovah mme udịm ọdọhọ.” Abasi ikemeke ndisu nsu. Nnyịn inyeneke ntak ndomokiet ndiyịk mme ikọ esie.—Micah 4:4; Titus 1:2.
Nte afo eyedara ndinyene idotenyịn edidu uwem ke ererimbot emi ẹma ẹkesio ndịk nuclear ẹfep taktak? Afo emekeme, koro Ikọ Abasi owụt mme in̄wan̄în̄wan̄ n̄kpọ oro ẹyomde. Ebede ke ndikpep mban̄a mmọ nnyụn̄ ndu uwem nte ekemde, afo emekeme ndikop idatesịt ndikot ibifịk ubọhọ nduọk usen kiet ndọhọ: “Ndịk nuclear—okụre ke akpatre!”
[Ndise ke page 7]
Emem eyedu ke obufa ererimbot Abasi ye unana ndịk nuclear
[Ebiet Ẹdade N̄kpọ Ẹto]
M. Thonig/H. Armstrong Roberts
[Ebiet Ẹdade Ndise Ẹto ke page 6]
Foto U.S. National Archives